பலஸ்தீனின் இன்றைய நிலைக்கு முழு சர்வதேசமும் பொறுப்புக் கூற வேண்டும்
இலங்கையில் அமைந்துள்ள பலஸ்தீன தூதரகம் மற்றும் இலங்கை அரபுலக இராஜதந்திரிகள்கவுன்ஸில் என்பன இணைந்து ஏற்பாடு செய்திருந்த ‘நக்பா’ பேரிடர் தினத்தின் 75 ஆவது ஞாபகார்த்த நிகழ்வு கடந்த திங்கட்கிழமை(22) கொழும்பு 07 இல் அமைந்துள்ள சர்வதேச உறவுகள்மற்றும் மூலோபாய கற்கைகளுக்கான லக்ஷ்மன் கதிர்காமர் நிறுவன கேட்போர் கூடத்தில் இடம்பெற்றது. இந்நிகழ்வில் எதிர்க்கட்சித் தலைவரும் ஐக்கிய மக்கள் சக்தியின் தலைவருமான சஜித்பிரேமதாச நக்பா தின ஞாபகார்த்த சிறப்புரையினை நிகழ்த்தினார். அதன் தமிழ் மொழிபெயர்ப்பு வருமாறு:
75 ஆண்டுகால தீராத துன்பங்களாக, பாலஸ்தீன அரசாங்கத்தையும் அதன் மக்களையும் ஒரு பாரிய மனிதாபிமானப் பேரழிவு முறையாக அழித்ததை நினைவுகூர்வதற்காக இன்று நாம் இங்கு கூடுகிறோம்.
இலங்கையர்களான நாம் எப்போதும் பலஸ்தீன மக்களின் பக்கம் நின்று பலஸ்தீன நாடு என்ற கருத்தாக்கத்தை நனவாக்க அர்ப்பணிப்புடன் செயற்படுகிறோம். பாலஸ்தீனத்தை சட்டபூர்வமானதேசிய நாடாகவும் ஏற்றுக் கொள்கிறோம்.
மனித குலத்திற்கு எதிரான குற்றங்கள், பயங்கரவாதம், வெறுப்பைப் பரப்புதல், குடும்பப் பிரிவினை போன்றவற்றால் ஏற்பட்ட 75 ஆண்டுகால துன்பங்களை இங்கு நினைவு கூர்கிறோம். ஆயிரக்கணக்கான பாலஸ்தீன மக்கள் இந்த கொடூரமான சூழ்நிலையால் பாதிக்கப்பட்டுள்ளனர், இதற்கு சர்வதேச சமூகத்தை பிரதிநிதித்துவப்படுத்தும் நாம் அனைவரும் பொறுப்பு கூற வேண்டும். இந்த ஓயாத பயங்கரவாதத்தை முடிவுக்குக் கொண்டுவரும் துணிவோ வலிமையோ எங்களிடம் இல்லாததால் இதற்கு நாமும் பொறுப்பாக இருக்கின்றோம்.
இதன் வரலாற்றின் பல்வேறு நிகழ்வுகளை ஆராய்ந்தால், இந்த தீராத மனிதப் பேரிடருக்கு நீண்டகால தீர்வை வழங்குவதற்கு ஐக்கிய நாடுகள் சபையும் அதன் செயலில் உள்ள உறுப்புநாடுகளும் பல முயற்சிகளை மேற்கொண்டதாகத் தெரிகிறது. பல ஆண்டுகளாக எமக்கு 242/338 இலக்க தீர்மானம் பற்றி கூறப்பட்டு வருகிறது. சுயநிர்ணய உரிமையைப் பெறுவதற்காக பாலஸ்தீனமக்களின் உரிமையை இலக்கம் 3236 தீர்மானத்தில் விபரிக்கப்பட்டுள்ளது.
அதன் பிறகு, ஒஸ்லோ உடன்படிக்கையின் முதல் மற்றும் இரண்டாவது முயற்சிகள் இந்த இரண்டுஎதிரெதிர் குழுக்களையும் ஒருங்கிணைத்து தீர்வு காணும் முயற்சிகளாகும். இது தவிர, கிளின்டன்அளவுருக்கள், இரண்டு நாடுகளின் அங்கீகாரம் தொடர்பான தீர்வுக்கு உத்தரவாதம் அளிக்கும் ஐக்கிய நாடுகளின் பாதுகாப்பு சபையின் 1397 இலக்க தீர்மானம், ஐக்கிய நாடுகள், ஐரோப்பிய ஒன்றியம், அமெரிக்கா மற்றும் ரஷ்யாவுக்கு இந்த இலக்குகளை அடைவதற்கான சட்டபூர்வ அதிகாரத்தை வழங்கியுள்ளது.
