முஸ்லிம் திருமண மற்றும் விவாகரத்துச் சட்டத்தில் திருத்தம் கோரும் இலங்கை முஸ்லிம் பெண்கள்

By vidivelli Last updated Jul 30, 2019

முஸ்லிம் திருமண மற்றும் விவாகரத்து சட்டம் எல்லா முஸ்லிம்களுக்கும் சமத்துவத்தையும், நீதியையும் உறுதிப்படுத்தக்கூடிய வகையில் திருத்தப்பட வேண்டுமென முஸ்லிம் பெண்கள் ஒன்றிணைந்து கோரிக்கை விடுக்கின்றனர்.

முஸ்லிம் பெண்கள் ஒன்றிணைந்து கொழும்பில் கடந்த வெள்ளிக்கிழமை ஏற்பாடு செய்திருந்த ஊடகவியலாளர் சந்திப்பில் கலந்துகொண்டு உரையாற்றிய முஸ்லிம் பெண்கள் இந்தக் கோரிக்கையை விடுத்திருந்தனர்.
கோரிக்கைகள்:

* அனைத்து முஸ்லிம்களின் திருமண வயதெல்லை 18ஆக அமைய வேண்டும்.

* பெண்கள் காதிகளாகவோ, ஜூரிகளாகவோ, திருமணப் பதிவாளர்களாகவோ, காதிகள் சபை அங்கத்தவராகவோ நியமிக்கப்பட தகுதியுடையவர்களாக்கப்படல் வேண்டும்.

* முஸ்லிம் திருமண மற்றும் விவாகரத்து சட்டம், அனைத்து முஸ்லிம்களுக்கும் ஒரே மாதிரியானதாக வேண்டும்.

* அனைத்து சட்ட ரீதியிலான திருமணங்களின் போது, மணமகன் மற்றும் மணமகள் ஆகிய இருவரின் கையெழுத்து மற்றும் கைவிரல் அடையாளங்களை கட்டாயமாகப் பெற்றுக்கொள்ள வேண்டும். திருமண வயதை எட்டிய அனைத்து பெண்களுக்கும் சுயாதீனமாக திருமணத்தை தீர்மானிப்பதற்கு உறவு முறை ஆண்களின் அனுமதியை பெற வேண்டியது கட்டாயம் கிடையாது.

* திருமணம், சட்ட ரீதியில் ஏற்றுக் கொள்வதற்காக, கட்டாயம் பதிவு செய்யப்பட வேண்டும்.

* ஒன்றுக்கு மேற்பட்ட திருமணங்களை செய்ய முயற்சிக்கும்போது, விசேட காரணங்களை அடிப்படையாகவும், சாதாரண காரணங்களை கருத்திலும் வைத்து கொண்டு, நிதி இயலுமை, அனைத்து தரப்பினரின் சம்மதம் மற்றும் நீதிமன்றத்தின் அனுமதி பெறுதல் உள்ளிட்ட உரிய நிபந்தனைகளை விதிக்க வேண்டும்.

* தலாக் மற்றும் பஸஹ் நடைமுறையின் கீழ் விவாகரத்து பெற்றுக் கொள்ளும்போது உரிய நிபந்தனைகள் விடுக்கப்பட வேண்டும். மேன்முறையீட்டு செயற்பாடுகளின் போது கணவர் மற்றும் மனைவி ஆகியோருக்கு விவாகரத்து நடைமுறை சமமாகக் காணப்பட வேண்டும். முஸ்லிம் திருமண மற்றும் விவாகரத்து சட்டம், முபாரத் மற்றும் குலா ஆகிய விதத்தில் விவாகரத்து ஏற்றுக் கொள்ளப்பட வேண்டும்.

