சஹ்ரானுடன் அடிக்கடி தொடர்புகொண்ட நபரை இராணுவ புலனாய்வுப் பிரிவு காப்பாற்றியது ஏன்?

- முன்னாள் சி.ஐ.டி. பணிப்பாளர் ஷானி அபேசேகரவின் அடிப்படை உரிமை மீறல் மனுவூடாக வெளிச்சத்துக்கு வரும் தகவல்கள்

By vidivelli Last updated Feb 24, 2022

எம்.எப்.எம்.பஸீர்

உயிர்த்த ஞாயிறு தினத்தன்று (2019.04.21) நடாத்தப்பட்ட தற்கொலை குண்டுத் தாக்குதல்களை தொடர்ந்து, அத்தாக்குதல்களின் பிரதான குண்டுதாரியாக செயற்பட்ட சஹ்ரான் ஹசீமுடன் அடிக்கடி தொடர்பினை ஏற்படுத்திய நபர் ஒருவரை சி.ஐ.டி.யினர் விசாரணைக்கு உட்படுத்திய போது, அந் நபரை பாதுகாப்பு அமைச்சு ஊடாக இராணுவ புலனாய்வுப் பிரிவின் அப்போதைய பிரதானி சூல கொடித்துவக்கு மீட்டுச் சென்றுள்ளமை தொடர்பில் விடயங்கள் வெளிப்படுத்தப்பட்டுள்ளன.

இந் நிலையில் அவ்வாறு சி.ஐ.டி. பிடியிலிருந்து மீட்டு இராணுவ புலனாய்வாளர்களால் அழைத்து செல்லப்பட்ட நபர் யார் எனும் கேள்வி தற்போது பரவலாக எழுந்துள்ளது.
தாக்குதல்களைத் தொடர்ந்து, இலங்கை சி.ஐ.டி.யினருடன் இணைந்து விசாரணைகளை முன்னெடுத்த அமெரிக்காவின் எப்.பி.ஐ அதிகாரிகள், தொழில் நுட்ப ரீதியிலான உதவிகளை செய்திருந்தனர். அவர்கள் தற்கொலை குண்டுதாரிகளின் இலத்திரனியல் உபகரணங்களை பகுப்பாய்வு செய்து விசாரணைகளுக்கான தகவல்களை வழங்கியிருந்தனர். இந் நிலையில் இணைய அடையாள முகவரி ஒன்றினை ( ஐ.பி. முகவரி) கண்டறிந்த எப்.பி.ஐ. அதிகாரிகள், அதனூடாக சஹ்ரானுடன் ஒருவர் அடிக்கடி தொடர்பில் இருந்துள்ளமையை வெளிப்படுத்தி சி.ஐ.டி.யினருக்கு அறிவித்துள்ளனர்.

அதன்பிரகாரம் நபர் ஒருவரை சி.ஐ.டி.யினர் விசாரணை செய்துள்ள நிலையில், அவர் சஹ்ரான் தொடர்பிலோ அல்லது தேசிய தெளஹீத் ஜமா அத் தொடர்பிலோ தகவல்களை வெளிப்படுத்த மறுத்துள்ளார். இதனையடுத்து, பாதுகாப்பு அமைச்சின் ஊடாக சி.ஐ.டி.யினரை அனுகியுள்ள அப்போதைய இராணுவ புலனாய்வுப் பணிப்பாளர் சூல கொடித்துவக்கு, அந் நபரை மீட்டுச் சென்றதாகவும், குறித்த நடவடிக்கைகள் இராணுவ புலனாய்வு நடவடிக்கைகளுடன் தொடர்புடையது என அவர் தெரிவித்ததாகவும் தகவல்கள் வெளிப்படுத்தப்பட்டுள்ளன.

உயர் நீதிமன்றுக்கு, உயிர்த்த ஞாயிறு தின தாக்குதல்கள் இடம்பெற்றதை தொடர்ந்து விசாரணைகளை முன்னெடுத்த சி.ஐ.டி. இற்கு தலைமை வகித்த அத்திணைக்களத்தின் அப்போதைய பிரதானி ஓய்வுபெற்ற சிரேஷ்ட பொலிஸ் அத்தியட்சர் ஷானி அபேசேகர தாக்கல் செய்துள்ள 36 பக்க அடிப்படை உரிமை மீறல் மனுவின் 59 ஆம் இலக்கமிடப்பட்ட விடயத்தில் மேற்படி விவகாரம் வெளிப்படுத்தப்பட்டுள்ளது.

