கருமலையூற்று பள்ளிவாசலை இராணுவத்திடமிருந்து மீட்க திட்டம்
முஸ்லிம் சமய பண்பாட்டலுவல்கள் திணைக்களம் நடவடிக்கை
ஏ.ஆர்.ஏ.பரீல்
இராணுவத்தின் கட்டுப்பாட்டுக்குள் இருக்கும் உடைக்கப்பட்டுள்ள கருமலையூற்று பள்ளிவாசலையும், பள்ளிவாசல் காணியையும் இராணுவத்திடமிருந்து மீட்டெடுப்பதற்கான நடவடிக்கைகளில் முஸ்லிம் சமய பண்பாட்டலுவல்கள் திணைக்களம் ஈடுபட்டுள்ளது.
கருமலையூற்று பள்ளிவாசல் மற்றும் பள்ளிவாசலுக்குச் சொந்தமான 139 பேர்ச்சஸ் காணி தொடர்பான விபரங்களையும் ஆவணங்களையும் திரட்டுவதற்கு முஸ்லிம் சமய பண்பாட்டலுவல்கள் திணைக்களத்தின் அதிகாரியொருவர் கருமலையூற்றுக்கு விஜயம் செய்து பள்ளிவாசல் நிர்வாகிகளைச் சந்தித்து உரிய தகவல்களையும், ஆவணங்களையும் பெற்றுக்கொண்டார். கருமலையூற்று பள்ளிவாசலையும் காணியையும் விடுவிப்பதற்குரிய அடுத்த கட்ட நடவடிக்கைகள் தொடர்பில் முஸ்லிம் சமய பண்பாட்டலுவல்கள் திணைக்களத்தின் பணிப்பாளர் எம்.ஆர்.எம்.மலிக்கிடம் வினவியபோது அவர் பின்வருமாறு பதிலளித்தார். 2014 ஆம் ஆண்டு கருமலையூற்று பள்ளிவாசல் இராணுவத்தினரால் உடைக்கப்பட்டதன் பின்பு பள்ளிவாசல் நிர்வாகம் திணைக்களத்துக்கு அறிவித்திருந்தது. இராணுவத்துடன் பேச்சுவார்த்தை நடாத்தி வருவதாகவும் அறிவித்திருந்தது. அதன் பிறகு எந்த நடவடிக்கையும் முன்னெடுக்கப்படவில்லை.
திணைக்களம் தற்போது பள்ளிவாசல் மற்றும் பள்ளிவாசல் காணி தொடர்பான விபரங்களைத் திரட்டியுள்ளது. அந்தக் காணி சட்டபூர்வமான காணியா? இல்லையேல் அரச காணியா? என்பது பற்றி ஆராயவேண்டியுள்ளது. திரட்டப்பட்ட விபரங்கள் வக்பு சபைக்கு கையளிக்கப்பட்டு ஆராய்ந்து தீர்மானம் மேற்கொள்ளப்படும். பள்ளிவாசலையும், பள்ளிவாசல் காணியையும் மீட்டெடுப்பதற்கான ஆரம்ப நடவடிக்கைகள் முன்னெடுக்கப்பட்டுள்ளன.
கருமலையூற்று பள்ளிவாசல் நிர்வாக சபையின் செயலாளர் எம்.ஐ.ஜவாஹிரைத் தொடர்பு கொண்டு இவ்விவகாரம் தொடர்பில் வினவியபோது அவர் பின்வருமாறு விளக்கமளித்தார். ‘பள்ளிவாசலுக்கும், பள்ளிவாசல் காணி 139 பேர்ச்சஸுக்கும் ஆங்கிலேயர் ஆட்சிக்காலத்தில் விக்டோரியா எனும் உறுதி வழங்கப்பட்டுள்ளது. தொல்பொருள் திணைக்களமும் பள்ளிவாசல் இருப்பதை உறுதிசெய்துள்ளது.
1923 ஆம் ஆண்டு 139 பேர்ச்சஸ் காணியும், பள்ளிவாசலும் கசெட் பண்ணப்பட்டுள்ளது. மேலும் சியாரம் ஒன்றும் அதற்கு 20 பேர்ச்சஸ் காணியும் கசெட் பண்ணப்பட்டுள்ளது. இந்த ஆவணங்கள் எம்மிடம் உள்ளன. இராணுவத்திடமிருந்து பள்ளிவாசல் காணியையும் பள்ளிவாசலையும் மீட்டுக் கொள்வதற்கு பிரதேச அரசியல்வாதிகள் மற்றும் கிழக்கு மாகாண ஆளுநர் ஆகியோரை நாடியும் இதுவரை எந்தப் பயனும் ஏற்படவில்லை. அத்தோடு பாதுகாப்பு அமைச்சின் தற்போதைய செயலாளருடனும் பேச்சுவார்த்தை நடாத்தியுள்ளோம். 400 வருடகாலம் பழைமை வாய்ந்த பள்ளிவாசலை இராணுவத்தினர் தகர்த்து விட்டார்கள். அவ்விடத்தில் மீண்டும் பள்ளிவாசலை நிர்மாணித்துக் கொள்வதற்கும், பள்ளிவாசல் காணியை மீட்டுக் கொள்வதற்கும் முஸ்லிம் சமய பண்பாட்டலுவல்கள் திணைக்களமும் முஸ்லிம் சமய விவகார அமைச்சும் உரிய நடவடிக்கைகளை முன்னெடுக்க வேண்டும்’ என்றார்.
-vidivelli