இலங்கை முஸ்லிம்கள் மிக மோசமானதொரு காலகட்டத்தைச் சந்தித்துள்ளனர். மரத்தால் விழுந்தவனை மாடேறி மிதித்ததற்கொப்ப, ஏப்ரல் 21 தாக்குதல்களாலும் அதன் பின்னரான நிகழ்வுகளாலும் மனமுடைந்து நொந்துபோயிருந்த முஸ்லிம்களை இவ்வாரம் இடம்பெற்ற பெருமெடுப்பிலான வன்முறைகள் மென்மேலும் மன அழுத்தத்தில் தள்ளியுள்ளன.
முஸ்லிம்களுக்கெதிராக நீர்கொழும்பு, சிலாபம், குருநாகல் மாவட்டம் மற்றும் மினுவாங்கொடை ஆகிய பகுதிகளில் கட்டவிழ்க்கப்பட்ட வன்முறைகளில் ஓர் உயிர் பலிகொள்ளப்பட்டுள்ளதுடன் 500 க்கும் மேற்பட்ட வீடுகள், கடைகள், வாகனங்கள் தாக்கப்பட்டும் தீ வைக்கப்பட்டும் அழிக்கப்பட்டுள்ளன.
இப் பின்னணியில்தான் இலங்கை அரசாங்கத்திடமும் பாதுகாப்புத் தரப்பிடமும் இனவாத ஊடகங்களிடமும் சில கேள்விகளை நாம் முன்வைக்க வேண்டியுள்ளது.
ஏப்ரல் 21 இல் தற்கொலைக் குண்டுத் தாக்குதல்களை நடாத்தி 250 க்கும் அதிகமான உயிர்களைப் பலியெடுத்த ஐ.எஸ். அமைப்பின் உறுப்பினர்கள் தீவிரவாதிகள், பயங்கரவாதிகள் என்பதில் எந்தவித சந்தேகமுமில்லை.
இலங்கை முஸ்லிம் சமூகம் ஒட்டுமொத்தமாகவே இவர்களுக்கும் இஸ்லாத்துக்கும் எந்தவித சம்பந்தமுமில்லை என்றும் இவர்கள் தீவிரவாதிகள்தான், பயங்கரவாதிகள்தான் என்பதை திரும்பத் திரும்ப உறுதி செய்துவிட்டனர். மாத்திரமன்றி உயிருடன் எஞ்சியிருந்த தீவிரவாதிகளையும் படையினருக்கு காட்டிக் கொடுத்து அவர்கள் தப்பிக்க முடியாத நிலையில் குண்டுகளை வெடிக்க வைத்து தம்மைத்தாமே மாய்த்துக் கொள்ளச் செய்ததும் முஸ்லிம்கள்தான் என்பதை நினைவூட்ட விரும்புகிறோம். தீவிரவாத நபரான கணவனால் தடுத்து வைக்கப்பட்டிருந்த தமது மகளைக் கூட பொலிசாரை வரவழைத்து ஒப்படைத்தது முஸ்லிம் பெற்றோர்தான் என்பதையும் இங்கு சுட்டிக்காட்ட விரும்புகிறோம்.
ஆனால் குண்டுத் தாக்குதல்களின் பின்னரான நாட்களில் படையினர் முஸ்லிம்களின் வீடுகளை மாத்திரம் இலக்கு வைத்து நாடளாவிய ரீதியில் முன்னெடுத்த தேடுதல் நடவடிக்கைகளின் போது கைப்பற்றப்பட்ட கத்திகளையும் மிகச் சில வாள்களையும் திரும்பத் திரும்ப ஊடகங்களில் பூதாகரப்படுத்திக் காட்டியதன் மூலம் பெரும்பான்மை இன மக்கள் மத்தியில் ‘எல்லா முஸ்லிம்களும் தீவிரவாதிகள்தான்’ எனும் விஷக் கருத்து திணிக்கப்பட்டமை துரதிஷ்டவசமானதாகும்.
வாள்களை வைத்திருந்தோர் அவற்றுக்கு நியாயங்கள் கூறினாலும் அதற்கெதிராக உரிய சட்ட நடவடிக்கைகளை பொலிசார் எடுக்க முடியும். அதை யாரும் மறுக்கவில்லை. சாதாரண கத்திகளையும் வாள்களையும் வீடுகளில் வைத்திருந்த முஸ்லிம்களை தீவிரவாதிகள் என முத்திரை குத்திய ஊடகங்களும் படையினரும் கடந்த மே 5 ஆம் திகதி முதல் மே 13 ஆம் திகதி பல இடங்களிலும் முஸ்லிம்களுக்கு எதிராக இடம்பெற்ற தாக்குதல்களின்போது எங்கே போயினர்?
