கூட்டணியில் பயணிப்பது குறித்தோ அல்லது தனித்து தேர்தலில் களமிறங்குவது குறித்தோ தமது தரப்பு இன்னமும் உறுதியான தீர்மானத்தை எட்டவில்லையென எதிர்க்கட்சித் தலைவர் மஹிந்த ராஜபக் ஷ கூறுகின்றார். ஸ்ரீலங்கா பொதுஜன முன்னணியின் ஏகமனதான தீர்மானம் என்னவோ அதனையே நான் செயற்படுத்துவேன்.எனது அணி இணக்கம் தெரிவித்தால் கூட்டணி அமைக்கலாம் எனவும் கூறுகின்றார்.
ஸ்ரீலங்கா சுதந்திர கட்சி, – ஸ்ரீலங்கா பொதுஜன முன்னணி கட்சிகள் இணைந்து கூட்டணி அமைப்பது குறித்து ஆராய்ந்து வருகின்ற நிலையில் நேற்று முன்தினம் ஜனாதிபதி மைத்திரிபால சிறிசேன தலைமையில் ஸ்ரீலங்கா சுதந்திரக் கட்சியுடன் எதிர்க்கட்சித் தலைவர் மஹிந்த ராஜபக் ஷ தலைமையிலான ஸ்ரீலங்கா பொதுஜன முன்னணி உறுப்பினர்கள் பேச்சுவார்த்தை நடத்தியிருந்தனர். இந்த சந்திப்பு குறித்து கருத்து தெரிவிக்கும்போதே அவர் இவ்வாறு குறிப்பிட்டார். அவர் மேலும் கூறுகையில்,
ஸ்ரீலங்கா சுதந்திரக் கட்சியுடன் கூட்டணியமைப்பது குறித்து ஆராயப்படுகின்றதே தவிர இப்போது வரையில் இறுதித் தீர்மானமொன்றை எட்டவில்லை. கூட்டணி அமைப்பது குறித்தோ அல்லது தனித்து பயணிப்பது குறித்தோ எமது தரப்பின் முழுமையான இணக்கப்பாட்டின் அடிப்படையில் தான் தீர்மானிக்கப்படும். இப்போது வரையில் எமது தரப்பின் முழுமையான இணக்கப்பாடு எட்டப்படவில்லை.
கடந்த உள்ளூராட்சி சபைத் தேர்தலில் நாம் தனித்து மிகப்பெரிய வெற்றியை பெற்றுள்ளோம். மாகாணசபை தேர்தலிலும் தனித்து ஸ்ரீலங்கா பொதுஜன முன்னணியாக களமிறங்க வேண்டுமென கட்சிக்குள் ஒருதரப்பினர் கூறுகின்றனர். ஜனாதிபதி தேர்தலில் கூட்டணியமைப்பது குறித்து சிந்திக்க எமக்கு காலம் உள்ளது. எனவே, ஸ்ரீலங்கா பொதுஜன முன்னணி எவ்வாறான தீர்வை எட்டுகின்றதோ அதற்கமைய நான் செயற்படத் தயாராக உள்ளேன். எமது கட்சிக்காக பாடுபட்ட நபர்களின் கருத்துக்களை என்னால் நிராகரிக்க முடியாது என்றார்.
இதுகுறித்து பிரசன்ன ரணதுங்க எம்.பி. கருத்து கூறுகையில்:- ஸ்ரீலங்கா சுதந்திரக் கட்சியுடன் கூட்டணி அமைத்துக்கொண்டு சகல தேர்தல்களையும் முகங்கொடுக்க வேண்டுமென எந்த அவசியமும் இப்போது இல்லை. மாகாணசபை தேர்தலில் ஸ்ரீலங்கா பொதுஜன முன்னணியாக நாம் போட்டியிட வேண்டும் என்பதே எமது நிலைப்பாடாக உள்ளது.
ஜனாதிபதி தேர்தலில் கூட்டணி அமைப்பதா இல்லையா என்பது குறித்து பின்னர் பார்த்துக்கொள்ள முடியும். ஆனால் இப்போது அதற்கான அவசியமில்லை. ஸ்ரீலங்கா சுதந்திரக் கட்சியும் பலமான தனிக் கட்சி என்ற வகையில் அவர்களும் தனித்துக் களமிறங்கி தம்மை உறுதிப்படுத்திக்கொண்டால் கூட்டணி அமைக்கும்போது அது மேலும் பலமாக அமையும் என்றார்.
-Vidivelli