எந்தவொரு சந்தர்ப்பத்திலும் பங்களாதேஷ் இலங்கையைப்போன்று பொருளாதார நெருக்கடிக்கு முகங்கொடுக்காது என்றும், தமது அரசாங்கம் உரிய திட்டமிடலின் பிரகாரம் நாட்டை அபிவிருத்தி செய்வதாகவும் பங்களாதேஷ் பிரதமர் ஷேக் ஹஸீனா தெரிவித்துள்ளார்.
‘எமக்கு எதிராகப் பொய்யான குற்றச்சாட்டுக்களை முன்வைப்பதில் எவ்வித அர்த்தமும் இல்லை. பங்களாதேஷ் ஒருபோதும் இலங்கையாகாது என்பதுடன் அவ்வாறு ஆகவும் முடியாது’ என்றும் அந்நாட்டு பிரதமர் சுட்டிக்காட்டியுள்ளார்.
கடந்த 1975 ஆம் ஆண்டு ஓகஸ்ட் 15 ஆம் திகதி ‘வங்கபந்து’ ஷேக் முஜிபுர் ரஹ்மான் படுகொலை செய்யப்பட்டமையை நினைவுகூரும் வகையில் ஏற்பாடு செய்யப்பட்டிருந்த நிகழ்வில் உரையாற்றுகையிலேயே பிரதமர் ஷேக் ஹஸீனா மேற்கண்டவாறு தெரிவித்துள்ளார்.
மேலும் அவர் உரையாற்றுகையில்நாட்டின் தொடர்ச்சியான அபிவிருத்தியை இலக்காகக்கொண்டு தமது அரசாங்கம் ஏற்கனவே திட்டமிடப்பட்டவாறான முறைகளில் வரவு, செலவுத்திட்டத்தை முன்வைத்திருக்கிறோம். ஒவ்வொரு அபிவிருத்தித்திட்டமும் அதன்மூலம் நாட்டின் பொருளாதார ரீதியான நன்மையை அடிப்படையாகக்கொண்டு அமைந்திருக்கிறது
‘நாம் ஒவ்வொரு அபிவிருத்தி செயற்திட்டத்திற்கு அனுமதி வழங்க முன்னரும், அது பூர்த்தியடைந்ததன் பின்னர் நாட்டுக்கும் பொதுமக்களுக்கும் எத்தகைய நன்மைகளைப் பெற்றுத்தரும்?’ என்பது குறித்து சிந்திப்போம். மாறாக பாரிய அபிவிருத்தித்திட்டமொன்றின் மூலம் பெருமளவான நிதியை தரகுப்பணமாகப் பெற்றுக்கொள்ளமுடியும் என்பது குறித்து நாம் சிந்திப்பதே இல்லை’ என்று கூறியுள்ள பிரதமர் ஷேக் ஹஸீனா, ‘நாம் பிறரிடம் நிதியைப்பெற்று, அதன்மூலம் ‘நெய்’ உண்பதில்லை. யாரினுடையதும் கடன்பொறிக்குள் சிக்கும் அளவிற்கு எமது கடன்தொகை மிகவும் உயர்ந்ததல்ல’ என்றும் சுட்டிக்காட்டியுள்ளார்.– Vidivelli