ஊழல் எதிர்ப்பு இயக்கத்தின் பணிப்பாளர் நாமல் குமார மற்றும் மகசோன் பலகாய இயக்கத்தின் தலைவர் அமித் வீரசிங்க மற்றும் புதிய சிங்கள தேசியம் அமைப்பின் முக்கியஸ்தர் டான் பிரசாத் ஆகியோர் கைது செய்யப்பட்டுள்ளனர்.
வட மேல் மாகாணத்தில் குளியாபிட்டி மற்றும் நிக்கவரட்டி பகுதிகளில் முஸ்லிம் கிராமங்களை இலக்குவைத்து திட்டமிட்ட குழுவொன்று முன்னெடுத்த தொடர் தாக்குதல்கள் தொடர்பிலான பிரதான விசாரணைகளுக்காக, மூவர் கைது செய்யப்பட்டுள்ளனர்.
இனங்களுக்கு இடையே வெறுப்புணர்வுகளைத் தூண்டும் வகையில் ஏற்கனவே நடந்துகொண்டுள்ள, கண்டி – திகன வன்முறைகளின் பிரதான சூத்திரதாரி மகாசோன் பலகாய எனும் அமைப்பின் தலைவர் வித்தாரணபத்திரணலாகே அமித் ஜீவன் வீரசிங்கவும் அவனுடன் மிக நெருங்கிய தொடர்பினைப் பேணிய மேலும் இருவருமே இவ்வாறு கைது செய்யப்பட்டுள்ளனர்.
அமித் வீரசிங்கவுக்கு மேலதிகமாக கைது செய்யப்பட்டோரில், ஊழலுக்கு எதிரான படையணியின் நடவடிக்கை பணிப்பாளரும், ஜனாதிபதி கொலை சதி ஒன்று தொடர்பில் வெளிப்படுத்தியவருமான அத்தநாயக்க முதியன்சலாகே நாமல் குமார மற்றும் புதிய சிங்ஹலே அமைப்பின் தலைவரான லியனகே அபேகோன் சுரேஷ் பிரியஷாத் எனப்படும் டான் பிரியஷாத் ஆகியோர் அடங்குகின்றனர்.
அமித் வீரசிங்கவை கொழும்பு பொலிஸ் தலைமையகத்தில் இருந்து கண்டி -– தெல்தெனிய பகுதிக்கு சென்ற, பொலிஸ் அத்தியட்சர் ஒருவரின் கீழான சிறப்பு விசாரணைக் குழு கைது செய்ததுடன், வரகாபொல பொலிஸ் நிலையத்தில் முறைப்பாடொன்றினைச் செய்ய சென்ற போது நாமல் குமாரவை அக்குழு கைது செய்தது. இந் நிலையில் வெல்லம்பிட்டியில் உள்ள டான் பிரியஷாத்தின் வீட்டுக்கு அவரைக் கைது செய்ய பொலிசார் சென்ற போதும் அவர் அங்கு இருக்கவில்லை. இந் நிலையில் பின்னர் நேற்று மாலை அவர் சட்டத்தரணி ஒருவர் ஊடாக சி.சி.டி. எனப்படும் கொழும்பு குற்றத்தடுப்புப் பிரிவுக்கு வந்து சரணடைந்ததை அடுத்து இந்த விவகாரம் தொடர்பில் கைது செய்யப்பட்டுள்ளார்.
இந்நிலையில் வடமேல் மாகாணத்தில், குருணாகல், வாரியபொல, நிக்கவரட்டிய, குளியாபிட்டிய, சிலாபம், பிங்கிரிய, தும்மலசூரிய, நாத்தாண்டிய, தும்மோதர உள்ளிட்ட பகுதிகளில் இடம்பெற்ற முஸ்லிம்களை இலக்குவைத்த தாக்குதல்கள் பல தொடர்பில் தடுத்து வைக்கப்பட்டு பொலிஸ் தலைமையகத்தின் சிறப்பு பொலிஸ் குழுவினரால் விசாரிக்கப்பட்டு வருகின்றனர்.
இந் நிலையில் நேற்று இரவு 7.00 மணியுடன் நிறைவடைந்த 72 மணி நேரத்தில் இடம்பெற்ற பள்ளிவாசல்கள் மீதான தாக்குதல்கள், முஸ்லிம்களின் கடைகள், வீடுகள் மீதான தாக்குதல்கள் உள்ளிட்ட வன்முறைகள் தொடர்பில் 81 பேர் மொத்தமாக கைது செய்யப்பட்டுள்ளனர். இதில் வடமேல் மாகாணத்தில் மட்டும் இடம்பெற்ற சம்பவங்கள் தொடர்பில் 64 பேர் கைது செய்யப்பட்டதாகவும், மினுவாங்கொடையில் முஸ்லிம்களின் பள்ளிவாசல் மற்றும் கடைகளை கொழுத்தி சேதப்படுத்தியமை தொடர்பில் 14 பேர் கைது செய்யப்பட்டுள்ளதாகவும் பொலிஸ் ஊடகப் பேச்சாளர் பொலிஸ் அத்தியட்சர் ருவன் குணசேகர கூறினார்.