இந்த தாக்குதல்களை முன்னெடுத்த சகலரும் தமது கைகளில் வாள்களை வைத்திருந்தனர். கொட்டாரமுல்லையில் நான்கு பிள்ளைகளின் தந்தையான பௌசுல் அமீர், வாளினால் வெட்டப்பட்டே படுகொலை செய்யப்பட்டார். ஏனைய இடங்களிலும் வாள்கள், பொல்லுகள், இரும்புக் கம்பிகள், பெற்றோல் குண்டுகள் மூலமே முஸ்லிம்களின் இடங்கள் தாக்கப்பட்டுள்ளன. இந்த ஆயுதங்கள் எங்கிருந்து வந்தன? இவற்றை வைத்திருந்தோரும் தாக்குதல் நடத்தியோரும் யார்? அவர்கள் தீவிரவாதிகள் இல்லையா? அன்று வாள்களையும் கத்திகளையும் காட்டி முஸ்லிம்களை தீவிரவாதிகளாக சித்திரித்த இனவாத ஊடகங்கள் இப்போது எங்கு போய் ஒளிந்து கொண்டன?
அவசர காலச் சட்டமும் ஊரடங்குச் சட்டமும் அமுலில் இருந்த வேளையில், பொலிசாரும் இராணுவத்தினரும் பார்த்திருக்க பிறரின் வீடுகளில், கடைகளில், பள்ளிவாசல்களில் நுழைந்து அட்டூழியம் புரிந்தவர்களை என்னவென்று அழைப்பது? இரண்டாயிரத்துக்கும் அதிகமானோர் இத் தாக்குதல்களில் பங்கேற்றிருக்க வெறும் 80 பேர்தான் கைது செய்யப்பட்டிருக்கிறார்கள். இது எந்தவகையில் நியாயம்?
முஸ்லிம் சமூகத்தினுள் தலையெடுத்த இந்த தீவிரவாத சக்திகளை முளையிலேயே கிள்ளியெறிய முஸ்லிம்களே அரசாங்கத்துக்கு கைகொடுத்திருக்கையில் இவ்வாறு குண்டர்களை ஏவி தாக்குதல் நடத்துவதற்கான தேவை ஏற்பட்டது ஏன்?
தீவிரவாதத்தை ஒருபோதும் தீவிரவாதத்தால் அழிக்க முடியாது. மாறாக அது இன்னுமின்னும் தீவிரவாதிகளை உருவாக்கவே வழியைத் திறந்து கொடுக்கும். அளுத்கமவிலும் கிந்தோட்டை மற்றும் அம்பாறை, திகனவிலும் முஸ்லிம்களுக்கு எதிராக வன்முறைகளைக் காட்டிக் காட்டியே தீவிரவாதிகள் தமக்கு ஆட்களைச் சேர்த்தார்கள். இப்போது ஹெட்டிபொல, மினுவாங்கொடை, கொட்டாரமுல்லையின் அழிவுகளை அடிப்படையாக வைத்து இன்னும் தீவிரவாதிகள் உருவாக வேண்டும் என இந்த சக்திகள் ஆசைப்படுகின்றனவா?
எனவேதான் தயவு செய்து எல்லா சமூகங்களிலும் உள்ள தீவிரவாதத்துக்கு முற்றுப்புள்ளி வைக்க முன்வாருங்கள். முஸ்லிம் சமூகம் தனது சமூகத்தில் உள்ள தீவிரவாதிகளை ஒழித்துக்கட்டவும் இதன் பிறகு தீவிரவாதிகள் உருவாகாமல் தடுக்கவும் ஏலவே தன்னைத் தயார்படுத்திவிட்டது. இப்போதுள்ள கேள்வி பெரும்பான்மை சமூகம் எப்போது தனது சமூகத்திலுள்ள தீவிரவாதிகளை களையெடுக்கப் போகிறது என்பதுதான். இதற்கு விடை காணாதவரை இந்த அழிவுகள் சங்கிலித் தொடர்தான்.
vidivelli