மாகாணசபை தேர்தல் தாமதமாக பிரதான 2 கட்சிகளுமே காரணம்
அனுரகுமார திஸாநாயக்க குற்றச்சாட்டு
மாகாணசபை தேர்தல் தாமதமாவதற்குப் பிரதான இரண்டு கட்சிகளுமே காரணமாகும். எல்லை நிர்ணய அறிக்கையை காரணம் காட்டி பிரதான கட்சிகள் இரண்டும் மாகாண சபைகள் தேர்தலை பிற்போடும் சூழ்ச்சிகளில் ஈடுபட்டு வந்துள்ளன என மக்கள் விடுதலை முன்னணி தலைவர் அனுரகுமார திஸாநாயக்க சபையில் குற்றஞ்சாட்டினார்.
பாராளுமன்றத்தில் நேற்று புதன்கிழமை மாகாண சபை எல்லை நிர்ணய அறிக்கை தொடர்பான மீளாய்வுக் குழுவின் அறிக்கை தாமதமாகியுள்ளமை தொடர்பாக எதிர்க்கட்சியினரால் எழுப்பப்பட்ட கேள்விகளை தொடர்ந்து சபையில் ஏற்பட்டிருந்த வாத விவாதங்களின் போது தனது கருத்தை முன்வைத்து உரையாற்றும் போதே அனுரகுமார திஸாநாயக்க எம்.பி. இவ்வாறு குற்றச்சாட்டை முன்வைத்தார். அவர் அதன்போது தெரிவிக்கையில்,
மாகாண சபைகள் தேர்தல் தொடர்பான எல்லை நிர்ணய அறிக்கைக்கு பாராளுமன்றத்தில் மூன்றிலிரண்டு பெரும்பான்மை கிடைக்கவில்லை. இதனால் அந்த அறிக்கை தோற்கடிக்கப்பட்டது. இந்நிலையில் சபாநாயகரினால் பிரதமர் தலைமையில் எல்லை நிர்ணயம் தொடர்பாக நடவடிக்கை எடுக்க மீளாய்வுக் குழுவொன்று அமைக்கப்பட்டது. அந்தக்குழு இரண்டு மாதத்திற்குள் தனது அறிக்கையை சமர்ப்பித்திருக்க வேண்டும் எனக் குறிப்பிடப்பட்டது. இதேவேளை குறித்த குழுவினால் அது தொடர்பான அறிக்கையை இரண்டு மாதத்திற்குள் சமர்ப்பிக்காவிட்டால் அதற்கடுத்ததாக எடுக்கக்கூடிய நடவடிக்கைகள் தொடர்பாக அது தொடர்பான சட்டமூலத்தில் எங்கேயும் குறிப்பிடப்படவில்லை. இதனால் எல்லை நிர்ணய நடவடிக்கைகளை பூர்த்தி செய்வதில் சட்ட சிக்கல்கள் ஏற்பட்டுள்ளன. ஆகவே இந்த சட்டமூலத்தில் திருத்தத்தை மேற்கொண்டு அதற்கான நடவடிக்கைகளை மேற்கொள்ள வேண்டும். எவ்வாறாயினும் அறிக்கையை சமர்ப்பிக்காது இருப்பது தொடர்பாக அந்தக்குழு பாராளுமன்றத்திற்கு பொறுப்புக்கூற வேண்டும்.
இதேவேளை, பழைய முறைமையில் தேர்தலை நடத்துவது குறித்து இப்போது கூறுகின்றீர்கள், ஆனால் எல்லை நிர்ணய அறிக்கை சபையில் சமர்ப்பிக்கப்பட்ட போது அதனை ஏற்றுகொள்ள முடியாதென இரண்டு தரப்பினரும் முரண்பட்டதுடன், எல்லை நிர்ணயத்தை எதிர்த்து திட்டமிட்டு தேர்தலை பிற்போடும் செயற்பாடுகளில் ஈடுபட்டீர்கள். இது தொடர்பான நடவடிக்கைகளை அன்றே செய்திருந்தால் இன்று தேர்தல் நடந்திருக்கும். ஆனால் அதற்கு இடமளிக்கப்படவில்லை. இப்போது மீண்டும் பழைய கதைகளை கூறுகிறீர்கள். தேர்தல்கள் பிற்போடப்பட பிரதான இரண்டு கட்சியினருமே காரணம் என அவர் குறிப்பிட்டார்.
-Vidivelli