கீழ்த்தரமான நோக்கங்களைக் கொண்ட சந்தர்ப்பவாதிகள் சிலராலேயே இந்த வன்முறைகள் கட்டவிழ்த்துவிடப்பட்டுள்ளதாகவும், தற்போது வன்முறைகள் கட்டுக்குள் கொண்டுவரப்பட்டு சந்தேக நபர்களை வேட்டையாடும் படலம் ஆரம்பித்துள்ளதாகவும் பொலிஸ் அத்தியட்சர் ருவன் குணசேகர மேலும் கூறினார்.
மினுவாங்கொடை சம்பவம்:
மினுவாங்கொடை நகரில், கொழும்பு -– குருணாகல் பிரதான வீதியில் அமைந்துள்ள சுமார் 10 முஸ்லிம் வர்த்தக நிலையங்கள் மற்றும் ஜும்ஆ பள்ளிவாசல் மீது தாக்குதல் நடாத்தப்பட்டிருந்தது. சம்பவம் இடம்பெற்ற நேற்று முன்தினம் மாலையே மேல் மாகாணத்தின் வடக்கு பிரதிப் பொலிஸ் மா அதிபர் தேசபந்து தென்னகோனின் கீழ் விசாரணைகள் ஆரம்பிக்கப்பட்ட நிலையில், அன்றைய தினம் இரவோடிரவாக 9 பேரும் நேற்று 5 பேருமாக 14 பேர் கைது செய்யப்பட்டனர். அவர்கள் அனைவரும் நேற்று மினுவாங்கொடை நீதிவான் நீதிமன்றில் ஆஜர் செய்யப்பட்டு எதிர்வரும் 29 ஆம் திகதிவரை விளக்கமறியலில் வைக்கப்பட்டுள்ளனர்.
ஐ.சி.சி.பி.ஆர். இன் கீழ் குற்றச்சாட்டு:
இவ்வாறு வெறுக்கத்தக்க வன்முறைகள் தொடர்பில் கைது செய்யப்படும் அனைத்து சந்தேக நபர்களும் அவசர கால சட்ட விதிகளின் கீழும், சிவில் மற்றும் அரசியல் உரிமைகளுக்கான சர்வதேச இணக்கப்பாட்டு சட்ட விதிகளின் கீழும் மன்றில் ஆஜர் செய்யப்படுவதாக பொலிஸ் பேச்சாளர் பொலிஸ் அத்தியட்சர் ருவன் குணசேகர கூறினார். அவ்வாறு ஆஜர் செய்யப்படும் போது அவர்களால் நீதிவான் நீதிமன்றில் பிணை பெற முடியாது எனவும் கண்டிப்பாக பிணை பெற மேல் நீதிமன்றை நாட வேண்டும் எனவும் அவர் சுட்டிக்காட்டினார்.
பொலிஸ் சான்றிதழில் விஷேட குறிப்பு:
அத்துடன் அவ்வாறு கைது செய்யப்படும் எந்த நபரும் தொழில் நிமித்தமோ, வேறு அலுவல்களுக்கோ வெளிநாடு செல்லவோ பொலிஸ் சான்றிதழை பெற முற்பட்டால் அவ்வாறான சான்றிதழில் கண்டிப்பாக, இன வன்முறைகளுக்காக கைது செய்யப்பட்டவர் எனும் பதம் சேர்க்கப்பட்டு சான்றிதழ் கொடுக்கப்படும் என பொலிஸ் பேச்சாளர் பொலிஸ் அத்தியட்சர் ருவான் குணசேகர சுட்டிக்கடடினார்.
வடமேல் வன்முறைகள்:
இதேவேளை வடமேல் மாகாணத்தில் இடம்பெற்ற வன்முறைகள் தொடர்பில் மொத்தமாக 64 பேர் கைது செய்யப்பட்டுள்ளனர். அவர்களில் 9 பேர் நேரடியாக வன்முறைகளில் பங்கேற்ற முக்கியமானவர்களாவர். அந்த 9 பேரும் நேற்று ஹெட்டிபொலை நீதிவான் நீதிமன்றில் ஆஜர் செய்யப்பட்டனர். இதன்போது அவர்கள் எதிர்வரும் 27 ஆம் திகதிவரை விளக்கமறியலில் வைக்க உத்தரவிடப்பட்டது.
