மூவின மக்கள் மத்தியிலும் பேதங்களை ஏற்படுத்தும் வகையில் தேர்தல் முடிவுகள்
எதிர்கால பாதக விளைவுகள் குறித்து அநுரகுமார எச்சரிக்கை
ஜனாதிபதி தேர்தல் முடிவுகள் எதிர்காலத்தில் ஏற்படுத்தப்போகும் பாதகவிளைவுகள் குறித்து எச்சரிக்கை விடுத்திருக்கும் மக்கள் விடுதலை முன்னணியின் தலைவரும் தேசிய மக்கள் சக்தி இயக்கத்தின் ஜனாதிபதி வேட்பாளருமான அநுரகுமார திசாநாயக்க தேர்தல் நாட்டின் மூவின மக்கள் மத்தியில் பேதங்களை ஏற்படுத்தும் வகையிலான முடிவுகளையே தந்துள்ளது, இதனால் ஒற்றுமைக்கு பதிலாக பிரிவினையே ஏற்படும் என்றும் கூறியுள்ளார்.
பத்தரமுல்ல – மக்கள் விடுதலை முன்னணியின் காரியாலயத்தில் நேற்று திங்கட்கிழமை இடம்பெற்ற விசேட ஊடகவியலாளர் சந்திப்பில் இவ்வாறு தெரிவித்த அவர் மேலும் கூறியதாவது,
தேர்தலின் போது எமக்கு ஆதரவாக 4 இலட்சத்து 18 ஆயிரத்து 553 வாக்குகள் வழங்கப்பட்டிருந்தன. எமக்கு வாக்களித்த அனைவருக்கும் எமது நன்றிகளை தெரிவித்துக் கொள்கின்றோம். ஆனால் நாங்கள் எதிர்பார்த்த முடிவு எமக்கு கிடைக்கவில்லை. இருந்த போதும் கிடைக்கப் பெற்றுள்ள முடிவை நாம் கட்டாயம் ஏற்றுக் கொண்டே ஆகவேண்டும்.
நாட்டின் இரு பிரதான கட்சிகளும் தேர்தலுக்காக களமிறங்கியிருந்த நிலையில் எமக்கு அவர்களுடன் போட்டியிடுவதில் பெரும் சவால் ஏற்பட்டிருந்தது. எங்களுடைய தேர்தல் செயற்பாடுகளுக்காக எந்தவித சுயலாபத்தையும் எதிர்பார்க்காத பெருந்தொகையானோர் இணைந்திருந்தனர்.
எமது பிரசாரங்களின் போது நாட்டு மக்கள் எதிர்நோக்க வேண்டியுள்ள சவால்கள் தொடர்பில் நாம் பல விடயங்களை தெரிவித்திருந்தோம். இதுவரை காலமும் தேர்தல் மேடைகள் கேலித்தனமாகவே காணப்பட்டன. ஆனால் இம்முறை நாங்கள் நாட்டின் அபிவிருத்தி , பொருளாதார முன்னேற்றம் , இன ஒற்றுமை , கலாசார பண்புகளை பாதுகாப்பது தொடர்பான பலவிடயங்கள் தொடர்பில் மக்களை சிந்திக்க வைத்தோம்.
இந்த தேர்தல் முடிவுகள் நாட்டில் ஏற்படுத்தும் பாதிப்புகள் குறித்து நாம் அறிவோம். எம்நாட்டு சிங்கள , தமிழ் மற்றும் முஸ்லிம் மக்களின் மத்தியில் இனபேதத்தை ஏற்படுத்தும் வகையிலான முடிவினை வழங்கியுள்ளது.இந்த முடிவுகள் நாட்டு மக்கள் மத்தியில் ஒற்றுமையை ஏற்படுத்துவதற்கு மாறாக பிரிவினையை ஏற்படுத்தும் வகையிலேயே அமைந்துள்ளன.
தேர்தலின் போது மேடைகளிலும் ஊடகங்களிலும் பேசப்பட்ட விடயங்கள் தொடர்பிலே மக்கள் முடிவெடுத்துள்ளனர். வடக்கு கிழக்கு தமிழர்கள் 2005க்கு பின்னரான காலப்பகுதிகளில் தாம் எதிர்நோக்கிய சம்பவங்களை கருத்திற்கொண்டு வாக்களித்துள்ளனர். முஸ்லிம் மக்களும் அவர்களின் பாதுகாப்பிற்காக இவ்வாறான தீர்மானத்தை எடுத்துள்ளதுடன் தெற்கிலுள்ள சிங்கள மக்கள் அடிப்படைவாதிகளுக்குப் பயந்தே இவ்வாறான தீர்மானத்தை எடுத்துள்ளனர்.
இந்நிலையில் மக்களின் உண்மையான எண்ணம் இங்கு பிரதிபலிக்கவில்லை. எனினும் தற்போது மக்களால் வழங்கப்பட்டுள்ள தீர்ப்பை நாம் ஏற்றுக் கொள்ளதான் வேண்டும். எதிர்வரும் காலங்களில் மக்களின் உரிமைகள் மற்றும் ஜனநாயகம் மீறப்படும் சந்தர்ப்பங்களில் நாங்கள் எப்போதும் போல் அவர்களுக்கு ஆதரவாக செயற்படுவோம்.
கேள்வி: பெரும் எதிர்பார்பை நீங்கள் கொண்டிருந்த போதிலும் ஏன் உங்களால் போதிய வாக்குகளை பெற்றுக் கொள்ள முடியவில்லை?
