நாட்டில் இனவாத அரசியலுக்கு முற்றுப்புள்ளி வைத்தவர் ரணில்
முஸ்லிம்கள் சரியான தீர்மானத்தை எடுக்க வேண்டும் என்கிறார் அமைச்சர் அலிசப்ரி
ஜனாதிபதித் தேர்தலுக்கு 5 நாட்களே இருக்கும் நிலையில் ஜனாதிபதி ரணில் விக்ரமசிங்ஹவுக்கு ஆதரவாக இறுதிக்கட்ட பிரசார நடவடிக்கைகளில் மும்முரமாக ஈடுபட்டுக்கொண்டிருக்கும் வெளிவிவகாரம், நீதி, சிறைச்சாலைகள் மறுசீரமைப்பு அமைச்சர் யூ.எல்.எம். அலி சப்ரியை நேற்று முன்தினம் திங்களன்று மாலை கொழும்பிலுள்ள அவரது இல்லத்தில் நேர்காணலுக்காக சந்தித்தோம்.
இதன்போது, இஸ்லாத்தின் பெயரில் அரசியல் வியாபாரம் செய்யக்கூடாது. தூய்மையான முறையில் முன்மாதிரியாக நடந்து பன்மைத்துவ கலாசாரம் பேணப்படுகின்ற இந்த நாட்டில் மாற்று மத மக்களிடையே முஸ்லிம்கள் பற்றியும் இஸ்லாம் குறித்ததுமான நல்லபிப்பிராயத்தை ஏற்படுத்தும் வகையில் நடந்துகொள்ள வேண்டும். நான், இலங்கை அரசியலில் பதியுதீன் மஹ்மூதின் வழிமுறைகளை அதிகம் பின்பற்றுகிறேன். ரீ.பீ.ஜயா, ஏ.சி.எஸ்.ஹமீதின் அணுகுமுறைகளிலும் ஈர்க்கப்பட்டிருக்கிறேன் என்ற தனது அரசியல் நிலைப்பாட்டை தெரிவித்தார் அமைச்சர் அலி சப்ரி.
அவருடனான முழுமையான நேர்காணலை விடிவெள்ளி வாசகர்களுக்காக இங்கு தருகிறோம்.
நேர்கண்டவர்: எஸ்.என்.எம்.சுஹைல்
சுயாதீன வேட்பாளராக Gas Cylinder சின்னத்தில் போட்டியிடும் ஜனாதிபதி ரணில் விக்கிரமசிங்ஹவை ஏன் ஆதரிக்க வேண்டும்?
இன்று எந்த வேட்பாளர்களும் இனவாதத்தையும் மதவாதத்தையும் முற்படுத்தி அரசியல் செய்யவில்லை. எல்லோரும் 13 ஐ அமுல்படுத்த வேண்டும் என்ற நிலைப்பாட்டிற்கு வந்துள்ளனர். இன்று இவ்வாறானதொரு நிலைமை ஏற்படுவதற்கு காரணமாக இருப்பவர் இன்றைய ஜனாதிபதி ரணில் விக்கிரமசிங்ஹதான். அவர் இந்த நாட்டை ஆட்சி செய்தபோது, இனவாதம், மதவாதத்தையெல்லாம் மூட்டைக்கட்டி ஓரத்தில் போட்டுவிட்டு நல்லாட்சியொன்று புரிந்தார். அதன் விளைவே, இன்றைய இந்த நல்லிணக்க மற்றும் புதியவழி அரசியல் கலாசாரமாகும். அனைத்து தரப்பையும் இணைத்துக்கொண்டு ஜனாதிபதி, ஆட்சி புரிந்தமையால் இதுவொரு பிரச்சினையாகவே இன்று பார்க்கப்படுவதில்லை. இது பாரிய வெற்றியாகும்.
அடுத்து, இந்த மூன்று பிரதான வேட்பாளர்களையும் எடுத்து நோக்கினால், யாருக்கு அனுபவம் இருக்கிறது, யார் நாட்டை நிர்வகித்து காட்டியுள்ளார் என்பதை பார்க்கமுடியும். உண்மையில் அனுரகுமார திஸாநாயக்க ஏற்கனவே விவசாய அமைச்சராக பதவி வகித்துள்ளார். அப்பதவி ஊடாக என்ன செய்தார் என்பதை எடுத்துக் காட்டுவதற்கும் எதுவுமே இல்லை.
மேலும், சஜித் பிரேமதாஸ வீடமைப்பு நிர்மாணத்துறை மற்றும் கலாசார அமைச்சராக பதவியில் இருந்திருக்கிறார். இந்த காலப்பகுதியில் அரச பொறியியல் கூட்டுத்தாபனம் திவாலானது. கலாசார நிதியத்தின் 8 பில்லியன் ரூபா பகிர்ந்தளிக்கப்பட்டது. நிதிகள் கிடைக்கும்போது வீட்டுத் திட்டங்களை கொண்டுவர முடியும். இவைதான் அவரது சாதனைகளாக உள்ளது.
ஆனால், ஜனாதிபதி விக்ரமசிங்ஹ நாடு மிகவும் இக்கட்டான நிலைமையில் மூன்று தடவைகள் நல்லதொரு தலைமைத்துவத்தை வழங்கியிருக்கின்றார். அவருடைய அனுபவம் எல்லோருக்கும் தெரியும். வர்த்தக கைத்தொழில் மற்றும் முதலீட்டு அமைச்சராக பியகமையை வர்த்தக வலயமாக மாற்றினார், கல்வி அமைச்சராக பல கல்விச் சீர்திருத்தங்களை கொண்டுவந்தார். நல்லாட்சி அரசாங்கத்தில் அவர் கொண்டுவந்த வெள்ளை அறிக்கை நடைமுறைக்கு வந்திருந்தால் நாடு நல்ல முன்னேற்றத்தை கண்டிருக்கும், எனினும் மக்கள் விடுதலை முன்னணி அதற்கு எதிராக நின்று அந்த திட்டத்தை தடுத்தது.
93 இல் நாட்டின் பல முக்கிய தலைவர்கள் கொல்லப்பட்டு ஸ்திரமற்ற அரசியல் சூழ்நிலையொன்று உருவாகியபோது, ரணில் விக்ரமசிங்ஹ ஐக்கிய தேசியக் கட்சிக்கு தலைமைதாங்கி, பிரச்சினைகளை சுமுகமாக தீர்த்துவைத்தார்.
