- எம்.எம்.ஏ.ஸமட்
மனிதன் தவறுக்கும் மறதிக்கும் மத்தியில் படைக்கப்பட்டிருக்கிறான். இருப்பினும், தவறுகள் உணரப்பட்டு திருத்தப்படுவதும், செயற்பாடுகள் நிதானத்துடனும் அலட்சியமின்றியும் முன்னெடுக்கப்படுவதும் அதற்கான மனப்பாங்கை உருவாக்கிக் கொள்வதும் முக்கியமாகும். ஒவ்வொருவரும் உலகத்தை மாற்ற வேண்டும் என நினைக்கிறார்கள். ஆனால், ஒருவர் கூட தங்களை மாற்றிக்கொள்ள நினைப்பதில்லை. தவறுகளை, பிழைகளை திருத்திக்கொள்ள முயல்வதில்லை.
மாற்றம் என்பது மானிடத்துவம். அந்தத் தத்துவத்தை பின்பற்ற வேண்டியவர்கள், மாற்றம் காணவேண்டியவர்கள் மனிதர்கள்தான். மாறாதிருக்க தவறுகளைத் திருத்திக்கொள்ளாதிருக்க நாம் விலங்குகளல்ல. மாற்றத்திற்கான மனப்பாங்குகள் நம்மில் உருவாக வேண்டும். ஆனால், தற்காலத்தில் இடம்பெறுகின்ற நிகழ்வுகள் சாதாரண மக்களினதும் துறைசார்ந்தோரினதும் மனப்பாங்கில் மாற்றத்தை ஏற்படுத்துவதற்கான தேசிய வேலைத்திட்டமொன்றை நாடு தழுவிய ரீதியில் நடைமுறைப்படுத்த வேண்டியதன் அவசியத்தை வலியுறுத்துவதாக அமைகின்றன.
இந்நாட்டின் அரச துறை மிகவும் மோசமான நிலையில் உள்ளது என்றால் அதற்கு அரச உத்தியோகத்தர்கள் காரணமல்ல. அவர்களை சரியாக வழி நடத்த தெரியாத தலைமைகளே காரணமாகுமென ஜனாதிபதி மைத்திரிபால சிறிசேன கடந்த திங்கட்கிழமை காலிமுகத்திடலில் நடைபெற்ற இலங்கையின் 71 ஆவது சுதந்திர தின நிகழ்வில் கலந்து கொண்டு உரையாற்றும் போது மேற்கண்டவாறு தெரிவித்ததைச் சுட்டிக்காட்ட வேண்டியுள்ளது.
சேவை நிலையங்களிலும், தொழிலகங்களிலும் பணிபுரிகின்ற மனிதாபிமானமற்ற மனப்பாங்கு கொண்டோரின் பேச்சுக்கள், செயற்பாடுகள், அலட்சியங்கள் போன்றவற்றினால் பலர் பல்வேறு சந்தர்ப்பங்களில் சேவை, தொழில், சமூக மற்றும் உளவியல் ரீதியாகப் பாதிக்கப்படுகின்றனர். உயிர் பறிபோகும் நிலையும் காணப்படுகின்றன. இதற்குக் காரணம் அத்தகையவர்களின் செயற்பாடுகள் திருத்தப்படுவதில்லை. பிழைகள் பிழைகளாகவே தொடர்ந்தும் காணப்பட்டு வருவதை அவதானிக்க முடிகிறது.
குறிப்பாக ஒரு சில தொழில்வாண்மை கொண்ட தொழில் புரிகின்றவர்களிடமிருந்து அல்லது அவர்களது தொழிலகங்களிலிருந்து சேவையை, உதவியைப் பெற்றுக்கொள்ளச் செல்கின்ற சாதாரண மக்கள் பல சந்தர்ப்பங்களில் உதாசீனப்படுத்தப் படுவதும், வஞ்சிக்கப்படுவதும், அலட்சியப்படுத்தப்படுவதும், பராமுகம் காட்டப்படுவதும் என்ற செயற்பாடுகளினூடாக பாதிக்கப்படுவதானது அத்தொழில் வாண்மைத்துறையில் தொழில்புரிகின்ற நல்ல சேவை மனப்பாங்கும் மனிதநேயமும் கொண்ட ஏனையவர்களையும் அவர்களது அச்சேவை நிலையங்களையும் விமர்சனத்துக்குள்ளாக்குவதுடன் அகௌரவத்துக்கும் நம்பிக்கையீனத்துக்கும் இட்டுச்செல்வதாக அமைந்து விடுகிறது.
