இந்தோனேஷிய சிறுவன் ஒருவனின் கழுத்தில் ஒரு கத்தியைப்போல மீன் ஒன்று குத்தியிருந்த புகைப்படங்கள் கடந்த வாரம் சமூக வலைத்தளங்களில் வைரலாகிப் பரவியிருந்தன.
குறித்த மீனின் கூரான வாய்ப்பகுதி அச்சிறுவனின் கழுத்தில் ஒரு பக்கத்தால் நுழைந்து மறுபக்கத்தால் வெளியேறியிருந்ததை அப்புகைப்படங்கள் காண்பித்தன.
நன்னீர் மற்றும் உவர்நீர் என இரு சூழலிலும் வாழும் ஊசி மீன் அல்லது முரல் மீன் என அழைக்கப்படும் ஒருவகை மீன் இனமே அந்த சிறுவனின் கழுத்தில் பாய்ந்து தாக்கியுள்ளது.
மொஹம்மது இதுல் என்ற 16 வயது சிறுவனே இவ்வாறு ஊசி மீனினால் பரிதாபமாகத் தாக்கப்பட்டவனாவான்.
இந்தோனேஷியாவின் சுலவேசி மாகாணத்தின் தென்கிழக்குப் பகுதியில் வசிக்கும் இந்த சிறுவன் தனது நண்பனுடன் பொழுதுபோக்குக்காக மீன்பிடிக்கச் சென்ற அத்தருணத்தில் தனக்கு இப்படியொரு அரிய அசம்பாவிதம் நிகழுமென ஒருபோதும் நினைத்திருக்கமாட்டான்.
நடந்தது என்ன?
சுலவேசியிலுள்ள ஒரு கடற்பிராந்தியத்தில் தனது நண்பனான சர்தி எனும் அதேவயது சிறுவனுடன் சென்றவாரம் ஒரு இரவு நேரத்தில் மீன் பிடிப்பதற்காகப் படகொன்றில் சென்றபோதே இந்த அசம்பாவிதம் இடம்பெற்றுள்ளது. “சர்தியின் படகு முதலில் புறப்பட்டது. பின்னர் நான் மற்றொரு படகில் சென்றேன். கடற்கரையிலிருந்து 500 மீற்றர் தொலைவில் படகு சென்றதும், அவர் ஓர் ஒளிரும் விளக்கை இயக்கினார். அப்போதுதான் ஓர் ஊசி மீன் திடீரென என் கழுத்தில் வந்து குத்தியது” என தனது பகீர் அனுபவத்தை ஊடகங்களிடம் இதுல் பகிர்ந்து கொண்டார்.
இருள் நிறைந்த நீருக்குள் இதுல் வீழ்ந்தார். தொண்டைக்கு அருகாமையால் ஊசி மீன் தாக்கியதுடன் நீரில் வீழ்ந்த அவரால் வலியால் துடித்துக் கத்துவதற்கான வாய்ப்புக்கூட கிடைத்திருக்கவில்லை. மீனின் நீளமான மெல்லிய மற்றும் கூர்மையான தாடைகள் கழுத்தின் இடது பகுதியில் மேலிருந்து மண்டையோட்டின் அடிப்பகுதி வரை உடுருவிச்சென்று தாக்கியிருந்தது. கழுத்தில் தாக்கிய மீன் அத்தோடு நின்று விடாமல் சுழலவும் துடிக்கவும் செய்துள்ளது.
இதனாலேயே வலி தாங்கமுடியாமல் இதுல் படகிலிருந்து நீரில் வீழ்ந்துள்ளார்.
சுழலும் மீனை இதுல் இறுக்கமாகப் பிடித்துக்கொண்டதால் காயம் பெரிதாகாமல் இருப்பதை ஓரளவு தடுக்க முடிந்தது. “நான் சர்தியிடம் உதவி கேட்டேன். இரத்தம் வடிவதைத் தடுக்க மீனை அகற்ற முயன்றேன். சர்தி அதை தடுத்து நான் நீந்த உதவினார்” என இதுல் தெரிவிக்கிறார்.
