தமிழில் : எம்.ஐ.அப்துல் நஸார்
மக்காவில் உள்ள புனித பள்ளிவாசலுக்கு மேற்கொள்ளப்படும் யாத்திரை ஹஜ். நீண்ட தூரங்களில் வாழும் மக்கள் இப் புனித கடமையை நிறைவேற்ற வருவது பழமையான வழக்கமாகும். மேலும் உலகளவில் வருடாந்தம் நிகழும் மிகப்பெரிய சமய ஒன்றுகூடல்களுள் இதுவும் ஒன்றாகும்.
தற்போதைய கொரோனா வைரஸ் (கொவிட்-19) தொற்று பரவலுக்கு முன்னர், வரலாறு நெடுகிலும் பல்வேறு தொற்று நோய்களால் ஹஜ் கடமைக்கு பல்வேறு இடர்பாடுகள் ஏற்பட்டுள்ளன. சில சந்தர்ப்பங்களில் புனித மக்கா நகரத்திற்கு ஹஜ் கடமைக்குச் செல்வதற்கு தடை விதிக்கப்பட்டது, சில சந்தர்ப்பங்களில் ஹஜ் மட்டுப்படுத்தப்பட்ட யாத்திரிகர்களுடன் நிறைவேற்றப்பட்டது.
மக்கா நகர மக்களும், யாத்திரிகர்களும் தொற்று நோய்களால் பாதிக்கப்பட்டனர். மக்காவில் வரலாற்று ரீதியாக பதிவு செய்யப்பட்ட முதலாவது தொற்று தொடர்பில் பிரபல முஸ்லிம் அறிஞரும் வரலாற்றாசிரியருமான இப்னு கதீர் தனது ‘அல்-பித்யா வன்-நிஹாயா’ (ஆரம்பம் மற்றும் முடிவு) என்ற புத்தகத்தில் ‘‘ 968 ஆம் ஆண்டு அல்-மஷ்ரி என அழைக்கப்படும் ஒரு தொற்றுநோய் மக்கா நகரத்தைத் தாக்கியது. இதனால் யாத்திரிகர்கர்கள் பலர் உயிரிழந்ததோடு அவர்களது ஒட்டகங்களும் கொல்லப்பட்டன. ஹஜ் கடமையினை நிறைவேற்றியவர்களும் அதனையடுத்து இறந்தனர் ’’ எனக் குறிப்பிட்டுள்ளார்.
அந்தக் காலகட்டத்தில், நோய் அல்லது பிற நோய்களால் ஏற்பட்ட மோசமான சமூக மற்றும் பொருளாதார சூழ்நிலைகள் காரணமாக குறிப்பாக தொற்றுநோயால் பாதிக்கப்பட்ட பகுதிகளிலிருந்து பிற்காலத்தில் யாத்திரிகர்களின் வருகை குறிப்பிடத்தக்க அளவில் வீழ்ச்சி கண்டதாக பல வரலாற்றாசிரியர்கள் குறிப்பிடுகின்றனர்.
19 ஆம் நூற்றாண்டில் அறிமுகமான புதிய போக்குவரத்து வழிமுறைகள் காரணமாக உலகெங்கிலும் உள்ள பெரிய குழுக்கள் ஹஜ்ஜுக்கு வருவது எளிதாகியது, இதனால் நோய்கள் பரவும் வாய்ப்பும் வேகமாகியதோடு அதனைக் கட்டுப்படுத்த முடியாத நிலையும் ஏற்பட்டது.
அதே நூற்றாண்டில் தொற்றுநோய்களால் பல பாதிப்புக்கள் ஏற்பட்டன. உலகெங்கிலும் பல்வேறு நோய்கள் பரவி மில்லியன் கணக்கானவர்களைக் கொன்றதால் உலகளாவிய ரீதியில் மக்களின் ஆயுள் எதிர்பார்க்கை வெறுமனே 29 வயதாக குறைந்தது. ஹிஜாஸ் பிராந்தியம் தொற்று நோயால் குறிப்பாக கொலரா தொற்று நோயினால் பெரும் பாதிப்பை எதிர்கொண்டது. இத் தொற்று இந்திய யாத்திரிகர்கள் மூலம் மீண்டும் மீண்டும் அந்தப் பகுதியில் ஏற்பட்டது.
