அம்பாறை மாவட்டத்திலுள்ள நுரைச்சோலை சுனாமி வீட்டுத் திட்டத்தின் வீடுகளை தகுதி உடையவர்களுக்கு விரைவில் பகிர்ந்தளிப்பதற்கான நடவடிக்கைகள் முன்னெடுக்கப்பட்டு வருவதாக அம்பாறை மாவட்ட செயலாளர் டி.எம்.எல்.பண்டாரநாயக தெரிவித்தார்.
அம்பாறை மாவட்டத்திலுள்ள பிரதேச செயலகங்கள் தோறும் வீடுகள் கேட்டு விண்ணப்பித்தவர்களுக்கான காணிக் கச்சேரி நேர்முகத் தேர்வு இடம்பெற்று வருவதாகவும் அரசாங்க அதிபர் மேலும் தெரிவித்தார்.
அம்பாறை, அக்கரைப்பற்று பிரதேச செயலகத்திற்குட்பட்ட நுரைச்சோலை சுனாமி 500 வீட்டு த்திட்டத்தினை அம்பாறை மாவட்ட மக்களுக்கு பகிர்ந்தளிக்குமுகமாக சாய்ந்தமருது பிரதேச செயலகத்தில் இடம்பெற்ற காணி கச்சேரியில் 660 விண்ணப்பதாரிகள் கலந்து கொண்டனர். சாய்ந்தமருது பிரதேச செயலகப் பிரிவில் நுரைச்சோலை வீடுகள் கோரி விண்ணப்பித்தவர்களுக்கான நேர்முகத் தேர்வு சாய்ந்தமருது பிரதேச செயலக கூட்ட மண்டபத்தில் கடந்த வெள்ளியன்று இடம்பெற்றது.
இந் நேர்முகத் தேர்வுக்கு அம்பாறை மாவட்ட உதவிக் காணி ஆணையாளர் திருமதி ஏ.எல்.ஐ.பானு, மாவட்ட காணி உத்தியோகத்தர் எம்.கே.எம்.முசம்மில், சாய்ந்தமருது பிரதேச செயலக காணி உத்தியோகத்தர் ஜே.ஏ.ஹஸ்மி, அபிவிருத்தி உத்தியோகத்தர்களான ஏ.சுதா, எம்.ஜெய்சங்கர், முகாமைத்துவ உதவியாளர் ஏ.எம்.ஹம்சார் உள்ளிட்ட கிராம உத்தியோகத்தர்கள், பொதுமக்கள் எனப் பலரும் கலந்து கொண்டனர்.
சவூதி அரசினால் நிர்மாணித்துக் கொடுக்கப்பட்ட நுரைச்சோலை சுனாமி 500 வீடுகளைக் கொண்ட இவ்வீட்டுத்திட்டத்தினை பெற்றுக்கொள்ள சாய்ந்தமருது பிரதேச செயலகப் பிரிவிலிருந்து 660 பேர் விண்ணப்பித்து நேர்முகத் தேர்வுக்குத் தோற்றியமை குறிப்பிடத்தக்கது.
அனைத்து பிரதேசங்களிலும் விண்ணப்பங்கள் கோரப்பட்டு விண்ணப்பித்தவர்களுக்கான காணிக் கச்சேரிகள் இடம்பெற்று வருவதாகவும். இவை நிறைவு பெற்றதன் பின்னர் தகுதி உடையவர்களுக்கும் சுனாமியினால் பாதிக்கப்பட்டவர்களுக்கும் விரையிவில் பகிர்ந்தளிப்பதற்கான நடவடிக்கை முன்னெடுக்கப்படும் என அம்பாறை மாவட்ட செயலாளா் டி.எம்.எல்.பண்டாரநாயக தெரிவித்துள்ளார்.
-Vidivelli