பாகிஸ்தானில் பரபரப்பான பொதுத்தேர்தல் நடந்து முடிந்து ஒரு வாரமாகின்றது. அங்கு எந்த கட்சி ஆட்சி அமைக்க போகிறது, அடுத்த பாகிஸ்தான் பிரதமர் யார் என்பது இன்னும் பெரும் பரபரப்பையே ஏற்படுத்தியுள்ளது.
முன்னாள் பிரதமர் இம்ரான்கான் சிறையில் அடைக்கப்பட்டு, அவரது பாகிஸ்தான் தெஹ்ரீக்-- இன்சாப் கட்சி தேர்தலில் போட்டியிட பல தடைகள் விதிக்கப்பட்ட போதிலும், அக்கட்சியின் ஆதரவுடன் சுயேச்சையாக போட்டியிட்ட 101 வேட்பாளர்கள் தேர்தலில் வெற்றி பெற்று ஆச்சரியப்படுத்தியுள்ளனர்.
மூன்று தடவை பிரதமராக இருந்த நவாஸ் ஷரீப்பின் பாகிஸ்தான் முஸ்லிம் லீக் நவாஸ் கட்சி 75 இடங்களில் வெற்றி பெற்று 2-வது இடத்தை பிடித்திருக்கிறது. அக்கட்சி பாகிஸ்தானின் சக்தி வாய்ந்த இராணுவத்தின் ஆதரவை கொண்டுள்ளதாக தெரிவிக்கப்படுகின்றது.
அரசியலமைப்பு என்ன சொல்கிறது?
பிலாவல் பூட்டோ சர்தாரியின் பாகிஸ்தான் மக்கள் கட்சி 54 இடங்களிலும் வெற்றி பெற்று மூன்றாம் இடத்தில் உள்ளது. எஞ்சிய இடங்களை சிறிய கட்சிகள் கைப்பற்றியுள்ளன.
அரசியல் கட்சிகள் பெப்ரவரி 29 ஆம் திகதி அல்லது தேர்தல் நடந்த நாளுக்கு மூன்று வாரங்களுக்குள் ஆட்சி அமைக்க வேண்டும் என்று பாகிஸ்தானின் அரசியல் சாசனம் கூறுகிறது. பாகிஸ்தான் பாராளுமன்றத்தில் மொத்தம் 336 இடங்கள் உள்ளன. அவற்றில் 266 நேரடி வாக்கெடுப்பு மூலம் முடிவு செய்யப்படுகின்றன. மீதமுள்ள 70 இடங்கள் இடஒதுக்கீடு மூலம் முடிவு செய்யப்படுகின்றன — 60 பெண்களுக்கும், 10 இஸ்லாமியர் அல்லாதவர்களுக்கும் – இவை பாராளுமன்றத்தில் உள்ள ஒவ்வொரு கட்சியின் பலத்திற்கும் ஏற்ப ஒதுக்கப்படுகின்றன.
அத்துடன், ஒரு அரசியல் கட்சி வெற்றி பெறும் ஒவ்வொரு 3.5 இடங்களுக்கும் ஒரு பெண்ணுக்கு இடம் ஒதுக்கீடு பெறுகிறது. சுயேட்சை வேட்பாளர்கள் எந்த கட்சியையும் சேர்ந்தவர்கள் அல்ல என்பதால் அவர்கள் இதற்கு தகுதியற்றவர்கள். தேர்தல் முடிவுகள் வெளியாகி 72 மணி நேரத்திற்குள், அவர்கள் ஒரு கட்சியில் சேரவோ அல்லது சுயேச்சையாக பாராளுமன்ற உறுப்பினராகவோ அமர விருப்பம் தெரிவிக்க வேண்டும்.
தொடர்ந்து இழுபறி
இந்நிலையில் ஆட்சி அமைப்பதற்கு 133 பாராளுமன்ற ஆசனங்கள் தேவை என்கிற நிலையில், எந்த கட்சிக்கும் பெரும்பான்மை கிடைக்கவில்லை. இதனால் கூட்டணி அரசை அமைக்க வேண்டிய கட்டாயம் ஏற்பட்டுள்ளது. ஆனால் இதில் அரசியல் கட்சிகளிடையே ஒருமித்த கருத்து ஏற்படாததால் புதிய அரசை அமைப்பதில் தொடர்ந்து இழுபறி நீடித்து வருகிறது.
