பாகிஸ்தான் முன்னாள் அதிபர் மற்றும் முன்னாள் இராணுவத் தளபதி ஜெனரல் பர்வேஸ் முஷாரபுக்கு ராஜதுரோக வழக்கு ஒன்றில் மரண தண்டனை விதித்து தீர்ப்பளித்துள்ளது இஸ்லாமாபாத்தில் உள்ள சிறப்பு நீதிமன்றம்.
2001 –- 2008 காலகட்டத்தில் நாட்டின் அதிபராக இருந்த பர்வேஸ் முஷாரப், 2007 ஆம் ஆண்டு அவசர நிலையை பிரகடனப்படுத்தி அரசமைப்பை மீறி ராஜதுரோகம் செய்ததாகக் குற்றம் சுமத்தப்பட்டுள்ளது.
முன்னாள் இராணுவ ஜெனரல் முஷாரப் 2016ஆம் ஆண்டு முதல் துபாயில் வசித்து வருகிறார். இந்த மாத தொடக்கத்தில் மருத்துவமனையில் அவர் அனுமதிக்கப்பட்டார். கடந்த இரு தசாப்தங்களாக முஷாரபின் வாழ்வானது நிச்சயமற்ற ஒன்றாகவே இருக்கிறது.
1999 ஆம் ஆண்டு ஆட்சி கவிழ்ப்பின்மூலம் ஆட்சியைப் பிடித்த முஷாரபை படுகொலை செய்ய பலமுறை முயற்சி மேற்கொள்ளப்பட்டது. அவற்றிலிருந்து தப்பிப் பிழைத்தவர் முஷாரப். ஆனால், கொலை முயற்சிகளில் தப்பிய இராணுவ சர்வாதிகாரி முஷாரபுக்கு அரசியல் களம் அவ்வளவு இலகுவானதாக இல்லை. 2008 ஆம் ஆண்டு நடந்த தேர்தலில் அவர் தோற்றார்.
யார் இந்த பர்வேஸ் முஷாரப்?
]1943 ஆம் ஆண்டு ஆகஸ்ட் மாதம் 11ஆம் திகதி டெல்லியில் உள்ள உருது மொழி பேசும் தம்பதிக்கு மகனாகப் பிறந்தார் பர்வேஸ் முஷாரப்.
1947ஆம் ஆண்டு இந்தியா – பாகிஸ்தான் பிரிவினையின்போது பாகிஸ்தானுக்கு குடிபெயர்ந்தது அவரது குடும்பம்.
இராணுவத்தில் பல ஆண்டுகள் பணியாற்றிய அவர், 1998ஆம் ஆண்டு நவாஸ் ஷெரீஃப் ஆட்சியின்போது இராணுவத் தளபதியானார். பொறுப்பேற்ற சிறிது காலத்திலேயே நவாஸ் ஆட்சியைக் கவிழ்த்து, நாட்டின் தலைமைப் பொறுப்பை கைப்பற்றினார். அந்த சமயத்தில் நவாஸின் புகழ் சரிவின் விளிம்பிலிருந்தது. பொருளாதார சரிவு, காஷ்மீர் குழப்பம் என பல்வேறு தளங்களில் நவாஸ் தோல்வியைச் சந்தித்திருந்தார். காஷ்மீர் பகுதியில் ஊடுருவி அதனை தனதாக்கிக் கொள்ள பாகிஸ்தான் எடுத்த முயற்சியும் தோல்வியைச் சந்தித்திருந்தது. இந்த தோல்விக்குப் பொறுப்பேற்றுக்கொள்ள இராணுவம் விரும்பவில்லை.
முஷாரபை இராணுவத் தளபதி பதவியிலிருந்து நீக்கி வேறொருவரை நியமிக்க நவாஸ் காய்களை நகர்த்தினார், அதற்கு முன்பு இராணுவத்தின் ஆதரவுடன் நவாஸ் ஆட்சியைக் கவிழ்த்தார் முஷாரப்.
முன்னாள் அமெரிக்க ஜனாதிபதி புஷ்ஷுடன்…
‘பயங்கரவாதத்திற்கு எதிரான போர்’
செப்டம்பர் 11 இரட்டை கோபுர தாக்குதலுக்குப் பின் காட்சிகள் மாறதொடங்கின. இரட்டை கோபுரத் தாக்குதலுக்குப்பின் ஜோர்ஜ் புஷ், ‘பயங்கரவாதத்திற்கு எதிரான போர்’ ஒன்றை அறிவித்தார். இதற்கு ஆதரவு தெரிவித்தார் முஷாரப்.
பயங்கரவாதத்திற்கு எதிரான போர் என்று அறிவித்தது தலிபான் மற்றும் அல்–கைதாவுக்கு எதிரான போரை. ஆனால், பாகிஸ்தான் இராணுவத்திற்கும் இந்த அமைப்புகளுக்கும் நெருங்கிய தொடர்பிருந்ததாக தொடர்ந்து குற்றஞ்சாட்டப்பட்டு வந்தது.
தலிபான் மற்றும் அல்கைதா ஆதரவாளர்களை முஷாரப் அரசு ஒடுக்கத் தவறிவிட்டதாக நேட்டோ மற்றும் ஆப்கான் அரசு தொடர்ந்து குற்றஞ்சாட்டியது.
2011 ஆம் ஆண்டு அல்கைதா தலைவர் ஒசாமா பின் லேடன், மிலிட்டரி அகாடெமி அருகே சுட்டுக் கொல்லப்பட்டபோது, மீண்டும் முஷாரபை நோக்கி கேள்விகள் எழுந்தன. ஆனால், தீர்க்கமாக தன் மீதான குற்றச்சாட்டுகளை மறுத்தார் அவர். பின் லேடன் இங்கிருந்தது தமக்குத் தெரியாது என்றார்.
