ஏ.ஆர்.ஏ.பரீல்
ஐம்பெருங்கடமைகளில் ஒன்றான ஹஜ் யாத்திரை இலங்கை முஸ்லிம்களுக்கு மூன்றாவது வருடமாகவும் கானல்நீராகிப் போயுள்ளது.
இவ்வருடம் சவூதி அரேபியாவின் ஹஜ் விவகார அமைச்சு இலங்கைக்கு 1585 கோட்டாவை வழங்கியும் அது கைநழுவிப்போயுள்ளது.
கடந்த இருவருடங்களாக உலகளாவிய ரீதியில் பரவிய கொவிட் 19 வைரஸ் தொற்று காரணமாக ஹஜ் யாத்திரை வாய்ப்பினை நாம் இழந்திருந்தோம். என்றாலும் இவ்வருடமேனும் ஹஜ் கடமையை நிறைவேற்றிக்கொள்ளலாம் என்றே பலர் எதிர்பார்த்திருந்தனர். இவ்வாறான நிலையில் நாட்டில் ஏற்பட்டுள்ள மிகவும் மோசமான பொருளாதார நெருக்கடி, டொலர் தட்டுப்பாடு என்பன ஹஜ் யாத்திரைக்கும் தடையினை ஏற்படுத்திவிட்டமை முஸ்லிம்களை துயரத்தில் ஆழ்த்தியுள்ளது.
2022ஆம் ஆண்டுக்கான ஹஜ் யாத்திரைக்கு சவூதி அரேபிய ஹஜ் அமைச்சு இலங்கைக்கு 1585 ஹஜ் கோட்டாவை வழங்கி அதற்கான வழிகாட்டல்களையும் அனுப்பி வைத்தது.
ஹஜ் யாத்திரை மேற்கொள்பவர்கள் 65 வயதுக்குட்பட்டவர்களாகவும் மூன்று கொவிட் 19 தடுப்பூசிகளைப் பெற்றுக்கொண்டவர்களாகவும் இருக்க வேண்டுமெனவும் நிபந்தனை விதித்திருந்தது.
இந்நிலையில் முஸ்லிம் சமய பண்பாட்டலுவல்கள் திணைக்களமும் அரச ஹஜ் குழுவும் ஹஜ் பயண ஏற்பாடுகள் மேற்கொள்வது தொடர்பில் கடந்த சில நாட்களாக கலந்துரையாடல்களை நடத்தியது.
ஹஜ் யாத்திரைக்கான ஒதுக்கீடு மற்றும் அதற்கான ஏற்பாடுகளைத் தொடர்வதற்கான திட்டங்களைப் பற்றி ஏற்கனவே இதனுடன் தொடர்பான அமைச்சான புத்த சாசன மற்றும் மத கலாசார அலுவல்கள் அமைச்சுக்கும் திணைக்களம் அறிவித்திருந்தது.
ஹஜ் முகவர்களுக்கிடையில் கோட்டா பகிர்வது பற்றியும் ஆலோசிக்கப்பட்டு வந்தது. எனினும் நாட்டில் ஏற்பட்டுள்ள அந்நியச் செலாவணி நெருக்கடி யாத்திரையை வெற்றிகரமாக முன்னெடுப்பதற்கு இடமளிக்கவில்லை.
டொலர் தட்டுப்பாடு
நாட்டில் தற்போது ஏற்பட்டுள்ள பொருளாதார நெருக்கடிக்கு மத்தியில் ஹஜ் பயண முகவர்கள் எவ்வாறு ஒரு ஹஜ் யாத்திரிகருக்கு 4000 டொலர் (14 இலட்சம் ரூபா) என்ற ரீதியில் சுமார் 6.3 மில்லியன் அமெரிக்க டொலர்களை (2.2 பில்லியன் ரூபா) திரட்டுவார்கள் என்ற கேள்வி எழுப்பப்பட்டது. ஹஜ் முகவர்களினால் வழங்கப்படும் சேவைகளைப் பொறுத்து ஒவ்வொரு யாத்திரிகருக்கும் விமானக்கட்டணத்தை தவிர்த்து 6000 டொலர் (21 இலட்சம் ரூபா) வரை செல்லும் என இத்தொழிற்துறை வட்டாரங்கள் தெரிவித்திருந்தன. இது பொதுவாக 20– 27 நாட்களுக்கு உணவு, போக்குவரத்து, தங்குமிடம் மற்றும் சவூதி அரேபிய வரிகளை உள்ளடக்கியதாகும்.