பதில்: நாம் ஒருபோதும் எமது தேர்தல் நடவடிக்கைகளுக்கான இன, மதவாதத்தை முன்வைக்க மாட்டோம்.பொது மக்களின் சொத்துகளை மோசடி செய்யும் வகையிலான அரசியல் செயற்பாடுகளை நாம் முன்னெடுக்க மாட்டோம். இந்த விடயம் தொடர்பில் ஆராய்ந்து மாற்றங்கள் ஏற்படுத்துவதற்கான முயற்சிகளை முன்னெடுப்போம்.
இரு பிரதான கட்சிகளுடன் மோத வேண்டி ஏற்பட்டமையினால் வாக்குகள் பிரிந்து சென்றுள்ளன. தேர்தல் முறைகேடுகள் கடந்த காலத்தை விட குறைவடைந்துள்ளதாக தெரிவிக்கப்பட்டுள்ள போதிலும் அதனை எம்மால் ஏற்றுக்கொள்ள முடியாது.எமது நாட்டின் தேர்தல் முறைகேடுகள் தற்போது மாற்றமடைந்துள்ளன.
ஒரு காலத்தில் வாக்களர்களிடமிருந்து வாக்கு சீட்டுகள் பறிக்கப்பட்டன. சிலகாலம் சென்றவுடன் வாக்காளர்களை தடுத்து அந்த வாக்கு சீட்டுகளை கைப்பற்றி அவர்களே வாக்களித்தனர். பின்னர் வாக்கு பெட்டிகளை திருடினர். இந்த நிலைமைகள் அனைத்துமே மக்களின் எண்ணத்தில் மாற்றம் ஏற்படுத்தும் வகையிலேயே அமையப் பெற்றுள்ளன.
சில அரச மற்றும் தனியார் ஊடகங்கள் மக்களின் எண்ணத்தில் தாக்கம் செலுத்தி முடிவுகளை எடுக்க தூண்டியுள்ளன.இந்த விடயம் தொடர்பில் தேர்தல் ஆணையாளரும் நேற்று முன்தினம் கருத்து தெரிவித்திருந்தார். இதற்கு நாங்களும் இணக்கம் தெரிவிக்கின்றோம். ஆனால் அவர் இந்த விடயம் தொடர்பில் செயற்பட்ட விதம் எமக்கு திருப்தியளிக்கவில்லை.
கேள்வி: ஊடகங்கள் இவ்வாறு செயற்பட்டால் எதிர்வரும் தேர்தல்களில் வெற்றி பெறுவதற்காக நீங்கள் எவ்வாறான நடவடிக்கைகளை முன்னெடுப்பீர்கள்?
பதில்: இதனை கட்டுப்படுத்த வேண்டுமென்றால் இவ்வாறு செயற்படும் ஊடகங்கள் தொடர்பான தகவல்களை நாம் வெளிப்படுத்த வேண்டும். ஊடகங்களுக்கு அரசியல் வாதிகளை விமர்சிப்பதற்கான உரிமை இருப்பது போன்று எமக்கும் அவர்களை விமர்சிப்பதற்கான உரிமை உண்டு. எதிர்வரும் காலங்களில் அவ்வாறான நிலைமை தோன்றினால் அவர்களுக்கு எதிரான விமர்சனங்களை நாங்கள் முன்னெடுப்போம்.
அதேவேளை, ஊடகங்கள் எமக்கு ஆதரவு தெரிவிக்கவில்லை என்று நாங்கள் கூறவில்லை. சில வேட்பாளர்களுக்கு முன்னுரிமை வழங்கி அவர்களுக்கு சாதகமான செய்திகளை வெளியிட்டன. நாம் கூறும் சில விடயங்களை காண்பித்து அவர்களின் கருத்துகளையும் அதில் இணைத்து வெளியிட்டன. இவ்வாறான நிலைமைகளில் மாற்றம் ஏற்பட வேண்டும்.
கேள்வி: கடந்த வருடம் அக்டோபர் மாதம் இடம்பெற்ற 52 நாட்கள் அரசியல் மாற்றத்தின் போது நீங்கள் பிரதமர் ரணில் விக்கிரம சிங்கவின் பதவியை பாதுகாப்பதற்காக செயற்பட்டமையின் காரணமாகவா உங்களுக்கு ஆதரவு குறைந்துள்ளது?
பதில்: நாங்கள் எந்தக் கட்சியையும் , எந்த நபரையும் ஆதரிப்பதற்காக அன்று செயற்பட வில்லை. நாட்டின் அரசியலமைப்பிற்கு புறம்பாக ஒவ்வொருவரும் நினைத்தவாறு செயற்படக் கூடாது என்பதனை உணர்த்துவதற்காகவே நாங்கள் அவ்வாறு செயற்பட்டோம். இது தொடர்பில் நாங்கள் பல தடவை கருத்து தெரிவித்தும் உள்ளோம்.
நாம் ஜனாதிபதி தேர்தலில் போட்டியிட தீர்மானித்தை அடுத்து இது கோத்தாபயவின் வெற்றிக்கு சாதகமாக அமையும் என்றும் எம்மை விமர்சித்தனர்.ஆனால் நாங்கள் அவ்வாறு யாருக்கும் சார்பாக எந்த முடிவையும் எடுத்ததில்லை. நாம் எடுக்கும் சில தீர்மானங்கள் ஒரு கட்சிக்கு தாக்கம் செலுத்துவதை எம்மால் தடுக்க முடியாது.-Vidivelli