தனிமைப்படுத்தலின் செயல்திறனைப் பற்றி முஸ்லிம்கள் நீண்ட காலமாக அறிந்து வைத்திருக்கின்றார்கள். ஏனென்றால் ‘நீங்கள் இருக்கும் ஒரு தேசத்தில் தொற்று நோய் பற்றி நீங்கள் அறிந்து கொண்டால், அங்கிருந்து வெளியேறாதீர்கள்; அது ஒரு குறிப்பிட்ட தேசத்தில் பரவுவதாக நீங்கள் கேள்விப்பட்டால், அந் நிலத்திற்குள் நுழைய வேண்டாம்’ என நபிகள் நாயகம் (ஸல்) அவர்கள் கூறி இருப்பதனாலாகும். உஸ்மானிய பேரரசு காலத்தல் எகிப்து போன்ற நாடுகளுக்கு தொற்று நோய்களுள்ள சில நாடுகளிலிருந்து எவவேரனும் திரும்பி வந்தால் அவர்கள் பெரும்பாலும் தனிமைப்படுத்தப்பட்டனர்.
எனினும், அக்காலத்தில் தனிமைப்படுத்தல் நடவடிக்கைகள் பரவலான பொது சுகாதாரக் கொள்கையின் ஒரு பகுதியாக இருக்கவில்லை. உலகளாவிய நோய்ப் பரவல் தொடர்பில் உலகம் அறிந்திருக்கவில்லை. பிளேக் போலல்லாமல், கொலரா முற்றிலும் புதிய நோயாகும். அது தொடர்பில் உலக மக்களுக்கு மிகக் குறைந்தளவு அறிவே காணப்பட்டது.
கொலரா மக்காவுக்குச் செல்லும் பாதைகளை அச்சுறுத்தலுக்குள்ளாக்கியது. குறிப்பாக சுயெஸ் கால்வாய் திறக்கப்பட்ட பின்னர், கப்பல்கள் மற்றும் ரயில்வே வழியாக கொலரா நோய் பரவுவதற்கு வாய்ப்பு ஏற்பட்டது. ஹிஜாஸுக்குள் நுழைவதற்கு முன்னர் சுயெஸ் கால்வாயிலோ அல்லது செங்கடலிலோ 15 நாட்கள் தனிமைப்படுத்தலில் இருக்குமாறு யாத்திரிகர்கள் கட்டாயப்படுத்தப்பட்டனர்.
இந்த நோய் முதன்முதலில் 1821 இல் அரேபிய தீபகற்பத்தில் தோன்றியது. எனினும், இது 1831 ஆம் ஆண்டு வரை ஹிஜாஸை வந்தடையவில்லை. இது மக்காவில் முதன்முறையாக பரவியபோது, அந்த நேரத்தில் வந்த யாத்திரிகர்களுள் நான்கில் மூன்று பகுதியினர் இறந்தனர். ‘இந்திய தொற்றுநோய்’ என்று அழைக்கப்பட்ட இந் தோய் மிக வேகமாகப் பரவியது.
1831 ஆம் ஆண்டு மக்காவில் பரவிய கொலரா காரணமாக 20,000 பேர் கொல்லப்பட்டதாகவும், அடுத்தடுத்த தொற்றுநோய்கள் புனித நகரத்தின் பகுதிகளுக்கு 1841, 1847, 1851, 1856–-57, மற்றும் 1859 ஆகிய ஆண்டுகளில் பரவியதாக இண்டியானா யுனிவர்சிட்டி பிரஸ் வெளியிட்டுள்ள ‘தெற்காசியாவில் சுகாதார வரலாறுகள்’ (Histories of Health in South Asia) என்ற புத்தகத்தில் குறிப்பிடப்பட்டுள்து.
உஸ்மானிய பேரரசு 1840 ஆம் ஆண்டில், தனிமைப்படுத்தலை அமுல்படுத்தியது. எல்லைக் கடவைகளிலும் புனித பள்ளிவாசல்களுக்கும் அருகிலுள்ள நகரங்களிலும் பயணிகளை நிறுத்துவதற்கான ஏற்பாடும் செய்யப்பட்டது.
இவ்வாறான தொற்று நோய் அச்சுறுத்தல்களை குறைப்பதற்காக 1895 ஆம் ஆண்டு, மக்காவில் முதலாவது சுகாதாரப் பணியகம் நிறுவப்பட்டது. முதலில் சுகாதார நிலைமைகளின் வளர்ச்சியுடனும், பின்னர் தடுப்பூசிகள் மற்றும் நுண்ணுயிர் எதிர்ப்புச் செயற்பாடுகள் போன்ற எதிர்விளைவுகளுடனும், படிப்படியாக, உலகம் எதிர்நோக்கிய தொற்றுநோய் வெகுவாகக் குறைந்தது.
