Qஆய்வு நிறுவனமான உங்கள் அமைப்பு எதற்காக உருவாக்கப்பட்டுள்ளது ?
முஸ்லிம் சமூகத்தைப் பலமானதொரு முஸ்லிம் சிவில் சமூகமாக மாற்றியமைப்பதற்கான முயற்சிகளை மேற்கொள்வதற்காகவே நாம் இதைத் தொடங்கினோம்.
புனித திருக்குர்ஆனின் உண்மையான நிலைமைகளை காலத்துக்கேற்ற நவீன முறைகளினூடாக முஸ்லிம்களுக்கு விளங்கவைப்பதே எமது நோக்கமாகும். மத்ரஸாக்களைப் பற்றி உங்களுக்கும் தெரிந்திருக்கும். இப்போது மத்ரஸாக்கள் பற்றிய அச்சங்கள் எழுந்துள்ளன. ஆனால் உண்மையான நிலைமை அதுவல்ல.
இஸ்லாமிய மார்க்கதைக் கற்பிக்கும் மத்ரஸாக்கள் இரு வகையாகும். ஒன்று எங்கள் குர்ஆனை ஓதக் கற்பிக்கும் இடம். உதாரணமாக பெளத்தர்கள் பாளி மொழியிலான சுலோகங்களைக் கற்றுக் கொள்வதற்கு உள்ள இடத்தைப் போன்றதாகும். குர்ஆனை ஆய்வுரீதியாக, விபரமாகக் கற்பிக்கும் பாடசாலைகள் இரண்டாவது வகையாகும். தடைசெய்யப்பட வேண்டிய அளவுக்கு எதுவுமே மத்ரஸாக்களில் இல்லை என்பதே உண்மை. இது வேறாக, விரிவாகப் பேசப்பட வேண்டியதொரு விடயமாகும்.
எப்படியோ, இவ்விரு முறைகளுக்கும் புறம்பான முற்றிலும் நவீன, முற்போக்கான முறைமையில் இன்றைய நவீன சமூகத்திற்குக் குர்ஆனைக் கற்பிக்கும் முயற்சியில் நீண்ட காலமாக நான் ஈடுபட்டு வருகிறேன். அதன் தொடராகத்தான் இவ் ஆய்வு நிறுவனமும் தொடங்கப்பட்டது.
Qபொதுவாகவே, அண்மைக்காலமாக முஸ்லிம் சமூகமானது படிப்படியாகப் பொதுப் பெரும் சமூகத்திலிருந்து அந்நியப்பட்டுச் சென்றுகொண்டிருக்கிறது, இந்த அழிவுகளுக்கெல்லாம் அதுவும் ஒரு காரணமென்ற குற்றச்சாட்டு முஸ்லிம்கள் மீது தொடுக்கப்படுகிறதே..?
நீங்கள் சொன்னது போல, பொதுச் சமூக வெளியில் இயல்பாக – சுமுகமாக வாழ்வது எப்படி என்பது மத்ரஸாக்களில் கற்பிக்கப்படுவது போதாது என்பதும் ஒரு பிரச்சினையே. அத்துடன் மத்ரஸாக்களில் கற்போர் அதிகமாக அரபு நாடுகளுடன் ஏற்படும் தொடர்புகள் காரணமாக அவர்கள் தம்மை முற்றிலும் வேறானவர்களாகத் தமது உடை, நடை, பாவனைகளில் வெளிப்புற மாற்றங்களை ஏற்படுத்தித் தம்மையும் அரபிகளாகவே காட்டிக் கொள்ளத் தொடங்கினர். அதனாலேயே இத்தகையோர் கடும்போக்குவாதிகளாகப் பிறருக்குத் தோன்றினர். இதனாலேயே இலங்கையின் பொதுப்பெரும் சமூகத்திலிருந்து தூரப்படத் தொடங்கினர். இதன் காரணமாக அவர்களது வாழ்வொழுங்கு உள்ளபடியாகவே பாகிஸ்தானியர், இந்தியர், அரேபியர் போன்று மாறத்தொடங்கிற்று.