நிலையான சமாதானத்தை அடைவதற்கு பல்வேறு முயற்சிகள் மேற்கொள்ளப்பட்ட போதிலும், அந்த முயற்சிகள் அனைத்தும் பேரழிவுகரமான தோல்வியையே நிரூபித்தன. அமைதிக்கான அறிவிப்புகள், வெளியீடுகள், உரைகள், பிரகடனங்கள் மற்றும் முயற்சிகள் மேற்கொள்ளப்பட்டன. இருப்பினும், மத்திய கிழக்கில் இதுவரை அமைதி இல்லை. பாலஸ்தீனர்களுக்கும் சமாதானம் வரவில்லை. அவர்களின் உரிமைகள் பாதுகாக்கப்படவில்லை, பாலஸ்தீனர்களின் உரிமைகள் நாளுக்கு நாள் ஒவ்வொரு நொடியும் தொடர்ச்சியாக மீறப்படுகின்றன.
சர்வதேச சமூகத்தை பிரதிநிதித்துவப்படுத்தும் நாம், இந்த மாபெரும் பேரிடரால் பாதிக்கப்பட்ட அனைவரின் கண்ணியத்தையும் பாதுகாப்பதற்காக, நிலையான சமாதானத்தை ஏற்படுத்துவதற்குமிகவும் அவசியமான, சமரசங்களாக வரும் கடினமான முடிவுகளை எடுக்கத் தவறியதன் மூலம்வெறும் பார்வையாளர்களாகி விட்டோம்.
இங்கு 75 வருடங்களாக மனித உயிர்கள் பலியாகியது மட்டுமன்றி இந்த தொடர்ச்சியான மோதல்களினால் ஏற்படும் சமூக விளைவுகளும் ஆராயப்பட வேண்டும். பாலஸ்தீன மக்கள் மிகுந்த வறுமையையும், ஆதரவற்ற நிலையையும் சந்திக்க வேண்டியுள்ளது. இந்தமோதலால் ஏராளமானோர் வீடுகளை இழந்துள்ளனர். மனித பேரழிவு கணக்கிட முடியாதது.
இந்த அவல நிலையை முடிவுக்கு கொண்டு வர நாம் என்ன செய்ய வேண்டும்? ஐக்கிய நாடுகள் சபையின் பல்வேறு தீர்மானங்கள் மற்றும் சர்வதேச அறிவிப்புகள் மூலம் பல சந்தர்ப்பங்களில்முன்வைக்கப்பட்ட சமாதானத் தீர்வு நிரந்தரத் தீர்வுக்கான அடிப்படையாகும் என்பது எங்களின்உண்மையான நம்பிக்கை. அனைத்து பாலஸ்தீனியர்களின் உரிமைகள், கண்ணியம்,கௌரவம்மற்றும் சுயமரியாதையை ஊக்குவிக்கும் மற்றும் பாதுகாக்கும் இரு நாட்டுத் தீர்வை நோக்கிமுன்னேற வேண்டும்.
இலங்கையர்களாகிய நாம் எப்போதும் பலஸ்தீனர்களின் எதிர்பார்ப்பை ஆதரித்து வருகிறோம், எதிர்காலத்திலும் அதைத் தொடருவோம். எதிர்காலத்தில் பலஸ்தீன மக்கள் இயக்கத்தை சர்வதேச அரங்கில் பாதுகாக்கும் நடைமுறைசக்தியாக மாற்றுவோம். நாங்கள் இங்கு வெறும் அறிக்கையாக மாத்திரம் இதனைவரையறுக்கமாட்டோம் என்பதையும் உறுதியளிக்கிறோம்.
பாலஸ்தீன மக்களுக்கான ஜனநாயகம், சமாதானம்,சுபீட்சம் மற்றும் நிர்வாக உரிமைகளைநனவாக்கும் வகையில் இலங்கைத் தாயின் பிள்ளைகள் என்ற வகையில் இந்த யோசனைகளை நடைமுறைப்படுத்துவதில் உறுதியாக உள்ளோம்.- Vidivelli