அத்தோடு, 1999, 2000 ஆம் ஆண்டாகும்போது பொருளாதார வீழ்ச்சியொன்று ஏற்பட்டு நிதி நெருக்கடி நிலைமையொன்றுக்கு நாடு முகம்கொடுத்தது. 2001 ஆம் ஆண்டு ரணில், ஆட்சியைக் கைப்பற்றியபின்னர், 2004 ஆகும்போது பெரிய மாற்றமொன்றை ஏற்படுத்தி பொருளாதார நிலைமையை உயர்த்தினார். 2015 இலும் பல பொருளாதார கொள்கை மாற்றங்களை கொண்டுவந்தார்.
2022 இல் அரசியல் ஸ்திரமின்மை ஏற்பட்டு, நாடு பொருளாதார நெருக்கடிக்கு முகம்கொடுத்தது. அன்று இருந்த நிலைமையையும் தற்போது இருக்கும் நிலைமையையும் யாருக்கும் விளங்கப்படுத்த வேண்டிய தேவை இருக்காது. இன்று ஜனாதிபதி ரணில் பாரிய மாற்றமொன்றை ஏற்படுத்தியிருக்கிறார். எனவே, அவரின் ஆட்சியை தொடர்ந்து கொண்டுசெல்வதா, அல்லது நாட்டை இன்னொருவரிடம் கொடுத்து மீண்டும் ஒருமுறை சோதித்து பார்ப்பதா என்பதுதான் இன்றுள்ள நிலைமையாகும். இது பரிசோதித்துப் பார்க்கும் தருணமல்ல. எனவே, இப்போதைக்கு ரணில் விக்கிரமசிங்ஹதான் பொருத்தம் என நாம் கருதுகிறோம்.
கோட்டா அரசாங்கத்திலும் ரணில் அரசாங்கத்திலும் நீங்கள் முக்கிய பதவியில் இருந்துள்ளீர்கள். இரு ஆட்சியாளர்களிடமும் உள்ள வித்தியாசம் என்ன?
நாட்டின் பொருளாதாரத்தை வழிநடத்துவதற்கு பூரண பொருளாதார திட்டம் குறித்த அறிவு இருக்க வேண்டும். எல்லோரும், நாம் நாட்டை முன்னேற்றுவோம், இலவசமாக வழங்குவோம் என்று கூறுகின்றனர். ஆனால், வருவாய் எவ்வாறு வரும் என்பதை தெளிவுபடுத்தவில்லை.
ஜனாதிபதி கோட்டாபய நல்லெண்ணத்துடன் வரியை குறைப்பதாக கூறினார். இதனால், அரச வருமானம் குறைந்தது. அதனை நிவர்த்தி செய்வதற்கான வழிமுறை அவரிடம் இருக்கவில்லை.
ஜனாதிபதி கோட்டாவுடன் ‘வியத்மக’ என்ற குழு இருந்ததல்லவா? அவர்கள் இதுவிடயத்தில் சரியான அறிவுரை வழங்கவில்லையா?
வியத்மக கடந்த ஜனாதிபதித் தேர்தல் பிரசாரத்தில் இருந்ததே தவிர, அதன் பிறகு அவர் அந்த அணியை அரசியலில் தொடர்புபடுத்திக்கொள்ளவில்லை. அவரது பொருளாதார குழுவில் முன்னாள் மத்திய வங்கி ஆளுநர்களான பேராசிரியர் டபிள்யு.டீ.லக்ஸ்மன், நிவாட் கப்ரால், திறைசேரியின் செயலாளர் அட்டிகல மற்றும் பீ.பீ.ஜயசுந்தர ஆகியோர் இருந்தனர். இவர்களே, கோட்டாபயவை வழிநடத்தினர்.
இந்த நெருக்கடியான நிலையிலிருந்து நாட்டை எவ்வாறு ஜனாதிபதி ரணில் விக்கிரமசிங்க மீட்டெடுத்தார்?
அரச தலைமைத்துவத்திற்கு பொருளாதார மூலக் கூறுகள் குறித்து தெரிந்திருக்க வேண்டும். எந்தளவு அரச வருமானம் இருக்க வேண்டும் என்பது பற்றிய அறிவு இருப்பது அவசியமாகும். இதை யாருக்கும் சொல்லி புரிய வைக்க முடியாது. ஜனாதிபதியான பிறகு ஒருவருக்கு இதுபற்றி பாடம் எடுக்க முடியாது.
ஜனாதிபதி ரணில் விக்கிரமசிங்ஹவுக்கு பொருளாதாரம் குறித்ததான முழுமையான அறிவு இருந்தது. இதனால், அவரால் இலங்கையின் நிலைமையை புரிந்துகொண்டு செயற்பட முடிந்தது. அவர், பொருளாதார கொள்கை திட்டத்தை வகுத்து நாட்டை மேலும் ஆபத்தான நிலைமைக்கு செல்வதை தடுத்தார்.
இந்த இடத்தில் ஜனாதிபதிக்குத்தான் பொருளாதாரம் குறித்த பூரண அறிவு இருக்க வேண்டும். அவரது அணிக்கு அல்ல என்பதை புரிந்துகொள்ள முடிந்தது.
முன்னாள் ஜனாதிபதி கோட்டபாயவிடம் நல்ல அணி இருப்பதாகவே வெளிக்காட்டபட்டது. என்னதான் நல்ல திறமையான அணி பின்னால் இருந்தாலும் ஜனாதிபதிக்கு பொருளாதாரம் குறித்த அறிவு இருக்க வேண்டும் என்பதை நாம் உணர்ந்துள்ளோம்.
முன்னாள் ஜனாதிபதி கோட்டபாயவிடம் நல்ல அணி இருப்பதாகவே வெளிக்காட்டபட்டது. என்னதான் நல்ல திறமையான அணி பின்னால் இருந்தாலும் ஜனாதிபதிக்கு பொருளாதாரம் குறித்த அறிவு இருக்க வேண்டும் என்பதை நாம் உணர்ந்துள்ளோம்.