* கைக்கூலி (சீதனம்) தொடர்பான சரியான தகவல்களை பெற்று, விவாகரத்தின் போது, அதனை மீளப்பெற்றுக் கொள்ளும் விதத்தில் சட்டம் தயாரிக்கப்பட வேண்டும். திருமணத்தின் போது, சரியான முறையில் பதிவுகள் செய்யப்படாது, சீதனத்தை வழங்குதல் மற்றும் பெற்றுக் கொள்ளுதல் சட்டவிரோதமானது அல்லது தண்டனைக்குரிய குற்றம் என்ற விதத்தில் அமைய வேண்டும்.

* முஸ்லிம் தம்பதியினால் திருமணத்திற்கு முன்னர் திருமண உடன்படிக்கையில் உள்ளடக்க வேண்டிய விடயங்களை அறிவித்து, அதனை ஏற்றுக்கொள்ள வேண்டும்.

2019ஆம் ஆண்டு ஏப்ரல் மாதம் 21ஆம் திகதி இலங்கையில் நடத்தப்பட்ட பயங்கரவாதத் தாக்குதல் சம்பவத்தின் பின்னர், முஸ்லிம் திருமண மற்றும் விவாகரத்து சட்ட திருத்தம் தொடர்பில் கூடுதல் கவனம் செலுத்தப்பட்டது.

இந்நிலையில், கடந்த ஜுலை 11ஆம் திகதி பாராளுமன்றத்தை பிரதிநிதித்துவப்படுத்தும் முஸ்லிம் உறுப்பினர்கள் 11 பேர் ஒன்றுகூடி, முஸ்லிம் திருமண மற்றும் விவாகரத்து சட்டத்தில் 14 திருத்தங்களை மேற்கொள்ள இணக்கம் தெரிவித்துள்ளனர்.

முஸ்லிம் திருமண மற்றும் விவாகரத்து சட்டத்தில் திருத்தத்தை கொண்டுவர முஸ்லிம் பாராளுமன்ற உறுப்பினர்கள் இணக்கம் வெளியிட்ட முதலாவது சந்தர்ப்பம் இதுவெனவும் அவர்கள் சுட்டிக்காட்டுகின்றனர்.

இறைவனால் கூறப்பட்டுள்ள சட்டத்தை, நாட்டிலுள்ள சட்ட திருத்தங்களின் ஊடாக அமுல்படுத்த வேண்டுமென முன்னாள் அமைச்சரான பேரியல் அஷ்ரப் இந்த ஊடகவியலாளர் சந்திப்பில் கலந்துகொண்டு கோரிக்கை விடுத்திருந்தார்.

“சுமார் 40 வருட காலம் இந்த சட்டத்தில் திருத்தங்களை மேற்கொள்வதற்கு தொடர்ச்சியாக பேசப்பட்டு வந்தது. ஏதோ ஒரு காரணத்தினால் இந்த சட்டத்தில் திருத்தங்களை மேற்கொள்ள முடியாத நிலைமை ஏற்பட்டுள்ளது. பல்வேறு காரணங்கள் காணப்படுகின்றன. இந்த இடத்தில் முஸ்லிம் பெண்களே இருக்கினறார்கள். இறைவன் எங்களுக்கு கூறியுள்ள விடயங்களில் மாற்றங்களை ஏற்படுத்துவதற்கு முயற்சிப்பதாக சிலர் நம்புகின்றனர்.

இறைவன் கூறிய விடயங்களில் மாற்றங்களை ஏற்படுத்துமாறு நான் இந்த இடத்திற்கு வந்து கூறவில்லை. அதற்கான தேவை மற்றும் அவசியம் எமக்கு கிடையாது. இறைவன் எமக்கு கூறியுள்ள சட்டங்களில் எந்தவித பிரச்சினையும் எமக்கு கிடையாது. அந்த சட்டத்தை மனிதர்களுக்கு கொண்டு வரும் போது, மனிதர்களினால் தயாரிக்கப்படுகின்ற சட்டத்திலேயே பிரச்சினை காணப்படுகின்றது. மனிதர்களால் எமக்கு விதிக்கப்பட்டுள்ள சட்டத்திலேயே நாம் திருத்தங்களை கோருகின்றோம்.