1950 களின் முற்பகுதியில், சவூதி அரேபியா, ஜித்தா நகருக்கு வெளியே யாத்திரிகர்களுக்காக ஒன்றுசேருமிடமொன்றை நிர்மாணித்தது. பின்னர் இது மன்னர் அப்துல் அஸீஸ் வைத்தியசாலையாக மாற்றமடைந்தது.
கொவிட்-19 சுகாதார நெருக்கடியைக் கையாள்வதில் சவூதி அரேபியாவின் சர்வதேச அளவில் அங்கீகரிக்கப்பட்ட வெற்றிக்கும், 1865 இல் கொலரா காரணமாக பல்லாயிரக்கணக்கானோர் இறந்ததற்கும் இடையில், நோயை நிர்வகிப்பதில் 95 ஆண்டுகளுக்கும் மேலான அனுபவத்தை சவூதி அரேபியா பெற்றுள்ளது.
‘சவூதி அரேபியா பொது சுகாதாரத்துறையில் விரிவான அனுபவத்தைப் பெற்றுள்ளது, குறிப்பாக பல ஆண்டுகளாக ஹஜ் மற்றும் உம்ரா பருவ காலங்களில் ஏராளமான யாத்திரிகர்களை வரவேற்கின்றது’ என தொற்று நோய் வைத்திய நிபுணரும் ஜித்தாவிலுள்ள மன்னர் பஹத் உள்ளக மருத்துவத் திணைக்களத்தின் தலைவருமான டாக்டர் வாயென் பஜாமூம் தெரிவித்தார்.
சவூதி அரேபியாவின் வரலாற்றைப் பொறுத்தவரை கூட்டங்களை நிர்வகிப்பதிலும் நோய்களைக் கட்டுப்படுத்துவதிலும் நவீன சவூதி அரேபிய அதிகாரிகள் குறிப்பிடத்தக்க அனுபவத்தைக் கொண்டுள்ளனர்.
ஹஜ் மற்றும் உம்ரா ஆராய்ச்சி நிறுவனம் அண்மையில் வெளியிட்ட அறிக்கையொன்றில், தொற்று நோய்கள் தற்போதைய ஹஜ் பருவகாலங்களுக்கு உண்மையான அச்சுறுத்தலாகக் காணப்படுகின்றன எனக் குறிப்பிட்டுள்ளது.
முந்தைய ஹஜ் பருவ காலங்களில் 26-–60.5 சதவிகிதம் நோயாளிகளுக்கு தடிமல் மற்றும் நிமோனியா போன்ற சுவாச நோய்கள் இருந்தன. ஏனையோருக்கு குடல் சம்பந்தப்பட்ட நோய்கள், வயிற்றுப்போக்கு மற்றும் மூளைக்காய்ச்சல் போன்ற நோய்களும் ஏற்பட்டன. ஹஜ்ஜின் போது தொற்று நோய்கள் காரணமாக ஏற்பட்ட இறப்புக்கள் 1.08 -– 13.67 சத வீதமாகும். இது சராசரியாக 7.1 சதவீதமாகும்.
‘குணப்படுத்துவதை விட தடுப்பது சிறந்தது’ (prevention is better than cure) என்ற கொள்கையை சவூதி அரேபியா ஆதரிக்கிறது என பஜாஹ்மூம் குறிப்பிட்டார். குறிப்பாக இது கொவிட் -19 தொற்றுநோயை முன்மாதிரியாகக் கையாண்டதில் எடுத்துக்காட்டப்பட்டுள்ளது. இந்தக் காலத்தின்போது அரசாங்கம் ஹஜ் கடமையினை நோயெதிர்ப்பு சக்தியைப் பெற்ற உள்ளூர் யாத்திரிகர்களுக்கு மாத்திரமென மட்டுப்படுத்தியது.
‘வழிபாடுகளில் ஈடுபடுபவர்கள் மற்றும் புனித தலங்களுக்கு வருபவர்களின் பாதுகாப்பைப் பேணுவதில் சவூதி அரேபியா மிக ஆர்வமாக உள்ளது, மேலும் பாதுகாப்பின் அடிப்படைகளில் ஒன்று தடுப்பதாகும். இதற்காக தடுப்பூசி வழங்கப்படுகின்து. பல தசாப்தங்களாக காணப்படும் பல்வேறு மருத்துவ நெருக்கடிகளுக்கு மத்தியில் தடுப்பூசிகளின் வகிபாகம் மறுக்க முடியாததாகும்’’ எனவும் பஜாமூம் தெரிவித்தார்.