நான், நிதி அமைச்சராக இருக்கும்போது, தற்போது பதவியிலுள்ள மத்தியவங்கி ஆளுநர் கலாநிதி நந்தலால் மற்றும் திறைசேரியின் செயலாளர் சிறிவர்தன ஆகியோரையும் நியமித்திருந்தேன். ஜனாதிபதி ரணில் விக்கிரமசிங்க நல்லதொரு அணியையும் உருவாக்கிக்கொண்டார். இருக்கின்றவர்களை பயன்படுத்திக்கொள்வதே ஆளுமையுள்ள தலைமைத்துவமாகும்.
உங்களை ஜனாதிபதி கோட்டா பயன்படுத்திய விதத்திற்கும் ஜனாதிபதி ரணில் பயன்படுத்திய விதத்திற்கும் வித்தியாசம் இருக்கின்றனவா?
என்னை கோட்டா அமைச்சராக நியமித்தபோது பெரும் எதிர்ப்பொன்று இருந்தது. அப்போது ஒரு முஸ்லிம் விரோதப் போக்கொன்று இருந்தது. எல்லோரும் அவற்றை மறந்துவிட்டனர். நான் ஒரு சட்டத்தரணி என்பதால் சட்ட மறுசீரமைப்பை மேற்கொள்ளச் சொன்னார்.
ஆனால், ஜனாதிபதி ரணில் விக்ரமசிங்க எனது திறமையை சரியாக புரிந்து பயன்படுத்திக்கொண்டார். அவருடன், இதுதான் முதற்தடவையாக வேலை செய்கிறேன். இதுவே, அவரது ஆளுமையாகும்.
அரசியல் ஸ்திரமற்ற நிலைமை, பொருளாதார நெருக்கடி மற்றும் நிர்வாக சீரின்மையால் வீழ்ச்சியடைந்த நாட்டை ரணில் அல்லாத வேறு யார் பொறுப்பெடுத்திருந்தாலும் இரண்டு வருடங்களில் நாடு சீரான நிலைமைக்கு திரும்பியிருக்கும் என்று எதிக்கட்சியினர் கூறுகின்றனரே, அது சாத்தியமா?
அப்படியென்றால், எதிரணியினர் நாட்டை அப்போது பொறுப்பெடுத்திருக்கலாமே. எதிர்க்கட்சித் தலைவர் ஏன் நாட்டை பெறுப்பேற்கவில்லை. யார் எடுத்திருந்தாலும் செய்திருக்க முடியும் என்பது பிழையான கருத்து.
தனது எதிர்கால அரசியலை கருத்திற்கொள்ளாமல் கடினமான தீர்மானங்களை அவர் எடுத்தார். ஜனாதிபதி ரணில் விக்ரமசிங்ஹ மிகவும் வித்தியாசமானவர்.
ஒரு தறுவாயில் சர்வதேச நாணய நிதியத்துடனான பேச்சுவார்த்தைகள் தாமதமாகின, இருந்தாலும் ஜனாதிபதி ரணிலால் சமந்தா பவருடன் தொலைபேசியில் கதைக்க முடியுமாக இருந்தது. ஜப்பான், இந்தியா மற்றும் பிரான்ஸ் நாட்டின் உதவியுடன் ஒரு குழுவை நியமித்து இந்த பிரச்சினையை தீர்த்து நாட்டை முன்னேற்றிச் செல்ல முடியுமாக இருந்தது.
இந்த நாட்டில் தற்போது ஏற்பட்டுள்ள மாற்றத்திற்கு ஜனாதிபதியின் அனுபவம், தனிப்பட்ட சர்வதேச தொடர்புகள் மிகவும் உதவியாக இருந்தது.
94 களுக்கு பின்னர் நாட்டின் கூட்டாட்சி முறையே இருப்பதால், இணக்க அரசியல் நடத்த வேண்டியுள்ளது. சஜித், அனுர வெற்றிபெற்றால் ஸ்திரமற்ற அரசியல் நிலைமை மீண்டும் தோன்றுமா?
ஜனாதிபதி ரணில் தோற்கடிக்கப்பட்டால் அப்படியொரு நிலைமை ஏற்படும் வாய்ப்பு இருக்கிறது. கூட்டாட்சி அரசாங்கமொன்றை முகாமைத்துவம் செய்வதற்கு சிறந்த தலைமைத்துவம் அவசியமாகும்.
பொதுஜன பெரமுனவின் கட்சித் தலைமையும், ஸ்தாபகரும் ஒருபுறம் இருக்கும்போது, அக்கட்சியின் 98 பாராளுமன்ற உறுப்பினர்களும் ஜனாதிபதி ரணில் விக்ரமசிங்ஹவுக்கு ஆதரவளிக்கிறார்கள். நாங்கள் கலந்தாலோசித்து ரணிலை ஆதரிக்கவில்லை. அவரவர் தனிப்பட்ட தீர்மானத்தின் அடிப்படையிலேயே ரணிலை ஆதரிக்கிறோம். இதற்கு காரணம், ரணிலின் நிர்வாகத் திறமைகளையும், முகாமைத்துவத்தையும், கொள்கை வகுப்பையும் நாம் எல்லோரும் கடந்த இரண்டு வருடங்களில் கண்டுகொண்டோம்.
ஆபத்தான நிலைமையில் ரணிலை பயன்படுத்திவிட்டு, தேவை முடிந்த பிறகு தூக்கி எறிவது சரியானதா என்ற வினா எங்களுக்குள் எழுந்தது.
ஆபத்தான நிலைமையில் ரணிலை பயன்படுத்திவிட்டு, தேவை முடிந்த பிறகு தூக்கி எறிவது சரியானதா என்ற வினா எங்களுக்குள் எழுந்தது.
இவர் ஐந்து தடவை பிரதமராக இருந்துள்ளார் என பலரும் கூறுகின்றனர். இந்த நாட்டில் பிரதமர் ஒரு அமைச்சரவை அந்தஸ்துள்ள அமைச்சர் போலவே இருக்க முடியும்.