மக்களின் வரிப்பணத்தின் மூலம் அரசினால் வழங்கப்படுகின்ற அதியுச்ச சலுகைகளைப் பெற்றுக்கொள்கின்ற தொழில்வாண்மை தொழிற்துறைசார்ந்தோர் மக்களின் நலன்களில், அவர்களுக்கான சேவைகளில் இவ்வாறு நடந்துகொள்வது அனுமதிக்கத் தக்கதல்ல. அதிகாரமும் பதவியும் இருக்கும்போதுதான் மக்கள் அதிகாரத்தினதும் பதவியினதும் பக்கம் சாய்ந்து கொள்வார்கள். இவ்விரண்டும் இல்லையேல் மக்களின் காலடிக்கே உரியவர்கள் செல்ல நேரிடும் என்பது மறக்கப்படலாகாது என்பதை ஞாபகப்படுத்துவதும் சமகாலத்தில் அவசியமாகவுள்ளது.
இறைவன் சிலரை பட்டம், பதவி, சொத்து, அந்தஸ்து போன்றவற்றில் உயர்ந்தவர்களாக அதிகப்படியானவர்களாக ஆக்கியிருக்கிறான். அவ்வாறு இறைவன் அவர்களை ஆக்கியிருப்பது பெருமையடித்துக் கொண்டும் ஏனையவர்களை அலட்சியப்படுத்திக் கொண்டும் வாழ்வதற்கல்ல. இறையருளால் கிடைத்துள்ள வளங்களை உரிய முறையில் மற்றவர்களுக்கு பயனளிக்கும் வகையில் பயன்படுத்தும்போதுதான் அவற்றையளித்த இறைவனுக்கு நன்றி செலுத்துவதாக அமையும்.
சமூக மட்டத்தில் ஒவ்வொருவரும் ஒவ்வொரு தொழில் புரிகின்றவர்களாகவும் சேவை செய்கின்றவர்களாகவும் காணப்படுகின்றனர். அரச, தனியார் துறைகளில் பல சேவை நிலைகள் காணப்படுகின்றன. அரச சேவையில் அத்தியாவசிய சேவைகள் என்றும் சாதாரண சேவைகள் என்றும் பல சேவைகள் மக்களின் தேவைகளின் நிமித்தம் வகைப்படுத்தப்பட்டுள்ளன. சுகாதாரம், போக்குவரத்து, பாதுகாப்பு, கல்வி போன்ற அத்தியாவசிய சேவைகள் அரச துறையில் காணப்படுகின்றன. இவற்றில் அதிக முக்கியத்துவமிக்க, அத்தியாவசிய சேவையாகக் கருதப்படுவதும் மக்கள் நலன் அதிகம் கொண்ட சேவையாக விளங்குவதும் சுகாதார வைத்திய சேவையாகும்.
இச்சேவைத் துறையில் உள்ள ஒவ்வொரு சேவையாளரினதும் சேவை நாட்டுக்கும் மக்களுக்கும் இன்றியமையாதது. அதிலும், வைத்தியத்துறைசார்ந்த வைத்திய அதிகாரிகளினதும் தாதி உத்தியோகத்தர்களினதும் சேவைகளானது அதிமுக்கியமானது. ஏனெனில், அவர்களது ஆக்கபூர்வமானதும் அலட்சியமற்றதுமான மனிதாபிமானத்துடனான சேவை உயிர்களோடு சம்பந்தப்பட்டது.
அதனால்தான், சமூக மட்டத்தில் வைத்தியதுறைசார்ந்தோர்கள் கௌரவத்துக்குரியவர்களாகக் கருதப்படுகிறார்கள். அத்தகைய கௌரவத்துக்குரியவர்களின் சேவைகள் மனிதாபிமானமிக்க மனப்பாங்குடன் முன்னெடுக்கப்படுவது அவசியமாகவுள்ளது. மருத்துவ சேவையானது மனிதநேயத்துடன் முன்னெடுக்கப்படும் போதுதான் இச்சேவைக்கான கௌரவம் பாதுகாக்கப்படும். மக்களிடத்திலே நன்மதிப்பையும் பெறும்.
