( எப்.அய்னா)
புலஸ்தினி மகேந்திரன் எனும் சாரா. உயிர்த்த ஞாயிறு தின தொடர் தற்கொலை குண்டுத் தாக்குதல்கள் தொடர்பான விசாரணைகளில் தொடர்ந்து மர்மமாக உள்ள ஒரு பெண். நீர்கொழும்பு கட்டுவபிட்டிய தேவாலயத்தில் தாக்குதல் நடாத்திய மொஹம்மது ஹஸ்தூன் எனும் குண்டுதாரியின் மனைவியான சாராவுக்கு என்ன நடந்தது என்பது விடை வெளிப்படுத்தப்படாத கேள்வியாக தொடர்கிறது.
ஒரு தரப்பு சாரா இறந்துவிட்டதாக சொல்கிறது. இன்னொரு தரப்பு தப்பி இந்தியாவுக்கு சென்றதாக சொல்கிறது. மற்றொரு தரப்பு அவர் இராணுவ முகாம் ஒன்றுக்கு அழைத்து செல்லப்பட்டு கொல்லப்பட்டிருக்கலாம் என ஊகம் வெளியிடுகின்றது.
ஆனால், சாரா சாய்ந்தமருது வொலிவேரியன் கிராமத்தில் 2019 ஏப்ரல் 26 ஆம் திகதி நடந்த வெடிப்புச் சம்பவத்தின் பின்னர் அங்கிருந்து தப்பிச் சென்றார் என்பதற்கு ஏராளமான சான்றுகள் இதுவரை வெளிப்படுத்தப்பட்டுள்ளன. ஆனால் அங்கு சாரா இறந்தார் என்பதற்கு ஒரே ஒரு டி.என்.ஏ. அறிக்கை மட்டுமே சான்று பகர்கின்றது. அதிலும் அந்த டி.என்.ஏ. அறிக்கை சர்ச்சைக்குரியது. அதற்கு முன்னர் நடந்த இரு டி.என்.ஏ. பரிசோதனைகளில் சாரா அங்கு உயிரிழந்தமையை உறுதி செய்ய முடியாது போன பின்னணியில், கடந்த 2019 ஆட்சி மாற்றத்தின் பின்னர் கோத்தாபய ராஜபக்ஷ அரசு, சாரா விடயத்தை கையாள நியமித்த சி.ஐ.டி.யின் மனித படுகொலை விசாரணை பிரிவு பொறுப்பதிகாரியாக இருந்த இந்துக டி சில்வா (இவர் தற்போது பொலிஸ் தலைமையகத்துக்கு பொறுப்புக்கள் எதுவும் இன்றி இடமாற்றப்பட்டு ஒழுக்காற்று விசாரணைகளை முகம்கொடுத்துள்ளார். பெண் ஒருவரை புகையிரதத்தில் வைத்து தவறாக படம்பிடித்தமை, ஊடகவியலாளர் தரிந்து ஜயவர்தனவை கைது செய்ய சதி செய்தமை ஆகிய விடயங்கள் தொடர்பில் இவ்விசாரணை நடக்கிறது.
கொழும்பு மற்றும் நீர் கொழும்பு, மட்டக்களப்பு ஆகிய இடங்களில் கடந்த 2019 ஏப்ரல் 21 ஆம் திகதி தம்மைத் தாமே இலங்கையின் ஐ.எஸ்.ஐ.எஸ். இனர் என அழைத்துக்கொண்ட தேசிய தெளஹீத் ஜமா அத் தலைவனாக செயற்பட்ட சஹ்ரான் ஹஷீம் தலைமையிலான கும்பலினால் 8 தொடர் குண்டுத் தாக்குதல்கள் நடாத்தப்பட்டன.
இதில் முக்கியமான விடயம் என்னவென்றால், சாரா சாய்ந்தமருதில் இறக்கவில்லை என சந்தேகிக்கும் விதமாக மற்றொரு சான்றும் தற்போது வெளிப்பட்டுள்ளது. 2020 ஆம் ஆண்டே வெளிப்பட்டுள்ள இந்த சான்று தொடர்பில் முறையான விசாரணைகள் இடம்பெறவில்லை என கூறப்படுகின்றது.
