எதிர்காலத்தில் நியமிக்கப்படும் அரச ஹஜ் குழுக்கள் அரசியல் சார்பானதாக இல்லாது சுயாதீன குழுக்களாக அமைய வேண்டும். அரச ஹஜ் குழு வரைபு செய்துள்ள ஹஜ் சட்ட மூல சிபாரிசுகள் மூலம் ஹஜ் குழு எதிர்காலத்தில் அரசியல் சார்பானதாக அமைவதற்கு வாய்ப்புகள் உள்ளன.
அத்தோடு ஹஜ் முகவர்களில் சிலர் கடத்தல் நடவடிக்கைகளிலும் ஊழல்களிலும் ஈடுபடுகின்றனர். அவ்வாறானவர்கள் தண்டிக்கப்பட வேண்டும். அவ்வாறானவர்களின் அனுமதிப்பத்திம் ரத்துச் செய்யப்பட வேண்டும் என சிவில் சமூக பிரதிநிதிகளும் ஹஜ் முகவர்களும் ஹஜ் சட்ட மூல வரைபினை மீளாய்வு செய்து இறுதி தீர்மானம் மேற்கொள்வதற்காக நியமிக்கப்பட்டிருக்கும் குழுவிடம் வேண்டுகோள் விடுத்தனர்.
அரச ஹஜ் குழுவினால் வரைபு செய்யப்பட்டு அமைச்சர் ஹலீமிடமும், அமைச்சின் செயலாளரிடமும் கையளிக்கப்பட்டுள்ள ஹஜ் சட்ட மூல சிபாரிசுகள் தொடர்பாக மீளாய்வு செய்யும் கூட்டம் கடந்த சனிக்கிழமை கொழும்பு அஞ்சல், அஞ்சல் சேவைகள் அமைச்சின் கேட்போர் கூடத்தில் நடைபெற்றது.
அஞ்சல், அஞ்சல் சேவைகள் மற்றும் முஸ்லிம் சமய விவகார அமைச்சின் செயலாளர் ஜனாபா எஸ்.எம். மொஹமட் தலைமையில் இந்தக் கூட்டம் நடைபெற்றது.
ஹஜ் சட்ட மூல வரைபு தொடர்பாக மீளாய்வு செய்வதற்காக நியமிக்கப்பட்டுள்ள குழுவின் தலைவராக அமைச்சின் செயலாளர் ஜனாபா எஸ்.எம். மொஹமதே பதவி வகிக்கிறார்.
நிகழ்வில் அகில இலங்கை ஜம்மியத்துல் உலமா சபை, தேசிய சூரா சபை, வை.எம்.எம்.ஏ., ஸ்ரீ லங்கா முஸ்லிம் கவுன்சில், இஸ்லாமிய இயக்கங்கள், தரீக்காக்கள், ஹஜ் முகவர் சங்கங்களில் பிரதிநிதிகள் என சுமார் 90 பேர் கலந்து கொண்டனர்.
40 சிவில் சமூக அமைப்புகளின் பிரதிநிதிகள் இதில் உள்ளடங்கியிருந்தனர்.ஸ்ரீலங்கா முஸ்லிம் கவுன்ஸிலின் உப தலைவர் ஹில்மி அஹமட் நிகழ்வில் கருத்து தெரிவிக்கையில்;
ஹஜ் குழு வடிவமைத்துள்ள வரைபில் எதிர்காலத்தில் அரச ஹஜ் குழுவுக்கு 9 பேர் நியமிக்கப்பட வேண்டும். அவர்களில் இருவர் பதவி நிலையில் உள்வாங்கப்பட வேண்டும். ஒருவர் முஸ்லிம் சமய பண்பாட்டலுவல்கள் திணைக்களத்தின் பணிப்பாளர், அடுத்தவர் முஸ்லிம் சமய விவகாரங்களுக்குப் பொறுப்பான அமைச்சின் செயலாளர். செயலாளர் மாற்று மதத்தவராக இருந்தால் அவரது பிரதிநிதியென்றும் தெரிவித்துள்ளதுடன் ஏனைய 7 பேரும் அமைச்சரினால் தெரிவு செய்யப்பட வேண்டுமெனவும் ஹஜ் சட்ட வரைபு தெரிவிக்கிறது.
பிரேரிக்கப்பட்டுள்ள சிபாரிசின்படி ஹஜ் குழு எதிர்காலத்தில் அரசியல் மயப்படுவதற்கு வாய்ப்பிருக்கிறது. எனவே ஹஜ் குழு அமைச்சின் தலையீடின்றி சுயாதீனமாக நியமிக்கப்பட வேண்டும் என்று கூறினார். அவரது கருத்தினை பலர் ஆதரித்துப் பேசினார்கள்.
ஹஜ் முகவர்கள் சிலர் ஊழலில் ஈடுபடுவதாகவும், கடத்தலில் ஈடுபடுவதாகவும் குற்றம் சுமத்தப்பட்டுள்ளது. அவ்வாறான நடவடிக்கைகளில் ஈடுபடும் ஹஜ் முகவர்களின் அனுமதிப்பத்திரம் ரத்துச் செய்யப்படுவதுடன் அவர்களுக்கு தண்டனை வழங்கப்படவேண்டுமெனவும் வலியுறுத்தப்பட்டடுள்ளது. அத்தோடு தற்போது சுமார் 100 ஹஜ் முகவர்கள் அனுமதிப்பத்திரம் பெற்றுள்ளார்கள். இலங்கைக்கு வருடாந்தம் 3000 ஹஜ் கோட்டாவே வழங்கப்படுகிறது. சுமார் 30 கோட்டாவே ஒருவருக்கு வழங்கும் நிலையுள்ளது. எனவே ஊழல்கள் புரியும் ஹஜ் முகவர்கள் நீக்கப்படுவதுடன் ஹஜ் முகவர்களின் எண்ணிக்கை குறைக்கப்பட வேண்டும் எனவும் கருத்துகள் பரிமாறப்பட்டன.
பொது மக்களின் கருத்துகளையும் பெற்றுக்கொண்டு ஹஜ் சட்ட மூல வரைபின் இறுதி வடிவமைப்பினைப் பூர்த்தி செய்வதென தீர்மானிக்கப்பட்டது. ஹஜ் சட்ட வரைபு தொடர்பாக மீளாய்வு செய்யும் குழுவின் செயலாளராக முஸ்லிம் சமய விவகார அமைச்சின் பணிப்பாளர் ஏ.பி.எம். அஷ்ரப் செயற்பட்டு வருகிறார்.
-Vidivelli