பிரதமர் ரணில் விக்கிரமசிங்ஹவுக்கும் ஜனாதிபதி ரணில் விக்கிரமசிங்ஹவுக்குமிடையில் மாற்றங்கள் விளங்குகின்றது. தற்போது, அவரின் வேலைத்திட்டங்களை அச்சமின்றி முன்னெடுக்க முடிகிறது. ஜனாதிபதியிடம் எந்தவித குறையுமில்லை என நான் கூறவில்லை, ஆனாலும், இருக்கின்ற மூவரில் அவர் தான் இப்போது ஜனாதிபதி பதவிக்கு பொருத்தமானவர்.
இதனால்தான், ஐக்கிய மக்கள் சக்தியில் சிரேஷ்ட தலைவர்கள் ஐவர் அதிலிருந்து வெளியேறும் நிலை ஏற்பட்டது. சரத்பொன்சேகா, குமாரவெல்கம, ராஜித சேனாரத்ன, தலதா அத்துக்கோரல மற்றும் ஏ.எச்.எம். பௌஸி ஆகியோர் அதிலிந்து வெளியேறினர். முதலாவது, சஜித்தால் வெல்ல முடியாது. இரண்டாவது, வென்றாலும் நாட்டை வழிநடத்த முடியாமல் போய்விடும்.
ஜனாதிபதி கோத்தா நல்ல மாற்றங்களை ஏற்படுத்துவார் என்று நானும் நம்பினேன். யுத்தத்தை வென்றெடுக்க பங்களிப்பு செய்தார், கொழும்பை மாற்றியமைத்தார், ஆனால், ஜனாதிபதிக்குரிய தகைமை இதுவல்ல என உள்ளே சென்று பார்த்தபிறகுதான் தெரிந்தது.
சஜித்தால் செய்ய முடியாது என்று 25, 30 வருடங்களாக அரசியல் செய்தவர்களுக்கு நன்றாகத் தெரியும். அரசாங்கத்தை கொண்டுசெல்வதென்பது இலகுவான காரியமல்ல, அதற்கு சிறந்த ஆளுமையும், நிர்வாகத்திறமையும் வேண்டும்.
பொதுஜன பெரமுனவுக்கும் ரணில் விக்கிரமசிங்ஹவுக்கும் டீல் இருப்பதாகவும், இதனடிப்படையிலேயே நாமல் தனித்து களமிறங்கியுள்ளதாகவும் பொதுஜன பெரமுனவின் ஏனைய உறுப்பினர்கள் ரணிலை ஆதரிப்பதாகவும் குற்றச்சாட்டுகள் முன்வைக்கப்படுகின்றதே, இப்படியொரு டீல் இருக்கிறதா?
நாமல் ராஜபக்ச பெறப்போகும் வாக்குகள் ரணில் விக்ரமசிங்ஹ இழக்கப்போகும் வாக்குகளாகவே கருத முடியும். ஏனெனில், ஐக்கிய தேசியக் கட்சி தற்போது பலவீனமடைந்துள்ளது. அவர்களிடம் பெரிய வாக்குவங்கி கிடையாது. எனவே, பொதுஜன பெரமுனவின் வாக்குகளையே ரணில் பெற வேண்டியுள்ளது. இதனால், நாமல் களமிறங்கியது ரணிலுக்குத்தான் பாதிப்பு.
கோத்தா பெற்ற 69 இலட்சம் வாக்குகளில் பெரிய தொகை வாக்கு ரணிலுக்கு வர வேண்டும். ஒரு குறிப்பிட்ட தொகை அனுரவுக்கும் செல்லும். நாமல் 5 இலட்சம் வாக்குகள் எடுத்தாலும் அது ரணிலுக்கு கிடைக்க வேண்டிய வாக்குகளாகவே கருத வேண்டியுள்ளது.
இதனால், உண்மையிலேயே டீல் சஜித்துக்கும் ராஜபக்சாக்களுக்கும் இடையில்தான் இருக்கிறது. நாமல் எவ்வளவு வாக்குகள் எடுக்கின்றாரோ அவ்வளவுக்கும் ரணிலின் வெற்றிவாய்ப்பு குறையும், சஜித்துக்கு வாய்ப்பாக அமையும் என்பதை நாங்கள் புரிந்துகொள்ள முடியும்.
இதனால், உண்மையிலேயே டீல் சஜித்துக்கும் ராஜபக்சாக்களுக்கும் இடையில்தான் இருக்கிறது. நாமல் எவ்வளவு வாக்குகள் எடுக்கின்றாரோ அவ்வளவுக்கும் ரணிலின் வெற்றிவாய்ப்பு குறையும், சஜித்துக்கு வாய்ப்பாக அமையும் என்பதை நாங்கள் புரிந்துகொள்ள முடியும்.
ரணிலை ஆதரிக்கும் தீர்மானத்தை எடுத்த பிறகு நீங்கள் ராஜபக்சாக்களுடன் டீலில் இருக்கின்றீரா?
நான் ரணிலை ஆதரிக்கும் நிலைப்பாட்டை எடுப்பதற்கு முன்னர் முன்னாள் ஜனாதிபதி மஹிந்த ராஜபக்சவை பாராளுமன்ற கட்சியின் குழுத் தலைமை என்ற அடிப்படையில் சந்தித்து கதைத்தேன். ‘இப்போதைக்கு ரணிலை ஆதரிப்பதே சிறந்த தீர்மானமாக இருக்கும். ஐந்தாண்டுகள் அவருக்கு வாய்ப்பளிப்போம், பொருளாதாரத்தை ஸ்திர நிலைமைக்கு கொண்டுவருவதற்கு அவகாசம் கொடுப்போம், ஐந்தாண்டுகள் பின்பு கட்சி அடிப்படையில் செயற்படுவோம்’ என்றேன். அவரும் அதனை ஏற்றுக்கொண்டார். ஆனால், பின்னர் துரதிஸ்டவசமாக அவர்களது குழுவின் தீர்மானத்திற்கமைய நாமலை களமிறக்கினர். பெரும்பான்மையானவர்கள் ஏற்றுக்கொள்ளாத போதும் ராஜபக்சாக்களே அந்த தீர்மானத்தை எடுத்தனர். அதற்கு பிறகு நாங்கள் அரசியல் ரீதியில் எந்த தொடர்பையும் கொண்டிருக்கவில்லை.
