(ஏ.ஆர்.ஏ.பரீல்)
பேராதனை பல்கலைக்கழக கணிதத்துறை செயற்பாட்டு ஆராய்ச்சியின் சிரேஷ்ட விரிவுரையாளர் கலாநிதி சில்மி ஜுமான் கடந்த சனிக்கிழமை குருநாகல் பொல்பிடிகம என்ற இடத்தில் இடம்பெற்ற விபத்தில் வபாத்தானார்.
சனிக்கிழமை பேராதனை பல்கலைக்கழகத்தில் விரிவுரைகளை நிறைவு செய்துவிட்டு திருமண வைபவமொன்றில் கலந்து கொள்ளச் சென்று கொண்டிருந்த வேளை காலை 11 மணிக்கு இவர் செலுத்திச் சென்ற ஸ்கூட்டரும் – பஸ் வண்டியும் மோதிக்கொண்டதில் இவ்விபத்து ஏற்பட்டுள்ளது.
மூன்று பிள்ளைகளின் தந்தையான ஜுமான் பேராதனைப்பல்கலைக்கழகத்தில் சிரேஷ்ட விரிவுரையாளராகக் கடமையாற்றி கண்டியில் குடும்பத்துடன் வாழ்ந்து கொண்டிருந்தார். விபத்து இடம்பெற்ற தினம் உறவினர் ஒருவரின் திருமண வைபவத்துக்கு மனைவியையும் பிள்ளைகளையும் காரில் ஏற்கனவே அனுப்பிவிட்டு ஜுமான் (42) விரிவுரைகளை முடித்துவிட்டு திருமண வைபவத்துக்காக திரும்பிக்கொண்டிருந்தார்.
குருநாகல் கல்கமுவ– கல்லாவ என்ற கிராமத்தில் பிறந்த ஜுமான் க.பொ.த. சாதாரண தரம் வரை சியம் பலாகஸ்கொட்டுவ மதீனா தேசிய பாடசாலையில் பயின்றார். பின்பு தனது உயர் கல்வியை மடவளை மதீனா தேசிய பாடசாலையில் தொடர்ந்தார்.
இவர் 2008 இல் பேராதனை பல்கலைக்கழகத்தில் கணிதத்தில் முதல் வகுப்பில் பட்டம் பெற்றார். இதனையடுத்து பேராதனை பல்கலைக்கழக விஞ்ஞான பீடத்தின் கணிதவியல் சிரேஷ்ட விரிவுரையாளர் பதவி கிடைத்தது.
மேலும் பேராதனை பல்கலைக்கழகத்தில் லாஜிஸ்டிக்ஸ் மற்றும் சப்ளை செயின் குறித்து பல கட்டுரைகளை எழுதியுள்ளார். இதன் மேலாண்மை மற்றும் அதன் இதர துறைகளில் ஆராய்ச்சி துறைகளில் ஆராய்ச்சியிலும் ஈடுபட்டிருந்தார்.
ஐரோப்பிய ஜர்னல் ஆஹ்ப் ஆபரேஷன்ஸ் ரிசர்ச், ஒமேகா, இன்டர் நெஷனல் ஜனரல் ஆஹ்ப் புரொடக்டின் ரிசார்ச் ஆகிய நூல்களின் பதிப்பாய்வாளராகவும் பணியாற்றியுள்ளார்.
இவரது ஜனாஸா கடந்த ஞாயிற்றுக்கிழமை மாலை 4 மணியளவில் கல்லாவ ஜும்ஆ பள்ளிவாசல் மையவாடியில் நல்லடக்கம் செய்யப்பட்டது.
ஜனாஸாவில் பல்கலைக்கழக பீடாதிபதிகள், விரிவுரையாளர், பட்டதாரி மாணவர்கள், பல்கலைக்கழக ஊழியர்கள், புத்திஜீவிகள், ஊர் மக்கள் என பெருந்திரளானோர் கலந்து கொண்டிருந்தனர்.- Vidivelli