நெருக்கடிகளிலிருந்து இலங்கை விரைவில் மீண்டெழுவது உறுதி
பயங்கரவாதத்தால் இலங்கையை தோற்கடிக்க முடியாது என்கிறார் மோடி
நெருக்கடிகளிலிருந்து இலங்கை விரைவில் மீண்டெழுமென உறுதியாக நம்புவதாகவும் பயங்கரவாத தாக்குதல்கள் மூலமாக இலங்கையை ஒருபோதும் தோற்கடிக்க முடியாது எனவும் இலங்கை மக்களுக்காக இந்தியா எப்போதும் உறுதியாக நின்று செயற்படுமெனவும் இந்தியப் பிரதமர் நரேந்திர மோடி தெரிவித்துள்ளார்.
சர்வதேச பயங்கரவாதம் இரண்டு நாடுகளுக்கும் சவாலாக உள்ளதால் இரு நாடுகளும் இணைந்து பயங்கரவாதத்தை தோற்கடிக்கலாம் எனவும் இலங்கை அரச தலைவர்களுக்கு மோடி அழைப்பு விடுத்தார். மாலைதீவுகளுக்கான அரச விஜயம் ஒன்றினை மேற்கொண்டிருந்த இந்திய பிரதமர் நரேந்திர மோடி ஜனாதிபதி மைத்திரிபால சிறிசேனவின் அழைப்பின்பேரில் நேற்று இலங்கைக்கான விஜயத்தை மேற்கொண்டிருந்தார்.
இலங்கையில் கடந்த ஈஸ்டர் தினத்தன்று இடம்பெற்ற பயங்கரவாத தாக்குதலின் பின்னர் அரச தலைவர் ஒருவர் இலங்கைக்கு வருகை தரும் முதல் சந்தர்ப்பம் இதுவாகும். நேற்று காலை 11 மணிக்கு பண்டாரநாயக்க சர்வதேச விமான நிலையத்தை வந்தடைந்த பிரதமர் நரேந்திர மோடியை இலங்கை பிரதமர் ரணில் விக்கிரமசிங்க வரவேற்றிருந்தார். அதன் பின்னர் நேற்று நண்பகல் ஜனாதிபதி செயலகத்தில் அவருக்கான வரவேற்பு நிகழ்வுகள் ஏற்பாடு செய்யப்பட்டன. இதன்போது ஜனாதிபதி மைத்திரிபால சிறிசேன இந்திய பிரதமர் நரேந்திர மோடியை இராணுவ அணிவகுப்பு கெளரவிப்புடன் ஜனாதிபதி செயலகத்தில் வரவேற்றிருந்தார். கௌரவ நிமித்தம் 19 பீரங்கி வேட்டுக்களும் இடம்பெற்றன. இந்த வரவேற்பு நிகழ்வில் அமைச்சர்கள், பாராளுமன்ற உறுப்பினர்கள், பாதுகாப்பு படைகளின் பிரதானிகள், முப்படை தளபதிகள் மற்றும் இராஜதந்திரிகள் இந்திய பிரதிநிதிகள் என சகலரும் கலந்துகொண்டனர்.
இதன் பின்னர் ஜனாதிபதி மாளிகையில் விசேட நிகழ்வுகளும் மதிய உணவுக்கான ஏற்பாடுகளும் செய்யப்பட்டிருந்தன. அத்தோடு ஜனாதிபதி மாளிகையில் மர நடுகை நிகழ்வும் ஏற்பாடு செய்யப்பட்டிருந்தது. இந்த நிகழ்வில் பிரதமர் ரணில் விக்கிரமசிங்கவும் கலந்துகொண்டிருந்தார். அதேபோல் ஜனாதிபதி மைத்திரிபால சிறிசேனவும் இந்திய பிரதமர் நரேந்திர மோடியும் ஒரே வாகனத்தில் விஜயம் செய்து ஜனாதிபதி மாளிகையை வந்தடைந்தனர். இங்கு அமைச்சர்கள் பலரும் கலந்துகொண்டிருந்தனர். ஜனாதிபதி மாளிகையில் இந்திய பிரதமர் அசோக மரக்கன்று ஒன்றினையும் நட்டுவைத்தார். இந்த நிகழ்வில் ஜனாதிபதி மைத்திரிபால சிறிசேனவுடன் அமைச்சர் சஜித் பிரேமதாசவும் கலந்துகொண்டிருந்தார். அத்துடன் இலங்கையிலுள்ள இந்திய பிரதிநிதிகளை சந்தித்து பிரதமர் மோடி உரை நிகழ்த்தியிருந்தார். இதில் இலங்கை -– இந்திய உறவுமுறை மற்றும் பாதுகாப்பு நகர்வுகள் அதில் இந்தியாவின் ஒத்துழைப்புகள் என்ற காரணிகளை சுட்டிக்காட்டியிருந்தார்.