இருந்தபோதிலும், கடந்த வாரம் எனது தாயார் இறையடி சேர்ந்தார். இதன்போது, முன்னாள் ஜனாதிபதிகளான மஹிந்த ராஜபக்ச, கோத்தாபய ராஜபக்ச ஆகியோர் எனது வீட்டுக்கு வந்து ஆறுதல் கூறிச் சென்றனர். நாமல் ராஜபக்சவும் தொலைபேசியில் தொடர்புகொண்டு என்னுடன் கதைத்தார்.
இது எனது தனிப்பட்ட தொடர்பாகும். ஆனால், அரசியல் ரீதியில் நான் இப்போது ரணில் விக்கிரமசிங்கவை ஆதரிக்கும் தீர்மானத்தை மிகத் தீர்க்கமாகவே எடுத்திருக்கின்றேன். அதன்படியே தற்போதைய அரசியல் நகர்வுகளை முன்னெடுத்து வருகின்றேன்.
நாடு இன்னும் பொருளாதார நெருக்கடியிலிருந்து விடுபடவில்லை. இதிலிருந்து மீண்டு வருவதற்கு ரணில் விக்கிரமசிங்கவின் திட்டங்கள் கைகொடுக்குமா? அவற்றை இன்னும் மேம்படுத்தவேண்டியுள்ளதா?
இந்த நாடு பாதாளத்தை நோக்கிச் சென்றது. இதை இன்னும் பாதாளத்துக்கு செல்லவிடாது நிறுத்துவதே எமது முதலாவது வேலையாக இருந்தது.
அடுத்தபடியாக, நாம் டொலர் இருப்பை அதிகரிக்க வேண்டிய நிலை ஏற்பட்டது. இறக்குமதியை குறைத்தோம். ரூபாவின் பெறுமதியை அதிகரிக்கச் செய்தோம். அரச வருவாயை அதிகரித்தோம். சுற்றுலா துறையை மேம்படுத்தினோம். தொடர்ந்து இந்த பணிகள் முன்னெடுக்கப்படுகின்றன.
மூன்றாவதாக, உள்நாட்டு உற்பத்தியை அதிகரிக்கும் வேலைத்திட்டங்களை முன்வைத்துள்ளோம். ஏற்றுமதியை ஊக்குவிக்கும் திட்டங்களை கொண்டுவந்துள்ளோம். இதற்கு இன்னும் 5 வருடங்கள் தேவை. அத்தோடு, பொருளாதார பரிணாமம் தொடர்பான சட்டமூலத்தை கொண்டுவந்துள்ளோம். நாம் இதுவரை மேற்கொண்டுள்ள மாற்றங்களை மேம்படுத்தும் விதத்திலேயே இதனை செய்ய வேண்டியுள்ளது.
சஜித் கூறுவதுபோல் எல்லாவற்றையும் இலவசமாக கொடுக்க முடியாது. இலவசமாக கொடுப்பதற்கும் வருவாய் இருக்க வேண்டும். வரியையும் குறைப்பதாக கூறுகிறார். என்ன விளையாட்டு இது. இதே, பிழையைத்தான் கோட்டாபய செய்தார். நாங்கள் மீண்டும் 2022 கோட்டாபய யுகத்துக்கு செல்ல வேண்டுமா என்று சிந்திக்க வேண்டியுள்ளது.
சஜித் கூறுவதுபோல் எல்லாவற்றையும் இலவசமாக கொடுக்க முடியாது. இலவசமாக கொடுப்பதற்கும் வருவாய் இருக்க வேண்டும். வரியையும் குறைப்பதாக கூறுகிறார். என்ன விளையாட்டு இது. இதே, பிழையைத்தான் கோட்டாபய செய்தார். நாங்கள் மீண்டும் 2022 கோட்டாபய யுகத்துக்கு செல்ல வேண்டுமா என்று சிந்திக்க வேண்டியுள்ளது.
System Change ஐதான் இன்றைய இளைஞர்கள் எதிர்பார்க்கின்றனர். இது குறித்து ஜனாதிபதியிடம் தெளிவான திட்டங்களை காண முடியவில்லையே?
நாங்கள் System Changeஐ செய்து காட்டியுள்ளோம். பெற்றோலியம் கூட்டுத்தாபனம், நீர்வழங்கல் சபை, மின்சார சபை, போக்குவரத்து சபை என்பனவும் பெரும் நஷ்டத்தில் இயங்கின. அதில் மாற்றங்களை ஏற்படுத்தியதனால் இன்று வருமானம் ஈட்டும் அரச நிறுவனங்களாக மாற்றியுள்ளோம். விலை சூத்திரத்தை பயன்படுத்தியதால் இந்த நிலைமை ஏற்பட்டிருக்கிறது.
டிஜிடல் முறைமையை நாம் கட்டம் கட்டமாக அறிமுகப்படுத்திக்கொண்டு செல்கிறோம். வலு சக்தி மற்றும் புதுப்பிக்கப்பட்ட சக்தி வளங்கள் உற்பத்தி செய்வது குறித்து கவனத்தை செலுத்துகிறோம்.
கல்வி முறை மாற்றம் என்பது ரணில் விக்கிரமசிங்கவின் தாரக மந்திரமாக இருக்கின்றது. அதனை முன்னெடுப்பதற்கான முனைப்புகளில் அவர் ஈடுபட்டு வருகிறார். தொழிநுட்பம், தொழில்முறைக் கல்வி மற்றும் செயற்கை நுண்ணறிவு (AI) கல்வியையும் வலுவூட்டும் திட்டங்களை முன்வைத்துள்ளார். மாகாண மட்டங்களில் தனியார் பல்கலைக்கழக கல்லூரிகளை நிறுவுவதற்கும் திட்டமிட்டிருக்கிறோம்.
நவீனமயப்படுத்தப்பட்ட விவசாய முறையையும் அறிமுப்படுத்தவுள்ளோம். 28 வீத விவசாயிகள் நாட்டில் இருந்தாலும் 8 வீத உற்பத்தியையே அவர்களால் வழங்கமுடிகிறது. இதனை பன்மடங்கால் அதிகரிப்பதற்கு வேலைத்திட்டங்கள் முன்மொழியப்பட்டுள்ளது.
தொழிற் பேட்டைகளை உருவாக்கி, வர்த்தக வலயங்களை மேம்படுத்தவும் திட்டமிட்டுள்ளோம்.
