அப்துல் காலித் முஹம்மது மின்ஹாஜ் முப்தி (காஷிபி)
மனித வாழ்வை நெறிப்படுத்தி வளப்படுத்துவதில் இறை மார்க்கம் புனித இஸ்லாம் சட்டங்களோடு சரி நிகராக பண்புகளையும், பண்பாடுகளையும் இணைத்து வைத்துள்ளது. சட்டங்களை (அஹ்காம்) மாத்திரம் நடைமுறைப்படுத்துவதன் மூலம் ஒரு முஸ்லிம் பரிபூரண முஸ்லிமாகி விடுவதுமில்லை. பண்பாடுகளை (அஹ்லாக்) மாத்திரம் கைக்கொள்வதன் மூலம் ஒரு முஸ்லிம் முழுமையான முஸ்லிமாகி விடுவதுமில்லை. அஹ்காமும் அக்லாக்கும் ஒரு நாணயத்தின் இரு பக்கங்களைப் போன்றதாகும்.
வாழ்வியலின் சகல அம்சங்களையும் தழுவிய இறைநெறி இஸ்லாம் வியாபாரக் கொடுக்கல் வாங்கலையும் செம்மையாய் நெறிப்படுத்தியுள்ளது. வாங்குபவர், விற்பவர், பொருள், கிரயம், விற்பதாக அல்லது வாங்குவதாகத் தெரிவித்தல், விற்பதற்கான அல்லது வாங்குவதற்கான தெரிவிப்பை ஏற்றுக்கொள்ளல் என விபரமாகப் பிரித்து ஒவ்வொன்றிலும் சட்டங்களையும் பண்பாடுகளையும் வகுத்துள்ளது. அவை முழு அளவில் பின்பற்றியொழுகப்பட்ட நிலையில் நடந்தேறும் வியாபாரக் கொடுக்கல் வாங்கலே இஸ்லாத்தின் பார்வையில் அங்க சம்பூரணமான வியாபாரக் கொடுக்கல் வாங்கலாகும்.
வியாபாரக் கொடுக்கல் வாங்கலை ஆளுகின்ற சட்டங்களை ஓரளவேனும் அறிந்து வைத்திருக்கின்ற நம்மில் பலர், அதன் பண்புகள் பற்றிய அறிவைப் பெறுவதில் ஆர்வம் காட்ட முயல்வது அரிதாகும். இப்பின்னணியில் இஸ்லாம் கூறும் வியாபாரத்தின் பண்புகள் சிலவற்றை எடுத்துக் காட்டுவதற்கு இக்கட்டுரையில் முயற்சி செய்யப்படுகின்றது.
உண்மை
வியாபாரி தனது பொருட்களை விற்று இலாபம் பெற்று தனது வியாபாரத்தை மேலும் வளப்படுத்திக்கொள்ள விரும்புகின்றான். இதற்காக விற்பனையின்போது வாடிக்கையாளரைக் கவர்ந்திழுக்கும் வண்ணம் அருமையாய் உபசரித்து அழகாகப் பேசுகின்றான். இயன்றவரை தனது பொருட்களை அவருக்கு விற்று காசாக்கிக் கொள்வதில் மிகுந்த அக்கறை செலுத்துகின்றான். இத்தருணத்தில் வியாபாரி உண்மையாய் நடந்துகொள்வது அவசியத்திலும் அவசியமாகும். வியாபாரப் பொருள் பற்றி முற்றிலும் உண்மையான வர்ணனையை அவர் வாடிக்கையாளருக்கு வழங்க வேண்டும். பொய் அறவே கலந்துவிடக் கூடாது. முழுக்க முழுக்க அல்லாஹ்வைப் பயந்த நிலையில் வியாபாரம் நடைபெற வேண்டும். உண்மைக்குப் புறம்பான எதுவும் வியாபாரத்தின் போது அனுமதிக்கப்படவில்லை.
