காவியுடை அணிந்த இனவாத பௌத்த குருமார்களின் அண்மைக்கால செயற்பாடுகள் நாட்டில் இனவாதத்துக்கு எண்ணெய் வார்ப்பதாக அமைந்துள்ளன. உயிர்த்த ஞாயிறு தற்கொலை குண்டுத் தாக்குதல்களின் பின்னர் முஸ்லிம்களுக்கு எதிரான இனவாத செயற்பாடுகள் மேலும் தீவிரமடைந்துள்ளன. முஸ்லிம்களுக்கு எதிராக இனவாதத்தைத் தூண்டுவதிலும் குற்றச்சாட்டுகளை முன்வைப்பதிலும் பொதுபலசேனா அமைப்பின் செயலாளர் கலகொட அத்தே ஞானசார தேரர் முன்னின்று செயற்பட்டு வருகிறார்.
2014 ஆம் ஆண்டு அளுத்கம மற்றும் பேருவளைப் பகுதிகளில் இடம்பெற்ற முஸ்லிம்களுக்கு எதிரான வன்செயல்களுக்குக் காரணமாக இருந்தவரும் ஞானசார தேரர் என்பதை எவராலும் மறுக்கமுடியாது. 2014 ஆம் ஆண்டு ஜூன் மாதம் ஞானசார தேரர் பேருவளையில் ஆற்றிய உரையே அளுத்கம வன்செயல்களுக்கு வித்திட்டது. இதனால் பாரிய அழிவுகளும் உயிர்ச்சேதங்களும் ஏற்பட்டன. அன்று ஞானசார தேரர் பெரும்பான்மை மக்கள் மத்தியில் உரையாற்றுகையில்;
‘அபசரணய்’ அதாவது அழிவு அல்லது சாபம் ஏற்படும் என்றார். அவர் கூறியது போன்று இனவாதிகளால் அழிவுகள் கட்டவிழ்த்துவிடப்பட்டன.
அளுத்கம வன்செயல்களையடுத்து நாட்டில் வெறுப்புப் பேச்சுகளுக்குத் தடை விதிப்பதற்கான சட்டமொன்றினை இயற்றிக்கொள்ள மேற்கொண்ட முயற்சிகளும் பயனற்றுப்போயின. முஸ்லிம் சமூகத்தை அச்சுறுத்திய இது போன்றவொரு சம்பவம் கடந்த மாதம் ஆரம்பத்தில் இடம்பெற்றதை எம்மால் மறக்கமுடியாது. அன்று முஸ்லிம் அரசியல் தலைவர்களும் அமைச்சர்களும் மேற்கொண்ட சமயோசித தீர்மானம் சமூகத்தை அழிவுகளிலிருந்தும் காப்பாற்றியதென்றே கூறவேண்டும்.
அப்போதைய அமைச்சர் ரிசாத் பதியுதீன், மேல் மாகாண ஆளுநர் அசாத் சாலி மற்றும் கிழக்கு மாகாண ஆளுநர் ஹிஸ்புல்லாஹ் ஆகியோர் இஸ்லாமிய அடிப்படை வாதிகளின் ஆதரவாளர்கள் எனக்கூறி அவர்கள் பதவி விலக வேண்டும் அல்லது பதவி விலக்கப்பட வேண்டுமென நாடு தழுவிய ரீதியில் கோரிக்கைகள் முன்னெடுக்கப்பட்டன.
இந்தக் கோரிக்கையை முன்வைத்து பாராளுமன்ற உறுப்பினர் அத்துரலிய ரதன தேரர் கண்டியில் சாகும்வரையிலான உண்ணாவிரதப் போராட்டத்தை கடந்த மே மாதம் 31 ஆம் திகதி முன்னெடுத்தார். இரு தினங்களின் பின்பு உண்ணாவிரதமிருந்த அத்துரலிய ரதன தேரரைப் பார்ப்பதற்காக கண்டிக்குச் சென்ற ஞானசார தேரர் ஓர் அச்சுறுத்தலை விடுத்தார். அதாவது மறுதினம் 3 ஆம் திகதி மதியம் 12 மணிக்கு முன்பு குறிப்பிட்ட மூன்று அரசியல்வாதிகளும் பதவி விலகாவிட்டால் இன்றேல் பதவி விலக்கப்பட்டாவிட்டால் நாடு முழுவதும் திருவிழா காணவேண்டியேற்படும் என்று அச்சுறுத்தல் விடுத்தார். இது பேருவளையில் அவர் விடுத்த ‘அபசரணய்’ கருத்துக்கு ஒத்ததாகும்.