இலங்கையிலுள்ள முஸ்லிம்களில் 2% ஆனவர்களுக்குக்கூட அரபு மொழி தெரியாது என்பதை நீங்கள் நம்புகிறீர்களா ? அவர்களுக்கும்கூட மிகச்சிறந்த அரபு மொழிப் பரிச்சயம் கிடையாது. அரபு மொழியில் வெளியாகும் ஒரு சஞ்சிகையேனும் இலங்கையில் இல்லை என்பது உங்களுக்குத் தெரியுமா ? உண்மையிலேயே பெளத்தர்களுக்குப் பாளி மொழி எப்படியோ அப்படித்தான் இந்நாட்டில் அரபு மொழி முஸ்லிம்களுக்கும் உள்ளது. வணக்க வழிபாடுகளுக்கான மொழியாக மட்டுமே அரபு உள்ளது.
Qநீங்கள் என்னதான் சொன்னாலும் ஏப்ரல் 21 தாக்குதல்கள் தொடர்பில் முஸ்லிம்கள் ஏதோ ஓரளவுக்குத் தெரிந்திருந்தார்கள் என்றே முஸ்லிம்கள் தவிர்ந்த ஏனைய சமூகங்கள் கருதுகின்றன..?
நாம் என்னதான் சொன்ன போதிலும் விளக்கம் கொடுத்த போதிலும் இன்னும் உங்களுக்கு எங்கள் மீதான சந்தேகங்கள் உள்ளன என்று எங்களுக்கும் தெரியும். அவ்வாறு நீங்கள் ஐயம்கொள்வதற்கு உங்களுக்கு உள்ள உரிமையை நாம் ஏற்றுக் கொள்கிறோம்.
இலங்கை முஸ்லிம் சமூகம் அடிப்படையில் மூன்று பகுதிகளாக உள்ளன. 1. மத்ரஸாக்களில் கல்வி கற்ற மெளலவிகளின் சமூகம். 2. சாதாரண பொதுமக்கள். அவர்கள் மெளலவிகள் அளவுக்கு இஸ்லாமிய அறிவு கொண்டவர்கள் அல்லர்.
3. தொழில்வாண்மையாளர்கள் (Professionals) இத்தகையவர்களுக்கும் இஸ்லாத்துக்கும் இடையிலான தொடர்புகள் மிகவும் குறைந்தவை.
இம்மூன்று பிரிவுகளிலிருந்தும் வேறுபட்டுத் தனியாக வாழ்ந்த சொற்பமான குழுவினரே ஏப்ரல் 21 தாக்குதல்களை நடத்தியவர்கள். அவர்களைப் பற்றி முஸ்லிம்கள் சமூகத்தில் பெரும்பான்மையினருக்குத் தெரிந்திருக்கவில்லை. ஒருசிலர் இக்குழுவைப் பற்றி ஓரளவு தெரிந்திருந்த போதிலும் இவ்வளவு பாரிய தாக்குதல்களை நடத்தக்கூடியதாக இக்குழுவினரை அவர்களும் மதிப்பிட்டிருக்கவில்லை. அதேவேளை, இக்குழு குறித்து ஓரளவு நன்றாகத் தெரிந்திருந்தோர் இவர்களைப் பற்றி பொலிஸுக்கும் இராணுவத்தினருக்கும் தெரியப்படுத்தி இருக்கிறார்கள் என்று இப்போது நாமும் தெரிந்து கொள்கிறோம்.
Qநீங்கள் இப்படிச் சொன்னாலும், யார், எப்படி இதை நம்ப முடியும்? முஸ்லிம்கள் மத்தியிலேயே அவர்கள் பிரசாரங்கள் செய்தனர். பயிற்சிப் பட்டறைகள் செய்துள்ளார்கள். ஆயுதப் பயிற்சி பெற்றுள்ளனர். இவையெல்லாவற்றையும் அவர்கள் முஸ்லிம்கள் எவருக்குமே தெரியாமல் கள்ளத்தனமாகவா செய்தார்கள் ?
