ஏ.ஆர்.ஏ.பரீல்
உலகளாவிய ரீதியில் கொவிட் 19 தொற்று பரவியிருந்த காலகட்டத்தில் உலகில் எந்தவொரு நாட்டிலும் இடம்பெறாத முஸ்லிம்களுக்கு எதிரான பழிவாங்கல்கள் இலங்கையில் நடந்தேறின. முஸ்லிம்களின் ஜனாஸாக்கள் எரிக்கப்பட்டன. பின்பு கொவிட் 19 தொற்று ஜனாஸாக்களுக்கென்று தனியான மையவாடியொன்று உருவாக்கப்பட்டது. மஜ்மா நகர் மையவாடியை முஸ்லிம்கள் ஓர் நினைவுச் சின்னமாக பாதுகாக்க வேண்டும் என இலங்கை தேசிய முஸ்லிம் பேரவையின் தலைவர் அமான் அஷ்ரப் தெரிவித்தார்.
கொவிட் 19 வைரஸ் தொற்றினால் வபாத்தான முஸ்லிம்களின் ஜனாஸாக்களை கெளரவமான முறையில் நல்லடக்கம் செய்வதில் கொவிட் 19 ஜனாஸா நலன்புரி அமைப்பு பெரும் பங்காற்றியது. இதற்காக அவ் அமைப்பின் தலைவர் அப்ஸல் அஹ்மட் மரிக்கார் பாராட்டு பத்திரம் வழங்கி கெளரவிக்கப்பட்டார். இலங்கை தேசிய முஸ்லிம் பேரவை இந்நிகழ்வினை ஏற்பாடு செய்திருந்தது.
அப்ஸல் அஹமட் மரிக்கார் சோனக, போரா, மேமன், மலே சமூகத்தின் பிரதிநிதிகளால் பாராட்டப்பட்டு கெளரவிக்கப்பட்டார்.
இந்நிகழ்வு இலங்கை தேசிய முஸ்லிம் பேரவையின் தலைவர் அமான் அஷ்ரப் தலைமையில் கடந்த சனிக்கிழமை மாலை தாஜ் சமுத்ரா ஹோட்டலில் நடைபெற்றது.
நிகழ்வில் அமான் அஷ்ரப் தொடர்ந்தும் உரையாற்றுகையில், ‘இலங்கை தேசிய முஸ்லிம் பேரவை இலங்கையிலுள்ள முஸ்லிம் சமூக குழுமங்கள் அனைத்தையும் ஒரே மேடையில் ஒன்றிணைத்துள்ளது. முஸ்லிம்களுக்குள் சோனக, போரா, மலே, மேமன் என்ற குழுமங்கள் இருந்தாலும் எங்களுக்குள் பிளவுகள் இல்லை. நாம் முஸ்லிம்கள் என்ற வகையில் ஒன்றுபட்டுள்ளோம். கொவிட் 19 வைரஸ் தொற்று காலத்தில் முஸ்லிம்கள் பழிவாங்கப்பட்டார்கள். ஜனாஸாக்கள் எரிக்கப்பட்டன. ஒரு வருட காலத்தின் பின்பு விஷேட மையவாடியில் ஜனாஸாக்கள் நல்லடக்கம் செய்யப்பட்டன. இதுவோர் இனவாத பழிவாங்கலாகும் என்றார்.
ஓட்டமாவடி மஜ்மாநகர்
கொவிட் 19 மையவாடி
கொவிட் 19 வைரஸ் தொற்றினால் இறந்த முஸ்லிம்கள் உள்ளடங்கலாக
அனைவரதும் உடல்கள் அடக்கம் செய்யப்படாது எரிக்கப்பட (தகனம்) வேண்டும் என்பது 2020 மார்ச் மாதத்திலிருந்து அரசாங்கத்தின் கொள்கையாக இருந்தது. ஸ்ரீ லங்கா முஸ்லிம் கவுன்ஸிலின் தகவல்களின்படி சுமார் 200க்கும் மேற்பட்ட முஸ்லிம் ஜனாஸாக்கள் தகனம் செய்யப்பட்டன.
