(எப்.அய்னா)
உயிர்த்த ஞாயிறு தின தொடர் தற்கொலை குண்டுத் தாக்குதல்கள் தொடர்பான விசாரணைகளில் தொடர்ந்து மர்மமாக உள்ள புலஸ்தினி மகேந்ரன் எனும் சாரா ஜெஸ்மின் தொடர்பில் மீள பிரத்தியேக விசாரணைகள் ஆரம்பிக்கப்படவுள்ளதாக அறிய முடிகின்றது.
நீர்கொழும்பு – கட்டுவபிட்டிய தேவாலயத்தில் தாக்குதல் நடாத்திய மொஹம்மது ஹஸ்தூன் எனும் குண்டுதாரியின் மனைவியான சாராவுக்கு என்ன நடந்தது என்பது வெளிப்படுத்தப்படாத கேள்வியாக தொடரும் நிலையில், புதிதாக விசாரணைகளை ஆரம்பிக்க திட்டம் வகுக்கப்பட்டுள்ளதாக அரசாங்கத்தின் உள்ளக தகவல்கள் தெரிவித்தன.
பெரும்பாலும் இவ்விசாரணைகள், மீள பொலிஸ் சேவைக்குள் அழைக்கப்பட்டுள்ள சிரேஷ்ட பொலிஸ் அத்தியட்சர் ஷானி அபேசேகரவின் கட்டுப்பாட்டில் இடம்பெறலாம் என அந்த தகவல்கல் தெரிவித்தன.
கொழும்பு மற்றும் நீர் கொழும்பு, மட்டக்களப்பு ஆகிய இடங்களில் கடந்த 2019 ஏப்ரல் 21 ஆம் திகதி தம்மைத் தாமே இலங்கையின் ஐ.எஸ்.ஐ.எஸ். இனர் என அழைத்துக்கொண்ட தேசிய தெளஹீத் ஜமா அத் தலைவனாக செயர்பட்ட சஹ்ரான் ஹஷீம் தலைமையிலான கும்பலினால் 8 தொடர் குண்டுத் தாக்குதல்கள் நடாத்தப்பட்டன.
இந்த 8 தற்கொலை குண்டுத் தாக்குதல்களால், 30 வெளிநாட்டவர்கள் உட்பட 268 பேர் கொல்லப்பட்டதுடன், 27 வெளிநாட்டவர்கள் உட்பட 594 பேர் காயமடைந்தனர்.
இந்த குண்டுவெடிப்பு தொடர்பிலான விசாரணைகளிலேயே சாரா தொடர்பில் முதலில் தகவல்கள் வெளிப்படுத்தப்பட்டன. குறிப்பாக கட்டுவாபிட்டிய தேவாலய குண்டுவெடிப்பு சம்பவத்தின் குண்டுதாரியின் மனைவி என அடையாளம் காணப்பட்ட சாரா, அந்த குண்டுதாரியை காதலித்து மதம் மாறி திருமணம் செய்திருந்தார்.
இந் நிலையில், 2019 ஏப்ரல் 21 ஆம் திகதி தாக்குதல்களை நடாத்திய குண்டுதாரிகளான சஹ்ரான் ஹஸீம், ஹஸ்தூனின் மனைவிமார் உட்பட மேலும் பலர் சாய்ந்தமருது- வெலிவேரியன் பகுதியில் வீடொன்றில் மறைந்திருப்பது தெரியவரவே, அதனை சுற்றி வளைத்த போது, அங்கு இருந்த தற்கொலை குண்டுதாரிகள் குண்டுகளை வெடிக்கச் செய்து தமது உயிர்களை மாய்த்துக்கொண்டிருந்தனர். அதனையடுத்து இராணுவத்தினர் முன்னெடுத்த தேடுதலில், சஹ்ரானின் மனைவி ஹாதியாவும், அவரது மகளும் படுகாயமடைந்த நிலையில் உயிருடன் மீட்கப்பட்டிருந்தனர். இந் நிலையில் சிகிச்சைகளிடையே சஹ்ரானின் மனைவியிடம் முன்னெடுத்த விசாரணைகளில் சி.ஐ.டி. சிறப்புக் குழு பல்வேறு தகவல்களை வெளிப்படுத்திக்கொண்டிருந்தது.