அல்லாஹ்வை அஞ்சி நேர்மையான முறையில் உண்மையுடன் வியாபாரத்தில் ஈடுபடும் வர்த்தகர்களை சிலாகித்தும், மாற்றமாக நடப்பவர்களை எச்சரித்தும் நபியவர்களின் வாக்கியங்கள் வந்துள்ளன. பின்வரும் ஹதீஸ் இவ்விடயத்தில் கவனத்திற்குரியதாகும்:
“நிச்சயமாக வியாபாரிகள் மறுமை நாளில் பாவிகளாக எழுப்பப்படுவர். அல்லாஹ்வைப் பயந்து நல்ல முறையில் உண்மையுடன் நடந்து கொண்டோரைத் தவிர.” (அறிவிப்பவர்: ரிபாஅஹ் இப்னு ராபிஃ ரழியல்லாஹு அன்ஹு, நூல்: முஸ்தத்ரக் அல்-ஹாகிம்)
எனவே, உண்மையைக் கடைப்பிடிப்பது ஏனைய சந்தர்ப்பங்களில் போலவே விற்றலின் போதும் ஒரு முக்கிய பண்பாக விதந்துரைக்கப்பட்டுள்ளது.
நம்பிக்கை
ஒரு முஸ்லிம் நம்பிக்கையின் பிரதிபிம்பமாக இருப்பான். ஏமாற்றல் அவனுக்கு வெறுப்பிலும் வெறுப்பாக இருக்கும். சொல், செயல் எல்லாவற்றிலும் நம்பிக்கை அவசியம் தேவையென இஸ்லாம் வற்புறுத்தி நிற்கின்றது. அல்லாஹு தஆலா தனது தூதர்களிடம் கட்டாயப்படுத்திய பண்புகளுள் ஒன்று நம்பிக்கை. நம்பிக்கையாக நடப்பவனை எல்லோரும் நம்புவர், அவனுடன் நம்பிக்கையுடன் பழகுவர், உறவாடுவர்.
வியாபாரத்தில் நம்பிக்கை இன்றியமையாதது. அதன் அனைத்து அம்சங்களிலும் நம்பிக்கை அவசியம். நம்பிக்கையான வர்த்தகரின் வர்த்தகம் பெயர், புகழுடன் நிலைத்து நிற்கும். சந்தையில் அதற்குள்ள நன்மதிப்பு வாடிக்கையாளர்களை அதனை நோக்கி இழுத்தழைத்துச் செல்லும்.
நம்பிக்கையான வியாபாரி பற்றி புகழ்ந்து பேசினார்கள் அல்லாஹ்வின் தூதர் ஸல்லல்லாஹு அலைஹி வஸல்லம்.
“உண்மையான நம்பிக்கையான வியாபாரி நபிமார்கள், உண்மையாளர்கள், ஷஹீத்களுடன் இருப்பார்.” (அறிவிப்பவர்: அபூ சஈத் ரழியல்லாஹு அன்ஹு, நூல்: ஸுனன் அல்-திர்மிதி)
ஏமாற்றி வியாபாரம் செய்வது முற்றிலும் தடுக்கப்பட்டது. ஒன்றிருக்க வேறொன்றைக் கூறி, ஒன்றைக் காட்டி மற்றொன்றைக் கொடுத்து வியாபாரம் பண்ணுவது ஏமாற்று வியாபாரமாகும்.
உணவுக் குவியலில் நனைந்த பகுதியை அடியிலும் உலர்ந்த பகுதியை மேலாகவும் வைத்து விற்றுக்கொண்டிருந்த மனிதரை தடுத்து வழிப்படுத்தி, “எம்மை ஏமாற்றுபவன் எம்மைச் சேர்ந்தவனல்லன்” என்று செப்பினார்கள் நபி ஸல்லல்லாஹு அலைஹி வஸல்லம் அவர்கள். (அறிவிப்பவர்: அபூ ஹுரைரா ரழியல்லாஹு அன்ஹு, நூல்: ஸஹீஹ் இப்னி ஹிப்பான்)
முஸ்லிம் சமூகம் நம்பிக்கைக்குரிய சமூகம். அதன் ஒவ்வோர் அங்கத்தவனும் நம்பிக்கையாளனாக இருப்பது கட்டாயம். ஏமாற்றுப் பேர்வழிகள் முஸ்லிம் சமூகத்தில் சேர்ந்திருக்க அருகதையற்றோர் என்பதே ஸல்லல்லாஹு அலைஹி வஸல்லம் அவர்களது மேற்படி கூற்றின் கருத்தாகும். வியாபாரத்தின் போது நபி ஸல்லல்லாஹு அலைஹி வஸல்லம் அவர்கள் இதனைக் கூறியிருப்பது இன்னும் கூர்ந்து அவதானிக்கப்பட வேண்டும். இதனையெல்லாம் பார்க்கும்போது வியாபாரத்தில் நம்பிக்கை ஒரு முக்கிய பண்பென்பது வெளிப்படையாகின்றது.