உயிர்த்த ஞாயிறு தினம் இடம்பெற்ற தொடர் தற்கொலை குண்டுத் தாக்குதல்களைத் தொடர்ந்து முன்னெடுக்கப்பட்ட விசாரணைகளில், பிரதான தற்கொலை குண்டுதாரியான சஹ்ரான் ஹசீமின் மிக நெருங்கிய சகாவான ‘குட்டி சஹ்ரான்’ அல்லது மாத்தளை சஹ்ரானுடன் அரச உளவுச் சேவையின் அதிகாரி ஒருவர் மிக நெருக்கமான தொடர்பில் இருந்தமை வெளிப்பட்டிருந்தது. ‘ சொனிக் சொனிக் ‘ எனும் பெயரால் அறியப்பட்ட குறித்த அரச உளவுச் சேவை அதிகாரி தொடர்பில் கூடுதல் தகவல்கள் தற்போது ஷானி அபேசேகரவின் அடிப்படை உரிமை மீறல் மனுவூடாக வெளிப்படுத்தப்பட்டுள்ளன.

சஹ்ரான் தொடர்பில் உரிய விசாரணைகளை முன்னெடுக்காமையால் உயிர்த்த ஞாயிறு தின தாக்குதல்கள் நடந்ததாக கூறி குளியாப்பிட்டிய நீதிவான் நீதிமன்றத்தில் சமர்ப்பிக்கப்பட்டுள்ள பீ அறிக்கை பிரகாரம் தான் கைது செய்யப்படுவதையும் தடுப்புக் காவலில் வைக்கப்படுவதையும் தடுத்து உத்தரவிடுவதுடன் தனக்கு 10 கோடி ரூபாவை நட்டஈடாக செலுத்த உத்தரவிடுமாறும் கோரி குற்றப்புலனாய்வு திணைக்களத்தின் முன்னாள் பணிப்பாளர் ஷானி அபேசேகர உயர் நீதிமன்றத்தில் அடிப்படை உரிமை மீறல் மனு தாக்கல் செய்துள்ளார்.

சட்டத்தரணி மஞ்சுள பாலசூரிய ஊடாக தாக்கல் செய்யப்பட்டுள்ள குறித்த மனுவில், 14 பேர் பிரதிவாதிகளாக பெயர் குறிப்பிடப்பட்டுள்ளனர்.

குறித்த அடிப்படை உரிமை மீறல் மனுவில், மாவனெல்லை புத்தர் சிலை உடைப்பு விவகாரம், கடந்த 2018 நவம்பர் 30 ஆம் திகதி மட்டக்களப்பு – வவுணதீவு பொலிஸ் காவலரணில் இரு பொலிஸ் கான்ஸ்டபிள்கள் கொடூரமாக கொலை செய்யப்பட்ட சம்பவம் முதல் ஒவ்வொரு சம்பவம் தொடர்பிலும் சி.ஐ.டி. முன்னெடுத்த விசாரணைகள் தொடர்பில் ஷானி அபேசேகர விவரித்துள்ளார்.

அதில் வவுண தீவு சம்பவம் தொடர்பில் சி.ஐ.டி.யின் விஷேட விசாரணைப் பிரிவு ஊடாக விசாரணைகள் ஆரம்பிக்கப்பட்டதாகவும், அந்த சம்பவம் தொடர்பில் 5.12.2018, 8.12.2018, 14.12.2018 மற்றும் 03.01.2019 ஆம் திகதிகளில் இராணுவ புலனாய்வுப் பிரிவினர் தமக்கு அறிக்கைகளை அளித்த நிலையில், அவை அனைத்திலும் அந்த குற்றத்தின் பின்னால் புலிகள் இருப்பதாகவே கூறப்பட்டதாக ஷானி அபேசேகர சுட்டிக்காட்டியுள்ளார்.

இதனைவிட 03.12.2018 அன்று அரச உளவுச் சேவை பிரதானி சிரேஷ்ட பிரதிப் பொலிஸ் மா அதிபர் நிலந்த ஜயவர்தன, சி.ஐ.டி. பிரதானிக்கு வழங்கிய தகவலும், அதனூடாக மீட்கப்பட்ட ‘ மோட்டார் சைக்கிள் ஜகட் ‘ மற்றும் பாடசாலை பை ஆகியன தொடர்பிலும் ஷானி அபேசேகர சந்தேகம் வெளியிட்டுள்ளார்.