இதேவேளை குளியாபிட்டிய வன்முறைகளுடன் தொடர்புடைய 10 பேரும் நேற்று கைது செய்யப்பட்டு குளியாபிட்டி நீதிமன்றில் ஆஜர் செய்யப்பட்டனர். இதன்போது அவர்களை எதிர்வரும் 27 ஆம் திகதிவரை விளக்கமறியலில் வைக்க உத்தரவிடப்பட்டது.
இதனைவிட நாத்தாண்டிய பகுதியில் இடம்பெற்ற வன்முறைகள் தொடர்பில் 18 பேர் கைது செய்யப்பட்டு மாரவில நீதிவான் நீதிமன்றில் ஆஜர் செய்யப்பட்டனர். அவர்களையும் எதிர்வரும் 28 ஆம் திகதிவரை விளக்கமறியலில் வைக்க மாரவில நீதிவான் நீதிமன்றம் உத்தரவிட்டிருந்தது. இவ்வாறு விளக்கமறியலில் வைக்கப்பட்டவர்கள் மாரவில, நாத்தாண்டிய, ஹத்தினிய மற்றும் தலவில பகுதிகளைச் சேர்ந்தவர்களாவர்.
விஷேட பொலிஸ் குழுவுக்கு மேலதிகமான விசாரணையாளர்கள்:
இதனிடையே இந்த வன்முறைகள் தொடர்பில் பொலிஸ் தலைமையகத்தின் பொலிஸ் அத்தியட்சர் ஒருவரின் கீழ் முன்னெடுக்கப்படும் விஷேட விசாரணைகளுக்கு மேலதிகமாக ஒவ்வொரு விஷேட பகுதிகளுக்கும் பொலிஸ் மா அதிபரால் சிறப்பு விசாரணையாளர்கள் நியமிக்கப்பட்டுள்ளனர். பதில் பொலிஸ்மா அதிபர் சந்தன விக்ரமரத்ன இந்த மேலதிக விசாரணையாளர்களை நியமித்துள்ளார். இரு பிரதிப் பொலிஸ் மா அதிபர்கள் மற்றும் 8 பொலிஸ் அத்தியட்சர்கள், உதவி பொலிஸ் அத்தியட்சர்கள் இவ்வாறு நியமிக்கப்பட்டுள்ளனர்.
பதில் பொலிஸ் மா அதிபர் சந்தன விக்ரமரத்னவின் நேரடி கட்டுப்பாட்டில் இந்த விசாரணைகள் இடம்பெறுகின்றன.
அவரின் கீழ் பொலிஸ் சட்டப் பிரிவு மற்றும் குற்றம் திட்டமிட்ட குற்றங்களை தடுக்கும் பொலிஸ் பிரிவுகளுக்கு பொறுப்பான பிரதிப் பொலிஸ் மா அதிபர் கமல் சில்வாவின் கீழ் பிரதான விசாரணைகள் இடம்பெறுகின்றன. குளியாபிட்டி மற்றும் ஹெட்டிபொல பகுதிகளில் இடம்பெற்ற விரும்பத்தகாத சம்பவங்கள் தொடர்பில் பிரதிப் பொலிஸ் மா அதிபர் கமல் சில்வாவின் கீழ் விசாரணைகள் இடம்பெறுகின்றன.
அத்துடன், நிக்கவரட்டி பொலிஸ் பிரிவில் பதிவாகியுள்ள வன்முறைகள் தொடர்பில் விசாரிக்கும் பொறுப்பு கொழும்பு குற்றத்தடுப்புப் பிரிவின் பணிப்பாளர் பொலிஸ் அத்தியட்சர் உதய ஹேமந்தவிடம் ஒப்படைக்கப்பட்டுள்ளது. கட்டுபொத்த பொலிஸ் பிரிவில் பதிவான சம்பவங்கள் தொடர்பில் சமூக பொலிஸ் பிரிவின் பணிப்பாளர் பொலிஸ் அத்தியட்சர் டி.வி.பி. அஜித்தின் கீழும், தும்மலசூரிய பொலிஸ் பிரிவில் பதிவாகியுள்ள சம்பவங்கள் தொடர்பில் உதவி பொலிஸ் அத்தியட்சர் கொடிசிங்கவின் கீழும் விஷேட விசாரணைகள் இடம்பெறுகின்றன.
இதனைவிட கொபேய்கனே பொலிஸ் பிரிவில் இடம்பெற்ற சம்பவங்கள் தொடர்பில் உதவி பொலிஸ் அத்தியட்சர் சமரகோனும், வாரிய பொலிஸ் பிரிவின் சம்பவங்கள் தொடர்பில் உதவி பொலிஸ் அத்தியட்சர் சமந்த திஸாநாயக்கவின் கீழும் விசாரணைகள் இடம்பெறுகின்றன.
