- நிபந்தனையுடன் சஜித்துக்கு ஆதரவு என மு.கா. அறிவிப்பு
- அ.இ.ம.கா. 14 ஆம் திகதியன்று நிலைப்பாட்டை வெளியிடும்
- ரணிலுக்கு ஆதரவான நிலைப்பாட்டில் தேசிய காங்கிரஸ்
- ந.தே.மு., ச.நீ.க. உள்ளிட்டோரும் தீர்மானமில்லை
- ஐக்கிய மக்கள் கூட்டணியின் ஒப்பந்தம் இன்று கைச்சாத்து
(எம்.வை.எம்.சியாம்)
ஜனாதிபதி தேர்தலுக்கான வேட்பு மனுக்கான வைப்புத் தொகை செலுத்தும் காலம் எதிர்வரும் 14 ஆம் திகதி நிறைவடையவுள்ள நிலையில், கூட்டணிகளுகளை அமைப்பதற்கான வேலைகள் மும்முரமாக இடம்பெற்று வருகின்றன.
இந்நிலையில், சிறுபான்மை முஸ்லிம் மக்களின் ஆதரவை பெற்றுக்கொள்வதற்காக முஸ்லிம் கட்சிகள் மற்றும் அரசியல் பிரமுகர்களை தம்மோடு இணைத்துக் கொள்வதற்காக பிரதான வேட்பாளர்கள் பலரும் முயற்சிகளில் ஈடுபட்டு வருகின்றனர்.
இந்நிலையில், ஏற்கனவே, முஸ்லிம் காங்கிரஸ் சஜித் பிரேமதாஸவுக்கும் தேசிய காங்கிரஸ் ரணில் விக்ரமசிங்கவுக்கும் என தமது ஆதரவு நிலைப்பாட்டை வெளியிப்படுத்தியுள்ளன. அகில இலங்கை மக்கள் காங்கிரஸ் எதிர்வரும் 14 ஆம் திகதி தமது தீர்மானத்தை வெளியிடவுள்ளதாக அறிவுத்துள்ளது. இதேவேளை, நல்லாட்சிக்கான தேசிய முன்னணி, சமூக நீதிக்கட்சி உள்ளிட்ட ஏனைய தரப்புகள் இன்னும் தத்தமது நிலைப்பாட்டை எதிர்வரும் நாட்களில் வெளியிடலாம் என எதிர்பார்க்கப்படுகிறது.
அத்துடன், ஆளும் எதிர் தரப்பிலுள்ள முஸ்லிம் அரசியல்வாதிகளும் தமது ஆதரவு எந்த வேட்பாளருக்கு என்பதை அறிவித்து வருகின்றனர்.
ஸ்ரீ லங்கா முஸ்லிம் காங்கிரஸ்
ரவூப் ஹக்கீம் தலைமையிலான ஸ்ரீலங்கா முஸ்லிம் காங்கிரஸ் எதிர்வரும் ஜனாதிபதித் தேர்தலில் எதிர்க்கட்சி தலைவர் சஜித் பிரேமதாசவுக்கு ஆதரவு வழங்குவதற்கான தீர்மானத்தை கடந்த ஞாயிறன்று அறிவித்தது.
மூன்று பிரதான நிபந்தனைகளின் அடிப்படையில் சஜித் பிரேமதாவுடன் கலந்துரையாடி தமது கோரிக்கைகளுக்கு உடன்படும்பட்சத்தில் ஆதரவை உறுதிப்படுத்துவதாக மு.கா. தலைவர் ஹக்கீம் தெரிவித்தார்.
ஜனாதிபதி தேர்தலில் யாரை ஆதரிப்பது என்பது தொடர்பில் உத்தியோகபூர்வமான தீர்மானத்தை எடுப்பதற்கு ஸ்ரீலங்கா முஸ்லிம் காங்கிரஸின் உயர்பீடக் கூட்டம் கடந்த ஞாயிற்றுக்கிழமை கொழும்பில் உள்ள கட்சியின் தலைமையகமான தாருஸ்ஸலாத்தில் கூடியது. மிக நீண்ட கலந்துரையாடலின் பின்னர் எதிர்வரும் ஜனாதிபதித்தேர்தலில் எதிர்க்கட்சித்தலைவர் சஜித் பிரேமதாசவுக்கு ஆதரவு வழங்க கட்சியின் உயர்பீடம் ஏகமானதாக தீர்மானித்துள்ளதாக கட்சியின் தலைவர் ரவூப் ஹக்கீம் ஊடகங்களுக்கு அறிவித்தார்.