இஸ்லாம் மார்க்கத்தை பின்பற்றுகின்ற எம் அனைவருக்கும் ஏதேனும் ஒரு தவறு இழைக்கப்பட்டிருக்குமாயின், அந்த தவறு இஸ்லாம் தர்மத்தில் என்றால், அது மிகவும் பிழையான கருத்தாகும். இறைவன் ஒருபோதும் எமக்கு அநீதி இழைக்கும் வகையிலான சட்டங்களை பிறப்பிக்கவில்லை. இறைவனினால் வழங்கப்பட்டுள்ள சட்டத்தை, சட்டத் திருத்தங்களின் ஊடாக மக்களுக்கு வழங்குமாறே நாம் கேட்டுக்கொள்கின்றோம்” என முன்னாள் அமைச்சரான பேரியல் அஷ்ரப் கூறினார்.

இறைவனால் கொண்டுவரப்பட்ட சட்டத்தை மாற்றியமைக்க கோரிக்கை விடுக்கவில்லை எனவும், மாறாக மனிதனால் உருவாக்கப்பட்ட சட்டத்திலேயே மாற்றத்தை ஏற்படுத்த வேண்டும் எனவும் சட்டத்தரணி எர்மிசா டெகேல் தெரிவிக்கின்றார்.

”முஸ்லிம் திருமண மற்றும் விவாகரத்துச் சட்டம் 1951ஆம் ஆண்டு கொண்டு வரப்பட்டுள்ளது. இதில் மாற்றங்களை கொண்டுவர வேண்டும் என்ற கோரிக்கை சுமார் 30 வருடங்களுக்கு முன்னரே வந்துள்ளது. இது அண்மையில் முன்வைக்கப்பட்ட கோரிக்கை கிடையாது. நீண்ட காலமாக முஸ்லிம் பெண்கள் இதுகுறித்து குரல் எழுப்பியுள்ளனர். இந்த சட்டம் மாற்றப்பட வேண்டும் என முஸ்லிம் மக்கள் மத்தியிலிருந்தே கோரிக்கை விடுக்கப்படுகின்றது. இந்த நாட்டிலுள்ள ஏனைய சட்டங்களைப் போன்றே பாராளுமன்றத்தில் மனிதர்களால் இந்த சட்டம் கொண்டு வரப்பட்டுள்ளது. இதே போன்று முன்பு காணப்பட்ட பல முஸ்லிம் சட்டங்கள் மாற்றப்பட்டுள்ளன. மாற்ற முடியாது என கூறுவது புதிய யோசனையல்ல. இன்று அதில் மாற்றத்தை ஏற்படுத்த முடியும். மனிதர்களால் உருவாக்கப்பட்ட சட்டத்தை மாற்றியமைக்க முடியும். மதத்தை மாற்றியமைக்குமாறு நாம் கோரவில்லை. சட்டத்தை மாற்றியமைக்குமாறே கோருகின்றோம்.

இவ்வாறாக ஒழுங்கு படுத்தப்பட்ட மக்களை நல்வழிப்படுத்துவதற்காக உள்ளதே மதங்களாகும். மாறாக இந்த திருமண மற்றும் விவாகரத்து சட்டத்தினூடாக முஸ்லிம் பெண்கள் பெரிதும் பாதிப்புக்குள்ளாகின்றனர். மதக்கோட்பாடுகளுக்கு உட்பட்டதாகவும் இந்த சட்டம் இல்லை. இந்த சட்டம் இஸ்லாமிய மார்க்கம், கோட்பாடுகளுக்கு உட்பட்டதாகவும் இல்லை. ஆகவே, இது முழுமையாக மாற்றப்படவேண்டும் என்றும் அவர் குறிப்பிட்டார்.

