இலங்கையில் இனி ஷரீஆ பல்கலைக்கழகம் உருவாக்க இடமளிக்க முடியாது. அத்துடன் அரபுக் கல்லுரிகள் மற்றும் குர்ஆன் மத்ரஸாக்களை கண்காணிக்கும் புதிய சட்டம் உருவாக்கப்படுவதாக பிரதமர் ரணில் விக்கிரமசிங்க தெரிவித்தார். அத்துடன், கடந்த 21 ஆம் திகதி பயங்கரவாத தாக்குதல் மற்றும் அதனுடன் தொடர்புடைய நபர்கள் குறித்து ஆராய நியமிக்கப்பட்ட பாராளுமன்ற தெரிவுக்குழுவில் எதிர்க்கட்சித் தலைவர் மற்றும் பிரதான எதிர்க்கட்சி உறுப்பினர்கள் கலந்துகொள்ள வேண்டும் என பிரதமர் ரணில் விக்கிரமசிங்க அழைப்பு விடுத்துள்ளார்.
முஸ்லிம் சமூக பிரதிநிதிகள் பிரதமர் ரணில் விக்கிரமசிங்கவுடன் நடத்திய பேச்சுவார்த்தைகளை அடுத்து அவர் இதனை தெரிவித்தார். அவர் மேலும் கூறுகையில்,
ஈஸ்டர் தினத்தன்று இடம்பெற்ற பயங்கரவாத தாக்குதலை அடுத்து முஸ்லிம் சமூகம் எம்முடன் கலந்துரையாடி சில இணக்கப்பாடுகளை எட்டியுள்ளது. குறிப்பாக மத்ரஸா பாடசாலைகளை கட்டுப்படுத்தும் வகையிலும் கண்காணிக்கும் வகையிலும் சில சட்ட திட்டங்களை அமைக்க இணங்கியுள்ளது. இவற்றை நாம் சட்டமா அதிபர் திணைக்களத்திற்கு அறிவித்துள்ளோம். புதிய சட்டங்கள் அமைப்பது குறித்து ஆராயப்பட்டு அதற்கான நடவடிக்கைகள் முன்னெடுக்கப்பட்டு வருகின்றன. அதேபோல் ஷரீஆ பல்கலைக்கழகங்களை அமைக்க வேண்டாம் எனவும் அவர்கள் கேட்டுக்கொண்டனர். அதற்கும் நாம் கவனம் செலுத்துகின்றோம். இதற்கு பின்னர் இலங்கையில் ஷரீஆ பல்கலைக்கழகங்கள் அமைக்கப்படாது. இவற்றைத் தடுக்க அரசாங்கம் சகல நடவடிக்கைகளையும் முன்னெடுக்கும். அதேபோல் புர்கா குறித்த பிரச்சினைக்கும் தீர்வு காணப்பட்டுள்ளது. மேலும், இலங்கையில் சிங்களம், தமிழ் மற்றும் ஆங்கில மொழிகளுக்கு அப்பால் வேறு எந்தவொரு மொழியும் எந்த அரச அறிவிப்புகளிலோ அல்லது பெயர் பலகை மற்றும் முக்கிய இடங்களில் பயன்படுத்த முடியாது என்பது எனது அறிவிப்பின் கீழ் உள்ளக விவகார அமைச்சர் அறிவித்துள்ளார்.
அதேபோல் கைதுகளை பொறுத்தவரை அப்பாவிகளை சந்தேகத்தின் பெயரில் கைதுசெய்து அதிக காலம் தடுத்து வைப்பதில் எந்த அர்த்தமும் இல்லை. அவர்களை விடுவிக்க வேண்டும். குற்றவாளிகள் இருந்தால் அவர்களுக்கு எதிராக கடுமையான சட்ட நடவடிக்கை எடுக்க வேண்டும் என்பதில் மாற்றுக் கருத்தில்லை. அதேபோல் தேடுதல் நடவடிக்கைகள் முன்னெடுக்கப்படுகின்றன. இவற்றின் மூலமாக குற்றங்கள் பாரிய அளவில் தடுக்கப்பட்டுள்ளன என்பதை சகல தரப்பும் ஏற்றுக்கொண்டுள்ளது. ஆகவே பாதுகாப்புத் தரப்பு முன்னெடுக்கும் நகர்வுகளுக்கு பொதுமக்கள் பூரண ஒத்துழைப்புகளை வழங்குகின்றனர். அதற்கும் நன்றி தெரிவித்துக்கொள்ள வேண்டும்.
மேலும் இப்போது தெரிவுக்குழு அமைக்கப்பட்டுள்ளது, இதில் கடந்த மாதம் 21 ஆம் திகதி தாக்குதல் குறித்தும் அதன் பின்னணி குறித்தும் முழுமையாக ஆராயவே இந்த நடவடிக்கை முன்னெடுக்கப்பட்டுள்ளது. இதில் சகல அரசியல் தரப்பினதும் பூரண ஒத்துழைப்பை நாம் கேட்டு நிற்கின்றோம்.
எனினும் இதில் அமைச்சர் ரிஷாத் பதியுதீன் குறித்தே அதிகமாக பேசப்பட்டு வருகின்றது. அமைச்சர் தன் மீதான குற்றச்சாட்டை முழுமையாக நிராகரித்து வருகின்றார். எனினும் இந்த தெரிவுக் குழுவில் எதிர்க்கட்சி தலைவர் சார்ந்த எதிரணி கலந்துகொள்ளாமை கவலைக்கிடமான விடயமாகும். தெரிவுக் குழுவில் கலந்துகொள்ள மீண்டும் அவர்கள் யோசிக்க வேண்டும் என கேட்டுக்கொள்கின்றேன். அதேபோல் ஊடகங்களும் இதில் கலந்துகொள்ள முழுமையாக இடமளிக்கப்பட்டுள்ளது. ஆகவே இந்த குழுவில் நடப்பவற்றை முழுமையாக ஊடகவியலாளர்கள் ஆராய்ந்து உண்மையை எழுத முடியும் என்றார்.
vidivelli