ஒருவருட காலத்தின் பின்பே அரசாங்கம் முஸ்லிம்களின் ஜனாஸாக்களை விஷேட மையவாடியொன்றில் அடக்கம் செய்வதற்கு அனுமதி வழங்கியது. இதற்கென ஓட்டமாவடி கோறளைப்பற்று மேற்கு பிரதேச சபை எல்லைக்குட்பட்ட சூடுபத்தின சேனை மஜ்மா நகரில் காணியொதுக்கப்பட்டது. இந்தக் காணியை ஒதுக்கிக் கொள்ளும் விடயத்தில் தற்போதைய அமைச்சர் நஸீர் அஹமட் முழு முயற்சிகளையும் மேற்கொண்டார்.
மஜ்மா நகர் கொவிட் 19 விஷேட மையவாடியில் 2021 மார்ச் மாதம் 5 ஆம் திகதி முதல் ஜனாஸாக்கள் நல்லடக்கம் செய்யப்பட்டது. இம் மையவாடியில் 2022ஆம் ஆண்டு மார்ச் மாதம் 5ஆம் திகதி வரை ஜனாஸாக்கள் நல்லடக்கம் செய்யப்பட்டு வந்தன. 2022 மார்ச் மாதம் 5ஆம் திகதியுடன் இவ் ஏற்பாடுகள் முடிவுக்கு வந்ததுடன் கொவிட் ஜனாஸாக்களை நாட்டின் எப்பாகத்திலுமுள்ள மையவாடிகளில் அடக்கம் செய்யலாம் என அனுமதி வழங்கப்பட்டது.
இம்மையவாடியில் 2986 முஸ்லிம்களினதும், 293 பெளத்தர்களினதும், 269 இந்துக்களினதும், 86 கிறிஸ்தவர்களினதுமாக மொத்தமாக 3634 உடல்கள் அடக்கம் செய்யப்பட்டுள்ளன.
கொவிட் ஜனாஸா நலன்புரி அமைப்பு
கொவிட் 19 தொற்றினால் காலமானவர்களின் ஜனாஸாக்களை நாடெங்கிலுமிருந்து மஜ்மா நகருக்கு கொண்டு சென்று அடக்கம் செய்வதற்கான பணிகளை முன்னெடுப்பதற்கு அன்று கொவிட் ஜனாஸா நலன்புரி அமைப்பு என்றோர் அமைப்பு உருவாக்கப்பட்டது. இதன் தேசிய தலைவராக அப்ஸல் அஹமட் மரிக்கார் நியமிக்கப்பட்டார்.
மஜ்மா நகரில் குறிப்பிட்ட ஜனாஸாக்களை அடக்கம் செய்வதற்கான வெளிக்கள உதவிகளை சுகாதார தரப்புக்கும், இராணுவத்தினருக்கும், ஜனாஸாக்களின் உறவினர்களுக்கும், பொதுமக்களுக்கும் இவ்வமைப்பு நெறிப்படுத்தி செயற்படுத்தியது. இவ்வகையில் இவ் அமைப்பினரை கெளரவிக்கும் முகமாகவே இந்நிகழ்வு ஏற்பாடு செய்யப்பட்டிருந்தது.
இவ்வமைப்பின் முழு இலங்கைக்குமான தேசிய அமைப்பளராக கண்டி மஸ்ஜித்கள் சம்மேளனத்தின் தலைவர் கே.ஆர்.ஏ. சித்தீக் மற்றும் கொழும்பு மாவட்ட மஸ்ஜித்கள் சம்மேளனத்தின் அப்போதைய தலைவர் அஸ்லம் ஒத்மான் ஆகியோர் நியமிக்கப்பட்டனர். அத்தோடு முஸ்லிம் பாராளுமன்ற உறுப்பினர்களும் தத்தம் பிரதேச கொவிட் 19 தொற்றுக்குள்ளாகி இறந்தவர்களின் ஜனாஸாக்களை ஓட்டமாவடிக்கு அடக்கத்துக்காக அனுப்பி வைக்கும் ஏற்பாடுகளில் ஒத்துழைப்பு வழங்கினர்.
இவ்வமைப்பு ஜனாஸாக்களை ஓட்டமாவடி மஜ்மா நகர் மையவாடிக்கு கொண்டு செல்வதற்கான பெட்டிகளை தலா 5 ஆயிரம் ரூபா வீதம் சகாய விலையில் ஜனாஸாக்களின் உறவினர்களுக்க வழங்கியது. ஓட்டமாவடி மையவாடிக்கு தூரப்பிரதேசங்களிலிருந்து ஜனாஸாக்களை எடுத்துச் செல்வதற்கு பல மணித்தியாலங்கள் தேவைப்பட்டதால் மல்டிலக் தனியார் நிறுவனம் குளிரூட்டப்பட்ட ட்ரக் வண்டியொன்றினை இலவசமாக வழங்கியது.
