சவூதி அரேபியாவின் பட்டத்திற்குரிய இளவரசர் மொஹமட் பின் சல்மானின் முக்கிய உதவியாளரான சௌத் அல்-கஹ்தானி எங்கிருக்கிறார் என்பது தொடர்பான தகவலை வழங்க சவூதி அரேபிய அதிகாரிகள் மறுத்து வருவதாக வொஷிங்டன் போஸ்ட் தெரிவித்துள்ளது.
சவூதி அரேபிய ஊடகவியலாளர் ஜமால் கஷோக்ஜி கொடூரமாகக் கொலை செய்யப்படமை தொடர்பான தகவல் வெளிச்சத்திற்கு வந்து சில நாட்களின் பின்னர் கடந்த ஒக்டோபர் மாதம் அல்-கஹ்தானி பதவி நீக்கம் செய்யப்பட்டிருந்தார்.
அவர் விசாரணைக்குட்படுத்தப்பட்டுள்ளதாகவும், அவருக்கு நாட்டை விட்டு வெளியேறத் தடை விதிக்கப்பட்டுள்ளதாகவும் கடந்த நவம்பர் மாதம் சவூதி அரேபியா உறுதிப்படுத்தியது. அதன் பின்னர் இந்த சம்பவம் தொடர்பில் உத்தியோகபூர்வமாக எவ்வித தகவல்களும் வெளியிடப்படவில்லை என வொஷிங்டன் போஸ்ட் குறிப்பிட்டுள்ளது.
கடந்த வருடம் ஒக்டோபர் மாதம் 02 ஆம் திகதி இஸ்தான்பூலிலுள்ள சவூதி அரேபிய துணைத் தூதரகத்தினுள் வைத்து சவூதி அரேபிய ஊடகவியலாளர் ஜமால் கஷோக்ஜி கொடூரக் கொலையில் சௌத் அல்-கஹ்தானி முக்கிய பங்கு வகித்ததாக வழக்கறிஞர்கள் குற்றம்சாட்டினர். இக்கொலை தொடர்பில் அமெரிக்காவினால் தடை விதிக்கப்பட்டுள்ள 17 பேருள் இவரும் ஒருவராவார்.
ஜமால் கஷோக்ஜி படுகொலைத் திட்டம் தொடர்பில் சவூதி அரேபியாவின் பட்டத்திற்குரிய இளவரசர் மொஹமட் பின் சல்மானுக்கு எதுவும் தெரியாது என சவூதி அரேபிய அதிகாரிகள் தெரிவித்ததாக வொஷிங்டன் போஸ்ட் குறிப்பிட்டுள்ளது.
விடயத்தின் தீவிரத்தன்மையினைக் கருத்திற்கொண்டு கசோக்ஜியின் கொலையாளிகளை நீதியின் முன் நிறுத்துதல் என்ற வகையில் கஹ்தானி விடயத்தில் சவூதி அரேபியா எவ்வாறு நடந்துகொள்கின்றது என அமெரிக்காவும் மேற்கு நாடுகளும் உற்றுநோக்கி வருவதாகவும் அப் பத்திரிகை தெரிவித்துள்ளது.
கொலைத் திட்டம், திட்டமிட்டு சிக்கவைக்கப்பட்டாரா என்பன உள்ளிட்ட கஹ்தானியின் சம்பந்தம் தொடர்பில் விடையளிக்கப்பட வேண்டிய பல கேள்விகள் உள்ளன.
கஹ்தானி சம்பந்தமான தகவல்கள் எதுவும் வெளிவராமலிருப்பது சவூதி அரேபியாவின் இயல்பான செயற்பாடேயாகும். பட்டத்திற்குரிய இளவரசர் மொஹமட் பின் சல்மானை இக் கொலைக் குற்றச்சாட்டிலிருந்து காப்பாற்றுவதற்கான தந்திரமே இதுவாகும் என வொஷிங்டனிலுள்ள அரபு மத்திய நிலையத்தின் நிறைவேற்றுப் பணிப்பாளர் கலீல் ஜஹ்ஷன் தெரிவித்தார்
சவூதி அரேபியாவிடமிருந்து எதிர்பார்க்கப்பட்ட அதன் கொள்கை இதுதான் என அயர்லாந்திலுள்ள சவூதி அரேபிய மனித உரிமைச் செயற்பாட்டாளரான அப்துல் அஸீஸ் அல்மொஐயாட் தெரிவித்தார்.
அகிம்சைவாதிகளான மாற்றுக்கருத்துடையவர்கள் அரசாங்கத்தில் சில சீர்திருத்தங்களை செய்யுமாறு கோரியபோது அவர்களுக்கு மரணதண்டனை வழங்கப்பட்டது எனவும் அவர் தெரிவித்தார்.
அவர்களுக்கு சீர்திருத்தவாதிகள் எவரும் தேவையில்லை. இதுதான் அவர்கள் மாற்றுக்கருத்துக்களையும், மக்கள் பிரதிநிதித்துவத்திற்கான கோரிக்கைகளையும் கையாளும் லட்சணம் எனத் தெரிவித்த அல்மொஐயாட், மொஹமட் பின் சல்மான் தனது அதிகாரத்திற்கு பாதிப்பு ஏற்பட்டுவிடும் என்பதால் கொலைகாரர்களை தண்டிக்க முன்வரமாட்டார். கொலைச் சூத்திரதாரிகள் ஒருபோதும் நீதியின்முன் நிறுத்தப்படமாட்டார்கள் எனவும் தெரிவித்தார்.
சவூதி அரேபியாவில் சிறுதொகையானோரே அதிகாரங்களை தம்வசம் வைத்துக்கொண்டுள்ளனர். அந் நாட்டு மக்கள் உரிமைகளுக்காகப் போராடுகின்றபோது சிறையில் அடைக்கப்படுகின்றனர்.
எனினும், மொஹமட் பின் சல்மானை சூழவுள்ள வட்டத்தினருக்கு எவ்வித பாதிப்புக்களும் ஏற்படாது. அவர்கள் பெரும் பணக்காரர்கள், அதீத அதிகாரமிக்கவர்கள், சவூதி அரேபியாவின் சட்டத்திற்கு அல்லது சர்வதேச சட்டத்திற்கு தாம் மேம்பட்டவர்கள் என அவர்கள் நினைத்துக் கொண்டிருக்கின்றார்கள்.
சவூதி அரேபியாவின் பட்டத்திற்குரிய இளவரசர் மொஹமட் பின் சல்மான் ஊடகவியலாளர் கஷோக்ஜியின் கொலைக்கு உத்தரவிட்ட தாக சீ.ஐ.ஏ. முடிவாக கடந்த நவம்பர் மாதம் அறிவித்திருந்தது.எனினும் மொஹமட் பின் சல்மானுக்கு கஷோக்ஜி கொலையுடன் எவ்வித சம்பந்தமும் இல்லை என சவூதி அரேபிய அரசாங்கம் அறிவித்தது.
-Vidivelli