அதன்படி, குறித்த சாய்ந்தமருது வீடு சுற்றிவளைக்கப்படும் போது அங்கு இருந்தவர்கள் யார் யார் என்பதை சி.ஐ.டி. வெளிப்படுத்தியது. கொழும்பிலிருந்து அவர்கள் சாய்ந்தமருதுக்கு செல்லும் வழியே, குருணாகல் மாவட்டம் – கிரிஉல்ல பகுதி துணிக்கடையில் அடுத்த கட்ட தாக்குதலுக்கு என சந்தேகிக்கப்படும் வெள்ளை ஆடைகளை கொள்வனவு செய்யும் சி.சி.ரி.வி. காட்சிகளிலும் அந்த தொடர் விசாரணைகளில் மீட்கப்பட்டன. அந்த சி.சி.ரி.வி. காட்சிகளிலும் சாரா உள்ளிட்டவர்கள் தெளிவாக விசாரணையாளர்களால் அடையாளம் காணப்பட்டனர்.
இவ்வாறான பின்னணியில், சட்டத் தேவைக்காக சாய்ந்தமருது வீட்டில் தற்கொலை செய்துகொண்டு உயிரிழந்த பயங்கரவாத கும்பலைச்சேர்ந்தவர்களின் ஆள் அடையாளத்தை நிரூபிக்க, சஹ்ரானின் மனைவி ஹாதியாவின் வாக்குமூலத்தினை அடிப்படையாக கொண்டு டி.என்.ஏ. பரிசோதனைகள் ஆரம்பிக்கப்பட்டன. அதாவது, சம்பவ இடத்திலிருந்து ஸ்தல தடயவியல் பிரிவினரால் அடையாளம் காணப்பட்டு மீட்கப்பட்ட உயிரியல் கூறுகள், குண்டு வெடிக்கச் செய்யும் போது வீட்டில் இருந்தவர்கள் என சஹ்ரனின் மனைவி ஹாதியாவின் வாக்கு மூலத்தில் குறிப்பிடப்பட்டவர்களின் இரத்த உறவுகளிடம் பெறப்பட்ட உயிரியல் கூறுகளுடன் ஒப்பீடு செய்யப்பட்டன. இதன்போது ஹாதியாவின் வாக்கு மூலத்தில் குறிப்பிடப்பட்டிருந்த அனைவரினதும் டி.என்.ஏ.க்கள் கண்டறியப்பட்டு அவர்களது இறப்பு அறிவியல் ரீதியில் உறுதி செய்யப்பட்ட போதும், ஹாதியா பெயர் குறிப்பிட்ட சாரா தொடர்பில் மட்டும் டி.என்.ஏ. பரிசோதனைகள் தோல்வியடைந்தன.
இதனையடுத்து அது குறித்து விஷேட விசாரணைகள் ஆரம்பிக்கப்பட்டன. இந்த விசாரணைகளை முன்னெடுத்த சி.ஐ.டி.யின் சிறப்பு விசாரணை அதிகாரி கொரோனா காலத்தில் மர்மமான முறையில் உயிரிழந்த நிலையில், அதன் பின்னர் அவ்விசாரணைகள் பிரதான பொலிஸ் பரிசோதகர் இந்துக டி சில்வவைடம் கையளிக்கப்பட்டது.
சாராவின் தாயின் டி.என்.ஏ. மாதிரிகளை பெற்றே, சம்பவ இடத்திலிருந்த உயிரியல் கூறுகளுடன் அது ஒப்பீடு செய்யப்பட்டிருந்தது.
இந் நிலையில் சாய்ந்தமருது வீட்டில் குண்டு வெடிக்கச் செய்யும் போது சாரா அங்கிருந்ததாக சஹ்ரானின் மனைவி ஹாதியாவின் கண்கண்ட சாட்சியும், சாரா சாய்ந்தமருது வீட்டுக்கு சென்றமைக்கான அறிவியல் தடயங்களும் இருக்கும் நிலையில், குண்டு வெடிப்பின் பின்னர் அவருக்கு என்ன ஆனது என்ற தெளிவான விம்பம் இதுவரை விசாரணையாளர்களிடம் இல்லை.
முதல் இரு தடவைகளில் சாரா உயிரிழக்கவில்லை என்பதை டி.என்.ஏ. பரிசோதனைகள் உறுதி செய்த போதும், இந்துக டி சில்வா மூன்றாவது முறையாக முன்வைத்த கோரிக்கைக்கு அமைய முன்னெடுக்கப்பட்ட டி.என்.ஏ. சோதனையில் சாரா உயிரிழந்ததாக கூறப்பட்டது. எவ்வாறாயினும் இந்துக டி சில்வாவின் நடவடிக்கைகள் பல்வேறு சர்ச்சைகளை ஏற்படுத்தியுள்ள நிலையிலும், சாரா தப்பிச் சென்றமைக்கான சான்றுகள் பல கிடைக்கப் பெற்றுள்ள நிலையிலும், புதிதாக இது குறித்த விசாரணைகளை முன்னெடுக்க திட்டமிடப்பட்டுள்ளது.- Vidivelli