இதுலின் கிராமத்திலிருந்து சுமார் ஒன்றரை மணிநேர பயணத்திற்குப் பின்னர் பா-–பா என்ற இடத்திலுள்ள வைத்தியசாலையை அடையமுடிந்தது. இதுலின் தந்தை ஸஹ்ருதீன் மிகுந்த சிரமத்துக்கு மத்தியில் இரவு நேரத்தில் இதுலை வைத்தியசாலைக்கு அழைத்துச் சென்றிருந்தார்.
வைத்தியர்கள் என்ன சொல்கிறார்கள்?
பா-–பாவிலிருந்த வைத்தியர்களால் மீனை மாத்திரமே வெட்ட முடிந்தது. கழுத்தில் சிக்கியிருந்த மீனின் தலைப்பகுதியை வெட்டி எடுப்பதற்குத் தேவையான கருவிகள் அவர்களிடம் இருக்கவில்லை. இதனால் தெற்கு சுலவேசியின் தலைநகர் மக்காசரில் உள்ள மாகாண வைத்தியசாலையொன்றுக்கு மாற்ற வேண்டியிருந்தது.
அங்குள்ள வைத்தியர்கள்கூட இந்த நிலைமையைக் கண்டு அதிர்ந்து போனார்கள். இது ஒருபோதுமில்லாத புதிய சம்பவம் என்றும், மீனின் தலையை அகற்ற ஐந்து வைத்திய நிபுணர்களாவது தேவை என்றும் வைத்தியர் காலித் சாலெஹ் தெரிவித்திருந்தார்.
கழுத்தில் நேராக மீன் குத்தியிருக்கும் பட்சத்தில் உடனே உயிர் போயிருக்குமென இதுலுக்கு சத்திரசிகிச்சை செய்த வைத்தியர்கள் தெரிவித்திருந்தனர். கழுத்தின் பக்கவாட்டில் ஊசிமீன் குத்தியதால் அதிஷ்டவசமாக அவர் உயிர் தப்பியுள்ளார். ஆனாலும், அவர் சாதாரண நிலைமைக்குத் திரும்ப ஐந்து நாள் வரை கால அவகாசம் தேவைப்பட்டுள்ளது.
கடந்த திங்கட்கிழமை இதுலுக்கு இரண்டு மணிநேரத்துக்கும் அதிகமான நேரம் சத்திரசிகிச்சை இடம்பெற்றது. இந்த நுட்பமான சத்திரசிகிச்சை இந்தோனேஷிய மருத்துவ வரலாற்றில் தடம்பதித்த ஒரு சத்திரசிகிச்சையாகவே பார்க்கப்படுகின்றது.
இந்த சிகிச்சைகளுக்குப் பின்னர் உள்ளுர் ஊடகமான மக்காசர் டேர்கின்னுக்கு கருத்துத் தெரிவித்த வைத்தியர் கே.ஆரிப், “சத்திர சிகிச்சையின்போது கழுத்திலிருந்த பெரிய தடையினால் மிகவும் கவனமாக செயற்பட வேண்டியிருந்தது” என தெரிவித்தார்.
இதுல் இப்போது நன்றாகக் குணமடைந்து பழைய நிலைமைக்கே திரும்பிவிட்டார். ஆனாலும் மேலதிக பாதுகாப்பு சிகிச்சைகளுக்காகவும் மருத்துவ பரிசோதனைகளுக்காகவும் வைத்தியசாலையில் தொடர்ந்து அனுமதிக்கப்பட்டுள்ளார். ஆரம்பத்தில் காய்ச்சல் இருந்ததாக வைத்தியர்கள் தெரிவித்திருந்தனர். தற்போது காய்ச்சலும் குணமடைந்துள்ளதாகத் தெரிவிக்கப்படுகின்றது.
விமர்சனங்கள்
முதலில் Savage Paramedics என்ற பேஸ்புக் பக்கம் இதுலின் புகைப்படங்களை பகிர்ந்திருந்தது. மீன் கழுத்தில் குத்தப்பட்ட இதுலின் புகைப்படங்கள் பேஸ்புக் சமூகவலைத்தளத்தில் வைரலானபோது அதனை அனைவரும் கிரபிக் படங்கள் என்றே விமர்சித்தனர். ‘ஐ பிஷ்’ எனப்படும் ஒரு தொலைக்காட்சி நிகழ்ச்சியில் இது ஒரு மோசமான கிரபிக் புகைப்படமென விமர்சிக்கப்பட்டது. பலர் இதை ஒரு போலியான புகைப்படமெனக் கடந்து சென்ற அதேவேளையில் பலர் இதன் உண்மைத்தன்மையை ஆராயவும் செய்தனர்.