முஸ்லிம் பெண்கள் அபிவிருத்தி நிதியத்தின் பணிப்பாளர் ஜுவைரியா மொஹிதீன் இதன்போது கருத்து தெரிவிக்கையில்,

முஸ்லிம் திருமண மற்றும் விவாகரத்து சட்டத்தின் காரணமாக முஸ்லிம் பெண்கள் பெருமளவில் பாதிக்கப்படுகின்றனர். இவ்வாறாக பாதிப்புக்குள்ளாகும் பெண்களின் எண்ணிக்கை நாளுக்கு நாள் அதிகரித்த வண்ணம் உள்ளன. இந்த சட்டத்தினூடாக பெண்கள் மாத்திரமல்லாது ஒரு பகுதி ஆண்களும் பாதிப்புக்குள்ளாகின்றனர்.

பாரபட்சம் மிக்க இந்த சட்டத்தின் காரணமாக பலதாரமணங்களை செய்து கொள்ள முடியுமாகவிருக்கின்றது. திருமணச்சான்றிதழில் பெண்கள் கையொப்பம் இடவோ அல்லது விரலடையாளம் இடவோ இடம் ஒதுக்கப்பட்டிருக்காமையே இதன் காரணமாகும். இது போன்ற விடயங்களை உள்ளடக்கிய இந்த சட்டத்தின் காரணமாக பாரிய பாதிப்பை முஸ்லிம் பெண்கள் எதிர்நோக்கியுள்ளனர். அவர்கள் உடல், உள ரீதியிலும் பாதிக்கப்படும் நிலைமை ஏற்பட்டுள்ளது.

இந்த சட்டத்தின் காரணமாக பிள்ளைகள் அநாதைகளாக்கப்படும் பாதகமான நிலையும் காணப்படுகின்றது. இவ்வாறாக நாளொன்றிற்கு 12 பேர் வரையில் இது தொடர்பிலான முறைப்பாடுகளை எமது அமைப்புக்களுக்கு அளிக்கின்றனர். இந்தப் பிரச்சினை புத்தளத்தில் மாத்திரமல்ல, அனைத்துப் பகுதிகளுக்கும் பொதுவான பிரச்சினையாகவே காணப்படுகின்றது.

திருமண வாழ்க்கையில் மகிழ்ச்சியை ஏற்படுத்தும் பொருட்டே அது தொடர்பிலான சட்டங்கள் அமைக்கப்படுகின்றன. மாறாக, இந்த சட்டத்தின் காரணமாக முஸ்லிம் பெண்கள் பாதிப்புக்குள்ளாகின்றார்கள். குறைந்த வயதில் திருமணம் செய்து கொள்கின்றமையின் காரணமாக முஸ்லிம் பெண்கள் பாதிப்பை எதிர்நோக்குகின்றனர். ஆகவே, இது தொடர்பில் ஆக்கபூர்வமான நடவடிக்கைகளை அரசாங்கமும், அரசியல்வாதிகளும் எடுக்க வேண்டுமென ஜுவைரியா தெரிவித்தார்.

ஆய்வுக்கும் வலுவூட்டலுக்குமான பெண்கள் அமைப்பின் உறுப்பினர் அனீஸா பிர்தௌஸ் இங்கு பேசுகையில்,

விதவைகளாகவும், கணவரை பிரிந்து வாழும் பெண்களுக்காகவும் கடந்த 12 வருடங்களாக சேவையாற்றி வருகின்றோம். இதன் ஊடாக முஸ்லிம் திருமண மற்றும் விவாகரத்து சட்டத்தின் காரணமாக பாதிக்கப்படுவோர் தொடர்பில் நன்கு அறிந்திருக்கின்றோம். ஆகவேதான் இந்த சட்டம் மாற்றப்படவேண்டும் என்பது தொடர்பில் உறுதியாக இருக்கின்றோம். எமது நாடு அழகு மிகுந்த நாடாகும் . அதற்கு மேலும் அழகு சேர்ப்பதாக காணப்படுவது நாட்டின் பல்லினத்தன்மையாகும். அதனை மேலும் மெருகூட்ட வல்லவையாகவே நாட்டின் சட்டங்கள் காணப்படுகின்றன. அந்த வகையில் சிங்கள மக்களுக்காக கண்டியச் சட்டமும்., தமிழர்களுக்காக தேசவழமைச் சட்டமும் முஸ்லிம்களுக்காக முஸ்லிம் தனியார் சட்டங்களும் காணப்படுகின்றன. இந்நிலையில் முஸ்லிம் தனியார் சட்டத்தினால் ஆளப்படும் முஸ்லிம்கள் பல்வேறு வகையான பிரச்சினைகளை எதிர்நோக்குகின்றார்கள். அந்த சட்டத்தில் காணப்படும் பாரிய இடைவெளிகளே இவ்வாறான பிரச்சினைகளுக்கு காரணமாக அமைந்துள்ளன.

