இந்தியக் கட்டுப்பாட்டு காஷ்மீரில் கிளர்ச்சிகாரரினால் மேற்கொள்ளப்பட்ட தாக்குதலையடுத்து ஏற்பட்ட இந்தியா – பாகிஸ்தான் பதற்றநிலை பல வாரங்கள் நீடித்து தற்போது தனிந்து வரும் நிலையில், இந்தியா மற்றுமொரு ஆத்திரமூட்டும் செயற்பாட்டில் இறங்கியுள்ளது. அது தண்ணீர் தொடர்பானதாகும்.
பாகிஸ்தானுக்குள் செல்லும் கிழக்குப்பகுதி மூன்று நதிகளின் அரை பில்லியன் ஏக்கர் அடிக்கும் அதிகமான நீரை தடைபோட்டுத் தடுத்துள்ளதாக கடந்த ஞாயிற்றுக்கிழமை இந்தியா அறிவித்தது. இந்தியாவின் இந்த நகர்வு பாகிஸ்தானை பாதிக்கும் சாத்தியம் இல்லை என நிபுணர்கள் தெரிவித்துள்ளனர்.
நீர்வளங்கள் தொடர்பான மாநில யூனியன் அமைச்சர் அர்ஜுன் மெக்ஹ்வால் ஞாயிற்றுக்கிழமை மேற்கொண்ட நடவடிக்கையினை உறுதிப்படுத்தினார். ரவி, பீயாஸ், சுல்டேஸ் ஆகிய நதிகளின் தண்ணீர் கட்டுப்படுத்தியதாக அவர் தெரிவித்தார்.
சுமார் 0.53 மில்லியன் ஏக்கர் அடி தண்ணீர் பாகிஸ்தானுக்குள் செல்லாதவாறு தடுக்கப்பட்டுள்ளதாகவும், அந்தத் தண்ணீர் சேமிக்கப்பட்டுள்ளதாகவும் தெரிவித்தார். ராஜஸ்தான் மற்றும் பஞ்சாப் மாநிலங்களுக்கு எப்போது தேவைப்படுகின்றதோ அப்போது குடிநீர்த் தேவைக்காகவும், நீர்ப்பாசன நோக்கங்களுக்காகவும் அது பயன்படுத்தப்படும் எனவும் மெக்ஹ்வால் தனது சொந்த ஊரான பிக்கானெரில் வைத்து ஊடகவியலாளர்களிடம் தெரிவித்தார்.
இந்தியப் பகுதியிலிருக்கும் இம் மூன்று கிழக்கு நதிகளிலும் சராசரியாக 33 மில்லியன் ஏக்கர் அடி தண்ணீர் காணப்படுகின்றது.
இந்தியா எமக்குரிய பங்கினைத் தடுத்து நிறுத்துவதால் பாகிஸ்தானுக்கு எவ்வித பாதிப்பும் ஏற்படப் போவதில்லை என பாகிஸ்தானின் முன்னாள் தண்ணீர் ஆணையாளர் செயிட் ஜமாத் அலி ஷாஹ் தெரிவித்தார்.
மூன்று கிழக்கு நதிகளின் அணைக்கட்டுக்களினால் நிரம்பி வழியும் அல்லது கசிந்தோடும் மேலதிக தண்ணீரையே இந்தியா கட்டுப்படுத்தியுள்ளது எனவும் அவர் தெரிவித்தார்.
1960 ஆம் ஆண்டு மேற்கொள்ளப்பட்ட இரு நாடுகளுக்கும் இடையேயான தண்ணீர் தொடர்பான உடன்பாட்டில் இம் மூன்று கிழக்கு நதிகள் தொடர்பில் எவ்வித கோரிக்கைகளையும் முன்வைக்கவில்லை எனவும் அவர் சுட்டிக்காட்டினார்.
அந்தத் தண்ணீர் உண்மையிலேயே இந்தியாவுக்குச் சொந்தமானதுதான். அதனையே பாகிஸ்தானினுள் வந்து விடாமல் தடுக்கின்றது. அது கிடைத்தால் அதை நாம் பயன்படுத்துவோம், கிடைக்கவில்லையென்றால் அது தொடர்பில் கவலைப்பட மாட்டோம் எனவும் அவர் தெரிவித்தார்.
மேற்கில் உள்ள மூன்று நதிகளின் தண்ணீரை இந்தியா கட்டுப்படுத்துமானால் அதனை பாகிஸ்தான் ஆட்சேபிக்கும், ஏனெனில் அதற்கு பாகிஸ்தான் உரிமைகோரியுள்ளது எனவும் அவர் தெரிவித்தார்.
-Vidvivelli