வாக்கை நிறைவேற்றுதல்
வியாபாரத்தில் கொடுத்த வாக்கில் உறுதியாக இருத்தல் இன்றியமையாதது. பலர் கடனுக்குப் பொருளை வாங்கிவிட்டு குறித்த நேரத்தில் கடனை அடைப்பதாக வாக்களிப்பதையும், மற்றும் சிலர் காசோலை வழங்குவதையும் சந்தைகளிலும், வியாபார நிலையங்களிலும் காண்கிறோம். குறித்த தவணை வந்ததும் கடன் கொடுத்தவர் கடனை அடைக்காமல் கொடுத்த வாக்கிற்கு மாறு செய்வதையும், அவர்களது தொலைபேசி அழைப்புக்களை துண்டித்து விடுவதையும், காசோலை வழங்கியவர் வங்கியில் பணம் செலுத்தாமல் விடுவது, மூடப்பட்ட வங்கி கணக்குகளின் காசோலைகளை வழங்கி ஏமாற்றுவது போன்ற நடவடிக்கைகள் மூலம் வாக்குறுதிகள் மீறப்படுவதை அவதானிக்க முடிகிறது.
ஆனால் உண்மையான, நம்பிக்கையான வியாபாரி வாக்களித்தால் மாறு செய்யமாட்டான் என அருமை நபி ஸல்லல்லாஹு அலைஹி வஸல்லம் அவர்கள கூறுகின்றார்கள்.
வியாபாரக் கொடுக்கல் வாங்கலில் வாக்குறுதியை உரிய முறையில் நிறைவேற்றுவது அதிமுக்கியமான பண்பாகுமென்பது இங்கு தெளிவாகின்றது.
தாராளத்தன்மை
இஸ்லாம் தாராளத்தன்மையின் மார்க்கம். தன்னைப் பின்பற்றுவோரிடமும் அது தாராளத்தன்மையை வெகுவாக எதிர்பார்க்கின்றது. தாராள மனப்பான்மை சட்ட எல்லைகளைத் தாண்டியதாகும். வியாபாரத்தின் போதும் இவ்வுன்னத பண்பு கடைப்பிடிக்கப்பட வேண்டும். வியாபாரி தாராள மனப்பான்மையுடன் நடந்துகொள்ள வேண்டும். வாடிக்கையாளரும் தாராளத்தன்மையுடன் நடந்துகொள்ள வேண்டும். பேரம் பேசுவது, இலாபம் வைப்பது, விற்பது, கிரயத்தைப் பெறுவது, பொருளைக் கையளிப்பது, பொருளைக் கையேற்பது போன்ற அனைத்து அம்சங்களிலும் இருவரும் தாராள மனதுடன் ஒருவர் மற்றவரின் நலன் பாதிக்கப்படாதிருப்பதை உறுதிசெய்யும் வகையில் நடந்துகொள்ள வேண்டும். விற்பவர் தனது நலனில் மட்டும் அக்கறை காட்டி இறுகிய நெஞ்சுடன் நடந்துகொள்ளக் கூடாது. வாங்குபவரும் அவ்வாறு நடந்துகொள்ளக் கூடாது. நெஞ்சு விரிந்த நிலையில் தாராள மனதுடன் வியாபாரக் கொடுக்கல் வாங்கலில் ஈடுபடுவோருக்கு வல்லவன் அல்லாஹ்வின் அருள் வேண்டி பிரார்த்தித்தார்கள் அருமை நபி ஸல்லல்லாஹு அலைஹி வஸல்லம் அவர்கள். “விற்றாலும் வாங்கினாலும் மீளக் கேட்டாலும் தாராளத்தன்மையுள்ள மனிதனுக்கு அல்லாஹ் அருள் புரிவானாக!” (அறிவிப்பவர்: ஜாபிர் ரழியல்லாஹு அன்ஹு, நூல்: சஹீஹ் அல்-புகாரி)
வியாபாரக் கொடுக்கல் வாங்கலின்போது தாராளத்தன்மையுடன் நடந்துகொள்வது அலாதியான முக்கிய பண்பாகுமென்பது இங்கு தெளிவாகின்றது.