நான் உங்களிடம் சிறியதொரு கேள்வி கேட்கிறேன். 88/89 காலப்பகுதியில் தெற்கிலே ஓர் ஆயுதக் கிளர்ச்சி நடந்தது நமக்குத் தெரியும். அக்கிளர்ச்சி பற்றி ஒவ்வொரு சாதாரண சிங்களப் பொதுமகனும் தெரிந்திருந்தனரா? அக்கிளர்ச்சியோடு தொடர்புகள் கொண்டிருந்தவர்களின் பெற்றோர்களாவது கிளர்ச்சி குறித்து அறிந்திருந்தார்களா? தென்பகுதியின் சமயத் தலைவர்கள் அந்த ஆயுதப் பயிற்சிகள், ஆயுதக் கிடங்குகள் குறித்தெல்லாம் தெரிந்திருந்தார்களா? இவர்கள் எவருமே அப்படித் தெரிந்திருக்கவில்லை என்றே நான் நினைக்கிறேன். இத்தகைய எந்தக் குழுக்களும் இரகசியமாகத்தான் இயங்குகின்றன. இந்தக் குழுவும் அப்படித்தான் இயங்கி இருக்க முடியும். ஆனால் ஒருசிலர் தெரிந்திருந்தார்கள் என்பது பொய்யில்லை. எனினும் மொத்த முஸ்லிம் சமூகமும் தெரிந்தே இருந்தது என்பது நியாயமற்ற, ஏற்க முடியாத ஒரு வாதமாகும்.
ஆனாலும், அக்குழுவினரைப் பற்றிய சரியான ஒரு மதிப்பீடு எங்களுக்குள் இருக்கவில்லை என்பதை ஏற்றுத்தானாக வேண்டும்.
Qஏப்ரல் 21 தாக்குதல்களின் பின்னரும்கூட முஸ்லிம் சமூகத்திற்குள் போதுமான பிரதிபலிப்புகளோ எதிர்வினைகளோ காணப்படவில்லை எனும் பொதுவான குற்றச்சாட்டுக் குறித்து நீங்கள் என்ன நினைக்கிறீர்கள் ?
இதைப் பற்றித் தெரிந்திருந்த காத்தான்குடி முஸ்லிம்கள் இராணுவத்திற்குத் தகவல்களைக் கொடுத்திருப்பதைப் பற்றி நீங்கள் என்ன சொல்கிறீர்கள்? நான் வாழும் அக்குறணை மக்கள் இது பற்றி அறிந்திருக்கவில்லை என்பது உண்மைதான். ஆனாலும் அறிந்திருந்தோர் ஏற்கனவே தகவல்களைக் கொடுத்துள்ளனர். அவை பிரதிபலிப்புகள் இல்லையா? வெளியாருக்கு, வெளிப்படையாகத் தெரியாவிட்டாலும் இத்தாக்குதல்கள் குறித்து முஸ்லிம் சமூகத்திற்குள் சீரியஸான கருத்தாடல்கள் நடந்தே வருகின்றன.
முஸ்லிம் தொழில்வாண்மையாளர்கள் இஸ்லாத்துடனான மிகக்குறைந்த தொடர்புகளையே கொண்டிருந்தனர். அவர்கள் பள்ளிவாசல்களுக்கு வந்தார்கள், தொழுதார்கள், மீண்டும் வீடுகளுக்குச் சென்றார்கள் அவ்வளவுதான். ஆனாலும் இந்த நிகழ்வுகளின் பிறகு, நடந்திருப்பது என்ன? ஏன் இப்படி நடந்தது என்றெல்லாம் சிந்திக்கத் தொடங்கி உள்ளனர். ஆரம்பத்தில் அவர்கள் மேம்போக்கான உரையாடல்களைத் தொடங்கினர். ஆயினும் மிகவும் விரைவாகவே அவ்வுரையாடல்கள் செவ்வையுறத் தொடங்கி, இக்குழுவினரின் பேரழிவு குறித்த விரிவான கலந்துரையாடல்களில் ஈடுபட்டுள்ளனர். எங்களுடைய மிஷ்காத் ஆய்வு நிறுவனம் இவ்வாறான ஆய்வுகளில் இறங்குவதற்கும் அத்தகைய சிலரின் தூண்டுதல்களும் காரணிகளாகும்.