அளுத்கம வன்செயல்களின் வடுக்கள் மாறாத நிலையில் முஸ்லிம் சமூகம் பீதிக்குள்ளாகியது. மீண்டும் அழிவுகளா? என்று சிந்தித்தது. இந்நிலையில் மூவரும் தங்கள் பதவிகளை இராஜினாமா செய்தனர். இதனையடுத்து முஸ்லிம்களின் பாதுகாப்பினை வலியுறுத்தியும் அநாவசிய கெடுபிடிகளுக்கு எதிர்ப்புத் தெரிவித்தும் முஸ்லிம் அமைச்சர்களும் தங்களது பதவிகளை இராஜினாமாச் செய்தனர். இதனால் ஞானசாரதேரர், அத்துரலிய ரதனதேரர் உட்பட இனவாத பௌத்த தேரர்கள் எழுச்சி பெற்றனர். தங்களால் எதையும் சாதிக்க முடியும் என கர்வம் கொண்டனர்.
கல்முனை வடக்கு தமிழ்ப் பிரதேச செயலகத்தை தரமுயர்த்தும் கோரிக்கையும் இவ்வாறானதொன்றே. சாகும்வரையிலான உண்ணாவிரதப் போராட்டமே ரன்முத்துகல சங்கரத்ன தேரரால் முன்னெடுக்கப்பட்டது. இப்போராட்டத்திலும் ஞானசார தேரர் சம்பந்தப்பட்டார். ஒருவார காலம் நடந்த இப்போராட்டம் ஞானசார தேரர், அத்துரலிய ரதன தேரர் மற்றும் அரச தரப்பு செயலகத்தை தரமுயர்த்த நடவடிக்கை எடுக்கப்படும் என்று உத்தரவாதமளிக்கப்பட்டதையடுத்தே கைவிடப்பட்டது.
எதிர்வரும் 7 ஆம் திகதி பொதுபலசேனா அமைப்பு மீண்டுமொரு முஸ்லிம்களுக்கு எதிரான செயற்பாட்டை முன்னெடுக்கவுள்ளது. கண்டி தலதா மாளிகைத் திடலில் மாநாடு ஒன்றினை ஏற்பாடு செய்துள்ளது. இம்மாநாட்டில் ஒரு இலட்சத்துக்கும் மேற்பட்ட மக்களும் சுமார் 10 ஆயிரம் பிக்குகளும் கலந்து கொள்ளவுள்ளதாக தெரிவித்துள்ளது.
மாநாட்டில் அரபுக்கல்லூரிகள், காதிநீதிமன்றங்கள், ஹலால், தௌஹீத் பள்ளிவாசல்களுக்கெதிராக தீர்மானங்கள் நிறைவேற்றப்பட்டு அரசிடம் மகஜர் கையளிக்கப் படவுள்ளது.
அவசரகாலச்சட்டம் அமுலில் இருக்கும் போது இனரீதியான முரண்பாடுகளைத் தோற்றுவிக்கும் இவ்வாறான மாநாடுகளை நடத்த முடியுமா? பாதுகாப்புத் தரப்பினரும், அரசும் இவ்வாறான செயற்பாடுகளில் சட்டத்தை அமுல்படுத்த வேண்டும். பாராளுமன்றத்தில் இடம்பெற்ற அவசரகால சட்டவிவாதத்தில் உரையாற்றிய பாராளுமன்ற உறுப்பினர் ஏ.எச்.எம்.பௌசி இம்மாநாடு முஸ்லிம்களின் பாதுகாப்புக்கு அச்சுறுத்தலாக அமையலாம் எனத் தெரிவித்துள்ளமை கவனத்தில் கொள்ளப்பட வேண்டும். அவசரகாலச் சட்டத்தை மீறி இடம்பெறும் இவ்வாறான நிகழ்வுகளுக்கு எதிராக பாதுகாப்புத் தரப்பினர் சட்ட நடவடிக்கை எடுக்க வேண்டும்.
vidivelli