சமகாலத்தில் வைத்தியத்துறையில் அத்துறைசார்ந்த சிலரினால் மேற்கொள்ளப்படுகின்ற அலட்சியங்கள், கவனக்குறைவுகள், கருணையற்ற கருத்தாடல்கள் என்பன அத்துறைமீதான மனிதாபிமானமற்ற செயற்பாடுகள் நம்பிக்கையை இழக்கச் செய்கிறது. குறிப்பாக வைத்தியசாலைகளில் இடம்பெறுவதாகக் கூறப்படுகின்ற அலட்சியச் செயற்பாடுகள் அவ் வைத்தியசாலைகளுக்கும் வைத்தியத்துறைக்கும் அத்துறை சார்ந்த வைத்திய அதிகாரிகள், தாதி உத்தியோகத்தர்கள் மற்றும் ஏனைய ஆளணியினருக்கும் அவமானத்தை ஏற்படுத்துவதுடன், விமர்சனங்களை எதிர்நோக்கச் செய்வதையும் அவதானிக்க முடிகிறது.
வைத்தியசாலைகள் மக்களின் ஆரோக்கியத்துக்காகச் செயற்படக்கூடிய பொது ஸ்தாபனமாகும். இதில் எத்தனிநபரினதும், எந்த அரசியல் சக்தியினதும் தலையீடுகள் இடம்பெறக் கூடாது. அவ்வாறு தலையீடுகளுக்கு உள்வாங்கப் படுகின்ற பட்சத்தில் அவ்வைத்தியசாலையின் நம்பகத்தன்மை கேள்விக்குறியாவதோடு அதன் தரமும் மக்கள் மத்தியில் குறைவாகவே கணிக்கப்படுகிறது.
வைத்தியசாலைகளும்
ஆரோக்கியமுள்ள பிரஜைகளும்
சமூக, பொருளாதார, ஆன்மீக மற்றும் உள ஆரோக்கிய விருத்தியில் ஆரோக்கியமுள்ள பிரஜைகளின் பங்களிப்பைப் பெற்றுக்கொடுப்பதே அரசின் இலக்காகவுள்ளது. இந்த இலக்கை அடைவதில் அதிக பங்கு வகிப்பது வைத்தியசாலைகளாகும். ஏனெனில் ஆரோக்கியமற்ற நிலையில் வைத்தியசாலைகளை நாடும் நோயாளர்களின் நோய்களைக் குணப்படுத்தி அவர்களை ஆரோக்கியம் மிக்கவர்களாக மாற்றும் நற்பணியில் வைத்தியசாலைகளும் வைத்தியர்களும் செயற்படுகின்றனர்.
வைத்தியசாலைகளினதும். அவ்வைத்தியசாலைகளில் பணிபுரியும் வைத்திய அதிகாரிகள், தாதி உத்தியோகத்தர், வைத்தியத் துறைசார்ந்தோர் மற்றும் ஏனைய ஆளணியரின் வகிபாகம் இவ்விலக்கை அடைந்துகொள்வதில் அளப்பெரியதாகும். நகரங்களிலும் கிராமங்களிலும் காணப்படும் மக்கள் தொகைக்கேற்பவும் வைத்தியசாலைகளின் எண்ணிக்கைக்கு ஏற்பவும் வைத்திய அதிகாரிகளும் தாதி உத்தியோகத்தர்களும் நியமனம் செய்யப்பட்டு சேவை செய்து வருகின்றனர். நகரப்புற வைத்தியசாலைகளில் காணப்படுகின்ற வாய்ப்பு வசதிகளுக்கு ஏற்ப கிராமப் புற வைத்தியசாலைகளில் காணப்படுவதில்லை என்ற போதிலும், அவ்வைத்தியசாலைகளில் மனிதநேயத்துடன் பணிபுரிகின்ற வைத்திய அதிகாரிகளையும், தாதியர்களையும் பாராட்டாமல் இருக்க முடியாது.
ஆனால், ஒரு சில வைத்திய அதிகாரிகளும் தாதி உத்தியோகத்தர்களும் இத்தகைய வசதி வாய்ப்புக்கள் குறைந்த வைத்தியசாலைகளில் பணிபுரிவதற்கு வருத்தப்படுவதையும் அவற்றை ஏற்க மறுப்பதையும் காணமுடிகிறது. கடந்த காலங்களில் வடக்கு கிழக்குப் பிரதேசங்களைச் சேர்ந்த வைத்திய அதிகாரிகள் கூட அப்பிரதேசங்களில் கடமை புரிவதற்கு விரும்பாத நிலை காணப்பட்டதை இங்கு சுட்டிக்காட்டுவது அவசியமாகும். இதற்குக் காரணம் அவர்கள் மத்தியில் காணப்படும் சேவை மனப்பாங்கற்ற உளநிலையின் வெளிப்பாடாகும்.
