(ஏ.ஆர்.ஏ. பரீல்)
‘ஒரே நாடு ஒரே சட்டம்’ தொடர்பான ஞானசார தேரர் தலைமையிலான ஜனாதிபதி செயலணி கிழக்கு மாகாணம் உட்பட நாட்டின் பல பாகங்களுக்கும் நேரடி விஜயம் மேற்கொண்டு மக்களின் கருத்துக்களையும் ஆலோசனைகளையும் பெற்றுக்கொள்ளவுள்ளதாக அச்செயலணியின் ஊடகப்பிரிவு தெரிவித்துள்ளது.
சிவில் சமூக அமைப்புக்கள் மற்றும் நிறுவனங்கள் கருத்துக்களை, ஆலோசனைகளைத் தெரிவிக்க விரும்பினால் ‘ஒரே நாடு ஒரே சட்டம்’ செயலணியின் காரியாலயத்துக்கு நேரடியாக வருகை தர முடியும் எனவும் தெரிவித்துள்ளது.
நாட்டில் அமுலிலுள்ள தனியார் சட்டங்களான கண்டிய சட்டம், தேசவழமை சட்டம் என்பனவற்றில் அடங்கியுள்ள நல்ல விடயங்கள் கருத்திற்கொள்ளப்பட்டு அனைவருக்கும் சமமான முன்னேற்றகரமான சிறந்தவோர் சட்டத்துக்கான சிபாரிசுகளை ஆணைக்குழு முன்வைக்கும் என செயலணியின் தலைவர் ஞானசாரதேரர் ஊடகங்களுக்கு கருத்துத் தெரிவிக்கையில் கூறினார்.
அரசியல்வாதிகள் நாட்டு மக்கள் இன, மத பேதமின்றி ஒன்றுபடுவதை விரும்பவில்லை. அதனாலேயே ‘ஒரே நாடு ஒரே சட்டம்’ செயலணியை எதிர்க்கிறார்கள். இந்நாட்டில் முஸ்லிம்களுக்கென்று பல சட்டங்கள் இருப்பதனால் அந்தச் சட்டங்களை ஒரே சட்டமாக்க நாம் விரும்புகிறோம். செயலணி தனது பொறுப்பினை எவ்வித பாகுபாடுமின்றி நிறைவேற்றும். இதற்கு அனைவரதும் ஒத்துழைப்பு தேவை என்றார்.-Vidivelli