Qஇத்தாக்குதல்கள் குறித்து உலமா சபைக்கும் முஸ்லிம் அரசியல் தலைமைகளுக்கும் எதிராகக் கடுமையான குற்றச்சாட்டுகள் எழுந்துள்ளன. இது குறித்து நீங்கள்..?
இதில் இரண்டு விடயங்கள் உள்ளன. உலமாக்கள் எங்கள் சமூகத்தை நல்ல நிலைக்கு இட்டுச் செல்வார்கள் என்று எங்கள் மக்கள் நம்பிக்கை கொண்டிருந்தார்கள். ஆனாலும், அது அந்தளவுக்கு நடைபெறவில்லை என்பது இப்போது தெளிவாகி உள்ளது. அதனால் நாமெல்லோரும் இப்போது மதத் தலைவர்களுக்கு அப்பாலான வெளிச் சிவில் சமூகத்தின் பங்களிப்பைப் பெற்றுக்கொண்டு நல்லதொரு மாற்றத்தைக் கொண்டு வருவதற்கான தீவிர முயற்சியில் இறங்கியுள்ளோம்.
Qமுஸ்லிம்கள் என்போர் ஓர் இனம். ஏனைய இனத்தார் பல்வேறு மதங்களை அனுஷ்டிக்கின்றனர். சிங்களவர் – பெளத்த, கத்தோலிக்க மதங்களை அனுஷ்டிக்கின்றனர். தமிழர்கள் – இந்து மதத்தைப் போல கத்தோலிக்க, பெளத்த மதங்களையும் பின்பற்றுகின்றனர். ஆயினும் முஸ்லிம்கள் இஸ்லாத்தை மட்டுமே பின்பற்றுகின்றனர்?
நீங்கள் சொல்வதை ஏற்றுக் கொள்கிறோம். இப் பேரவலத்தின் பிறகு, முஸ்லிம்களுக்கு இருண்டதொரு சூழ்நிலை ஏற்பட்டிருப்பதைப் போலவே சிலவேளை சில மாற்றங்களை செய்து கொள்வதற்கான சந்தர்ப்பமும் உருவாகியுள்ளது. அளவுக்கதிகமாக இஸ்லாத்தின் தாக்கத்துக்கு உள்ளாகியிருப்பதாலேயே இவையெல்லாம் நிகழ்ந்துள்ளன என்றே நாம் நினைக்கிறோம். தீவிரமாக மதத்தை அடிப்படையாகக் கொண்டுள்ள முஸ்லிம் சமூகத்தை அதிலிருந்து சற்று விடுவித்து, பலமான, நடுநிலையான ஒரு முஸ்லிம் சிவில் சமூகமாக மாற்றியமைப்பதற்கான ஒரு குழு முயற்சியிலேயே நாம் இறங்கியுள்ளோம்.
இஸ்லாத்தைப் பொறுத்தவரை இறைவன் எங்களுக்கு அருளியுள்ள இறை அறிவாகவே ‘வஹீ’யை நாம் கருதுகிறோம். அதைப் போலவே இறைவன் மனிதனுக்கு சுய அறிவையும் வழங்கியுள்ளான். மனிதனுக்கு இறைவன் வழங்கியுள்ள இந்த அறிவைச் சூழ்நிலைகளுக்கேற்பப் பயன்படுத்திக்கொள்ள வேண்டும் என்பதே இறைவனின் நாட்டமாகும்.
நேர்காணல்: சிசிர யாப்பா
தமிழில்: அஜாஸ் மொஹம்மத்
vidivelli