கொஸ்வந்த பொலிஸ் பிரிவில் இடம்பெற்ற கொலை உள்ளிட்ட சம்பவங்கள் தொடர்பில் விசாரிக்கும் பொறுப்பு சிலாபம் உதவி பொலிஸ் அத்தியட்சர் கீர்த்தி பண்டாரவிடம் ஒப்படைக்கப்பட்டுள்ளது.
சிலாபம் பொலிஸ் பிரிவில் இடம்பெற்ற விசாரணைகள் தொடர்பில் பொலிஸ் மா அதிபரின் அலுவலக பிரதான பிரதிப் பொலிஸ் மா அதிபர் பிரியந்த ஜயகொடியின் கீழ் தனியான விசாரணைகள் இடம்பெறுவதுடன் மாரவில பொலிஸ் பிரிவில் இடம்பெற்ற சம்பவங்கள் தொடர்பில் உதவி பொலிஸ் அத்தியட்சர் சுஜீவ விஜேசிங்க தலைமையில் விசாரிக்கப்பட்டு வருகின்றது. வென்னப்புவ பகுதியில் இடம்பெற்ற சம்பவங்கள் தொடர்பில் பொலிஸ் அத்தியட்சர் பேர்னாட் பெரேராவின் கீழ் விசாரிக்கப்பட்டு வருகின்றது.
பிரதான விசாரணைகளில் எழுந்துள்ள சந்தேகம்:
இந் நிலையில் முஸ்லிம்களின் சொத்துக்களையும் உயிர்களையும் இலக்குவைத்து நடத்தப்பட்டுள்ள கொடூர தாக்குதல்கள் தொடர்பில் பிரதான விசாரணைகளைக் கையாளும் பொலிஸ் தலைமையகத்தின் சிறப்பு பொலிஸ் குழு அது தொடர்பில் பல தகவல்களை வெளிப்படுத்திக்கொண்டுள்ளது. இந் நிலையில் மிகக் கீழ்த்தரமான அரசியல் உள் நோக்கமொன்று இந்த வன்முறைகளின் பின்னணியில் இருக்க வேண்டும் என விசாரணையாளர்கள் விசாரணைகளில் வெளிப்படுத்தப்பட்ட விடயங்களை வைத்து சந்தேகிப்பதாக பொலிஸ் தலைமையகத்தின் உயர் அதிகாரி ஒருவர் கூறினார். இந் நிலையில் அவற்றை வெளிப்படுத்த மேலதிக விசாரணைகள் இடம் பெறுவதாகவும், வன்முறைகளில் பங்கேற்றவர்களை பிடிக்க, பதில் பொலிஸ் மா அதிபர் அமைத்துள்ள வெவ்வேறு சிறப்பு விசாரணை அதிகாரிகளின் கீழ் நடவடிக்கை எடுத்துள்ளதாகவும் அந்த அதிகாரி சுட்டிக்காட்டினார்.
பிரதான சந்தேக நபர்கள் குறித்த வெளிப்படுத்தல்கள்:
இதனிடையே இந்த வன்முறைகள் தொடர்பில் கைது செய்யப்பட்டுள்ள பிரதான சந்தேக நபர்களாக கருதப்படும் மூன்று சந்தேக நபர்களும் ஏற்கனவே இனவாத சம்பவங்களுடன் தொடர்புபட்டவர்கள் என பொலிஸ் விசாரணைகளில் தெரியவந்துள்ளது.
அதில் பிரதானமாக மகாசோன் பலகாய எனும் அமைப்பின் தலைவர் அமித் வீரசிங்க , கண்டி திகன வன்முறைகளின் பிரதான சூத்திரதாரியாக கருதப்பட்டு கைது செய்யப்பட்டவராவார். அது தொடர்பில் 7 மாதங்கள் விளக்கமறியலில் இருந்த அவர் கடந்த 2018 ஒக்டோபர் 31 ஆம் திகதி அரசியல் குழப்ப நிலையின்போது பிணையில் விடுவிக்கப்பட்டிருந்தார்.
டான் பிரசாத் எனும் சந்தேக நபரும், கல்கிசை பகுதியில் இடம்பெற்ற ரோஹிங்யா முஸ்லிம்களுக்கு எதிரான இனவாத போராட்டத்தின் போது பிரதான சந்தேக நபராக கொழும்பு குற்றத்தடுப்புப் பிரிவினரால் ஏற்கனவே கைதாகி தற்போது அது தொடர்பில் பிணையில் உள்ளவராவார்.
நாமல் குமார எனும் நபர் இவ்விரு இனவாதிகளுடனும் மிக நெருக்கமாக பழகியதுடன், அவர் ஊடாகவே பொலிசார் முன்னர் இனவாதிகள் குறித்த தகவல்களைப் பெற்றிருந்தனர் என்பதும் குறிப்பிடத்தக்கது.
vidivelli