அரசியல் கட்சிகள் தேர்தல் நடந்த நாளில் இருந்து 3 வாரங்களுக்குள் ஆட்சி அமைக்க வேண்டும் என்று பாகிஸ்தானின் அரசியல் சாசனம் கூறுகிறது. எனவே நவாஸ் ஷரீப்பின் பாகிஸ்தான் முஸ்லிம் லீக் நவாஸ் கட்சியும், பிலாவல் பூட்டோ சர்தாரியின் பாகிஸ்தான் மக்கள் கட்சியும் இணைந்து கூட்டணி அரசை அமைப்பதற்கான முயற்சிகள் நடந்து வருகின்றன.
எனினும் பிரதமர் பதவி யாருக்கு என்பதில் இரு கட்சிகளுக்கும் இடையே கருத்து வேறுபாடு நிலவுகிறது. நான்காவது முறையாக பிரதமராக வேண்டும் என்பதில் நவாஸ் ஷரீப்பும், பிலாவல் பூட்டோ சர்தாரியை பிரதமராக்கியே தீருவேன் என்பதில் அவரது தந்தையும், பாகிஸ்தான் முன்னாள் அதிபருமான ஆசிப் அலி சர்தாரியும் உறுதியாக உள்ளதாக தகவல் வெளியாகி இருந்தது.
பிரதமர் பதவியை தவிர்த்து, வெளியுறவு அமைச்சு, உள்நாட்டலுவல்கள் அமைச்சு, நிதி அமைச்சு மற்றும் பாகிஸ்தானின் மிகப்பெரிய மாகாணமான பஞ்சாபின் முதலமைச்சு போன்ற முக்கிய பதவிகளுக்கு யார் பரிந்துரைக்கப்படுவார்கள் என்பதிலும் இருக்கட்சிகள் இடையே கருத்து வேறுபாடுகள் நிலவுவதாக கூறப்பட்டு வந்தது.
நவாஸின் நிலைப்பாடு
இந்நிலையில் பாகிஸ்தானின் புதிய பிரதமராக தனது சகோதரர் ஷெபாஸ் ஷரீப்பையும், பஞ்சாப் மாகாண முதலமைச்சராக தனது மகளான மரியம் நவாசையும் நியமனம் செய்வதாக நவாஸ் ஷரீப் தெரிவித்துள்ளார். பாகிஸ்தான் மக்கள் கட்சி தலைவர் பிலாவல் பூட்டோ- சர்தாரி பிரதமர் போட்டியில் இருந்து விலகியதை அடுத்து இந்த அறிவிப்பு வெளியாகியுள்ளது.
17 இடங்களை வென்ற சமூக தாராளவாத முட்டாஹிதா குவாமி இயக்கத்துடனும் (MQM) நவாஸ் ஷரீபின் கட்சி பேச்சுவார்த்தை நடத்தி வருகிறது. சுயேச்சைகளை தன் பக்கம் இழுக்கவும் முயற்சிக்கிறது.
நவாசுக்கு பிலாவல் ஆதரவு
பாகிஸ்தான் மக்கள் கட்சியின் தலைவர் பிலாவல் பூட்டோ சர்தாரி நேற்றுமுன்தினம் செவ்வாயன்று, “நாட்டில் ஆட்சி அமைப்பதை உறுதி செய்வதற்காக முஸ்லிம் லீக் கட்சியின் வேட்பாளருக்கு ஆதரவாக வாக்களிக்கும்” என்று கூறினார். அந்த அமைச்சரவையில் இடம்பெறாமல், வெளியில் இருந்து ஆதரவு தருவோம் என்றும் அவர் தெரிவித்துள்ளார்.
பாகிஸ்தான் முஸ்லிம் லீக் நவாஸ் கட்சிக்கு சக்திவாய்ந்த பாகிஸ்தான் இராணுவத்தின் ஆதரவு இருப்பதாக நம்பப்படுகிறது. நவாஸ் ஷெரீப்புக்கு ஆதரவளித்த பிலாவல் மற்றும் அவரது தந்தை ஆசிப் அலி சர்தாரி ஆகியோருக்கு ஷெபாஸ் நன்றி தெரிவித்தார். கூட்டணிக்கு ஆதரவு தெரிவித்த கட்சிகளுக்கு பாகிஸ்தான் முஸ்லிம் லீக் கட்சி நன்றி தெரிவித்துள்ளது.