சத்தியம் செய்வதைத் தவிர்ந்துகொள்ளல்
பொருட்களை விற்றுப் பணமாக்கும் பொருட்டு பகீரதப் பிரயத்தனம் செய்ய வேண்டிய சந்தர்ப்பங்கள் ஏற்படும். வியாபாரமானது வர்த்தகர்களுக்கு மத்தியில் பெரும் போட்டிக்கு மத்தியில் நிலவுகின்றது. எதனைச் சொல்லியாவது வாடிக்கையாளரைத் திருப்திப்படுத்தி பொருட்களை அவர் தலையில் கட்டி பணத்தைப் பெற்றுக் கொள்வதில் முனைப்புடன் செயற்படுகின்ற வர்த்தகர்கள் சில வேளைகளில் சத்தியம் செய்யத் தவறுவதுமில்லை.
சத்தியம் செய்தல் உண்மைக்காக இருந்தாலும் சரியே தவிர்க்கப்பட வேண்டியதாகும். குற்றச்சாட்டுக்களை மறுத்துரைக்க வேண்டிய கட்டங்கள் போன்ற சந்தர்ப்பங்களில் மாத்திரம் அனுமதிக்கப்பட்ட சத்தியம் செய்தலை சாதாரணமாக வியாபாரக் கொடுக்கல் வாங்கலின் போதெல்லாம் இஸ்லாம் அனுமதிக்கவில்லை. பொய் சத்தியம் செய்வது பெரும் பாவம் என்பதுடன் உண்மைக்காக சத்தியம் செய்வதும் விரும்பத்தகாததாகும்.
வியாபார வேளையில் உண்மையைப் பேசி நேர்மையுடன் நடந்துகொள்வது போதுமானது, சத்தியம் செய்தல் பரக்கத்தை இல்லாதொழித்து விடும். பின்வரும் நபி மொழி இதற்கு சான்றாகும்:
“சத்தியம் சரக்கை விற்கச் செய்யும், பரக்கத்தை ஒழிக்கச் செய்யும்.” (அறிவிப்பவர்: அபூ ஹுரைரா ரழியல்லாஹு அன்ஹு, நூற்கள்: சஹீஹ் அல்-புகாரி, சஹீஹ் முஸ்லிம்)
அதிலும் வியாபாரத்தில் பொய் சத்தியம் செய்வது அல்லாஹ்வின் தண்டனைக்குரியதாகும். பின்வரும் நாயக வாக்கியம் இதனை உணர்த்துகின்றது:
“மறுமை நாளில் மூவருடன் அல்லாஹ் பேசவும் மாட்டான், அவர்களைப் பார்க்கவும் மாட்டான், அவர்களைப் பரிசுத்தப்படுத்தவும் மாட்டான். அவர்களுக்கு நோவினை தரும் வேதனையுண்டு” என நபி ஸல்லல்லாஹு அலைஹி வஸல்லம் அவர்கள் கூறினார்கள். “அவர்கள் தோல்வியடைந்தார்கள், நஷ்டமடைந்தார்கள். அல்லாஹ்வின் தூதரே! அவர்கள் யார்?” எனக் கேட்டார்கள் அபூதர் ரழியல்லாஹு அன்ஹு அவர்கள். “கரண்டைக் காலுக்குக் கீழ் ஆடை அணிபவன், தான் செய்த உபகாரத்தை சொல்லிக்காட்டுபவன், தனது சரக்கை பொய் சத்தியம் செய்து விற்பவன்” என நபி ஸல்லல்லாஹு அலைஹி வஸல்லம் அவர்கள் கூறினார்கள். (அறிவிப்பவர்: அபூதர் ரழியல்லாஹு அன்ஹு, நூல்: சஹீஹ் முஸ்லிம்)
ஓர் உண்மையான, இறையச்சமுள்ள வியாபாரியின் உயர்ந்த பண்புகளுள் ஒன்றாக சத்தியம் செய்தலைத் தவிர்ந்திருப்பதைக் கூறலாம்.