இந்தப் புகைப்படங்களை உலகின் பல்வேறு பகுதிகளில் இருந்தும் பார்த்து உணர்வுபூர்வமாக நம்பிய பலர் இந்தச் சிறுவன் உயிர்தப்பியது எவ்வாறெனத் தேடத் தொடங்கினார்கள். இதுலுக்காக பிரார்த்திக்கவும் செய்தார்கள். இதுல் சர்வதேசம் தேடும் ஒரு பிரபலமாக மாறினார்.
ஊசி மீன்கள்
மேலே சொன்னது போல ஊசி மீன்கள் நன்னீர் மற்றும் உவர்நீர் என இரு பிராந்தியங்களிலும் வாழக்கூடிய ஓர் உயிரினமாகும். இவை 1.5 மீற்றர் வரை வளரும். இதுலைத் தாக்கிய மீன் சுமார் 75 சென்றிமீற்றர் நீளம் கொண்டதாகும். இவற்றின் நீண்ட மெல்லிய தாடையினால் ஏனைய மீன்களில் இருந்தும் வேறுபடுகின்றன. அந்த நீண்ட தாடையில் அமைந்துள்ள பற்கள் வேட்டைப்பிராணிகளை குத்திக்காயப்படுத்த ஏதுவாக உள்ளன.
நீரின் மேற்பரப்பிலுள்ள உயிரினங்களை வேட்டையாடுவதில் வல்லமை படைத்த இந்த மீன்கள் சில வேளைகளில் மனித உயிர்களையும் காவுகொள்கின்றன. இந்த மீன்கள் நீருக்குள் இருந்தே ஒரு மணித்தியாலத்திற்கு அறுபது கிலோமீற்றர் வேகத்தில் பாயக்கூடிய திறனைப் பெற்றுள்ளன. இரவில் செயற்கை ஒளி தென்படும்போது இந்த மீன்கள் அவற்றைத் தேடிவந்து தாக்குவதற்கான அதிக சாத்தியக்கூறுகள் உள்ளன.
ஏனைய உயிரிழப்புக்கள்
ஊசி மீன்களால் உலகின் பல்வேறு பிரதேசங்களில் அவ்வப்போது உயிரிழப்புக்கள் ஏற்பட்டுள்ளன. அதில் 1977 ஆம் ஆண்டில் ஹவாய் தீவில் தனது தந்தையுடன் மீன் பிடிக்கச் சென்ற 10 வயது சிறுவன் ஒருவன் ஊசி மீன் தாக்கி உயிரிழந்த சம்பவம் உலகையே உலுக்கியது. இந்த சிறுவனை திடீரென தண்ணீரிலிருந்து ஒரு ஊசிமீன் கண்ணில் பாய்ந்து மூளையினூடாக ஊடுருவி மண்டையோட்டையும் துளைத்து வெளியில் பாய்ந்திருந்தது. குறித்த ஊசிமீன் 1.0 –1.2 மீற்றர் வரை (3.3 – 3.9 அங்குலம்) நீளமாக இருந்தது.
