தமிழ் – முஸ்லிம்களின் முழுமையான ஆதரவினை பெற்றுக்கொள்ள முடியும்
ஆகஸ்ட் 11 இல் ஜனாதிபதி வேட்பாளரை அறிவிப்பேன் என்கிறார் மஹிந்த
உத்தேச ஜனாதிபதி தேர்தலில் பொதுஜன பெரமுனவின் சார்பில் ஐவரது பெயர்கள் இதுவரையில் பரிந்துரை செய்யப்பட்டுள்ளன. அந்த வேட்பாளரை 11 ஆம் திகதி அறிவிப்பேன். தமிழ், முஸ்லிம் மக்களின் முழுமையான ஆதரவினை பெற்றுக்கொள்ள முடியும். அந்த மக்கள் எம்மை புறக்கணிப்பதற்கான நியாயமான காரணிகள் எதுவும் கிடையாதென எதிர்க்கட்சித் தலைவர் மஹிந்த ராஜபக் ஷ தெரிவித்தார்.
கொழும்பில் நேற்று ஞாயிற்றுக்கிழமை இடம்பெற்ற நிகழ்வில் கலந்துகொண்டதன் பின்னர் ஊடகங்களுக்கு கருத்துரைக்கையில் அவர் மேற்கண்டவாறு குறிப்பிட்டார்.
பொதுஜன பெரமுனவின் ஜனாதிபதி வேட்பாளர் யார் என்ற சர்ச்சைக்கு ஆகஸ்ட் மாதம் 11ஆம் திகதி தீர்வு கிடைக்கும். இதுவரையில் பொதுஜன பெரமுனவின் ஜனாதிபதி வேட்பாளர் தெரிவிற்கு ஐவரது பெயர்கள் பரிந்துரை செய்யப்பட்டுள்ளன. எதிரணியில் அங்கத்துவம் வகிக்கும் அனைத்து கட்சிகளினதும் அபிப்பிராயங்களுக்கு அமையவே ஜனாதிபதி வேட்பாளர் தெரிவு செய்யப்படுவார்.
தமிழ், முஸ்லிம் மக்களின் வாக்குகளை பெறமுடியும் என்ற நம்பிக்கை காணப்படுகின்றது. எம்மை புறக்கணிப்பதற்கான உரிய காரணம் ஏதும் கிடையாது. போலியான குற்றச்சாட்டுக்களுக்கு மத்தியிலே ஆட்சி மாற்றம் ஏற்படுத்தப்பட்டது. சாட்டப்பட்ட குற்றங்கள் ஏதும் இதுவரையில் நிரூபிக்கப்படவில்லை.
தேர்தலை கருத்திற்கொண்டு அரசாங்கம் தற்போது மாறுபட்ட பல விடயங்களை முன்னெடுக்கின்றது. தேர்தல் வெற்றிக்காக இம்முறை மேற்கொள்ளும் உபாயங்கள் ஏதும் பயனளிக்காது. எவர் தலைமையிலான அரசாங்கத்தை ஏற்படுத்த வேண்டும் என்பதை நாட்டு மக்கள் தேர்தல் அறிவிப்பிற்கு முன்னரே தீர்மானித்து விட்டார்கள்.
சர்வதேச அமைப்புக்களை திருப்திப்படுத்துவதற்காக அரசாங்கம் தொடர்ந்து இராணுவத்தினருக்கு எதிராகவே செயற்பட்டது. இன்றும் இந்நிலை தொடர்கின்றது. இராணுவத்தினருக்கு எதிரான அடக்குமுறைகள் அனைத்தும் கவலைக்குரியவை. இந்நிலைமைகள் அனைத்தும் இன்னும் குறுகிய காலத்திற்குள் மாற்றியமைக்கப்படும் என்றார்.
vidivelli