ரணில் மேற்கத்திய நாடுகளின் முகவர் என்ற குற்றச்சாட்டை கடந்த காலங்களில் பலரும் முன்வைத்து விமர்சித்து வந்தனர். அவர் நாட்டின் வெளிநாட்டுக் கொள்கையில் மாற்றம் ஏற்படுத்தியுள்ளாரா? புவிசார் அரசியல் ஆதிக்க சக்திகளுடனான இராஜதந்திர உறவுகள் எப்படியிருக்கிறது?
ரணில் விக்கிரமசிங்க ஒரு புத்திசாலி, நல்ல இராஜதந்திரி. புவிசார் அரசியலை அவர் சிறப்பாக கையாளக்கூடியவர். இலங்கை ஒரு சுதந்திர நாடு என்ற அடிப்படையில் நாம் எந்த முகாமுக்கும் செல்வதில்லை. எல்லா தரப்புடனும் நாம் இணைந்து செயற்படுகின்றோம்.
உலகில் அமெரிக்காவின் ஆதிக்கம் இருக்கும் நேரத்தில் ஏன் இலங்கை ஈரானுடன் நெருக்கமாக செயற்பட்டது என எம்மிடம் மேற்கத்திய நாடுகள் கேள்வி எழுப்பின. வேறு யாருடைய எதிரியும் எமக்கு எதிரி அல்ல என்ற பதிலை நாம் அவர்களுக்கு தெளிவாக கூறினோம். ஈரானுடன் நல்ல தொடர்புள்ளது. இஸ்லாமிய நாடுகளுடனும் சிறந்த வெளியுறவுகளுடன் செயற்படுகின்றோம். பலஸ்தீனியர்களுக்காக தொடர்ந்தும் குரல்கொடுத்து வருகின்றோம்.
இலங்கை விடயத்தில் சர்வதேச சக்திகளின் ஆதிக்கம் இருப்பதாக என்னிடம் எந்த ஆதாரமும் இல்லை. ஆனால், இலங்கையை அடிமைப்படுத்துவதற்கு சில ஆதிக்க சக்திகள் எத்தனிக்கக் கூடும். பொம்மை அரசியல் தலைமைகள் உருவாக வேண்டும் என்று எதிர்பார்க்கின்றனர்.
இலங்கை விடயத்தில் சர்வதேச சக்திகளின் ஆதிக்கம் இருப்பதாக என்னிடம் எந்த ஆதாரமும் இல்லை. ஆனால், இலங்கையை அடிமைப்படுத்துவதற்கு சில ஆதிக்க சக்திகள் எத்தனிக்கக் கூடும். பொம்மை அரசியல் தலைமைகள் உருவாக வேண்டும் என்று எதிர்பார்க்கின்றனர்.
ஜனாதிபதி ரணில் விக்கிரமசிங்ஹ ஒரு திடமான ஆளுமை. அவரை ஏமாற்ற இயலாது, அச்சுறுத்தவும் முடியாது, கட்டுப்படுத்தவும் முடியாது. எதிர்த்து போராடக் கூடியவராக ரணில் இருக்கிறார். அத்தோடு, இராஜதந்திர ரீதியில் ஏனைய நாடுகளடுன் செயற்படுவதற்கு அவர் அனுபவம் பெற்றுள்ளார்.
இவருடைய காலத்தில் சீனா, இந்தியா, அமெரிக்கா, ஜப்பான் மட்டுமன்றி இஸ்லாமிய நாடுகளுடனும் சீரான உறவை பேணமுடிந்தது. இந்த திறமை இப்போது இருக்கின்ற ஜனாதிபதி வேட்பாளர்களில் ரணில் விக்கிரமசிங்கவுக்கு இருக்கிறது. எனவே, அவரை தவிர வேறு வேட்பாளர்கள் வெற்றிபெற்றால் நாடு ஆதிக்க சக்திகளில் நெருக்கடிகளுக்கு முகம்கொடுக்க நேரிடும்.
பலஸ்தீன விவகாரத்தில் இலங்கையின் நிலைப்பாடு தொடர்ந்து நீடிக்குமா? இஸ்ரேலுக்கு வெளிநாட்டு வேலைவாய்ப்பு பணியாட்களை அனுப்பும் செயற்பாடுகள் எவ்வாறு இருக்கும்?
பலஸ்தீன், இஸ்ரேல் விவகாரத்தில் இலங்கையின் நிலைப்பாடு உறுதியாகவே இருக்கிறது. இலங்கையின் அனைத்து அரசாங்கங்களும் அதை பின்பற்றி வந்துள்ளன. சுதந்திர பலஸ்தீனத்திற்கு நாங்கள் தொடர்ந்து ஆதரவை வெளிப்படுத்துகிறோம்.
அவர்களுக்கு ஆதரவாக ஐக்கிய நாடுகள் சபையிலும் அணிசேரா மாநாட்டிலும் ஜனாதிபதி உரையாற்றினார். காஸா சிறுவர்களுக்கான நிதியை உருவாக்கியுள்ளோம்.
மக்களை உணர்வு ரீதியாக கீழ்படியச் செய்வதற்கு எதிர்க்கட்சிகள் சில பொய் பிரசாரங்களை முன்னெடுக்கின்றன. குறிப்பாக பலஸ்தீனத்தை அங்கீகரிப்பது குறித்து முஸ்லிம் கட்சிகளின் தலைவர்கள் ஒப்பந்தம் செய்துள்ளதாக கூறுகின்றனர். 1987 இல் இலங்கை அரசாங்கம் பலஸ்தீனத்தை அங்கீகரித்துவிட்டது. இவ்வாறான பொய் பிரசாரத்தை மேற்கொள்ளக் கூடாது.
அத்தோடு, இஸ்ரேலில் இலங்கையர்களுக்கான தொழில் வாய்ப்புகள் கிடைத்துள்ளன. இதில் நாம் பல கட்டுப்பாடுகளை விதித்திருக்கிறோம். குறிப்பாக இஸ்ரேலினால் ஆக்கிரமிக்கப்பட்ட பகுதிகளில், குறிப்பாக காஸா மற்றும் மேற்குக் கரை பகுதிகளில் இஸ்ரேல் இலங்கையர்களை வேலைக்கு அமர்த்தக்கூடாது என்ற நிபந்தனையை விதித்திருக்கிறோம்.
