நிறைவேற்று அதிகாரத்தை ஒழிக்கும் ரணிலின் யோசனைக்கு கடுமையான எதிர்ப்பு
சஜித்தை ஓரங்கட்டுவதற்கான நகர்வு என்றும் குற்றச்சாட்டு
நிறைவேற்று அதிகார ஜனாதிபதி முறைமையை ஒழிக்கும் வகையில் பிரதமர் ரணில் விக்ரமசிங்கவினால் நேற்றைய தினம் அமைச்சரவையில் முன்வைக்கப்பட்ட யோசனைக்கு ஐக்கிய தேசிய முன்னணியின் பங்காளிக் கட்சிகளும் ஐக்கிய தேசியக் கட்சியின் அமைச்சர்களும் கடும் எதிர்ப்பை வெளியிட்டுள்ளனர். இதனையடுத்து குறித்த யோசனை கைவிடப்பட்டுள்ளது.
ஜனாதிபதித் தேர்தலுக்கான திகதி குறிக்கப்பட்டு வர்த்தமானி அறிவித்தலும் வெளியிடப்பட்ட பின்னர் அவசர அவசரமாக இவ்வாறு நிறைவேற்று அதிகார ஜனாதிபதி முறைமையை ஒழிக்க முற்படுவதன் பின்னணி என்ன என்றும் நேற்றைய அமைச்சரவைக் கூட்டத்தின்போது பல அமைச்சர்கள் கேள்வி எழுப்பியுள்ளனர்.
நேற்று பிற்பகல் 3.30 மணிக்கு இடம்பெற்ற விசேட அமைச்சரவைக் கூட்டத்தின்போது குறித்த விடயம் கலந்துரையாடலுக்கு எடுத்துக் கொள்ளப்பட்டது. எனினும் இந்த யோசனைக்கு ஐக்கிய தேசியக் கட்சியின் பிரதித் தலைவரும் அமைச்சருமான சஜித் பிரேமதாசவும் அவர் சார்ந்த அமைச்சர்களும் ஸ்ரீ லங்கா முஸ்லிம் காங்கிரஸ் தலைவர் அமைச்சர் ரவூப் ஹக்கீம், தமிழ் முற்போக்கு கூட்டணியின் தலைவரும் அமைச்சருமான மனோ கணேசன் உள்ளிட்ட பலர் கடும் எதிர்ப்பை வெளியிட்டுள்ளனர்.
” தேர்தல் ஒன்று அறிவிக்கப்பட்டுள்ள நிலையில் இவ்வாறான ஒரு யோசனையை முன்வைப்பது எம்மைப் பலவீனப்படுத்துவதாகவே அமையும். தேர்தலுக்குச் செல்வதே இப்போதைக்குள்ள தெரிவாகும். தகுதியான ஒருவரை ஜனாதிபதியாகத் தெரிவு செய்யும் பொறுப்பை மக்களுக்கு வழங்க வேண்டும் ” என அமைச்சர் ஹக்கீம் இதன்போது குறிப்பிட்டார்.
”நிறைவேற்று அதிகார ஜனாதிபதி முறைமையை ஒழிக்க வேண்டும் என்பதில் மாற்றுக் கருத்தில்லை. எனினும் அதனைச் செய்வதற்கான தருணம் இதுவல்ல. ஜனாதிபதித் தேர்தலுக்கான அறிவிப்பு வெளியிடப்பட்டுவிட்ட நிலையில் இதனைச் செய்ய முடியாது. முதலில் தேர்தலுக்குச் செல்ல வேண்டும். அதன் பின்னர் இதுகுறித்து ஆராய முடியும் என தாம் திட்டவட்டமாக குறிப்பிட்டதாக அமைச்சர் மனோ கணேசன் தெரிவித்தார்.
ஐக்கிய தேசியக் கட்சிக்குள் ஜனாதிபதி வேட்பாளரைப் பெயரிடும் விடயத்தில் கருத்து முரண்பாடுகள் நீடிக்கின்ற நிலையில், சஜித் பிரேமதாசவை வேட்பாளராக நியமிக்கும் யோசனைக்கு முற்றுப்புள்ளி வைக்கவே பிரதமர் ரணில் விக்ரமசிங்க இந்த நகர்வை முன்னெடுத்துள்ளதாக அக் கட்சி வட்டாரங்கள் தெரிவிக்கின்றன. பிரதமரின் இந்த யோசனைக்கு ஜனாதிபதி மைத்திரிபால சிறிசேனவும் முன்னாள் ஜனாதிபதியும் எதிர்க்கட்சித் தலைவருமான மஹிந்த ராஜபக்சவும் ஆதரவு தெரிவித்ததாகவும் அறிய முடிகிறது. எனினும் ஐக்கிய தேசிய முன்னணியின் முக்கியஸ்தர்கள் மற்றும் பங்காளிக் கட்சிகள் இந்த யோசனையை கடுமையாக எதிர்த்த நிலையில் ரணிலின் திட்டம் தோல்வியடைந்துள்ளதாக சுட்டிக்காட்டப்படுகிறது.
vidivelli