சுமார் நூறு வருடங்களாக சிலாபம் – அம்பகந்தவில பகுதியில் அடக்கஸ்தலம் ஒன்றினை மையப்படுத்தி முஸ்லிம்கள் வருடாந்தம் நடத்திவரும் கந்தூரி வைபவத்திற்கு சிலாபம் நீதிவான் நீதிமன்ற நீதிவான் தடையுத்தரவொன்றினைப் பிறப்பித்திருந்தார். இதனையடுத்து கடந்த ஞாயிற்றுக்கிழமை நடைபெறவிருந்த கந்தூரி வைபவத்துக்கு நீதிமன்றம் தடை விதித்திருந்தது.
சிலாபம் அம்பகந்தவில பகுதியைச் சேர்ந்த கத்தோலிக்க மக்களும், கத்தோலிக்க தேவாலய அருட் தந்தையும் தெரிவித்த எதிர்ப்பினையடுத்தே இக்கந்தூரி வைபவம் தடைசெய்யப்பட்டதாக சிலாபம் நீதிவான் நீதிமன்ற நீதிவான் ‘இந்திய முஸ்லிம் ஹனபி பள்ளிவாசல்‘ என்றழைக்கப்படும் சிலாபம் பஸார் பள்ளிவாசல் தலைவர் எஸ்.எம்.ஜே.பைஸ்தீனுக்கு கடிதம் மூலம் அறிவித்திருந்தார்.
அம்பகந்தவில பகுதியில் அமைந்துள்ள அடக்கஸ்தலம் சுமார் 60 அடி நீளம் 5 அடி அகலத்தினைக் கொண்டதாகும். சுமார் ஒரு ஏக்கர் நிலப்பரப்பினைக் கொண்டுள்ள காணியில் அமைந்துள்ள அடக்கஸ்தலத்துக்கும், காணிக்கும் வேலி அமைக்கப்பட்டிருக்கவில்லை. கடந்த நூறு வருடங்களாக இங்கே கந்தூரி வைபவம் இடம்பெற்று வந்துள்ளது. கந்தூரி வைபவத்தில் வருடாந்தம் ஆயிரக்கணக்கான மக்கள் கலந்து கொள்வது வழமையாகும்.
‘‘கந்தூரி வைபவம் இடம்பெற்றால் கிராமவாசிகளுக்கு இடையில் கலவரம் ஏற்படும் நிலை உருவாகும். அத்தோடு அமைதிக்கும் சமாதானத்திற்கும் பாதிப்பு ஏற்படும்‘‘ என சிலாபம் பொலிஸார் சிலாபம் நீதிவான் நீதிமன்றுக்கு அறிவித்திருந்ததையடுத்தே சிலாபம் நீதிவான் நீதிமன்றம் கந்தூரி வைபவத்துக்கு தடையுத்தரவு பிறப்பித்து நிறுத்தியது. இந்தக் கந்தூரி வைபவத்தில் பல்லாண்டுகாலமாக கிறிஸ்தவ மக்களும் பங்குகொண்டு வந்தமை குறிப்பிடத்தக்கதாகும்.
முஸ்லிம் மக்களால் வருடாந்தம் நடாத்தப்பட்டுவரும் இந்த சமய நிகழ்வுக்கு அம்பகந்தவில பிரதேச கத்தோலிக்க மக்களும், கத்தோலிக்க ஆலய குருமார்களும் எதிர்ப்பு வெளியிட்டுள்ளதால் இந்த சமய நிகழ்வு இடம்பெறும் தினத்தன்று கிராம மக்களால் கலவரங்கள் ஏற்படுத்தப்பட்டு அசாதாரண நிலை ஏற்படலாம் என சிலாபம் பொலிஸார் நீதிமன்றுக்கு அறிக்கை சமர்ப்பித்துள்ளதாக நீதிவான் நீதிமன்ற நீதிவான் சிலாபம் பஸார் பள்ளிவாசல் நிர்வாக சபைத் தலைவருக்கு கடிதம் மூலம் அறிவித்துள்ளார். 1979 ஆம் ஆண்டின் 15 ஆம் இலக்க குற்றவியல் சட்டக்கோவை 106 (1) பிரிவின் கீழ் குறிப்பிட்ட கந்தூரி வைபவத்துக்கு தடை விதிக்கப்பட்டுள்ளதாக அவர் பள்ளிவாசல் நிர்வாக சபைத் தலைவருக்கு அனுப்பி வைத்துள்ள கடிதத்தில் குறிப்பிட்டுள்ளார்.
கடந்த வருடம் ஏப்ரல் மாதம் உயிர்த்த ஞாயிறு குண்டுத் தாக்குதல்கள் இடம்பெறுவதற்கு முன்பு மார்ச் மாதம் குறிப்பிட்ட அடக்கஸ்தலம் (சியாரம்) அமைந்துள்ள இடத்துக்கு அண்மையில் 10 அடி தூரத்தில் பலாத்காரமாக கிறிஸ்தவ சிலையொன்றினை வைத்துள்ளதாகவும் தெரிவிக்கப்படுகிறது.
சிலையொன்றினை நிறுவியது மட்டுமல்லாமல் அவர்கள் சந்தியா விளையாட்டு மைதானம் என முஸ்லிம்களுக்குச் சொந்தமான காணியை பிரகடனப்படுத்தி பெயர்ப்பலகையொன்றும் நிறுவியுள்ளனர். சிலாபம் பள்ளிவாசல் நிர்வாகத்தின் கீழ் இருக்கும் முஸ்லிம்களுக்குச் சொந்தமான காணியையும் அடக்கஸ்தலத்தையும் பிரதேச கிறிஸ்தவர்கள் சிலர் அபகரிக்க முயற்சிப்பதாகவும் தெரிவிக்கப்படுகிறது.
இந்நாட்டில் நூற்றாண்டு காலமாக முஸ்லிம்கள் ஒற்றுமையாகவே வாழ்ந்து வருகிறார்கள். இந்நிலையில் முஸ்லிம்களின் சமய இடங்கள், காணிகள் பலாத்காரமாக அபகரிக்க முற்படுவது இந்நாட்டில் நல்லிணக்கத்துக்கும் சக வாழ்வுக்கும் குந்தகமாகவே அமையும்.
நூற்றாண்டுகாலம் பழமை வாய்ந்த இந்த அடக்கஸ்தலத்தில் நடைபெற்று வந்த கந்தூரி வைபவத்துக்கு கத்தோலிக்க மக்களும் அருட்தந்தையும் எதிர்ப்பு தெரிவித்து தடைசெய்துள்ளமை தொடர்பில் பேராயர் மல்கம் ரஞ்சித் ஆண்டகையை நேரில் சந்தித்து பேச்சுவார்த்தை நடத்தவுள்ளதாக தரீக்கா கவுன்ஸில் அறிவித்துள்ளது. இந்நகர்வு வரவேற்கத்தக்கதாகும்.
இனங்களுக்கிடையில் நிலவும் பிரச்சினைகளுக்கு வன்முறைகளினாலன்றி சமாதானமாக பேச்சுவார்த்தைகள் மூலமே தீர்வு காணப்பட வேண்டும். முஸ்லிம் மக்களின் எதிர்பார்ப்பு இதுவேயாகும்.-Vidivelli