முஸ்லிம் திருமண மற்றும் விவாகரத்து சட்டம் முழுமையாக இஸ்லாமிய விழுமிய கோட்பாடுகளுக்கு அமைய உருவாக்கப்படாமையின் காரணமாக முஸ்லிம் பெண்களும் சிறுவர்களும் பாரிய சீரழிவுக்கு உள்ளாகின்றனர். ஆகவே, இந்த சட்டம் திருத்தப்படவேண்டும் என்பது தொடர்பிலான முன்மொழிவுகள் பல ஆண்டுகளுக்கு முன்னதாகவே கொண்டுவரப்பட்டன. அதேபோல் பல்வேறு கலந்துரையாடல்கள் மேற்கொள்ளப்பட்டன. இதற்கு எதிர்ப்பு தெரிவித்து சிலகுழுக்கள் அழுத்தங்களை பிரயோகித்தன. இந்த நிலையில் இந்த விடயம் தற்போது தகுந்த தீர்வை எட்டக்கூடிய நிலைக்கு வந்திருக்கின்றது. அந்த தீர்மானத்தை முழுமையாகவும் முஸ்லிம் பெண்கள் எதிர்நோக்கிய பிரச்சினைக்கு உரிய தீர்வாக அமையப்பெறும் வகையிலும் இருக்க வேண்டும் என்பதே எமது எதிர்பார்ப்பாகும்.

மேலும், இந்த விடயங்கள் அனைத்தும் இஸ்லாமிய கோட்பாடுகளுக்கு புறம்பானவையல்ல. மாறாக, எம்முடைய அனைத்துக் கோரிக்கைகளும் மார்க்கத்திற்கு ஏற்றதாகவே அமையப்பெற்றுள்ளன. ஆகவே, இது தொடர்பில் உரிய நடவடிக்கைகள் உடனடியாக எடுக்கப்படவேண்டும். ஏனெனில், சட்டத்திருத்தங்கள் மேற்கொள்ள காலதாமதம் ஏற்படும் ஒவ்வொரு நாளிற்கும் இந்த சட்டத்தினால் பாதிப்புக்குள்ளாகும் பெண்களினது எண்ணிக்கையும் அதிகரித்த வண்ணமே உள்ளன. ஆகவே இதற்கு உடனடித்தீர்வு காணப்படவேண்டும் எனத் தெரிவித்தார்.