அத்தகைய ஒரு நெருக்கடி மூளைக்காய்ச்சலாகும். இது மக்காவில் உள்ள புனித தலங்களில் மக்கள் கூடும்போது வேகமாகப் பரவக்கூடியது. அதன் பரவலைக் கட்டுப்படுத்த தடுப்பூசிகள் அவசியமாகும்.
இங்கிலாந்தை தலமாகக் கொண்ட மூளைக்காய்ச்சல் ஆராய்ச்சி ஆதார நிலையத்தின் கூற்றுப்படி, மூளைக்காய்ச்சல் தொற்றுநோய்கள் ஹஜ் யாத்திரையோடு தொடர்புபட்டுக் காணப்படுகின்றன. யாத்திரிகர்கள் தமது சொந்த நாடுகளுக்குத் திரும்பிய பின்னர் உலகின் பல நாடுகளில் இந்த நோய் ஏற்படுகின்றது. இதன் காரணமாக சவூதி அரேபியா 2002 முதல் ஹஜ் மற்றும் உம்ராவின் போது சவூதி அரேபியாவினுள் நுழைவதற்கு தடுப்பூசி போட்டுக் கொள்வதை கட்டாயமாக்கியுள்ளது. அதன் பின்னர் ஹஜ் கடமையோடு தொடர்புடைய நோய்த் தொற்றுக்கள் எவையும் இதுவரை அறிவிக்கப்படவில்லை.
தற்போதைய கொவிட் 19 தொற்றுநோய்க்கு முன்னர் கடைசியாக சர்வதேச யாத்திரிகர்கள் சவூதி அரேபியாவுக்கு வந்தபோது, சவூதி சுகாதார அமைச்சின் பொது சுகாதார கரிசனைகள் 2019 அறிக்கை, ஹஜ் கடமையை நிறைவேற்றும் பகுதியில் உள்ள அனைவருக்கும் மூளைக்காய்ச்சல் தடுப்பூசி கட்டாயமானது என்பதைக் குறிப்பிட்டுள்ளது. சில நாடுகளைச் சேர்ந்த யாத்திரிகர்களுக்கு போலியோ மற்றும் மஞ்சள் காய்ச்சல் தடுப்பூசிகள் அவசியமாவதோடு பருவ காலங்களில் ஏற்படும் காய்ச்சலுக்கு விரும்பினால் தடுப்பூசி செலுத்திக் கொள்ள முடியும்.
டெங்கு காய்ச்சல், போலியோ, நுரையீரல் காசநோய், எபோலா மற்றும் லாசா காய்ச்சல் உள்ளிட்ட இரத்தக்கசிவு காய்ச்சல், அம்மை, ஜிகா வைரஸ், இரத்தத்தில் பரவும் வைரஸ்கள் மற்றும் உணவு மற்றும் நீரினால் பரவும் நோய்கள் ஆகியவை சுகாதார அமைச்சு எச்சரிக்கைவிடுக்கும் ஏனைய நோய்களாகும்.
ஒரு குறிப்பிட்ட பிராந்தியத்தில் ஒரு தொற்று நோயின் பரவலான தன்மை அல்லது உலகில் ஒட்டுமொத்தமாக காணப்படும் நிலை போன்ற குறிப்பிட்ட காரணிகளின் அடிப்படையிலும் சில நோய்கள் பரவுவதற்கு உதவும் சுற்றுச்சூழல் காரணிகள் குறிப்பிட்ட பருவம் அல்லது வானிலை மாற்றங்கள் ஆகியவற்றின் அடிப்படையில் யாத்திரிகர்களுக்கான தடுப்பூசி பட்டியல்கள் தீர்மானிக்கப்படுகின்றன என பஜாமூம் விளக்கினார்.
‘இந்த ஆண்டு கொவிட் 19 பரவியவுடன், இந்த ஹஜ் பருவ காலத்திற்கான முதன்மையான தடுப்பூசி இந்த நோய்க்கு எதிரானதாகவே இருந்தது’ என அவர் மேலும் தெரிவித்தார்.