2007 ஆம் ஆண்டில் ஹலோங் விரிகுடாவுக்கு அண்மையில் 16 வயதான வியட்னாம் சிறுவன் ஒருவன் கடல் வெள்ளரிக்காய்களை சேகரித்துக் கொண்டிருக்கும்போது சொண்டு 15 சென்றிமீற்றர் நீளமுடைய ஊசிமீன் ஒன்று இதயத்தில் தாக்கியதால் அவன் உயிரிழந்தான். 2010 இல் புளோரிடாவில் ஊசி மீனைப்போன்ற ‘ஹவுன்ட்பிஷ்’ எனப்படும் டைலோசரஸ் இன முதலை ஒருவரின் மார்பில் தாக்கியதில் அவர் உயிரிழந்தார். மேலும் ஊசி மீன் தாக்கி ஜேர்மனியில் 2012 ஆம் ஆண்டு ஒருவர் பலத்த காயமடைந்தார். எகிப்தில் 2013 ஆம் ஆண்டில் செங்கடலில் இருந்து ஓர் ஊசி மீன் பாய்ந்ததில் ஒருவரின் முழங்கால் பலத்த சேதமடைந்த சம்பவம் பரவலாகப் பேசப்பட்டது. அதேயாண்டு ஒக்டோபரில் தமாமில் ஒரு இளைஞனின் கழுத்தின் இடது பகுதியில் ஊசிமீன் தாக்கி இரத்தக் கசிவினால் அவர் உயிரிழந்ததாக சவூதி அரேபியாவின் செய்தி வலைத்தளங்கள் அறிக்கை வெளியிட்டிருந்தன. வியட்நாமின் நாட்ரங் பகுதியில் ரஷ்ய சுற்றுலாப்பயணி ஒருவர் 2014 ஆம் ஆண்டு ஊசி மீனினால் தாக்கப்பட்டு கொல்லப்பட்டார். குறித்த ரஷ்யப் பிரஜையை அந்த ஊசிமீன் கழுத்திலிருந்து முதுகின் அடிப்பகுதி வரை தனது பற்களால் கடித்தே கொன்றிருந்தது.
2016 ஆம் ஆண்டு ஜனவரியில் சுலவேசியின் மத்திய பகுதியில் பாலுவைச் சேர்ந்த 39 வயதான பெண்ணொருவரின் வலது கண்ணுக்கு மேலே அரை மீற்றர் நீளமுடைய ஓர் ஊசிமீன் தாக்கியதில் அவர் பலத்த காயமடைந்து உள்ளூர் வைத்தியசாலையில் அனுமதிக்கப்பட்டபோதும் சிகிச்சை பலனின்றி உயிரிழந்தார். அவர் டஞ்சுங் கரங் எனும் இந்தோனேஷியாவின் பிரபல சுற்றுலாத் தலத்தில் 80 சென்றிமீற்றர் ஆழத்தில் நீந்திக்கொண்டிருந்த போதே இந்த சம்பவம் நடந்தது. இவர் காயமடைந்தபோது எடுக்கப்பட்ட புகைப்படங்கள் சமூகவலைத்தளங்களில் பரவியபோது சர்ச்சைகள் தோன்றின. இது மனித தாக்குதலாகவே இருக்குமென ஒருசில உள்ளூர் ஊடகங்கள் அறிக்கையிட்டிருந்தன.
மேலும் 2018 டிசம்பரில் தாய்லாந்து கடற்படை வீரர் ஒருவர் தனது பயிற்சியின்போது கழுத்தில் ஊசி மீன் தாக்கி உயிரிழந்தார். ஊசி மீன்களின் ஆதிக்கத்தால் பலர் உயிரிழந்துள்ளதுடன் அங்கவீனமுற்றுமுள்ளார்கள். மீனவர்களும் சுற்றுலாப் பயணிகளும் இதனால் பாதிக்கக்கூடிய சாத்தியக்கூறுகள் அதிகமாக உள்ளதை ஊகிக்க முடிகின்றது. ஊசி மீன்கள் வாழும் கடற்பிரதேசம் மற்றும் நன்னீர் ஏரிகளை அடையாளம் கண்டு அவ்விடங்களில் மீன் பிடிக்கவும் சுற்றுலாப்பயணிகள் நடமாடவும் தடைவிதிக்கப்பட வேண்டும்.
அத்துடன் மீனவர்களுக்கும், பொழுது போக்குக்காக கடலுக்கு செல்லும் பொதுமக்களுக்கும் இதுபற்றிய போதிய விழிப்புணர்வு வழங்கப்படுவது கட்டாயமானது. இதன்மூலமே ஊசி மீன்களால் எதிர்காலத்தில் ஏற்படப்போகும் உயிரிழப்புகளைத் தடுக்கலாம்.-Vidivelli
- எம்.ஏ.எம்.அஹ்ஸன்