தடைசெய்யப்பட்ட சஹ்ரான் ஹாஷிமின் தேசிய தௌஹீத் ஜமாஅத்தின் மார்க்க போதனை நிகழ்வில் கலந்து கொண்டாரென்ற குற்றச்சாட்டில் கைது செய்யப்பட்ட இளைஞனை கல்முனை நீதிவான் நீதிமன்றம் நிபந்தனைகளுடன் பிணையில் விடுதலை செய்தது.
கடந்த மே மாதம் 29ஆம் திகதி பயங்கரவாத தடை சட்டத்தின் கீழ் கைது செய்யப்பட்ட மருதமுனையை சேர்ந்த ஏ.எச்.நில்ஷாத் எனும் நபர் விளக்கமறியலில் வைக்கப்பட்டிருந்த நிலையில் இவரது கைது விடயத்தில் மேற்கொள்ளப்பட்ட பொலிஸ் நடவடிக்கையை ஆட்சேபித்து தாக்கல் செய்யப்பட மனு நேற்று கல்முனை நீதிவான் நீதிமன்ற நீதிபதி ஐ.என்.றிஸ்வான் முன்னிலையில் பரிசீலனைக்கு எடுத்துக் கொள்ளப்பட்டது.
இதன்போது குறித்த நபர் மீதான வழக்கை பயங்கரவாத தடைச் சட்டத்தின் கீழ் முன்னெடுப்பதற்கான காரணமேதும் இல்லையென பொலிஸ் தரப்பில் அறிவிக்கப்பட்டதைத் தொடர்ந்து இவரை பிணையில் விடுவிக்குமாறு கோரி இவர் சார்பில் ஆஜரான சட்டத்தரணிகள் வாதிட்டனர்.
இவற்றை செவிமடுத்த நீதிவான் சந்தேக நபரை ஒரு இலட்சம் ரூபா பெறுமதியான இரண்டு சரீரப் பிணையில் விடுவிக்க உத்தரவிட்டதுடன், இவ்வழக்கு முடிவுறும் வரை ஒவ்வொரு மாதத்தின் கடைசி ஞாயிற்றுக்கிழமை அன்று கல்முனை பொலிஸ் நிலையத்தில் கையொப்பமிட வேண்டுமென சந்தேக நபரைப் பணித்ததுடன் வெளிநாட்டுப் பயணங்களுக்கும் நீதிவான் தடையுத்தரவு பிறப்பித்தார்.
அத்துடன் இவ்வழக்கு விசாரணை எதிர்வரும் ஆகஸ்ட் மாதம் 28 ஆம் திகதிக்கு நீதிவானால் ஒத்திவைக்கப்பட்டது.
பாறுக் ஷிஹான்
vidivelli