மூளைக்காய்ச்சல் தொடக்கம் சவூதி அரேபியாவில் பல்வேறு தொற்றுநோய்கள் மற்றும் வைரஸ் பரவல்கள் ஏற்பட்டுள்ளன. 2009 ஆம் ஆண்டில், பன்றிக்காய்ச்சல் பரவியதால் வயதானவர்கள், குழந்தைகள் மற்றும் நீண்டகால நோய்களால் பாதிக்கப்பட்ட யாத்திரிகர்கள் அந்த ஆண்டு ஹஜ் செய்வதைத் தடுப்பதற்கு சவுதி அரேபியா தீர்மானித்தது.
மேலும், 2013 ஆம் ஆண்டு மத்திய கிழக்கு சுவாச நோய்க்குறி கொரோனா வைரஸ் (மேர்ஸ்) அதிகரித்ததன் காரணமாக, வயதான மற்றும் நீண்டகாலமாக நோய்வாய்ப்பட்ட முஸ்லிம்களை ஹஜ் செய்வதைத் தவிர்க்குமாறு சவூதி அரேபியா வலியுறுத்தியது. ஏனெனில் இந்த நோய் காரணமாக ஏற்கனவே சவூதி அரேபியாவில் டசின் கணக்கான மக்கள் அந்த நோயினால் கொல்லப்பட்டிருந்தமையினாலாகும்.
மேலும், 2014 மற்றும் 2016 ஆம் ஆண்டுகளுக்கிடையே ஆபிரிக்காவில் 11,300 பேரைப் பலிகொண்ட எபோலா வைரஸ் பரவலின் போது, சவூதி அரேபியா குறிப்பிடத்தக்க திட்டங்களை உருவாக்கியது. இதில் விமான நிலையங்களில் மருத்துவ ஊழியர்களை பணிக்கமர்த்துதல், உலகெங்கிலுமிருந்து சுமார் 3 மில்லியன் முஸ்லிம்கள் ஹஜ் செய்ய திரண்டிருந்த நிலையில் தனிமைப்படுத்தும் பிரிவுகளை அமைப்பதுமாகும். மிக மோசமாகப் பாதிக்கப்பட்ட கினியா, சியரா லியோன் மற்றும் லைபீரியா ஆகிய மூன்று நாடுகளுக்கும் யாத்திரைக்கான ன்று நாடுகளுக்கும் யாத்திரைக்கான விசாக்களை வழங்குவதை நிறுத்தி வைத்தது.
உலகளவில் ஆயிரக்கணக்கான உயிர்களைக் கொன்ற 2020 ஆம் ஆண்டின் ஆரம்பத்தில் கொவிட் 19 பரவியதால், டசின்கணக்கான பணியாளர்கள் மூலம் மக்காவில் உள்ள பெரிய பள்ளிவாயல் தளங்கள் சுத்திகரிப்பட்டன. நாட்டிற்குள் யாத்திரிகர்கள் நுழைவதை இடைநிறுத்த முடிவு செய்த சவூதி அரேபியா உம்ரா மற்றும் ஹஜ் செய்வதற்கான சுகாதார வழிமுறைகளை அமுல்படுத்தியது – இந்த முடிவை உலக சுகாதார அமைப்பு வரவேற்றது.
‘சவூதி அரேபியா ஏலவே பெற்றுக்கொண்டுள்ள அனுபவத்திற்கு மேலதிகமாக கொவிட் 19 ஐக் கட்டுப்படுத்துவதில் கிட்டத்தட்ட இரண்டு வருட அனுபவத்தைப் பெற்றிருப்பது எதிர்கால சுகாதார பிரச்சினைகளை எதிர்த்துப் போராடுவதற்கான அசாதாரண திறன்களை எங்களுக்குத் தருகிறது’ என பஜாமூம் சுட்டிக்காட்டினார்.
சில மாதங்களுக்குள் சவூதி அரேபியா நோய் எதிர்ப்பு சக்தியை பெற்றுவிடும், சவூதி அரேபியா விரைவில் சர்வதேச யாத்திரிகர்களை மீண்டும் அழைக்கும் என பஜாமூம் நம்பிக்கை தெரிவித்தார்.
‘‘இந்த தொற்றுநோய் நாம் எதிர்கொண்ட பல நெருக்கடிகளில் ஒன்றாகும், இது காலப்போக்கில் எம்மைக் கடந்து செல்லும். எதிர்காலத்தில் நம்மை வலிமையுடன் நிலை நிறுத்திக்கொள்வதற்கான ஒரு நினைவாக நாம் இதனைப் பார்க்கின்றோம்’’ எனவும் அவர் தெரிவித்தார். – Vidivelli