கிழக்கின் அரசியல் தலைமைத்துவம் தமிழர் கைகளிலே இருக்க வேண்டும்
கோத்தாவை ஆதரிப்பதே அதற்கு வழி என்கிறார் கருணா
கிழக்கு மாகாணத்திற்கு மீண்டும் முஸ்லிம் ஆளுநரையோ, முதலமைச்சரையோ எம்மால் ஏற்க முடியாது என்று தெரிவித்த முன்னாள் பாராளுமன்ற உறுப்பினர் விநாயகமூர்த்தி முரளிதரன் (கருணா அம்மான்) தமிழ் தலைமைத்துவத்தின் கீழ் கிழக்கு மாகாணம் இருக்க வேண்டும் என்றும் கூறினார்.
கிருலப்பனையில் சனிக்கிழமை இடம்பெற்ற ஊடகவியலாளர் சந்திப்பில் கலந்துகொண்டு உரையாற்றும் போதே அவர் இதனை தெரிவித்தார். மேலும் கருத்து தெரிவித்த அவர்.
ஐ.தே.க அரசாங்கம் மீண்டும் ஆட்சிக்கு வந்தால் கிழக்கில் மீண்டும் முஸ்லிம் தலைமைத்துவம் ஒன்றே மேலோங்கும். இந்த இடத்தில் தமிழ் மக்கள் சிந்தித்து செயல் பட வேண்டும். பொதுஜன பெரமுன ஜனாதிபதி வேட்பாளர் கோத்தாபய ராஜபக் ஷவை வெற்றி பெற வைக்கும் போதே தமிழ் மக்களின் இருப்பை தக்கவைத்து கொள்ள முடியும். தமிழ் மக்களை கோத்தாபய முற்றுமுழுதாக நம்பியுள்ளார். யுத்தம் முடிவடைந்த காலத்தில் இருந்து முன்னாள் ஜனாதிபதி மஹிந்த ராஜபக் ஷ மூலம் வடக்கின் வசந்தம், கிழக்கின் உதயம் என பல செயற்திட்டங்கள் மூலம் பாரிய அபிவிருத்திகள் செய்யப்பட்டன.
அன்று பல்லாயிரக் கணக்கான போராளிகள் புனர்வாழ்வளிக்கப்பட்டு சமூகத்திற்குள் சேர்க்கப்பட்டனர். இன்று ரணிலின் அரசாங்கம் 134 அரசியல் கைதிகளை கூட விடுவிக்க முடியாமல் தமிழ் மக்களை ஏமாற்றிக் கொண்டிருக்கின்றது. கோத்தாபய அரசியல் கைதிகளை விடுவிப்பதாக வாக்குறுதி வழங்கியுளளார். மற்றும் கல்முனை பிரதேச செயலகத்தை தரமுயர்த்தி தருவதாகவும் ஒரு லட்சம் இளைஞர் யுவதிகளுக்கு வேலை வாய்ப்பை பெற்றுத் தருவதாகவும் மலையக மக்களுக்கான சம்பள பிரச்சினைகளையும் தீர்த்து தருவதாகவும் வாக்குறுதி வழங்கியுள்ளார்.
ரவூப் ஹக்கீம் சஹ்ரானின் சகாக்களுடன் சேர்ந்து புகைப்படம் எடுத்துள்ளார். இவ்வாறான தீவிரவாத முஸ்லிம் தலைவர்கள் அனைவரும் சஜித் பிரேமதாசவின் பக்கமே உள்ளனர். தமிழர்களுக்கு எவ்வித முக்கியத்துவமும் ஐக்கிய தேசிய கட்சியில் இல்லை. இதனை எதிர்த்தே தமிழர்களாகிய நாங்கள் கோத்தாபயவிற்கு எங்களின் ஆதரவினை வழங்கியுள்ளோம்.
முஸ்லிம் தலைவர்களை புறம் தள்ளும் நோக்கில் எதையும் நான் குறிப்பிடவில்லை. எனது அரசியல் சாணக்கியத்தை மட்டுமே இங்கு தெரிவிக்கிறேன். தலைமைப் பொறுப்பு தமிழ் தலைவர்களிடம் இருக்க வேண்டும். ஏனென்றால் தாங்கள் மட்டுமே கிழக்கு மாகாணத்தின் ஆளுநர்களாக இருக்க வேண்டும் என்பதில் முஸ்லிம் தலைவர்கள் திட்டவட்டமாக இருக்கின்றனர். முஸ்லிம் தலைவர்களின் எதிரொலிப்புகளே இனத்துவேசமாக மாற்றமடைந்துள்ளது. தலைமை தாங்கும் சக்தி தமிழ் தலைவர்களுக்கு வர வேண்டும் என்றார்.-Vidivelli