மக்களின் சுகாதார மேம்பாட்டுக்கும் முகாமைத்துவத்துக்குமாக சுகாதார அமைச்சு பல்வேறு திட்டங்களை வகுத்து செயற்படுத்திக் கொண்டிருக்கிறது. இவற்றிற்காக பல மில்லியன் ரூபாய்கள் செலவழிக்கப்படுகிறது. இந்த ரூபா பெறுமதிமிக்கதாக மாற்றப்படுவதில் சுகாதாரத்துறை சார்ந்தோரின் ஒத்துழைப்பு இன்றியமையாதது.
அரச சேவையில் அதி உன்னதமான சேவையாகக் கருதப்படும் வைத்திய சேவைக்காகவும் அச்சேவையிலுள்ளவர்களின் நலன்களுக்காகவும் பல சலுகைகள் அரசினால் வழங்கப்படுகிறது. வழங்கப்படுகின்ற நலன்களில் ஒரு சில குறைபாடுகள் உள்ள போதிலும், இச்சேவையில் உள்ளவர்களின் பல்வேறு தேவைகள் நிறைவேற்றி வைக்கப்படுகின்றன.
வைத்தியத்துறையும் விமர்சனங்களும்
மக்களின் ஆரோக்கியத்துக்கான அடிநாதமாக விளங்குகின்ற வைத்தியசாலைகளில் பணி புரிகின்ற ஓரிரு வைத்தியர்கள், தாதியர்கள் மற்றும் ஏனைய ஆளணியினரின் செயற்பாடுகள் அவ்வைத்தியசாலை குறித்த விமர்சனங்களையும் கேள்விகளையும் ஏற்படுத்துகின்றன. ஒரு சில வைத்தியத்துறை சார்ந்தோரின் அலட்சியங்கள், கவனயீனங்கள், பொறுப்பற்ற செயற்பாடுகள் நோயாளர்களின் ஆரோக்கியத்தைக் கேள்விக்குறியாக்குவதுடன், அவர்களின் உயிர்கள் வீணாகப் பறிபோகவும் காரணமாக அமைந்துவிடுகிறது.
ஒரு சிலரை நீண்ட கால அங்கவீனர்களாக மாற்றவும் செய்கிறது. இந்நிலை ஒருசில அரச வைத்தியசாலைகளில் காணப்படும் அதேவேளை தனியார் வைத்தியசாலைகளில் பணத்தை மையப்படுத்தி ஆரோக்கியம் விலைபேசப்படுகிறது.
எவ்வாறேனும் நோயையும் அதனால் ஏற்படும் உயிர் ஆபத்தையும் தவிர்த்துக் கொள்வதற்காக தனியார் வைத்தியசாலைகளை நாடி நோயைக் குணப்படுத்தி உயிரைக் காப்பாற்றிக்கொண்டவர்கள் அவற்றிற்காக செலவழித்து இன்னும் கடனாளிகளாக வாழ்ந்து கொண்டிருக்கிறார்கள். அந்தளவுக்கு தனியார் வைத்தியசாலைகளின் கட்டண அறவீடுகள் காணப்படுகின்றன. மனிதாபிமானமும் மனிதநேயமும் பணத்திற்காக விலைபேசப்படுவதை இங்கு அவதானிக்க முடிகிறது.
ஒரு சில அரச வைத்தியசாலைகளில் கவனயீனமாகவும், அலட்சியமாகவும் பொறுப்பற்ற விதத்திலும் மேற்கொள்ளப்பட்ட சிகிச்சை நடவடிக்கைகள் ஒரு சிலரை நிரந்தர நோயாளர்களாக்கியும் உள்ளது. அத்தோடு, ஒரு சில வைத்தியர்களுக்கிடையே காணப்படுகின்ற போட்டா போட்டிகள், வெட்டுக்குத்துக்கள் நோயாளர்களைப் பாகுபாட்டுடன் நோக்கவும் செய்கிறது. இவ்வாறான சம்பவங்களும் கடந்த காலங்களில் வைத்தியசாலைகளில் இடம்பெற்றிக்கின்றன.
