பொதுஜன பெரமுனவின் ஜனாதிபதி வேட்பாளராக அறிவிக்கப்பட்டுள்ள முன்னாள் பாதுகாப்பு செயலர் கோத்தாபய ராஜபக் ஷ, 2005 ஆம் ஆண்டு அமெரிக்க பிரஜையாக இருந்த போது ஹம்பாந்தோட்டை – மெதமுலன வாக்காளர் இடாப்பில் பெயர் உள்வாங்கப்பட்ட விதம் மற்றும் தற்போது அவர் இலங்கை கடவுச் சீட்டொன்றினை பெற்றுக்கொண்ட விதம் தொடர்பில் விசேட விசாரணைகள் ஆரம்பிக்கப்பட்டுள்ளன. குற்றப் புலனாய்வுப் பிரிவின் சிறப்புக் குழுவொன்று இது தொடர்பில் விசாரணைகளை நடாத்திவருவதாக பொலிஸ் தலைமையக தகவல்கள் விடிவெள்ளிக்குத் தெரிவித்தன.
பொலிஸ் தலைமையகத்துக்கு கிடைக்கப்பெற்றுள்ள இருவேறு முறைப்பாடுகளுக்கமைய இந்த விசாரணைகள் முன்னெடுக்கப்பட்டுள்ளன.
2005 ஆம் ஆண்டு ஜனாதிபதி தேர்தல் இடம்பெற்ற சமயம், கோத்தாபய ராஜபக் ஷ அமெரிக்கப் பிரஜையாக இருந்துள்ளார். எனினும் அவரது பெயர் ஹம்பாந்தோட்டை மாவட்டம் – மெதமுலன வீட்டில் வசிப்போரின் வாக்காளர் பெயர் பட்டியலில் இணைக்கப்ப்ட்டுள்ளது. வெளிநாட்டுப் பிரஜை ஒருவரின் பெயர் எவ்வாறு வாக்காளர் இடாப்பில் இடம்பெற்றது, அவர் அதன் கீழ் வாக்களித்தாரா உள்ளிட்ட விடயங்களை வெளிப்படுத்த சி.ஐ.டி.யின் சிறப்புக்குழு விசாரணைகளை ஆரம்பித்துள்ளது.
இது தொடர்பில் சில வாக்குமூலங்களையும் பதிவு செய்துள்ள சி.ஐ.டி., 2005 ஆம் ஆண்டு வாக்காளர் இடாப்பு உள்ளிட்ட ஆவணங்களையும் பரிசீலித்து வருகின்றது.
இதனிடையே, கடந்த மே மாதம் கோத்தாபய ராஜபக் ஷவால், முறையற்ற விதத்தில் இரட்டை பிரஜாவுரிமை தொடர்பில் குறிப்பிடப்படாத இலங்கை கடவுச் சீட்டொன்றினைப் பெற்றுக் கொண்டுள்ளதாகக் கூறப்படும் விவகாரம் தொடர்பில் விசாரணைகள் தீவிரப்படுத்தப்பட்டுள்ளன. இந்த விசாரணைகளுக்குத் தேவையான பல்வேறு ஆவணங்களை உடனடியாகத் தம்மிடம் கையளிக்குமாறு குற்றப் புலனாய்வுப் பிரிவு குடிவரவு மற்றும் குடியகல்வு திணைக்களத்திடம் கோரியுள்ளதக அறிய முடிகின்றது. எவ்வாறாயினும், இரட்டை பிரஜா உரிமையை அகற்றிக்கொண்டதாக, இந்த இலங்கை கடவுச்சீட்டைப் பெற்றுக்கொள்வதற்காக கோத்தாபய ராஜபக் ஷவினால் ஆவணங்கள் சில சமர்ப்பிக்கப்பட்டுள்ளதாகவும், அதன் நம்பகத்தன்மையை உறுதி செய்துகொள்ளவும், மேலதிக தகவல்களை வெளிப்படுத்தவும் உள்நாட்டலுவல்கள் அமைச்சர் வஜிர அபேவர்தனவிடமும் விசாரணை செய்து விசேட வாக்கு மூலமொன்றைப் பதிவுசெய்ய சி.ஐ.டி. திட்டமிட்டுள்ளதாக அறியமுடிகின்றது.
அதன்படி இந்த இரு விடயங்கள் தொடர்பிலான விசாரணைகள் தொடர்ந்தும் முன்னெடுக்கப்பட்டு வருகின்றன.
vidivelli