இன்றைய சூழலில் நாட்டில் எரிபொருள், எரிவாயு, உணவு, மருந்துகள் உள்ளிட்ட அத்தியாவசியப் பொருட்களை இறக்குமதி செய்ய டொலர் இல்லாத நேரத்தில் ஹஜ் யாத்திரைக்கு தேவையான சுமார் 6 மில்லியன் அமெரிக்க டொலருக்கும் அதிகமான தொகையை வழங்குவதற்கு போதுமான டொலர்கள் மத்திய வங்கியிடம் இல்லை என்பதே சிக்கலுக்குப் பிரதான காரணமாகும்.
சுற்றாடல்துறை அமைச்சருடன்
கலந்துரையாடல்
நாட்டில் நிலவும் பொருளாதார நெருக்கடி, டொலருக்கான தட்டுப்பாட்டுக்கு மத்தியில் இவ்வருட ஹஜ் பயண ஏற்பாடுகளை எவ்வாறு முன்னெடுக்க முடியும் என்பது தொடர்பில் ஹஜ் முகவர்கள் சங்க பிரதிநிதிகள் கடந்த வாரம் சுற்றாடல் துறை அமைச்சர் ஹாபிஸ் நஸீர் அஹமடை சந்தித்து கலந்துரையாடினார்கள். அமைச்சின் அலுவலகத்தில் இடம் பெற்ற இச்சந்திப்பில் இவ்வருட ஹஜ் பயண ஏற்பாடுகளை முன்னெடுப்பதில் உள்ள சிக்கல்களை எவ்வாறு களைவது என்பது பற்றி ஆராயப்பட்டது.
விடயத்துக்கு பொறுப்பான புத்தசாசன மதவிவகாரங்கள் மற்றும் கலாசார அமைச்சர் விதுர விக்கிரமநாயக்கவுடன் கலந்துரையாடி அரசாங்கத்தின் அனுமதியைப் பெற்றுத்தருமாறு ஹஜ் முகவர்கள் சங்க பிரதிநிதிகள் அமைச்சர் நஸீர் அஹமட்டை வேண்டிக்கொண்டிருந்தார்கள். ஹஜ் முகவர்கள் சங்க தரப்பில் எம்.ஜி.எம்.ஹிஸாம். எம்.ஆர்.எம்.பாரூக், எம்.ஓ.எப்.ஜெஸீம், எச்.எம். அம்ஜதீன், எம்.எப்.என்.எம்.உஸாமா ஆகியோர் இதில் பங்குகொண்டிருந்தனர்.
அமைச்சர் நஸீர் அஹமட்
‘நாட்டில் டொலர் பிரச்சினை இருக்கிறது. இதேவேளை ஹஜ் யாத்திரையும் முஸ்லிம்களின் முக்கிய கடமையாகும். இந்நிலையில் விடயத்துக்குப் பொறுப்பான அமைச்சர் விதுர விக்கிரமநாயக்கவுடன் பேச்சுவார்த்தை நடாத்தி வருகிறேன். அத்தோடு அமைச்சரவையிலும் இதுபற்றி கலந்துரையாடவுள்ளேன்‘ என அமைச்சர் நஸீர் அஹமட் இதன்போது தெரிவித்திருந்தார்.
ஹஜ் முகவர்கள் சங்க பிரதிநிதிகள்
அமைச்சர் விதுரவுடன் சந்திப்பு
இந்த இக்கட்டான நிலையில் அகில இலங்கை ஹஜ் முகவர்கள் சங்கத்தின் தலைவர் ரிஸ்மி ரியால், ஹஜ் முகவர்கள் சங்கத்தின் தலைவர் எம்.ஜி.எம்.ஹிஸாம் உட்பட பிரதிநிதிகள் புத்தசாசன, மத மற்றும் கலாசார அலுவல்கள் அமைச்சர் விதுரவிக்கிரம நாயக்கவைச் சந்தித்து இவ்வருட ஹஜ் யாத்திரை தொடர்பில் கலந்துரையாடினார்கள்.