மேலும் கண்டி மஸ்ஜித்கள் சம்மேளனம் மையவாடிக்கு தேவைப்பட்ட பெக்கோ இயந்திரமொன்றினை பாவனைக்காக வழங்கியது. கொவிட் ஜனாஸா நலன்புரி அமைப்பு மஜ்மா நகர் மையவாடியைச் சூழ யானை வேலி அமைத்துக் கொடுத்துள்ளது. அத்தோடு சுற்றிவர மதில் அமைக்கும் பணிகள் விரைவில் ஆரம்பிக்கப்படவுள்ளன. இம்மையவாடியில் தனது தாய், தந்தையர் நல்லடக்கம் செய்யப்பட்டுள்ள பிரபல வர்த்தகர் ஒருவர் இப்பணியினை முன்னெடுப்பதற்கு முன் வந்துள்ளார்.
அப்ஸல் அஹமட் மரிக்கார்
நிகழ்வில் கெளரவிக்கப்பட்ட கொவிட் ஜனாஸா நலன்புரி அமைப்பின் தலைவர் அப்ஸல் மரிக்கார் உரையாற்றுகையில், ஜனாஸா நல்லடக்கத்துக்கான விஷேட மையவாடி காணியினை பெற்றுக்கொள்வதற்கு பெரும் பங்காற்றிய அமைச்சர்களான அலிசப்ரி மற்றும் அகமட் நஸீர் ஆகியோருக்கு நன்றிகளைத் தெரிவித்தார். அத்துடன் தனது அமைப்பின் உறுப்பினர்களின் ஒத்துழைப்புகளுக்கு நன்றி மற்றும் பாராட்டுகளைத் தெரிவித்தார்.
தேசிய முஸ்லிம் பேரவையின் முன்னாள் தலைவர்
தேசிய முஸ்லிம் .பேரவையின் முன்னாள் தலைவர் பேராசிரியர் கெமால் ஐ டீன் உரையாற்றுகையில், ஜனாஸா தகனத்தை நிறுத்துவதற்காக அரசியல் பிரமுகர்களுடனும் நிபுணத்துவ குழுவினருடனும் பல கட்ட பேச்சுவார்த்தைகளை நடாத்தினோம். ஆனால் நிபுணர் குழுவின் இருவரின் தீர்மானமே இறுதித் தீர்மானமாக இருந்தது. இதனாலேயே ஜனாஸா எரிப்பினை உடனடியாக தடுக்க முடியாமற் போனது என்றார்.
நிகழ்வில் சோனக, மலே, போரா மற்றும் மேமன் சமூகங்களைச் சேர்ந்த பேரவையின் உறுப்பினர்கள் பேரவையின் தலைவர் அமான் அஷ்ரப், சுகாதார அமைச்சின் கொவிட் 19 செயலணியின் பொறுப்பாளர் டாக்டர் அன்வர் ஹம்தானி, அகில இலங்கை ஜம்இய்யத்துல் உலமா சபையின் தலைவர் ரிஸ்வி முப்தி, முன்னாள் அமைச்சர் பேரியல் அஷ்ரப், கொவிட் ஜனாஸா நலன்புரி அமைப்பின் தலைவர் அப்சல் மரிக்கார், அதன் கொழும்பு மாவட்டத் தலைவர் அஸ்லம் ஒத்மான், கண்டி மாவட்டத் தலைவர் கே.ஆர்.ஏ.சித்தீக் மற்றும் நலன்புரி அமைப்பின் தலைவர்கள் என்போர் கலந்துகொண்டிருந்தனர்.
நிகழ்வில் கொவிட் ஜனாஸா நலன்புரி அமைப்பின் மூலம் சமூகத்துக்கும் நாட்டுக்கும் ஆற்றிய அளப்பரிய சேவையைப் பாராட்டி அமைப்பின் தலைவர் அப்சல் மரிக்காருக்கு தேசிய முஸ்லிம் பேரவையில் அங்கம் வகிக்கும் சமூகங்களின் பிரதிநிதிகள் ஞாபகார்த்த சின்னங்களையும் பாராட்டு பத்திரங்களையும் வழங்கி கெளரவித்தனர்.- Vidivelli