மு.கா. உத்தியோகபூர்வமாக இத்தீர்மானத்தை அறிவித்துள்ளபோதிலும் அக்கட்சியின் பாராளுமன்ற உறுப்பினர்கள் சிலர் உள்ளிட்ட மேலும் பல கட்சி உறுப்பினர்கள் ஜனாதிபதி ரணிலுக்கு ஆதரவளிக்க வேண்டும் எனும் நிலைப்பாட்டில் இருப்பதாகவும் கட்சியின் தீர்மானத்தில் உடன்பாடு இல்லாத நிலையில் உள்ளதாகவும் தெரியவருகிறது.
இதேவேளை முஸ்லிம் காங்கிரஸின் கோரிக்கைகளுக்கு சஜித் சாதகமாக பதிலை வழங்கியுள்ளதாகவும் தகவல்கள் தெரிவிக்கின்றன.
அகில இலங்கை மக்கள் காங்கிரஸ்
அகில இலங்கை மக்கள் காங்கிரஸ் எதிர்வரும் ஜனாதிபதித் தேர்தலில் எந்த வேட்பாளரை ஆதரிப்பது என்பது குறித்து எதிர்வரும் 14 ஆம் திகதிக்குள் அறிவிக்கவுள்ளதாக அகில இலங்கை மக்கள் காங்கிரஸ் தெரிவித்துள்ளது.
இதுதொடர்பான தீர்மானத்தை எடுப்பதற்கு அகில இலங்கை மக்கள் காங்கிரஸின் செயற்குழு கூட்டம் நேற்று முன்தினம் பிற்பகல் கொழும்பில் கூடியது.
மிக நீண்ட கலந்துரையாடலின் பின்னர் எதிர்வரும் ஜனாதிபதித் தேர்தலில் எந்த வேட்பாளரை ஆதரிப்பது என்பது குறித்து எதிர்வரும் 14 ஆம் திகதிக்குள் அறிவிக்கவுள்ளதாக கட்சியின் தலைவர் பாராளுமன்ற உறுப்பினர் ரிஷாட் பதியுதீன் தெரிவித்தார். மேலும், தமக்கு ஆதரவு வழங்குமாறு நாட்டின் தற்போதைய ஜனாதிபதி ரணில் விக்கிரமசிங்கவும் அழைப்பு விடுத்திருந்தார். அத்துடன் சஜித் பிரேமதாச தலைமையிலான ஐக்கிய மக்கள் சக்தியும் எமது கட்சியின் ஆதரவை கோரியுள்ளது.
இதனிடையே, அ.இ.ம.கா. 10 அம்ச நிபந்தனையின் அடிப்படையிலும் எழுத்துமூலமான உறுதிப்பாட்டின் அடிப்படையிலும் ஜனாதிபதி வேட்பாளருக்கு ஆதரவை வெளிப்படுத்தவுள்ளதாக முன்னதாக தெரிவிக்கப்பட்டது.
தேசிய காங்கிரஸ்
அதாவுல்லாஹ் தலைமையிலான தேசிய காங்கிரஸானது ஏற்கனவே ஜனாதிபதி ரணில் விக்கிரமசிங்கவுக்கு தனது ஆதரவு நிலைப்பாட்டை வெளிப்படுத்தியிருந்தது. கடந்த மாதம் காலியில் இடம்பெற்ற கூட்டமொன்றின்போது ஜனாதிபதிக்கான ஆதரவை அவர் வெளிப்படுத்தியிருந்தார்.
நல்லாட்சிக்கான தேசிய முன்னணி
நல்லாட்சிக்கான தேசிய முன்னணியின் முக்கியஸ்தர்களுக்கிடையேயான கூட்டமொன்று நேற்று இரவு இடம்பெற்றுள்ளது. இதன்போது, ஜனாதிபதித் தேர்தல் தொடர்பான தீர்மானம் எடுக்கப்படவுள்ளதாக தெரிவிக்கப்பட்டது.
சமூக நீதிக்கட்சி
ஜனாதிபதி தேர்தல் அறிவிப்பு வெளியானதையடுத்து அனுரகுமார திஸாநாயக்க தலைமையிலான தேசிய மக்கள் சக்தியின் கூட்டணியிலிருந்து வெளியேறிய சமூக நீதிக்கட்சியானது இன்னும் ஜனாதிபதி தேர்தல் தொடர்பிலான தீர்மானத்தை வெளியிடவில்லை.
எனினும், நாளை மறுதினம் கிண்ணியாவில் இடம்பெறவிருக்கும் அக்கட்சியின் விஷேட மாநாட்டையடுத்து தீர்மானம் எட்டப்படும் என எதிர்பார்க்கப்படுகின்றது.
ஆளும்தரப்பு முஸ்லிம் எம்.பி.க்கள்
வெளிவிவகார அமைச்சர் அலி சப்ரி மற்றும் இராஜாங்க அமைச்சர் காதர் மஸ்தான் ஆகியோர் கடந்த வாரம் ஜனாதிபதி ரணில் விக்ரமசிங்கவுக்கு ஆதரவு தெரிவித்து 92 மொட்டு உறுப்பினர்கள் பங்குபற்றிய கூட்டத்திலும் கலந்துகொண்டிருந்தனர்.