இவ்வாறான நிலையில், மாவனெல்லை புத்தர் சிலை தகர்ப்பு சம்பவத்தை அடுத்து உதவி பொலிஸ் அத்தியட்சர் விக்ரமசேகரவின் கீழ் முன்னெடுக்கப்பட்ட விசாரணைகளிலேயே சி.ஐ.டி.க்கு சஹ்ரன் தொடர்பில் முதன் முறையாக தகவல்கள் வெளிப்பட்டதாகவும், எனினும் அரச உளவுச் சேவை மற்றும் இராணுவ புலனாய்வுப் பிரிவிடம் அந்த தகவல்கள் இருந்தும் அவற்றை தம்முடன் பகிர்ந்துகொள்வதிலிருந்து உளவுப் பிரிவுகள் தவிர்ந்திருந்துள்ளதாக ஷானி அபேசேகர தனது மனுவூடாக சுட்டிக்காட்டியுள்ளார்.

அத்துடன் உயிர்த்த ஞாயிறு தினம் இடம்பெற்ற தொடர் தற்கொலை குண்டுத் தாக்குதல்களைத் தொடர்ந்து முன்னெடுக்கப்பட்ட விசாரணைகளில், பிரதான தற்கொலை குண்டுதாரியான சஹ்ரான் ஹசீமின் மிக நெருங்கிய சகாவான ‘குட்டி சஹ்ரான்’ அல்லது மாத்தளை சஹ்ரானுடன் அரச உளவுச் சேவையின் அதிகாரி ஒருவர் மிக நெருக்கமான தொடர்பில் இருந்தமை வெளிப்பட்டிருந்தது. ‘ சொனிக் சொனிக் ‘ எனும் பெயரால் அறியப்பட்ட குறித்த அரச உளவுச் சேவை அதிகாரி தொடர்பில் கூடுதல் தகவல்கள் தற்போது ஷானி அபேசேகரவின் அடிப்படை உரிமை மீறல் மனுவூடாக வெளிப்படுத்தப்பட்டுள்ளன.

குறித்த மனுவில் கூறப்பட்டுள்ள விடயங்களுக்கு அமைய, சொனிக் சொனிக் எனும் பெயரால் அறியப்படும் அரச உளவுச் சேவை அதிகாரி உப பொலிஸ் பரிசோதகர் பண்டார என்பவர் ஆவார். விசாரணைகளில் கண்டறியப்பட்ட சிம் அட்டை ஒன்றினை மையப்படுத்திய விசாரணையில் இது தெரியவந்துள்ளது.

குறித்த சிம் அட்டையின் பதிவு தொடர்பில் விசாரித்த போது, அது கொழும்பு நகர போக்குவரத்து பிரிவின் பெண் பொலிஸ் சார்ஜன் ஒருவரின் பெயரில் இருந்ததாகவும் அவரை விசாரித்த போது, அந்த சிம் அட்டை தன்னுடன் தொடர்பில் இருக்கும் உளவுச் சேவை அதிகாரியான உப பொலிஸ் பரிசோதகர் பண்டாரவுக்கு தான் பெற்றுக்கொடுத்தது எனவும் தெரிவித்ததாக முன்னாள் சி.ஐ.டி. பணிப்பாளர் ஷானி அபேசேகர தனது அடிப்படை உரிமை மீறல் மனுவில் சுட்டிக்காட்டியுள்ளார்.

இதன்போது உப பொலிஸ் பரிசோதகர் பண்டாரவை தான் விசாரிக்க முயன்றதாகவும், அப்போது அரச உளவுச் சேவையின் பிரதிப் பொலிஸ் மா அதிபராக இருந்த சம்பத் லியனகே, அவரை விசாரிக்க வேண்டாம் எனவும் அது உளவுத் துறையின் திட்டப்படி முன்னெடுக்கப்பட்ட தொடர்பாடல் எனவும் குறிப்பிட்டுள்ளார்.

எவ்வாறாயினும் அக்கோரிக்கையை தான் நிராகரித்து உப பொலிஸ் பரிசோதகர் பண்டாரவை விசாரணை செய்ததாகவும், அவர் எந்த விடயத்தையும் வெளிப்படுத்த மறுத்ததாகவும் ஷானி அபேசேகர மனுவில் சுட்டிக்காட்டியுள்ளார்.

உயிர்த்த ஞாயிறு தாக்குதலின் பின்னர், தாக்குதலுக்கான பொறுப்பை சர்வதேச பயங்கரவாத கும்பலான ஐ.எஸ். ஐ.எஸ். ஏற்பதற்கான கோரிக்கை இந்த மாத்தளை சஹ்ரான் எனும் சந்தேக நபராலேயே முன் வைக்கப்பட்டிருந்ததாக தகவல்கள் ஏற்கனவே வெளிப்படுத்தப்பட்டுள்ளமையும் இங்கு சுட்டிக்காட்டத்தக்கது.- Vidivelli