இந்தியா – பாகிஸ்தானுக்கு இடையே காணப்படும் முறுகல் நிலையே தெற்காசிய வறுமைக்கு பிரதான காரணமாகும்
பாகிஸ்தானிய உயர்ஸ்தானிகர் மேஜர் ஜெனரல் முஹமட் ஷாத் கட்டாக்
இந்தியா – பாகிஸ்தானுக்கு இடையே காணப்படும் முறுகல் நிலையே தெற்காசியப் பிராந்தியத்தில் 16.1 சதவீதமான மக்கள் வறுமைக்கோட்டிற்குக் கீழ் வாழ்வதற்கான பிரதான காரணமாகும். இம்முரண்பாடு சார்க் அமைப்பு மற்றும் அதன் குறிக்கோள்களுக்கும் பெரும் பாதிப்பாக அமைந்திருக்கிறது என்று இலங்கைக்கான பாகிஸ்தானிய உயர்ஸ்தானிகர் மேஜர் ஜெனரல் முஹமட் ஷாத் கட்டாக் தெரிவித்தார்.
பாகிஸ்தானால் நேற்று முன்தினம் புதன்கிழமை (05) காஷ்மீருடனான ஒருமைப்பாட்டை வெளிப்படுத்தும் தினமாகப் பிரகடனப்படுத்தப்பட்ட நிலையில், அதனை முன்னிட்டு இலங்கையிலுள்ள பாகிஸ்தானிய உயர்ஸ்தானிகராலயத்தினால் புதன்கிழமை கொழும்பு பண்டாரநாயக்க ஞாபகார்த்த சர்வதேச மாநாட்டு மண்டபத்தில் கலந்துரையாடல் நிகழ்வொன்று ஏற்பாடு செய்யப்பட்டிருந்தது.
இந்நிகழ்வில் ‘அமைதியும், ஸ்திரத்தன்மையும் தெற்காசியப் பிராந்தியத்தின் சுபீட்சத்திற்கான கட்டாயத்தேவைகள்’ என்ற தலைப்பில் ஜம்மு – காஷ்மீர் மாநிலத்தின் முன்னாள் பிரதமர் சர்தார் அத்தீக் அஹ்மட் கான், ஊடகவியலாளரும் செயற்பாட்டாளருமான மேதா டி அல்விஸ், ஐக்கிய இராச்சியத்தின் முன்னாள் பாராளுமன்ற உறுப்பினர் கிரஹம் ஜோன்ஸ் மற்றும் இலங்கைக்கான பாகிஸ்தானிய உயர்ஸ்தானிகர் மேஜர் ஜெனரல் முஹமட் ஷாத் கட்டாக் ஆகியோர் தமது கருத்துக்களைப் பகிர்ந்துகொண்டனர்.
உலகில் சீனாவிற்கும், அமெரிக்காவிற்கும் இடையில் தொடர்ந்துவரும் போட்டித்தன்மை மற்றும் சீனாவின் ‘ஒரு மண்டலம் ஒரு பாதை’ திட்டத்தில் தெற்காசிய நாடுகள் பலவும் முக்கியத்துவம் பெற்றிருக்கின்றமை குறித்து விசேடமாக சுட்டிக்காட்டிப் பேசிய ஐக்கிய இராச்சியத்தின் முன்னாள் பாராளுமன்ற உறுப்பினர் கிரஹம் ஜோன்ஸ், ஜம்மு – காஷ்மீரின் சுயாட்சியுடன் தொடர்புடைய இந்திய அரசியலமைப்பின் 370 ஆவது ஷரத்தை புதுடில்லி இரத்துச்செய்தமை மற்றும் காஷ்மீர் மக்களின் உரிமைகள் தொடர்பிலும் குறிப்பிட்டதுடன், ‘இந்தியாவின் கட்டுப்பாட்டிற்குள் இருக்கும் ஜம்மு–காஷ்மீருக்குள் நடைபெறும் மிருகத்தனமான செயற்பாடுகளின் விளைவாக காஷ்மீரின் நிலைமை, சர்வதேச அமைதி மற்றும் பாதுகாப்பிற்கு அச்சுறுத்தலாக அமைந்திருக்கிறது’ என்றும் கூறினார்.
அதேவேளை, காஷ்மீர் பிரச்சினைக்குத் தீர்வு காண்பதற்கு மேற்குலகம் அதன் முழுமையான பங்களிப்பை வழங்கவில்லை என்று விசனம் வெளியிட்ட அவர், இப்பிரச்சினைக்குத் தீர்வு காண்பதற்கு அனைவரினதும் பங்களிப்பை வழங்குவது நமது கூட்டுப்பொறுப்பாகும் என்றும் வலியுறுத்தினார்.
மேலும், ‘இலங்கை சுமார் 30 வருடகாலமாக தமிழீழ விடுதலைப்புலிகள் இயக்கத்தின் பயங்கரவாதத்தை எதிர்கொண்ட நாடாகும்.
எனினும், இறுதியில் இலங்கை அரசாங்கம் அதனைத் தோற்கடித்து நாட்டில் சுபீட்சத்தை ஏற்படுத்தி, அதில் புதிய படிநிலைகளையும் எட்டியிருக்கிறது.
