(ஏ.ஆர்.ஏ.பரீல்)
கடந்த வருடங்களில் ஹஜ் யாத்திரையை மேற்கொள்வதற்காக முஸ்லிம் சமய பண்பாட்டலுவல்கள் திணைக்களத்துக்கு விண்ணப்பங்களைச் சமர்ப்பித்து 25 ஆயிரம் ரூபா பதிவுக் கட்டணம் செலுத்தியுள்ளவர்கள் இதுவரை அவர்களுக்கு வாய்ப்பு கிடைத்திராவிட்டால் பதிவுக்கட்டணத்தை திணைக்களத்திடமிருந்து மீளப் பெற்றுக் கொள்ள முடியுமென அரச ஹஜ்குழு தெரிவித்துள்ளது.
இவ்வாறான விண்ணப்பதாரிகள் எதிர்வரும் காலங்களில் ஹஜ் யாத்திரை மேற்கொள்வதில்லை என தீர்மானித்திருந்தால் அவர்கள் பதிவுக்கட்டணத்தை மீளப்பெற்றுக்கொள்ள முடியும். ஹஜ் யாத்திரை மேற்கொள்பவர்களின் வயதெல்லை 65 வயதுக்குட்பட்டிருக்க வேண்டும் என சவூதி ஹஜ் அமைச்சு நிபந்தனை விதித்துள்ளதால் இந்த வயதெல்லைக்கு மேற்பட்ட விண்ணப்பதாரிகளுக்கு ஹஜ் யாத்திரை மேற்கொள்ள முடியாது. இவ்வாறானவர்கள் உரிய ஆவணங்களுடன் முஸ்லிம் சமய பண்பாட்டலுவல்கள் திணைக்களத்துக்கு விஜயம் செய்து தாம் செலுத்தியுள்ள பதிவுக்கட்டணத்தை மீள பெற்றுக் கொள்ள முடியும்.
தற்போது ஹஜ் விண்ணப்பதாரிகளில் பலர் முஸ்லிம் சமய பண்பாட்டலுவல்கள் திணைக்களத்துக்கு விஜயம் செய்து பதிவுக்கட்டணத்தை மீளப்பெற்று வருகின்றனர்.– Vidivelli