ஜனாதிபதித் தேர்தலுக்கான வேட்பாளர்களை முன்னிறுத்துவது தொடர்பில் பரபரப்பான அரசியல் சூழல் நிலவுகின்ற நிலையில் சிறுபான்மை மக்களின் ஆதரவையும் பெறக் கூடிய ஒருவராலேயே இம்முறை தேர்தலில் வெற்றி பெற முடியும் என்ற கருத்துக்கள் வலுப்பெற ஆரம்பித்துள்ளன. அரசியல் தலைவர்கள் முன்வைக்கும் கருத்துக்களும் சில உத்தியோகப்பற்றற்ற ஆய்வுகளும் இதனையே கூறிநிற்கின்றன. இந் நிலையில் சிறுபான்மை மக்கள், குறிப்பாக முஸ்லிம்கள் தமது வாக்குப் பலத்தைப் பயன்படுத்தி சமூகம் எதிர்நோக்கும் முக்கிய பிரச்சினைகளைத் தீர்த்துக் கொள்ள முன்வர வேண்டியது காலத்தின் தேவையாகும்.
அந்த வகையில் நாட்டில் முஸ்லிம் சமூகம் எதிர்நோக்கும் காணிப் பிரச்சினை முக்கியமானதாகும். இது தொடர்பில் ஜனாதிபதி வேட்பாளர்களுடன் பேரம் பேசல்களில் ஈடுபடுவதுடன் எழுத்துமூல வாக்குறுதிகளையும் பெற்றுக் கொள்வதன் மூலமாகவே காணிகளை விடுவிப்பதை சாத்தியமாக்கிக் கொள்ள முடியும்.
கடந்த ஜனாதிபதித் தேர்தலில் பொது வேட்பாளராக களமிறக்கப்பட்ட மைத்திரிபால சிறிசேனவை ஆதரிப்பதற்கு தமிழ் தேசியக் கூட்டமைப்பு முன்வைத்த பிரதான நிபந்தனைகளுள் ஒன்று அரசாங்கத்தினால் குறிப்பாக படையினரால் கையகப்படுத்தப்பட்டுள்ள தமிழ் மக்களின் காணிகளை விடுவிக்க வேண்டும் என்பதாகும். இதற்கமைய இராணுவத்தினர் வசமிருந்த காணிகளில் 71,178 ஏக்கர் காணிகள் கடந்த மார்ச் மாதம் 31 ஆம் திகதி வரை விடுவிக்கப்பட்டுள்ளதாக அரசாங்கம் அண்மையில் அறிவித்திருந்தது.
அரசாங்கம் இவ்வாறு காணிகளை விடுவிப்பதற்கான காரணம் தமிழ் தேசியக் கூட்டமைப்பு வழங்கிய அழுத்தங்களேயாகும். தமிழ் மக்களின் அரசியல் பிரச்சினைகளுக்கு தீர்வு வழங்கும் அரசாங்கத்தின் போக்குகள் ஒருபுறமிருக்க, காணிப் பிரச்சினைகளுக்கு தீர்வைப் பெற்றுக் கொடுப்பதில் தமிழ் தேசியக் கூட்டமைப்பு குறிப்பிடத்தக்களவு வெற்றி பெற்றுள்ளது என்ற யதார்த்தத்தை எவரும் மறுக்க முடியாது.
எனினும் துரதிஷ்டவசமாக இராணுவத்தினாலும் அரசாங்கத்தின் ஏனைய திணைக்களங்களினாலும் அபகரிக்கப்பட்ட காணிகளை விடுவிப்பதில் முஸ்லிம் அரசியல்வாதிகளும் முஸ்லிம் மக்களும் தோல்வியைச் சந்தித்திருக்கிறார்கள் என்ற யதார்த்தத்தையும் நாம் ஏற்றுக் கொள்ள வேண்டும்.
குறிப்பாக அம்பாறை மாவட்டத்தில் தனியாருக்குச் சொந்தமான காணி அனுமதிப் பத்திரம் இருக்கின்ற சுமார் 4652 காணிச் சொந்தக்காரர்களது 14127 ஏக்கர் பரப்புள்ள காணிகள் அபகரிக்கப்பட்டுள்ளதாக காணி உரிமைக்கான அம்பாறை மாவட்ட செயலணி சுட்டிக்காட்டியுள்ளது. அத்துடன் தமது காணிகளை மீட்டுத் தர முன்வரும் வேட்பாளருக்கே எதிர்வரும் ஜனாதிபதித் தேர்தலில் வாக்களிப்போம் என காணிகளை இழந்த மக்கள் தெரிவித்துள்ளதுடன் அதற்கான போராட்டங்களையும் தற்போது முன்னெடுத்து வருகின்றனர்.
இதேபோன்றுதான் திருகோணமலையில் கருமலையூற்று பள்ளிவாசல் காணி உட்பட ஏராளமான காணிகள் அபகரிக்கப்பட்டுள்ளன. இன்றும் புல்மோட்டை உட்பட பல இடங்களில் காணிகளை அபகரிக்கும் முயற்சிகள் தொடர்கின்றன. வடக்கில் முசலியில் இராணுவத்தால் ஆக்கிரமிக்கப்பட்ட காணிகளை மீட்பதற்காக அம் மக்கள் பல வருடங்களாக போராடி வருகிறார்கள்.
இவை தொடர்பில் முஸ்லிம் அரசியல் தலைமைகள் கையறு நிலையிலேயே உள்ளன. தேர்தல் காலங்களில் மாத்திரம் காணிகளை மீட்டுத் தருவதாக வாக்குறுதிகளை அளித்துவிட்டு பின்னர் மறந்துவிடுகின்ற நிலையே நீடிக்கிறது.
அந்தவகையில் முஸ்லிம்களுக்குச் சொந்தமான மேற்படி ஆயிரக் கணக்கான ஏக்கர் காணிகளை விடுவிப்பதற்கான துரித நடவடிக்கைகளை சகல கட்சிகளிதும் முஸ்லிம் அமைச்சர்களும் பாராளுமன்ற உறுப்பினர்களும் முன்னின்று மேற்கொள்ள வேண்டும். குறிப்பாக எதிர்வரும் ஜனாதிபதித் தேர்தலில் போட்டியிடும் பிரதான வேட்பாளர்களிடமிருந்து இக் காணிகளை விடுவிப்பதற்கான வாக்குறுதிகளை எழுத்து மூலம் பெற்றுக் கொள்ள வேண்டியதுடன் தேர்தலின் பின்னர் அந்த வாக்குறுதி நிறைவேற்றப்படுவதை உறுதிப்படுத்துவதும் அவசியம் என்பதை சுட்டிக்காட்ட விரும்புகிறோம்.
vidivelli