இம்ரான் தரப்பு நிராகரிப்பு
இந்த சூழலில் பாகிஸ்தானில் எந்த முக்கிய அரசியல் கட்சிகளுடனும் கூட்டணி ஆட்சி அமைக்கும் யோசனையை இம்ரான் கான் நிராகரித்தார். மேலும் சிறிய கட்சியுடன் இணைந்து ஆட்சி அமைப்பதற்கான முயற்சியில் ஈடுபட்டிருக்கும் இம்ரான்கானின் பாகிஸ்தான் தெஹ்ரீப் -இ -இன்சாப் கட்சி, பெரும்பான்மை கிடைக்கவில்லை என்றால் எதிர்க்கட்சியாக இருப்போம் என திட்டவட்டமாக தெரிவித்துள்ளது.
இம்ரான் கானின் ஊடக ஆலோசகர் சுல்பி புகாரி, பெரும்பான்மையை பெறத் தவறினால் கூட்டணி அமைப்பதற்குப் பதிலாக எதிர்க்கட்சியாகவே இருக்க விரும்புவதாகக் கூறினார்.
பல்வேறு குற்றச்சாட்டுகளில் தற்போது 14 ஆண்டுகள் சிறைத்தண்டனை அனுபவித்து வரும் இம்ரான் கான் முன்னர் கூறியதையே இது பிரதிபலிக்கிறது.
2018 இல், ‘கூட்டணி அரசாங்கம் பலவீனமாக இருக்கும்’ என்றும், ‘நாடு எதிர்கொண்டுள்ள நெருக்கடிகளைச் சமாளிக்க வலிமையான அரசாங்கம் தேவை’ என்றும் அவர் கூறினார். ஆயினும்கூட, அவர் MQM போன்ற சிறிய கட்சிகளுடன் கூட்டணியை உருவாக்கினார்.
நீதிமன்றை நாடிய சுயேட்சைகள்
இதனிடையே தேர்தலில் தோல்வியடைந்த சுயேச்சை வேட்பாளர்கள் வாக்கு மோசடி குற்றச்சாட்டுகளை முன்வைத்து நீதிமன்றத்தை நாடியுள்ளனர். அதன்படி இம்ரான்கானின் பாகிஸ்தான்-தெஹ்ரீப்-இ-இன்சாப் கட்சியின் சார்பில் போட்டியிட்டு தோல்வியுற்ற சுயேச்சை வேட்பாளர்கள் பலர் நவாஸ் ஷரீப் மற்றும் அவரது மகள் மரியம் நவாஸ் உள்பட பாகிஸ்தான் முஸ்லிம் லீக் நவாஸ் கட்சி தலைவர்களின் வெற்றி ஏற்றுக்கொள்ளப்படமாட்டாது என அறிவிக்கக்கோரி பல்வேறு நீதிமன்றங்களிலும் வழக்கு தொடர்ந்துள்ளனர்.
அப்படி சுயேச்சை வேட்பாளர்கள் சார்பில் தாக்கல் செய்யப்பட்ட 30-க்கும் மேற்பட்ட மனுக்களை லாகூர் நீதிமன்றம் தள்ளுபடி செய்து உத்தரவிட்டுள்ளது.
ஜார்ஜ் டவுன் பல்கலைக்கழகத்தின் உதய் சந்திரா, “முன்பு இம்ரான் கானுக்கு வாக்களிக்காதவர்கள் கூட கடந்த இரண்டு ஆண்டுகளாக அவரும் அவரது கட்சியும் இராணுவத்தால் நடத்தப்பட்ட விதம் அநீதியானது என்று உணரலாம். நாடு முழுவதும் இருக்கும் ஒரு பொதுவான ஜனநாயக உணர்வு, அந்தச் சம்பவங்கள் மூலம் மீறப்பட்டதாகத் தெரிகிறது.சுயேச்சைகளை தேர்ந்தெடுப்பதன் மூலம், வாக்காளர்கள் இராணுவத்திற்கு தெளிவான செய்தியைச் சொல்லியிருக்கிறார்கள்: ‘ஜனநாயகம் மேலோங்கட்டும்” என்றார். (பி.பி.சி.) – Vidivelli