கடந்த 2018 ஆம் ஆண்டு அம்பாறையில் மேற்கொள்ளப்பட்ட முஸ்லிம்களுக்கெதிரான வன்செயல்களில் பாதிக்கப்பட்ட அம்பாறை ஜும்ஆ பள்ளிவாசல் மற்றும் சொத்துகளுக்கு நஷ்டஈடு வழங்குவதற்காக முதற்கட்டமாக 10 மில்லியன் ரூபா திறைசேரி மூலம் அம்பாறை மாவட்ட செயலகத்திற்கு அனுப்பி வைக்கப்பட்டுள்ளது.
பாதிக்கப்பட்ட அம்பாறை ஜும்ஆ பள்ளிவாசல் மற்றும் சொத்துகளுக்கு நஷ்டஈடு முதற்கட்டமாக விரைவில் பகிர்ந்தளிக்கப்படவுள்ளதாக புனர்வாழ்வு அமைச்சின் இழப்பீட்டு பணியகத்தின் உதவிப் பணிப்பாளர் எஸ்.எம். பதுர்தீன் தெரிவித்தார்.
இதே வேளை அமைச்சர் ரிஷாத் பதியூதீன் நீண்டகாலம் இடம்பெயர்ந்தோருக்கான மீள் குடியேற்ற செயலணியின் நிதியிலிருந்தும் 6 மில்லியன் ரூபாவை நஷ்ட ஈடுகள் வழங்குவதற்கு ஒதுக்கியுள்ளதாகவும் அவர் தெரிவித்தார்.
வன்செயல்களினால் சேதமாக்கப்பட்ட அம்பாறை ஜும்ஆ பள்ளிவாசலுக்கு 26 மில்லியன் ரூபா ஒதுக்கப்பட்டுள்ளதாகவும், பாதிக்கப்பட்ட ஏனைய 13 சொத்துகளுக்கு 3.6 மில்லியன் ரூபா மதிப்பீடு செய்யப்பட்டுள்ளதாகவும் மேலும் அவர் கூறினார். பாதிக்கப்பட்ட ஏனைய 13 சொத்துக்களுக்கு தற்போது திறைசேரியினால் வழங்கப்பட்டுள்ள 10 மில்லியன் ரூபாவிலிருந்து முதற்கட்டமாக ஒரு இலட்சம் ரூபா வழங்கப்படவுள்ளது. கண்டி – திகன வன்செயல்களினால் பாதிக்கப்பட்ட சொத்துகளுக்கு நஷ்டஈடு வழங்கப்பட்டது போன்று அம்பாறை வன்செயல்களினால் பாதிக்கப்பட்டுள்ள சொத்துகளுக்கும் கட்டம் கட்டமாகவே நஷ்டஈடுகள் வழங்கப்படவுள்ளன.
அம்பாறை நஷ்டஈடுகளை துரிதப்படுத்தும்படி புனர்வாழ்வு அமைச்சுக்குப் பொறுப்பாகவுள்ள பிரதமர் ரணில் விக்கிரமசிங்க உத்தரவிட்டுள்ளார்.
அம்பாறையில் முஸ்லிம் ஒருவருக்குச் சொந்தமான ஹோட்டலில் கருத்தடை மாத்திரைகள் கலக்கப்பட்டு பெரும்பான்மை சமூகத்தினருக்கு உணவு பரிமாறப்படுவதாகக் கூறி அப்பகுதியில் முஸ்லிம்களுக்கு எதிராக வன்செயல்கள் கட்டவிழ்த்து விடப்பட்டமை குறிப்பிடத்தக்கதாகும்.
ஏ.ஆர்.ஏ.பரீல்
vidivelli