நடந்து முடிந்த வியாபாரக் கொடுக்கல் வாங்கலை முறித்துக்கொள்ளல்:
விற்பவரும் வாங்குபவரும் வியாபாரக் கொடுக்கல் வாங்கலை முறித்துக்கொள்ளும் விருப்ப நிபந்தனையின்றி ஒரு வியாபாரம் நடந்து முடிந்தபின் வாங்கியவர் பொருளை திருப்பிக் கொடுக்கவோ, விற்றவர் பொருளை திருப்பிக் கேட்கவோ சட்ட ரீதியாக அனுமதியில்லை. சில வேளைகளில் இவ்வாறான சந்தர்ப்பங்கள் ஏற்படுவதுண்டு. இத்தகைய சந்தர்ப்பங்களில் இருவரும் மனம் ஒப்பி நடைபெற்று முடிந்த வியாபாரக் கொடுக்கல் வாங்கலை முறித்துக்கொள்ள முன்வருதல் மற்றுமொரு வியாபாரப் பண்பாகும்.
வாங்கியவருக்கு பொருள் வாங்கும் போதிருந்த மனநிலை மாறி அதனை மீண்டும் விற்றவருக்குத் திருப்பிக் கொடுக்க விரும்பலாம். விற்றவர் பெருமனதுடன் அப்பொருளை மீளப் பெற்றுக்கொண்டு எடுத்திருந்த கிரயத்தை அப்படியே திருப்பிக்கொடுத்து நல்ல பண்புடன் நடந்துகொள்கிறார். இது ஒரு வகை. சிலவேளை விற்றவர் பொருளை வாங்கியவரிடம் சென்று தான் விற்ற பொருளை மீளக் கேட்கிறார். வாங்கியவரோ தாராள மனதுடன் கிரயத்தை மீளப் பெற்றுக்கொண்டு பொருளை திருப்பிக் கொடுத்து நல்ல பண்புடன் நடந்துகொள்கின்றார். இது மற்றுமொரு வகை.
இரு வகைகளிலும் நல்ல பண்பு பளிச்சிடுகின்றது. இருவருமே அல்லாஹ்வின் மன்னிப்புக்குரியவர்கள்.
அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் இவ்வாறு சொன்னார்கள்:
“யார் ஒரு முஸ்லிமுக்கு அவரது வியாபாரத்தை மன்னிப்பாரோ அல்லாஹ் அவரின் தவறை மன்னிப்பான்.” (அறிவிப்பவர்: அபூ ஹுரைரா ரழியல்லாஹு அன்ஹு, நூல்: ஸுனன் அபீ தாவூத்)
கடனை எழுதிக் கொள்வதும் அதற்கு சாட்சி வைப்பதும்
உடனடி கிரயக் கொடுப்பனவு, பிந்திய கிரயக் கொடுப்பனவு ஆகிய இரண்டும் வியாபாரத்தின் போது சகஜமானவையாகும். சமகால சந்தை நிலை பெரும்பாலும் கடனுக்கு கொள்வனவு செய்வதாகவே உள்ளது. கடனைப் பொறுத்தமட்டில் அதனை எழுதிக்கொள்வதும் அதற்கு சாட்சி வைத்துக் கொள்வதும் உயர்ந்த பண்புகளாக இஸ்லாம் எடுத்துக் காட்டுகின்றது.