சட்டத்தரணி சபானா குல் பேகம் தெரிவிக்கையில்,

முஸ்லிம் திருமண மற்றும் விவாகரத்து சட்டமானது இலங்கை பாராளுமன்றத்தினால் உருவாக்கப்பட்ட ஏனைய சட்டங்களைப் போன்றதொரு சட்டமாகும். ஆகவே, தேவை ஏற்படுகின்ற போது இந்த சட்டத்தில் திருத்தங்களை கொண்டுவரவேண்டியது அவசியமாகின்றது. இந்த சட்டம் 17ஆம் நூற்றாண்டில் இந்தோனேசியாவிலிருந்து கொண்டுவரப்பட்டு பின்னர் 1806 இல் முகமதின் கோர்வையாக உருவாக்கப்பட்டது. அதன் பின்னர் எம்.ரீ. அக்பர் தலைமையில் அமைக்கப்பட்ட குழுவினாலும் 1929 ஆம் ஆண்டில் முஸ்லிம் விவாக விவாகரத்து பதிப்பு சட்டமாகவும் மாற்றப்பட்டது. அதன் பின்னர் 1951இல் 13 ஆம் இலக்க முஸ்லிம் விவாக விவாகரத்து சட்டமாக இது மாற்றப்பட்டது. தற்போது உள்ள இந்த சட்டத்தில் 1975 ஆம் ஆண்டு வரைக்கும் திருத்தங்கள் கொண்டுவரப்பட்ட போதிலும் அதன் பின்னர் எந்த திருத்தங்களும் கொண்டுவரப்படவில்லை. இருந்த போதிலும் 1951ஆம் ஆண்டு ஏ.ஆர்.எச். கனகரத்னவின் தலைமையில் உருவாக்கப்பட்ட குழுவினரும் 1972 ஆம் ஆண்டு எச்.என். இசட். பாரூக்கினால் உருவாக்கப்பட்ட குழுவினரும் 1990 ஆம் ஆண்டு ஏ.எல்.எம்.எம் .சகாப்தீனால் உருவாக்கப்பட்ட குழுவினரும் இந்த சட்டத்தில் திருத்தங்களை கொண்டுவரவேண்டும் என்பது தொடர்பிலான பல பரிந்துரைகளை முன்வைத்திருந்தனர். ஆயினும் எந்த திருத்தங்களும் கொண்டுவரப்படவில்லை.

இறுதியாக 2009 ஆம் ஆண்டு முன்னாள் உயர் நீதிமன்ற நீதியரசர் சலீம் மர்சூப் தலைமையில் குழு நியமிக்கப்பட்டு அந்தக்குழு தமது அறிக்கையை 2018 இல் நீதியமைச்சிற்கு சமர்ப்பித்தது. ஆகவே, அந்த அறிக்கையை நீதியமைச்சிற்கு சமர்ப்பித்த பின்னர் அந்த சட்டத்தை மறுசீரமைப்பு செய்வதற்கு உரிய முழுப் பொறுப்பும் பாராளுமன்றத்திற்கே உள்ளது. ஆகவே, தற்போது பாராளுமன்றத்தில் எம்மை பிரதிநிதித்துவப்படுத்தும் அமைச்சர்கள், பாராளுமன்ற உறுப்பினர்கள் ஆகியோர் இத்திருத்தங்கள் தொடர்பில் முடிவினை எடுத்து அதனை நீதியமைச்சிற்கு சமர்ப்பிக்கும் நிலை ஏற்பட்டது.
இருந்த போதிலும் அதனை மீளாயும் பொருட்டு மீண்டும் நான்கு பேர் கொண்ட குழு அமைக்கப்பட்டது. பாராளுமன்ற அமைச்சரோ அல்லது பாராளுமன்ற உறுப்பினரோ அல்லாத நபரையும் உள்ளடக்கிய வகையிலேயே இந்தக் குழு அமைக்கப்பட்டுள்ளது. அந்தக்குழு பாராளுமன்ற உறுப்பினர்களாலும், அமைச்சர்களாலும் எடுக்கப்பட்ட முடிவை மீளாய்வு செய்வதற்காக உருவாக்கப்பட்டதாகக் கூறப்பட்டது. ஆகவே, மீண்டும் கலந்துரையாடல்களையும் குழுக்களையும் நியமிக்காமல் உடனடியாக இஸ்லாமிய கோட்பாடுகளுக்கு உட்பட்ட வகையிலும், நாட்டின் அரசியலமைப்பு சட்டத்திற்கு முரணாகாத வகையிலும் ஆண், பெண் சமத்துவத்திற்கேற்ற வகையில் இந்த சட்டத்தில் திருத்தங்கள் மேற்கொள்ளப்பட வேண்டும். இதனை எம்மை பிரதிநிதித்துவப்படுத்தும் தலைவர்கள் சரிவரச் செய்வார்கள் என்ற நம்பிக்கை உள்ளது என்றார்.

vidivelli