இவ்வருட ஹஜ் யாத்திரைக்கு அரசு தடை விதிக்கவில்லை. ஆனால் அதற்கான டொலரை அரச வங்கியில் வைப்பிலிடுமாறு கோரியது. அதாவது 1585 ஹஜ் யாத்திரிகர்களுக்குமான மொத்த கட்டணமான 6.5 மில்லியன் டொலரை வங்கியில் வைப்பிலிடுமாறு அமைச்சர் விதுர விக்கிரமநாயக்க முகவர் சங்க பிரதிநிதிகளை வேண்டியுள்ளார். இதற்கான நிதியை திரட்டும் பொறுப்பை ஹஜ் பயண முகவர்களிடமே சுமத்தினார். வங்கிகளிடம் டொலர் இல்லாமையால் அவர்களால் இவ்விடயத்தில் உதவுவது பிரச்சினையாக உள்ளது என்பதையும் அமைச்சர் சுட்டிக் காட்டினார்.
ஹஜ் முகவர்களின் கூட்டம்
இலங்கை ஹஜ் முகவர்கள் கடந்த திங்கட்கிழமை முஸ்லிம் சமய பண்பாட்டலுவல்கள் திணைக்களத்தில் ஒன்று கூடி நிலைமைகளை ஆராய்ந்து இறுதித் தீர்மானமொன்றினை மேற்கொண்டனர்.
நாடு மிக மோசமான பொருளாதார நெருக்கடியில் சிக்குண்டுள்ளமை, மருந்து வகைகளுக்கான தட்டுப்பாடு, எரிபொருள், எரிவாயு, பால்மா மற்றும் அத்தியாவசிய பொருள்களுக்கான தட்டுப்பாடு என்பனவற்றுக்கு மத்தியில் இவ்வருட ஹஜ் யாத்திரையை மேற்கொள்வதிலிருந்தும் தவிர்ந்திருப்பதே பொருத்தமானது என இதன்போது தீர்மானம் எட்டப்பட்டது.
நாட்டின் நெருக்கடி நிலைமைக்கு டொலர் தட்டுப்பாடே காரணம் என்பதால் இவ்வருட ஹஜ் ஏற்பாடுகளிலிருந்தும் தவிர்ந்திருக்க தீர்மானித்தனர். இந்த தீர்மானம் ஏகமனதாக எடுக்கப்பட்டது. நாடு எதிர்கொண்டுள்ள பொருளாதார நெருக்கடியிலிருந்து மீள்வதற்கு முஸ்லிம் சமூகம் வழங்குகின்ற ஒத்துழைப்பாக இது அமையும் என்றும் இதன்போது சுட்டிக்காட்டப்பட்டது.
இலங்கையின் வெளிநாட்டு நாணய கையிருப்பு பூச்சியமாக இருப்பதால் அத்தியாவசியமற்ற பொருட்கள் மற்றும் செயற்பாடுகளுக்கு டொலர்களை வழங்க முடியாது என்று மத்திய வங்கி ஆளுநர் பல சந்தர்ப்பங்களில் தெரிவித்துள்ளமை குறிப்பிடத்தக்கதாகும்.
திணைக்கள பணிப்பாளர்
இப்ராஹிம் அன்ஸார்
இதேவேளை இவ்வருட ஹஜ் யாத்திரையிலிருந்தும் ஹஜ் முகவர்கள் தவிர்ந்திருப்பதற்கு மேற்கொண்ட தீர்மானத்தை முஸ்லிம் சமய பண்பாட்டலுவல்கள் திணைக்கள பணிப்பாளர் இப்ராஹிம் அன்ஸார் பாராட்டியுள்ளார்.
முஸ்லிம்கள் தங்களது புனிதமான கடமையை நாட்டினதும் நாட்டு மக்களினதும் நலன்கருதி தியாகம் செய்துள்ளார்கள். இதன்மூலம் முஸ்லிம்கள் நாட்டுப் பற்றுள்ளவர்கள் என்பதை மீண்டும் நிரூபித்துள்ளார்கள் என்றும் தெரிவித்துள்ளார்.
சவூதி ஹஜ் அமைச்சுக்கு அறிவிப்பு
இந் நிலையில், நாட்டில் நிலவும் பொருளாதார நெருக்கடி நிலைமை காரணமாக இவ்வருடம் இலங்கையர்கள் ஹஜ் யாத்திரை மேற்கொள்வதில்லை என புத்தசாசன, மத மற்றும் கலாசார அமைச்சு வெளிவிவகார அமைச்சின் ஊடாக சவூதி ஹஜ் அமைச்சுக்கு உத்தியோகபூர்வமாக அறிவித்துள்ளமை குறிப்பிடத்தக்கதாகும்.-Vidivelli