உயிர்த்த ஞாயிறு தாக்குதல்கள் தொடர்பான விசாரணைகள் மற்றும் பிரதான சூத்திரதாரிகளை கண்டுபிடிக்கும் நடவடிக்கைகள் மந்தகதியில் இடம்பெறுவதாக குற்றச்சாட்டுகள் முன்வைக்கப்படுகின்றதே. ஏன் அவ்வாறு?
முஸ்லிம் பெயர் தாங்கிய 19 பேர் தான் இந்த தற்கொலை தாக்குதலை நடந்தினர் என்ற கசப்பான உண்மையை நாம் ஏற்றுத்தான் ஆகவேண்டும். இதன்பிறகு இப்படியொரு சம்பவம் இந்த நாட்டில் ஏற்படாதவாறு நாம் பார்த்துக்கொள்ள வேண்டும். இன்னொரு சம்பவம் இடம்பெற்றால் எமது இருப்பு கேள்விக்குறியாகிவிடும்.
இந்த சம்பவத்துடன் நேரடியாக தொடர்புபட்டவர்கள் உயிரிழந்துவிட்டனர். நௌபர் மௌலவி உட்பட 37 பேருக்கு எதிராக நீதிமன்றில் வழக்குத் தாக்கல் செய்யப்பட்டுள்ளது. 23 வழக்குகள் தொடரப்பட்டுள்ளன. அது முடியும்வரை எங்களுக்கு எதுவும் சொல்ல முடியாது.
ஜனாதிபதி மைத்திரிபால சிறிசேனவினால் நியமிக்கப்பட்ட தெரிவுக்குழுவில் மேலும் இருவரை இணைத்து அடுத்த கட்ட விசாரணைகளை மேற்கொள்வதற்கு யாரையாவது பிரேரிக்கும்படி நாம் கர்தினாலிடம் கோரினோம். அவ்வாறு அவசியமில்லை. தற்போதுள்ள குழுவை ஏற்கிறோம் என்றனர்.
இதனை மீள் விசாரணை செய்வதற்காக கடந்த 2 வருடங்களுக்கு முன்பதாக அமெரிக்க புலனாய்வுப் பிரிவின் உதவியை கோரினோம். ஏற்கனவே, முன்னதாக இடம்பெற்ற விசாரணைகளின்போது அவர்கள் உதவி செய்ததாகவும் புதிதாக விசாரிப்பதற்கு எதுவும் இல்லையென்றே எமக்கு பதிலளித்தனர்.
கோட்டா அரசாங்கம் கொவிட் தொற்றால் உயிரிழந்த முஸ்லிம்களின் ஜனாஸாக்களை பலவந்தமாக எரித்தது. இந்த கட்டாய ஜனாஸா எரிப்பு தீர்மானத்தை எடுத்தவர்களுக்கு தண்டனை வழங்க வேண்டும் என்று மக்கள் கோரிக்கை விடுக்கின்றனர். இதுவிடயமாக நடவடிக்கை ஏதும் எடுக்கப்படவில்லையே?
உயிரிழந்தவர் ஒருவரின் இறுதிக் கிரியைகள் எவ்வாறு நடக்க வேண்டும் என்பதை தீர்மானிக்கும் உரிமையை உயிரிழந்தவரின் குடும்பத்திற்கு வழங்குவதற்கான சட்டம் நிறைவேற்றப்பட்டுள்ளது. அத்தோடு, பாதிக்கப்பட்ட மக்களுக்கு நஷ்டஈடு வழங்குவதற்கும் நடவடிக்கை எடுக்கப்பட்டுள்ளது. இதுபோக, ஜனாஸாக்களை எரிப்பதற்கு தீர்மானத்தை எடுத்தவர்களுக்கு தண்டனை வழங்குவதற்கான விசாரணை நடத்துவதற்காக பாராளுமன்ற விசாரனை குழுவொன்று நியமிக்கப்படவுள்ளது. இது மிகப் புத்திசாதுர்யமாக மேற்கொள்ளப்பட்ட தீர்மானமாகும். ஏனென்றால், ஏற்கனவே, ஜனாஸா எரிப்பு விவகரம் தொடர்பில் மீஉயர் நீதிமன்றத்திற்கு கொண்டு செல்லப்பட்ட மனு நிராகரிக்கப்பட்டது. இந்நிலையில் பாராளுமன்ற தெரிவுக்குழு ஊடாக விசாரணைகள் முன்னெடுக்கப்பட்டால்தான் நீதியை பெற்றுக்கொள்ள முடியும் என ஜனாதிபதி நம்புகிறார். அதனடிப்படையில் விசாரணைக் குழுவொன்று நியமிக்கப்படும் என ஜம்இய்யதுல் உலமாவிடம் வாக்குறுதி அளித்திருக்கிறோம்.
சாதாரணமாக நடவடிக்கை எடுக்கச் சென்றால் மீஉயர் நீதிமன்றத்தின் தீர்மானத்தைகாட்டி மீண்டும் நிராகரிக்கப்படக்கூடிய சந்தர்ப்பம் இருக்கிறது. அதனாலேயே பாராளுமன்ற தெரிவுக்குழு நியமிக்கப்படவுள்ளது.
இந்த விடயத்தை பற்றி பேசும் எதிர்க்கட்சிகள் பாராளுமன்றத்தில் எந்தவொரு பிரேரணையையும் கொண்டுவரவும் இல்லை. சட்ட ஏற்பாடுகளை முன்வைக்கவும் இல்லை. வெறுமனே அரசியலுக்காக வீதிகளில் போராடினார்களே தவிர, சட்டரீதியாக தீர்த்துவைக்க முன்வரவில்லை.
ஜனாதிபதி ரணில் விக்கிரமசிங்ஹ, ஜனாஸா எரிப்பு விடயத்தை எதிர்த்தார். அத்தோடு, பேசிப் பேசி இருக்காமல் அதற்கு எதிரான சட்டத்தை கொண்டுவந்தார். நஷ்ட ஈடுவழங்குவதற்கும் அடுத்தகட்ட விசாரணைகளுக்கும் நடவடிக்கைகளை எடுத்து வருகிறார்.