ஜனாதிபதி – பிரதமர் மோடி சந்திப்பு
இதனை தொடர்ந்து ஜனாதிபதி மைத்திரிபால சிறிசேனவிற்கும் பிரதமர் நரேந்திர மோடிக்கும் இடையில் விசேட பேச்சுவார்த்தைகளும் இடம்பெற்றன. இருதரப்பு நட்புறவை பலப்படுத்தும் பல கலந்துரையாடல்கள் இதன்போது முன்னெடுக்கப்பட்டுள்ளன. அத்துடன் பயங்கரவாத தாக்குதலின் காரணமாக பதற்ற நிலை காணப்படும் இந்த சூழ்நிலையில் தனது நாட்டுக்கு வருகை தந்து உலகத்தினருக்கு வழங்கிய நற்செய்தி தொடர்பில் ஜனாதிபதி இந்திய பிரதமருக்கு நன்றி தெரிவித்தார். அயல் நட்பு நாடான இந்தியாவிற்கும் இலங்கைக்குமிடையிலான நம்பிக்கை மற்றும் நட்புறவு இந்திய பிரதமரின் இந்த விஜயத்தின் மூலம் மேலும் வலுவடைந்திருப்பதாக ஜனாதிபதி தெரிவித்தார். அத்துடன் இந்திய பிரதமர் நரேந்திர மோடியின் இந்த விஜயமானது இலங்கையின் பொருளாதார, வர்த்தக, சுற்றுலா போன்ற துறைகளின் வளர்ச்சிக்கு சாதகமான நிலையை ஏற்படுத்தும் என்றும் ஜனாதிபதி கூறியதுடன் இக்கட்டான சூழ்நிலைகளில் அயல் நட்பு நாடுகளுக்கு உறுத்துணையாக இருப்பது தனது கடமையாகுமென்று இதன்போது இந்திய பிரதமர் நரேந்திர மோடி தெரிவித்தார். மேலும் இந்தியா இலங்கை மீது வைத்துள்ள நம்பிக்கை எதிர்காலத்திலும் இவ்வாறே பாதுகாக்கப்படுமென தெரிவித்த அவர் அத்தோடு அனைத்து தரப்புகளின் உதவியுடன் சகல இனத்தோருக்கும் நீதியை நிலைநாட்டும் வகையில் கடமையாற்றிவரும் ஜனாதிபதி மைத்திரிபால சிறிசேனவின் வேலைத்திட்டங்கள் தொடர்பில் இந்திய பிரதமர் தனது மகிழ்ச்சியை வெளியிட்டார்.
மேலும், இருநாட்டு உறவுகளை மேம்படுத்தல், வலயத்தின் பாதுகாப்பு, சமாதானம், நிலைபேறான தன்மை ஆகியன தொடர்பில் இருநாட்டு தலைவர்களும் கலந்துரையாடினர். பயங்கரவாத தாக்குதல்களுக்கு இலக்காகிய இரு நாடுகள் என்ற வகையில், பயங்கரவாதத்தை கடுமையாக கண்டிக்க வேண்டுமென்றும் பயங்கரவாதத்தை இல்லாதொழிப்பதற்கு சர்வதேச ஒத்துழைப்பை மேம்படுத்த வேண்டுமென்றும் இருநாட்டுத் தலைவர்களும் உடன்பட்டனர். இருநாடுகளுக்கிடையில் நீண்டகால ஆழமான நட்பிற்கு பரஸ்பர நம்பிக்கை மற்றும் மரியாதை, ஒத்துழைப்பு ஆகியவற்றை அடிப்படையாகக்கொண்ட கொள்கையே காரணமாக அமைந்திருப்பதாகவும் இருநாடுகளுக்குமிடையிலான உறவினை மேலும் வலுப்படுத்திக்கொள்ள வேண்டுமென்றும் இரு நாட்டுத் தலைவர்களும் இணங்கினர். தனக்கு வழங்கிய உற்சாகமான வரவேற்பிற்கும் உபசரிப்பிற்கும் ஜனாதிபதிக்கும் இலங்கை அரசாங்கத்திற்கும் இலங்கை மக்களுக்கும் இந்திய பிரதமர் தனது நன்றிகளை தெரிவித்தார்.
இந்திய பிரதமர், – ரணில், மஹிந்த, சம்பந்தன் இடையிலும் சந்திப்பு
மேலும் இந்திய பிரதமர் நரேந்திர மோடிக்கும் பிரதமர் ரணில் விக்கிரமசிங்கவிற்கும் இடையிலும் முக்கிய பேச்சுவார்த்தைகள் இடம்பெற்றன. அதனை தொடர்ந்து எதிர்க்கட்சி தலைவர் மஹிந்த ராஜபக் ஷ, தமிழ் தேசிய கூட்டமைப்பின் தலைவர் மற்றும் உறுப்பினர்களும் பிரதமர் நரேந்திர மோடியை சந்தித்து கலந்துரையாடியிருந்தனர்.
