பொதுபலசேனா அமைப்பு பல தேசிய அமைப்புகளுடன் இணைந்து கண்டியில் எதிர்வரும் 7 ஆம் திகதி ஏற்பாடு செய்துள்ள மாநாடு தொடர்பில் கண்டி மற்றும் அயல் பிரதேசங்களைச் சேர்ந்த முஸ்லிம்கள் பெரும் அச்சமுற்றுள்ளதாகவும் இது தொடர்பில் ஜனாதிபதி, பிரதமர் மற்றும் பாதுகாப்பு இராஜாங்க அமைச்சருடன் கலந்துரையாடியுள்ளதாகவும் அஞ்சல் சேவைகள் மற்றும் முஸ்லிம் சமய விவகார அமைச்சர் எம்.எச்.ஏ.ஹலீம் தெரிவித்தார்.
கண்டியில் பொதுபலசேனா ஏற்பாடு செய்துள்ள மாநாடு தொடர்பில் கருத்து தெரிவிக்கையிலே அவர் இவ்வாறு கூறினார். அவர் தொடர்ந்தும் கருத்து தெரிவிக்கையில்; ‘கண்டி பகுதியைச் சேர்ந்த முஸ்லிம்களும் மற்றும் சிவில் சமூக அமைப்புகளும் குறிப்பிட்ட மாநாட்டுக்கு நீதிமன்ற தடையுத்தரவினைப் பெற்று தடை செய்ய நடவடிக்கை எடுக்குமாறு என்னிடம் கோரிக்கை விடுத்துள்ளனர். இது தொடர்பில் ஜனாதிபதியையும், பிரதமரையும், பாதுகாப்பு இராஜாங்க அமைச்சரையும் சந்தித்து கலந்துரையாடினேன். கண்டி மற்றும் அயல்பகுதி மக்கள் அச்சமுற்றிருப்பதையும் எடுத்து விளக்கினேன். மாநாடு இடம்பெறுவதற்கு இடமளிப்பதா? இல்லையேல் தடையுத்தரவு பெற்றுக் கொள்வதா? என்பது பற்றி சிந்தித்து தீர்மானம் மேற்கொள்வதாகத் தெரிவித்திருக்கிறார்கள்.
இது தொடர்பில் ஏனைய முஸ்லிம் பாராளுமன்ற உறுப்பினர்களிடமும் கதைத்திருக்கிறேன். கண்டிப் பிரதேச முஸ்லிம்களின் பாதுகாப்புக் கருதி இம்மாநாட்டுக்கு நீதிமன்ற தடையுத்தரவு பெற்றுக்கொள்வதற்காக அழுத்தங்களைப் பிரயோகிக்குமாறு கோரியிருக்கிறேன்.
மாநாடு எதிர்வரும் 7 ஆம் திகதி ஞாயிற்றுக்கிழமை நடைபெறவுள்ளதால் நாளை சனிக்கிழமை இறுதித் தீர்மானம் எட்டப்படும் என நினைக்கிறேன். கண்டி மற்றும் அயல் பிரதேசங்களுக்கு பாதுகாப்பினைப் பலப்படுத்துமாறு பதில் பொலிஸ்மா அதிபரைக் கோரியிருக்கிறேன்’ என்றார்.
vidivelli