ஏப்ரல் 21 குண்டுவெடிப்புடன் சம்பந்தப்பட்டவர்கள், சஹ்ரானுடன் தொடர்புபட்டவர்கள், உதவி செய்தவர்கள், தீவிரவாதத்துக்கு ஒத்துழைத்தோர் அனைவரும் பாரபட்சமின்றித் தண்டிக்கப்படுவரென சிறிய மற்றும் நடுத்தர தொழிற்றுறை, தொழில் முயற்சி அபிவிருத்தி, கைத்தொழில் வளங்கள் முகாமைத்துவ அமைச்சர் விமல் வீரவன்ச தெரிவித்தார்.
அத்துடன், மக்கள் வழங்கிய ஆணைக்கேற்ப, அவர்களின் நம்பிக்கை வீண்போகாத வகையில் புதிய ஆட்சியை கொண்டு செல்வோம் என்றும் அவர் குறிப்பிட்டார்.
அமைச்சில் நேற்று கடமைகளை பொறுப்பேற்றபின் ஊடகவியாலாளர்களுக்கு கருத்து தெரிவித்தபோதே அமைச்சர் இவ்வாறு தெரிவித்தார்.
ஜனாதிபதி தேர்தலில் பெரும்பாலான பெரும்பான்மை மக்களினதும் சிறியளவிலான சிறுபான்மை மக்களினதும் ஆதரவுடன் கோத்தாபய ராஜபக் ஷ ஜனாதிபதியாக அமோக ஆதரவுடன் வெற்றிபெற்றுள்ளார்.
மக்களின் விருப்பத்திற்கு ஏற்றவகையில் அவர்களின் நலனை கருத்திற்கொண்டு நாம் செயற்படுவோம். அவர்களின் தேவைகளை நிறைவேற்றப் பாடுபடுவோம்.
கடந்த நான்கரை வருடகால ஆட்சியில் நடந்த ஊழல்கள், முறைகேடுகள் அனைத்தையும் முறையாக விசாரித்து குற்றவாளிகளை தண்டிப்போம். அதேபோன்று அமைச்சு, நிறுவனங்களில் இடம்பெற்ற மோசடிகள் குறித்தும் விசாரணை செய்து குற்றவாளிகள் சட்டத்தின்முன் நிறுத்தப்படுவார்கள்.
அமைச்சு, நிறுவனங்கள் தொடர்பில் பொதுமக்கள், தொழிற்சங்கங்கள் ஆகியவற்றிலிருந்து நிறைய முறைப்பாடுகள் கிடைக்கப்பெற்றுள்ளன. பாராளுமன்றத்தில் சட்டமொன்றை நிறைவேற்றி முறையான பொறிமுறை ஊடாக அவற்றை விசாரித்து தீர்வு பெறுவதும் எதிர்காலத்தில் நிறுவனங்களில் முறைகேடுகள் இடம்பெறாத வண்ணம் பாதுகாப்பதும் அரசின் நோக்கமாகும். அந்தவகையில் விரைவில் அதற்கான நடவடிக்கைகள் மேற்கொள்ளப்படும். அத்துடன் அமைச்சின் எதிர்கால வேலைத்திட்டங்களும் ஆரம்பிக்கப்பட்டுள்ளன.
ஏப்ரல் 21 குண்டுவெடிப்பு தொடர்பில் ஊடகவியலாளர் ஒருவரின் கேள்விக்குப் பதிலளித்த அமைச்சர், குண்டுவெடிப்புடன் சம்பந்தப்பட்டவர்கள், சஹ்ரானுடன் தொடர்புபட்டவர்கள், உதவி செய்தவர்கள், தீவிரவாதத்துக்கு ஒத்துழைத்தோர் அனைவரும் பாரபட்சமின்றித் தண்டிக்கப்படுவர் என்றார்.
மிலேனியம் ஒப்பந்தத்தில் இந்த அரசாங்கம் ஒருபோதும் கையெழுத்திடாது என்றும் அமைச்சர் உறுதிபடத் தெரிவித்தார்.-Vidivelli