பிரதமர் மோடி – எதிர்க்கட்சி தலைவர் மஹிந்த ராஜபக் ஷ சந்திப்பு
எதிர்க்கட்சித் தலைவர் மஹிந்த ராஜபக் ஷவும் பிரதமர் நரேந்திர மோடியை சந்தித்து பேச்சுவார்த்தை நடத்தியிருந்தார். இந்த சந்திப்பில் இரு நாட்டு பாதுகாப்பு நகர்வுகள் குறித்து முக்கிய காரணிகள் கலந்துரையாடப்பட்டிருந்தன. குறிப்பாக இலங்கையின் எல்லை பாதுகாப்பு விடயங்களில் இந்தியாவின் ஒத்துழைப்புகள் அவசியம் என்பதை எதிர்க்கட்சித் தலைவர் சுட்டிக்காட்டியிருந்த நிலையில் அதனை பிரதமர் மோடி ஏற்றுகொண்டார். அத்துடன் பயங்கரவாதத்தை தடுக்கும் நடவடிக்கைகளில் இரு நாடுகளும் இணைந்து கைகோர்த்து செயற்பட வேண்டும் என மோடி தெரிவித்துள்ளார்.
மோடி -சம்பந்தன் சந்திப்பு
தமிழ் தேசிய கூட்டமைப்பின் தலைவர் ஆர்.சம்பந்தன் மற்றும் பிரதிநிதிகளும் இந்திய பிரதமர் நரேந்திர மோடியை சந்தித்து பேச்சுவார்த்தை நடத்தியிருந்தனர். இதில் தமிழர் தரப்பின் நியாயமான அரசியல் கோரிக்கைகளை தெளிவுபடுத்திய தமிழ் தேசிய கூட்டமைப்பு பிரதிநிதிகள் இவை குறித்து ஆழமான பேச்சுவார்த்தைகளை முன்னெடுக்க தனிப்பட்ட சந்திப்பொன்றையும் கோரியிருந்தனர். அவை குறித்தும் பிரதமர் மோடி அக்கறை செலுத்தியிருந்தார்.
இந்திய பிரஜைகளை சந்தித்தார் மோடி
இலங்கையில் உள்ள இந்திய பிரதிநிதிகளையும் இந்திய வாழ் சமூகத்தினரையும் சந்தித்து உரையாற்றிய பிரதமர் மோடி, இலங்கை – இந்திய உறவுப்பாலம் பலமடைய வேண்டிய கட்டாயம் குறித்து எடுத்துரைத்தார். இலங்கைக்கும் இந்தியாவிற்கும் இலையிலான நட்புறவு மேலும் மேலும் பலமடையும் வகையில் தாம் செயற்பட வேண்டும் என்பதுடன் இலங்கையின் நம்பிக்கைக்கு பாத்திரமான தலைமைத்துவத்தை நாம் பெற்றுகொடுக்க வேண்டும் என்பதையும் சுட்டிக்காட்டியிருந்தார்.
கொழும்பு புனித அந்தோனியார் தேவாலயத்திற்கு மோடி விஜயம்
பயங்கரவாதிகளால் தாக்கப்பட்ட க ொழும்பு கொச்சிக்கடை புனித அந்தோனியார் தேவாலயத்தையும் பிரதமர் மோடி நேரில் சென்று பார்வையிட்டார். இதில் கர்தினால் மெல்கம் ரஞ்சித் ஆண்டகை, பிரதமர் ரணில் விக்கிரமசிங்க மற்றும் பாராளுமன்ற உறுப்பினர்களும் கலந்துகொண்டனர். இதன்போது இலங்கை நெருக்கடிகளில் இருந்து விரைவில் மீண்டெழும் எனவும், பயங்கரவாத தாக்குதல்கள் மூலமாக இலங்கையை ஒருபோதும் தோற்கடிக்க முடியாது எனவும் இலங்கை மக்களுக்காக இந்தியா எப்போதும் உறுதியாக நின்று செயற்படும் என தனது ட்விட்டர் பக்கத்தில் தெரிவித்துள்ளார்.
நேற்று காலை இலங்கைக்கு வருகை தந்த இந்திய பிரதமர் நேற்று பிற்பகல் மீண்டும் இந்தியாவிற்கு பயணம் மேற்கொண்டிருந்தார் என்பதும் குறிப்பிடத்தக்கது.
-Vidivelli