சமூக வலைத் தளத்தில் இஸ்லாத்தையும் இறைத் தூதர் முகம்மது நபியையும் கொச்சைப்படுத்திய மலேசிய நபர் ஒருவருக்கு ஏழு மாதகால சிறைத் தண்டனையும் 10,000 றிங்கிட் (2,445 டொலர்) தண்டப் பணமும் விதிக்கப்பட்டதாக திங்கட்கிழமையன்று உள்ளூர் ஊடகங்கள் தெரிவித்தன.
மொஹமட் யாஸிட் கொங் அப்துல்லாஹ் என்ற 52 வயது நபர் கடந்த வாரம் கைது செய்யப்பட்டதோடு, அவர் மீதான 11 குற்றச்சாட்டுக்களையும் ஏற்றுக் கொண்டார். அவரது பிணை மனு நிராகரிக்கப்பட்டது. 1998 ஆம் அண்டு கையொப்பமிடப்பட்டு சட்டமாக்கப்பட்ட தொடர்பாடல் மற்றும் பல்லூடக குற்றவியல் கோவைக்கு எதிராக மலேசிய மக்களிடமிருந்து அதிகரித்து வரும் சவால்களின் பிந்திய சம்பவம் இதுவாகும்.
மிகச் சிறந்த முறையில் இவ்விடயம் கருத்திற் கொள்ளப்படா விட்டால் இந்த நிலைமை கோபத்தை ஏற்படுத்தும், இது தேசிய பாதுகாப்புக்கும் அச்சுறுத்தலாக அமையும் என இந்த வழக்கின் சட்டவாதியான மொஹமட் அஷ்ரப் தெரிவித்தார்.
குறித்த சட்டம் அமுலுக்கு வந்ததிலிருந்து நாடு முழுவதிலுமிருந்து இத்தகைய சம்பவங்கள் தொடர்பில் தமக்கு தகவல்கள் கிடைத்துள்ளதாக மலேசியப் பொலிஸார் தெரிவித்தனர்.
கடந்த மார்ச் மாதம் முதலாம் திகதி சீன நபரான வாயி பூ சிங் என்ற 68 வயதான நபர் சமூக ஊடகத்தில் இறைத் தூதர் முகம்மது நபியை அகௌரவப்படுத்தி கேலிச் சித்திரமொன்றைப் பதிவேற்றியதைத் தொடர்ந்து மலேசிய அரச சார்பற்ற நிறுவனமொன்று ஆர்ப்பாட்டத்தில் ஈடுபட்டது. குறித்த நபர் தற்போது கைது செய்யப்பட்டுள்ளார்.
-Vidivelli