ஜனாதிபதி ரணில் விக்கிரமசிங்ஹ, ஜனாஸா எரிப்பு விடயத்தை எதிர்த்தார். அத்தோடு, பேசிப் பேசி இருக்காமல் அதற்கு எதிரான சட்டத்தை கொண்டுவந்தார். நஷ்ட ஈடுவழங்குவதற்கும் அடுத்தகட்ட விசாரணைகளுக்கும் நடவடிக்கைகளை எடுத்து வருகிறார்.
முஸ்லிம் கட்சிகள் சஜித்தை ஆதரிக்கத் தீர்மானித்திருக்கின்றன. ஆனால் அக்கட்சிகளின் பாராளுமன்ற உறுப்பினர்களும் ஏனைய உறுப்பினர்களும் ரணிலை ஆதரிக்கின்றனர். இப்படியான சூழ்நிலையில் வாக்காளர்கள் குழம்பிப் போயுள்ளார்கள் அல்லவா?
நடுநிலையான, சுயமாக சிந்திக்கும் முஸ்லிம் மக்கள் ரணிலை ஆதரிக்கத் தீர்மானித்துவிட்டனர். முஸ்லிம்கள் ரணிலை எதிர்த்து நிற்பதற்கு காரணமேதும் இல்லை.
இதே முஸ்லிம் தலைவர்கள்தான், 2001, 2004,2005,2010, 2015 இலும் ரணில்தான் இனவாதமற்ற அரசியல்வாதிகள் என்று மக்கள் மத்தியில் பிரசாரம் செய்துவந்தனர்.
எங்களுடைய முஸ்லிம் தலைமைகளுக்கு ஒரு சிறிய பிரச்சினை இருக்கிறது. ‘பெரும்பான்மை இனத்தில் பெரும்பான்மையானோர் எந்த தரப்பை ஆதரிக்கின்றனரோ அவர்களுடன் சேர்ந்து பயணிக்க வேண்டும்’ என அஸ்ரப் கூறியுள்ளார். 1989 இல் பிரேமதாஸவுக்கும் 1994 மற்றும் 1999 இல் சந்திரிக்காவுக்கும் அவர் ஆதரவை வழங்கினார்.
தலைமை மாற்றத்திற்கு பிறகு எந்தவொரு சந்தர்ப்பத்திலும் அவர்களால் சரியான தீர்மானத்தை எடுக்க முடியாமல் போயுள்ளது. சிறுபான்மையினர் ஏற்படுத்திய அரசாங்கத்தில் வெற்றிபெற்றாலும் எதனையும் செய்ய முடியாத நிலை ஏற்பட்டதை 2015 இல் நாம் கண்டுகொண்டோம்.
முஸ்லிம் தலைமைகளின் செயற்பாடுகளினால் எமக்குரிய கௌரவம் இல்லாது செய்யப்பட்டுள்ளது. இவர்களிடம் கொள்கையோ, முன்மாதிரியான அரசியல் செயற்பாடுகளையோ காண முடியவில்லை.
முஸ்லிம் சமூகம் இவர்களின் பின்னால் செல்லாமல், உரியமுறையில் சிந்தித்து வாக்களிக்க வேண்டும்.
முஸ்லிம் தலைமைகளின் செயற்பாடுகளினால் எமக்குரிய கௌரவம் இல்லாது செய்யப்பட்டுள்ளது. இவர்களிடம் கொள்கையோ, முன்மாதிரியான அரசியல் செயற்பாடுகளையோ காண முடியவில்லை.
முஸ்லிம் சமூகம் இவர்களின் பின்னால் செல்லாமல், உரியமுறையில் சிந்தித்து வாக்களிக்க வேண்டும்.
கடந்த காலங்களில் இனம், மதம் என்று பேசப்பட்டு வந்தநிலையில் இம்முறை பொருளாதார விடயமே தேர்தல் மேடைகளில் பேசுபொருளாக மாறியுள்ளது. ஏனென்றால், ரணில் கடந்த இரண்டுவருட ஆட்சியில் இனவாதத்திற்கும் மதவாதத்திற்கும் முற்றுப்புள்ளி வைத்துள்ளார்.
முஸ்லிம் கட்சிகளின் தலைவர்கள் இருவரும் இஸ்லாத்தை விற்று அரசியல் செய்கின்றனர். இஸ்லாத்தை வைத்து அரசியல் செய்வதானால், அதற்கேற்ற தரத்தில் அரசியல் செய்ய வேண்டும். பொய் சொல்லக் கூடாது. ரிஷாத் பதியுதீனோ, ரவூப் ஹக்கீமோ அவர்கள் செய்த சேவைகளை முன்னிறுத்தி வாக்கு கேட்டால் பரவாயில்லை. ஆனால், முஸ்லிம் சமுதாயத்துக்காக, அல்லாஹ்வுக்காக, ரசூலுல்லாஹ்வுக்காக என்று சொல்லி வாக்கு கேட்கக் கூடாது. அப்படியாயின், அதற்கேற்ற வகையில் நடந்துகொள்ள வேண்டும்.
மலையக கட்சிகள் எப்போதும் இரண்டு தரப்பாக இருந்து அரசாங்கத்திலும் இருப்பர், எதிர்க்கட்சி அரசியலையும் செய்வர். அவர்கள், பிரதானமாக அரசாங்கத்திடம் கல்வி இராஜாங்க அமைச்சையும் தோட்ட உட்கட்டமைப்பு அமைச்சையுமே கோருவர். ஆனால், எமது அரசியல்வாதிகளின் கோரிக்கை பற்றி நான் புதிதாக சொல்வதற்கு ஒன்றுமில்லை.
இவர்கள் முஸ்லிம் விவகாரங்களை வைத்து மக்களை திசை திருப்புகின்றனர். குறிப்பாக மக்களின் உணர்வுகளை தூண்டி அரசியல் நடத்துகின்றனர். மக்களை புத்திசாலித்தனமாக சிந்திப்பதை தடுக்கின்றனர். மூளையால் சிந்திப்பதைவிடுத்து, இதயத்தால் சிந்திக்க வைப்பதற்கு தள்ளிவிடுகின்றனர்.- Vidivelli