இது பாகிஸ்தான் மற்றும் காஷ்மீருக்கு சிறந்த முன்னுதாரணமாகும்’ என்று ஜம்மு-– காஷ்மீர் மாநிலத்தின் முன்னாள் பிரதமர் சர்தார் அத்தீக் அஹ்மட் கான் தெரிவித்தார். ‘காஷ்மீர் பிரச்சினை 1947 ஆம் ஆண்டில் தெற்காசியாவின் மிக முக்கிய பகுதியில் ஆரம்பித்தது. சர்ச்சைக்குரிய ஜம்மு–காஷ்மீர் பிராந்தியம் இன்றைய மூன்று முக்கிய சக்திகளான பாகிஸ்தான், சீனா மற்றும் இந்தியா ஆகிய நாடுகளுக்கிடையில் அமைந்துள்ளது. துரதிஷ்டவசமாக காஷ்மீரில் உள்ளக பிராந்திய மற்றும் சர்வதேச தேவைப்பாடுகளைப் பூர்த்தி செய்தபோதிலும் இந்தியா சமாதானப் பேச்சுவார்த்தைக்கு வரவில்லை. கடந்த 72 வருடகால வரலாற்றில் ஆணவம், மதவெறி, வெறுப்பு, பேரினவாதம் ஆகியவையே இந்தியாவினால் காஷ்மீருக்கு வழங்கப்பட்டிருக்கின்றன’.
‘இந்தியா கடந்த வருடம் ஆகஸ்ட் 5 ஆம் திகதியிலிருந்து காஷ்மீர் பள்ளத்தாக்கு முழுவதையும் முற்றுகையிட்டு, ஒரு மில்லியன் இராணுவத்துருப்புக்களால் 9 மில்லியன் காஷ்மீர் மக்களை சுற்றிவளைத்திருக்கிறது. அத்தோடு காஷ்மீரை இராணுவ ரீதியாகப் பகுதிகளாகப் பிரித்து அவற்றை யூனியன் பிரதேசங்கள் ஆக்கியிருக்கிறது.
ஆனால் ஐக்கிய நாடுகள் சாசனத்தின் பிரகாரம் எந்தவொரு சர்ச்சைக்குரிய பிராந்தியத்திலும் பௌதிக மாற்றங்களைச் செய்யமுடியாது’ என்றும் அவர் சுட்டிக்காட்டினார்.
இதேவேளை, இத்தலைப்பில் தனது கருத்துக்களை முன்வைத்த ஊடகவியலாளர் மேதா டி அல்விஸ், ‘தெற்காசியப் பிராந்தியத்தில் காணப்படும் பிரச்சினைகளைத் தீர்ப்பதற்கும், அதன் சுபீட்சத்திற்கும் இப்பிராந்தியத்திலுள்ள நாடுகள் என்ற வகையில் நாமனைவரும் எத்தகைய பங்களிப்பினை வழங்கியிருக்கிறோம்? அதற்கான முயற்சிகளை மேற்கொண்டிருக்கிறோமா?’ என்று கேள்வி எழுப்பினார். தெற்காசியப் பிராந்தியத்தின் பிரச்சினைகளைத் தீர்ப்பதற்கும், முன்னேற்றத்திற்கும் சார்க் அமைப்பை மேலும் பலப்படுத்த வேண்டியதன் அவசியம் தொடர்பிலும் அவர் குறிப்பிட்டார்.
இலங்கையின் நல்லிணக்க செயற்பாடுகள் தொடர்பில் பேசிய அவர், காணாமல்போனோர் விவகாரம் போன்றவற்றில் அதனாலேற்பட்ட வலியை மாத்திரமே மீண்டும் மீண்டும் நினைவிலிருத்திக்கொள்வதில் பயனில்லை என்றும் அதனோடு நாம் நல்லிணக்கத்தையும் அபிவிருத்தியையும் நோக்கிப் பயணிக்க வேண்டிய தேவையிருக்கிறது என்றும் தெரிவித்தார்.
இறுதியாகக் கருத்து வெளியிட்ட பாகிஸ்தானிய உயர்ஸ்தானிகர் முஹமட் ஷாத் கட்டாக், ‘தெற்காசியப் பிராந்தியத்தில் வாழும் மக்களில் 16.1 சதவீதமானோர் வறுமைக்கோட்டிற்குக் கீழ் இருப்பதாகக் குறிப்பிட்டதுடன், இந்தியா – பாகிஸ்தானுக்கு இடையே காணப்படும் முறுகல் நிலையே இதற்குப் பிரதான காரணமாக இருக்கிறது என்றும் கூறினார். இம்முரண்பாடு சார்க் அமைப்பு மற்றும் அதன் குறிக்கோள்களுக்குப் பெரும் பாதிப்பாகும் என்றும் சுட்டிக்காட்டினார்.
‘இந்திய அரசியலமைப்பின் 370 ஆவது சரத்து இரத்து செய்யப்பட்டமையின் மூலம், இந்தியா அதன் சொந்த அரசியலமைப்பை அப்பட்டமாக மீறியிருக்கிறது.
அதுமாத்திரமன்றி சுமார் 9 மில்லியன் மக்களின் உரிமைகளை மறுத்து, அவர்களைக் கட்டுப்படுத்தியதன் மூலம் கடுமையான அடக்குமுறையையும் அது பிரயோகித்திருக்கிறது. இது பல்வேறு சர்வதேச மனித உரிமைகள் அமைப்புக்களின் கண்டனத்திற்கு உள்ளாகியிருக்கின்றது’ என்றும் அவர் மேலும் தெரிவித்தார்.-Vidivelli