மருத்துவம் என்பது நோய்களைக் குணப்படுத்துவதற்கான கலையும் அறிவியலும் ஆகும். இது நோய்த்தடுப்பு, குணப்படுத்தல் போன்றவற்றின் மூலம் மனிதர்களின் உடல் நலத்தைப் பேணுதல், மீள்வித்தல் ஆகியவற்றுக்காக உருவாக்கப்பட்ட பல்வேறு உடல்நலம் பேணற் செயல் முறைகளை உள்ளடக்கும். தற்கால மருத்துவம், காயங்களையும் நோய்களையும் கண்டறிந்து குணப்படுத்துவதற்கு உடல்நல அறிவியல், உயிர்மருத்துவ ஆய்வுகள், மருத்துவத் தொழில்நுட்பம் போன்றவற்றைப் பயன்படுத்துகிறது. இவ்வாறான குணப்படுத்தல் பெரும்பாலும் மருந்துகள், அறுவை சிகிச்சை மற்றும் பிற சிகிச்சைகள் மூலம் செய்யப்படுகிறது. தற்கால மருத்துவத்துக்கு மருத்துவ தொழில்நுட்பமும் நிபுணத்துவமும் இன்றியமையாதவை. எனினும் நோயாளிகளின் உண்மையான துன்பத்தைக் குறைப்பதற்கு அவர்களை அந்நோய்களிலிருந்து குணப்படுத்துவதற்கு அவர்களின் நோய்களைக் கண்டறிவதற்கு அவர்களின் உணர்வுகளைப் புரிந்து கொள்வதும் கருணையும், மனிதாபிமானமும் நல்ல சேவை மனப்பாங்கும் தற்காலத்தில் வைத்தியத்துறை சார்ந்தோருக்கு தொடர்ந்தும் அவசியமாகவுள்ளது.
தற்கால வைத்தியத்துறையில் மனிதாபிமானத்திற்கு மதிப்பளிப்பதை விடவும் பணத்திற்கு மதிப்பளிப்பதைக் காண முடிகிறது. பிரதேசம் ஒன்றாக இருந்தாலும் நோயின் வகை ஒன்றாக இருந்தாலும் அந்நோய்க்கான ஆலோசனை மற்றும் சிகிச்சையைப் பெற்றுக்கொள்வதற்கு வைத்திய நிபுணர்களை சந்திப்பதற்கு செலுத்தும் கட்டணம் ஒவ்வொரு தனியார் வைத்தியசாலைக்கும் வித்தியாசமாகவே உள்ளது என்பது சிறு உதாரணமாக இங்கு முன்வைக்க வேண்டியுள்ளது. மனிதாபிமானத்தையும் தொழில் கௌரவத்தையும் பின்தள்ளி பணம் என்ற பேய் வைத்தியத்துறையில் மாத்திரமின்றி சகல துறையிலும் தலைவிரித்து ஆடும் தற்காலத்தில் பிழைகளை பிழையென்று சுட்டிக்காட்டி பிழைதிருத்தம் செய்ய முயல்வதும் பிழையாகக் கொள்ளப்படுகிறது என்பதையும் பதியவேண்டியுள்ளது.
நாகரிகமிக்க மனிதப்பண்புகள் மறக்கப்படுகின்றபோது அல்லது அவற்றை வெளிக்காட்ட முயற்சிக்காதபோது அவற்றினால் ஏற்படுகின்ற தவறுகள், பிழைகள், அலட்சியங்கள் வைத்திய சேவை, ஆசிரியர் சேவை உட்பட அத்தனை சேவையையும், சேவையாளர்களையும் விமர்சனத்துக்கு உள்ளாக்குவதுடன் சேவை பெறுநர்களின் உள்ளத்தோடும், உடலோடும், உயிரோடும் விளையாடச் செய்கிறது. இத்தகைய நிலைமைகள் தவிர்க்கப் படுவதற்கும், தடுக்கப்படுவதற்கும் குறித்த சேவையிலுள்ளவர்கள் அல்லது சேவைத்துறைசார்ந்தோர் திருத்தப்படாத பிழைகளை பிழைதிருத்தம் செய்ய முயற்சிப்பது நாட்டுக்கும் மக்களுக்கும் நன்மையளிக்கும் என்பதே நிதர்சனமாகும்.
-Vidivelli