அமைச்சர் ரிஷாத் பதியுதீனுக்கு மாத்திரம் தண்டனை பெற்றுக் கொடுத்துவிட்டு அரசாங்கத்தை பாதுகாக்க வேண்டிய தேவை மக்கள் விடுதலை முன்னணிக்கு கிடையாது. குண்டுத் தாக்குதல்களில் பலியான நூற்றுக்கணக்கான உயிர்களுக்கு பொறுப்புகூற வேண்டியது ரிஷாத் மாத்திரமல்ல. முழு அரசாங்கமும் இதற்கு பொறுப்பு கூற வேண்டும் என்று ஜே.வி.பியின் பொதுச் செயலாளர் டில்வின் சில்வா தெரிவித்தார்.
வெலிமடை பிரதேசத்தில் நேற்று புதன்கிழமை இடம்பெற்ற மக்கள் சந்திப்பில் கலந்து கொண்டு உரையாற்றும் போதே அவர் இவ்வாறு தெரிவித்தார்.
அங்கு அவர் தொடர்ந்தும் உரையாற்றுகையில் கூறியதாவது,
நாட்டில் மேற்கொள்ளப்பட்ட தொடர் குண்டுத் தாக்குதல்கள் தொடர்பில் விசாரிப்பதற்கு ஆணைக்குழு நியமிக்கப்பட்டது. எனினும் தாக்குதலை மேற்கொண்ட முதலாவது சந்தேகநபர் அதாவது தற்கொலை குண்டுதாரி இறந்துவிட்டார்.
இரண்டாவது சந்தேகநபர் இந்த அரசாங்கமாகும். எனவே அரசாங்கத்திற்கு தான் தண்டனை வழங்கப்பட வேண்டும். ஆனால் அரசாங்கம் தனக்குத் தானே தண்டனை வழங்கிக் கொள்ளாது. எனவே புதிய அரசாங்கம் ஒன்று வெகுவிரைவில் அமைக்கப்பட வேண்டும்.
நடைமுறையிலுள்ள அரசாங்கத்தின் மீது மக்களுக்கு ஆகக் குறைந்தளவு நம்பிக்கை கூட கிடையாது. எனவேதான் பாராளுமன்றத்தில் அரசாங்கத்திற்கு எதிரான நம்பிக்கையில்லா பிரேரணையை சமர்ப்பித்துள்ளோம். எனினும் அதில் தற்போது சிறு பிரச்சினை உள்ளது.
தினமும் அரசாங்கத்தை விமர்சித்துக் கொண்டிருக்கும் மஹிந்த தரப்பினருக்கு ஜே.வி.பி. நம்பிக்கையில்லா பிரேரணையை சமர்ப்பித்ததில் விருப்பமில்லை. இதற்கான காரணம் என்ன என்று யாருக்கும் தெளிவில்லை. இவ்வாறிருக்க அண்மையில் மஹிந்த தரப்பினர் சிலர் கையெழுத்திட்டு அமைச்சர் ரிஷாத் பதியுதீனுக்கு எதிராக நம்பிக்கையில்லா பிரேரணையை சமர்ப்பித்துள்ளனர். அதில் எமக்கு எந்தப் பிரச்சினையும் கிடையாது.
ஆனால் குண்டுத் தாக்குதல்களுக்கு இலக்கான நூற்றுக்கணக்கான உயிர்களுக்கு பொறுப்புக்கூற வேண்டியது ரிஷாத் பதியுதீன் மாத்திரமல்ல. அவரும் பொறுப்புக்கூற வேண்டிய அதே வேளை அரசாங்கமும் பொறுப்புக்கூற வேண்டியது அவசியம். எனவே ரிஷாதை மாத்திரம் தண்டித்து அரசாங்கத்தை பாதுகாக்க ஜே.வி.பி. தயாராக இல்லை.
-Vidivelli