இராணுவ தளபதியாக இருந்தபோது..
வீழ்ச்சியின் தொடக்கம்
முஷாரப் அதிகாரத்திலிருந்தபோது, நீதித்துறையுடன் பல்வேறு முறை முரண்பட்டிருக்கிறார். குறிப்பாக, பாகிஸ்தான் தலைவராக இருந்தபோது, இராணுவத்துக்கும் தளபதியாக இருக்க விரும்பினார். அப்போது நீதித்துறை இவருடன் முரண்பட்டது.
2007ஆம் ஆண்டு பாகிஸ்தான் தலைமை நீதிபதி இப்திகார் முகம்மது செளத்திரியை பதவியிலிருந்து நீக்கினார். இது நாடெங்கும் போராட்டம் வெடிக்கக் காரணமாக அமைந்தது.
இஸ்லாமாபாத் லால் மஸ்ஜித் மீது முஷாரப் தாக்குதல் நடத்த உத்தரவிட்டதில் குறைந்தது 100 பேர் பலியானார்கள். அந்த பள்ளிவாசலின் மதகுருக்கள் ஷரீஆ சட்டத்தை பாகிஸ்தான் தலைநகரில் அமுல் செய்ய முயன்றனர் என்பதுதான் அவர்கள் மீதான குற்றச்சாட்டு.
இந்த தாக்குதல் ‘பாகிஸ்தான் தலிபான்’ உருவாகக் காரணமானது. இதன்பின்பு ஏராளமான குண்டுவெடிப்பு தாக்குதல்கள் பாகிஸ்தானில் நடந்தன. பாகிஸ்தான் வரலாற்றில் இரத்தம் தோய்ந்த நாட்கள் அவை.
நாடுகடத்தப்பட்ட நவாஸ் 2007ஆம் ஆண்டு பாகிஸ்தான் திரும்பினார், முஷாரபின் வீழ்ச்சியானது இந்தப் புள்ளியில்தான் தொடங்கியது.
தனது பதவிக்காலத்தை நீடித்துக்கொள்ள அவசர நிலையை பிரகடனப்படுத்த முஷாரப் முயற்சித்தார். ஆனால், பெப்ரவரி 2008 ஆம் ஆண்டு பாராளுமன்றத் தேர்தலில் அவரது கட்சி தோல்வியுற்றது. ஆறு மாதங்களுக்குப் பிறகு தனது பதவியை இராஜிநாமா செய்துவிட்டு நாட்டைவிட்டு வெளியேறினார்.
மீண்டும் பாகிஸ்தான்
லண்டன், துபாய் ஆகிய நாடுகளில் வசித்த அவர், 2013 ஆம் ஆண்டு மார்ச் மாதம் பாகிஸ்தான் திரும்பினார். ஆனால், அவமானங்களைச் சந்தித்தார். கைது செய்யப்பட்டார். அவர் தேர்தலில் போட்டியிடத் தடை விதிக்கப்பட்டது. அவரது கட்சியான பாகிஸ்தான் முஸ்லிம் லீக்கும் தேர்தலில் மோசமான தோல்வியையே சந்தித்தது.
அதன்பிறகு நீதிமன்றத்தில் அவர் மீது அடுக்கடுக்கான வழக்குகள் வந்தன. பெனாசிர் பூட்டோ 2007 ஆம் ஆண்டு பாகிஸ்தானில் தலிபான்களால் படுகொலை செய்யப்பட்டார். பெனாசிருக்கு போதுமான பாதுகாப்பு வழங்கவில்லை என்றும் முஷாரப் மீது வழக்குத் தொடுக்கப்பட்டது. அவர் மீது ராஜதுரோக வழக்கும் போடப்பட்டது.
மரண தண்டனை
இந்நிலையில் இஸ்லாமாபாத்திலுள்ள சிறப்பு நீதிமன்றம் ஒன்று, முஷாரபிற்கு ராஜதுரோக வழக்கில் மரண தண்டனை விதித்து தீர்ப்பளித்துள்ளது.
முஷாரப் 2007ஆம் ஆண்டு அவசர நிலையை பிரகடனப்படுத்தி அரசமைப்பை மீறி ராஜதுரோகம் செய்ததாகக் குற்றம் சுமத்தப்பட்டுள்ளது.
நவாஸ் ஷெரீபின் பாகிஸ்தான் முஸ்லிம் லீக் 2013ஆம் ஆண்டு ஆட்சிக்கு வந்தபோது முஷாரப் மீது இந்த வழக்குத் தொடுக்கப்பட்டது. அந்த வழக்கின் விசாரணை ஆறு வருட காலமாக நடைபெற்றது. அவர் பாகிஸ்தான் அரசியலமைப்பை மீறியதாக அவர் மீது குற்றம் சாட்டப்பட்டது. பாகிஸ்தான் வரலாற்றிலேயே அந்நாட்டின் அரசியலமைப்பை மீறி செயற்பட்டதாகக் குற்றம் சாட்டப்பட்ட முதல் நபர் பர்வேஸ் முஷாரபாவார்.
நீதிபதி வாகர் சேத் தலைமையிலான மூன்று நீதிபதிகள் கொண்ட அமர்வு இந்த தீர்ப்பை வழங்கியுள்ளது. இதில் இரண்டு நீதிபதிகள் மரண தண்டனை வழங்க வேண்டுமென்று தீர்ப்பளித்தனர். ஒரு நீதிபதி மாறுபட்ட தீர்ப்பை வழங்கினார்.-Vidivelli