போதை பாவனையை விடும்படி புத்திமதி சொன்னதற்காக தந்தையின் கண்ணை தோண்டி எடுத்த 19 வயது மகன்
வாழைச்சேனையில் கொடூர சம்பவம்
(எச்.எம்.எம்.பர்ஸான்)
“போதைப்பொருள் பாவனைக்கு அடிமையான எனது மகனை திருத்துவதற்கு நான் பல்வேறு முயற்சிகளை செய்து வந்தேன். போதைப்பொருள் பாவிக்க வேண்டாம். கெட்ட நண்பர்களுடன் சேர வேண்டாம் என்று புத்திமதி சொன்ன போதே எனது மகன் எனது கண்ணை தோண்டி விட்டான்” என்று 67 வயதுடைய தந்தையொருவர் தனது மன வேதனையை தெரிவித்தார்.
வாழைச்சேனை பொலிஸ் பிரிவுக்குட்பட்ட தியாவட்டவான் பாடசாலை வீதியில் கடந்த சனிக்கிழமை 18 ஆம் திகதி மகன் தனது தந்தையை கொடூரமான முறையில் தாக்கி அவரது கண்ணை அவனது விரல்களால் தோண்டி எடுத்த கோரச் சம்பவமொன்று இடம்பெற்றுள்ளது.
இவ்வாறு மகனின் தாக்குதலுக்கு இலக்கான அந்நபர் வாழைச்சேனை ஆதார வைத்தியசாலையில் அனுமதிக்கப்பட்டு பின்னர் மேலதிக சிகிச்சைக்காக மட்டக்களப்பு போதனா வைத்தியசாலைக்கு மாற்றப்பட்டு தற்போது வரை அவர் அங்கு சிகிச்சை பெற்று வருகிறார்.
இவ்வாறு கொடூரமான தாக்குதலுக்குள்ளான சதக்கத்துல்லாஹ் அசனார் கருத்து தெரிவிக்கையில், எனது மகனுக்கு தற்போது பத்தொன்பது வயது. அவன் 2017 ஆம் ஆண்டில் இருந்தே போதைக்கு அடிமையாகி விட்டான். நான் அவனை திருத்துவதற்கு என்னால் முடிந்த முயற்சிகளை செய்துள்ளேன்.
நான் பள்ளிவாசல் ஒன்றில்தான் கடமை புரிந்து வந்தேன். எனது மகன் போதைப்பொருள் பாவனையாளர் என்ற காரணத்தினால் தான் நான் கடமையில் இருந்து விலகினேன்.
எனது மகனை திருத்தி எடுக்க நான் 2017 ஆம் ஆண்டு முதல் இதுவரை ஐந்து தடவைகள் வாழைச்சேனை பொலிஸ் நிலையத்தில் முறைப்பாடு செய்துள்ளேன். அது பலனளிக்கவில்லை.
எனது மகனை விட்டு விடுங்கள் என்று அவனது நண்பர்களிடமும் நான் அடிக்கடி சொல்லி வருவதுண்டு, அவர்கள் திருந்தியதும் இல்லை எனது மகனை விட்டு அவர்கள் விலகியதுமில்லை.
சம்பவம் நடந்த அன்றைய தினம் எனது மகன் என்னிடம் ஆயிரம் ரூபாய் பணம் கேட்டான். நான் கொடுக்கவில்லை. பணம் தராவிட்டால் கொலை செய்வேன் என்று சொல்லிக் கொண்டே என்னை தாக்கினான். எனது தலையில் கல்லால் கடுமையாக தாக்கினான். பின்னர் எனது கழுத்தை நெரித்து என்னை கொலை செய்ய அவன் முயற்சி செய்தான். நான் அவனிடம் போராடித்தான் எனது உயிரை காப்பாற்றிக் கொண்டேன். ஆனால் எனது மகன் எனது கண்ணை தோண்டி எடுத்து விட்டான்.
இப்போது எனது இடது கண் முழுமையாக எடுக்கப்பட்டுவிட்டது. வலது கண்ணும் 80 வீதம் பாதிப்படைந்துள்ளதாக வைத்தியர்கள் சொல்லி இருக்கிறார்கள். ஆனால் நான் கவலைப்படவில்லை தைரியமாக இருக்கிறேன். எனக்கு நடந்த இந்த சம்பவம் போல இனி யாருக்கும் நடக்கக் கூடாது என்றார்.-Vidivelli