அத்துடன், ஆளும் தரப்புக்கு ஆதரவு தெரிவித்து வரும் அகில இலங்கை மக்கள் காங்கிரஸ் திகாமடுல்ல மாவட்ட பாராளுமன்ற உறுப்பினர் எஸ்.எம்.எம்.முஸர்ரப் மற்றும் முஸ்லிம் தேசிய கூட்டமைப்பின் பாராளுமன்ற உறுப்பினர் அலி சப்ரி ரஹீம் ஆகியோரும் ஜனாதிபதி ரணில் விக்கிரமசிங்கவிற்கு ஆதரவுக்கு வழங்கியுள்ளனர்.
மேலும், ராஜபக்ச குடும்பத்தாருடன் நெருக்கமான உறவை பேணிவரும் தேசியப் பட்டியல் பாராளுமன்ற உறுப்பினர் மர்ஜான் பழீலும் சில தினங்களுக்கு முன்னர் பேருவளையில் இடம்பெற்ற நிகழ்வொன்றின்போது தனது ஆதரவை ஜனாதிபதி ரணில் விக்ரமசிங்கவுக்கு வெளிப்படுத்தியிருந்தார்.
எதிர்க்கட்சி
ஐக்கிய மக்கள் சக்தி பாராளுமன்ற உறுப்பினர்களான இம்தியாஸ் பாக்கீர் மாக்கார், முஜிபுர் ரஹ்மான், இம்ரான் மகரூப் மற்றும் எஸ்.எம்.மரிக்கார் ஆகியோர் எதிர்க்கட்சி தலைவர் சஜித் பிரேமதாஸவுக்கு தனது ஆதரவை வெளிப்படுத்தி பிரச்சார பணிகளையும் மிகத் தீவிரமாக முன்னெடுத்து வருகின்றனர்.
அத்துடன், சிரேஷ்ட உறுப்பினர்களான எம்.எச்.ஏ.ஹலீம் மற்றும் கபீர் ஹாஷிம் ஆகியோர் தேர்தல் அறிவிப்பு வெளியிடப்படுவதற்கு முன்னதாக ஐக்கிய தேசியக் கட்சியும் ஐக்கிய மக்கள் சக்தியும் இணைந்து பயணிக்க வேண்டும் என வலியுறுத்தி வந்தனர். எனினும், தற்போது சஜித் பிரேமதாஸவின் தேர்தல் பிரசார பணிகளில் மும்முரமாக ஈடுபட்டு வருகின்றனர்.
இதனிடையே, ஐக்கி மக்கள் சக்தியின் கொழும்பு மாவட்ட பாராளுமன்ற உறுப்பினரான ஏ.எச்.எம்.பௌஸி இன்னும் தனது நிலைப்பாட்டை வெளியிடாதுள்ளார்.
அத்துடன், ஐ.ம.ச. ஊடாக அ.இ.ம.கா. சார்பில் அநுராதபுரத்திலிருந்து தெரிவான இஷாக் ரஹ்மான் ஏற்கனவே ரணிலுக்கு ஆதரவை வெளிப்படுத்தியுள்ளார்.
ஐக்கிய மக்கள் கூட்டணி
இதனிடையே ஐக்கிய மக்கள் சக்தியின் பரந்துபட்ட கூட்டணி ஒப்பந்தம் கைச்சாதிடும் நிகழ்வு இன்று கொழும்பு சுகததாஸ உள்ளக விளையாட்டரங்கில் இடம்பெறவுள்ளது.
எதிர்க்கட்சித் தலைவர் சஜித் பிரேமதாஸ தலைமையில் இந்த ஒப்பந்தத்தில் கைச்சாத்திட முஸ்லிம் காங்கிரஸ், அகில இலங்கை மக்கள் காங்கிரஸ் மற்றும் நல்லாட்சிக்கான தேசிய முன்ணி உள்ளிட்ட முஸ்லிம் தரப்புகளுக்கு அழைப்பு விடுக்கப்பட்டுள்ளது.
மொட்டு வேட்பாளர் அறிவிப்பு
நீண்ட இழுபறியின் பின்னர் நேற்றைய தினம் ஸ்ரீலங்கா பொதுஜன பெரமுனவின் ஜனாதிபதி வேட்பாளராக முன்னாள் ஜனாதிபதி மஹிந்த ராஜபக்சவின் புதல்வர் நாமல் ராஜபக்ச பெயர் அறிவிக்கப்பட்டமை குறிப்பிடத்தக்கது.- Vidivelli