வியாபாரக் கடன்களிலும் இப்பண்புகள் அமைய வேண்டும். மறதி, தடுமாற்றம் போன்ற பலவீனங்கள் கடன் கொடுத்தவருக்கும் ஏற்படலாம், கடன் எடுத்தவருக்கும் ஏற்படலாம். கடன் நிமித்தம் பிறந்த பிரச்சினைகள் பூதாகரமாகி இமாலயப் பிரச்சினைகளாக விஸ்வரூபமெடுத்து கொலையிலும் தற்கொலையிலும் முடிந்துள்ள நிகழ்வுகள் ஏராளம் ஏராளம்.
பிரச்சினைகள் எழுவதற்கு முன்னரே அவற்றுக்கான தீர்வுகளைக் காட்டியுள்ள மார்க்கம் இஸ்லாமாகும். வெள்ளம் வருமுன் அணைகட்ட வேண்டும். கடன் கொடுக்கும் சந்தர்ப்பத்தில் கொடுப்பவரின் பெயர், பெறுபவரின் பெயர், கடன் தொகை, கொடுக்கப்படும் இடம், காலம், மீளக் கொடுக்கப்பட வேண்டிய காலம், முறை போன்ற விபரங்கள் தெளிவாக ஒரு பத்திரத்தில் எழுதப்பட்டு அதில் கொடுப்பவரும் பெறுபவரும் கையொப்பமிட்டு உறுதிப்படுத்தி, அதனை உறுதிப்படுத்தும் பொருட்டு இரு சாட்சிகள் ஒப்பமிட்டு நேர்த்தியான ஆவணமொன்றாக அதனைப் பாதுகாத்து வைக்கும் சிறந்த பண்பாடு எப்பொழுதும் கடைப்பிடிக்கப்பட வேண்டியதாகும். வியாபாரக் கடன்கள் இதற்கு விதிவிலக்கல்ல. கடன் பற்றிய சட்டதிட்டங்கள், பண்பாடுகள் குறித்து பேசும் வசனமே அல்-குர்ஆனின் மிக நீண்ட வசனமாகும். (2 : 282)
சதக்கா
வியாபாரத்தின் போது நடைபெறுகின்ற பாவங்கள், தவறுகளுக்கு சதக்கா பிராயச்சித்தமாக அமைகிறது. அல்லாஹ்வின் தூதர் ஸல்லல்லாஹு அலைஹி வஸல்லம் அவர்கள் கூறினார்கள்:
“வியாபாரிகளே! திண்ணமாக ஷைத்தானும் பாவமும் வியாபாரத்தில் சமுகமளிக்கின்றன. எனவே உங்கள் வியாபாரத்தை சதக்காவுடன் கலந்து விடுங்கள்.” (அறிவிப்பவர்: கைஸ் ரழியல்லாஹு அன்ஹு, நூல்: ஸுனன் அல்-திர்மிதீ)
சதக்கா வியாபாரத்தின் ஓர் உபரி அங்கமாக அமைந்து வியாபாரிக்கு பிராயச்சித்தமாக, ஏழை எளியோருக்கு உதவியாக இருப்பது இங்கு கண்கூடு. இதுவும் வியாபாரிகளிடம் இருக்க வேண்டிய ஒரு சிறந்த பண்பாகும். மொத்தத்தில் நமது வியாபார முயற்சிகள் இஸ்லாமிய சட்டங்களைப் பேணி நல்ல பண்புகளைக் கைக்கொண்டதாக அமையுமாயின் அல்லாஹ்வின் கிருபையால் பிற மதத்தவரும் நம்மைப் பற்றி நல்லெண்ணம் கொள்வர், நாம் பின்பற்றி வாழ்கின்ற புனித இஸ்லாத்தை நோக்கி கவரப்படுவர். ஆகவே நாமும் வியாபாரத்தில் இஸ்லாமிய பண்புகளையும், பண்பாடுகளையும் கடைப்பிடித்து நபிமார்கள், உண்மையாளர்கள், ஷஹீத்களுடன் இருக்கும் பாக்கியத்தை அடைய முயற்சிப்போம்.
-Vidivelli