கரையோர பொலிஸ் பிரிவுக்கு உட்பட்ட கொச்சிக்கடை புனித அந்தோனியார் தேவாலயம், நீர்கொழும்பு, கட்டான பொலிஸ் பிரிவுக்கு உட்பட்ட கட்டுவபிட்டி – புனித செபஸ்டியன் தேவாலயம், மட்டக்களப்பு புனித சியோன் தேவாலயம் ஆகிய கிறிஸ்தவ தேவாலயங்களும் கொழும்பு காலி முகத்திடலுக்கு சமீபமாகவுள்ள ஷங்கிரில்லா, சினமன் கிராண்ட், கிங்ஸ்பெரி ஆகிய ஐந்து நட்சத்திர ஹோட்டல்களிலும் குண்டுத் தாக்குதல்கள் இடம்பெற்றன. மேற்படி ஆறு தாக்குதல்களும் இடம்பெற்றது ஏப்ரல் 21 ஆம் திகதி காலை 8.45 மணிக்கும் 9.30 மணிக்கும் இடையிலான 45 நிமிட இடைவெளியிலேயே ஆகும்.
அதே தினம் பிற்பகல் 1.45 மணியளவில் தெஹிவளை பொலிஸ் பிரிவின் மிருகக்காட்சி சாலைக்கு முன்பாக உள்ள ‘ நியூ ட்ரொபிகல் இன்’ எனும் சாதாரண தங்கு விடுதி கொண்ட ஹோட்டலில் குண்டு வெடிப்புச் சம்பவம் பதிவானது. அதனைத் தொடர்ந்து பிற்பகல் 2.15 மணியளவில், குண்டுவெடிப்புடன் தொடர்புடையதாக கூறப்படும் சந்தேக நபர்கள் தொடர்பிலான விசாரணைக்கு சென்ற கொழும்பு குற்றத்தடுப்புப் பிரிவின் அதிகாரிகளை இலக்கு வைத்து தெமட்டகொட மஹவில கார்டின் பகுதி சொகுசு வீட்டில் பெண் தற்கொலை குண்டுதாரியினால் தாக்குதல் நடாத்தப்பட்டது.
இந்த 8 தற்கொலை குண்டுத் தாக்குதல்களால், 30 வெளிநாட்டவர்கள் உட்பட 268 பேர் கொல்லப்பட்டதுடன், 27 வெளுநாட்டவர்கள் உட்பட 594 பேர் காயமடைந்தனர்.
இந்த குண்டுவெடிப்பு தொடர்பிலான விசாரணைகளிலேயே சாரா தொடர்பில் முதலில் தகவல்கள் வெளிப்படுத்தப்பட்டன. குறிப்பாக கட்டுவாபிட்டிய தேவாலய குண்டுவெடிப்பு சம்பவத்தின் குண்டுதாரியின் மனைவி என அடையாளம் காணப்பட்ட சாரா, அந்த குண்டுதாரியை காதலித்து மதம் மாறி அவனை திருமணம் செய்திருந்தார். அவரது திருமணம் குறித்த சர்ச்சைகளை இக்கட்டுரை ஆராயவில்லை. ஆனால் இந்த விவகாரத்தில் சிறிலங்கா தெளஹீத் ஜமா அத்தின் அப்போதைய தலைவர் அப்துல் ராசிக் உள்ளிட்டவர்களின் நடவடிக்கைகள் தொடர்பில் மீள விரிவான விசாரணைகள் செய்ய வேண்டிய அவசியம் ஏற்பட்டுள்ளது. ஏனெனில் இவர்கள் இலங்கையின் உளவுத்துறையோடு இணைந்து செயற்பட்டமைக்கான ஆதாரங்கள், சிரேஷ்ட பிரதிப் பொலிஸ் மா அதிபர் ஒருவரின் அலுவலகத்தில் நடந்த சந்திப்புக்கள் தொடர்பில் தகவல்கள் வெளிப்படுத்தப்பட்டுள்ளன.
இந் நிலையில், 2019 ஏப்ரல் 21 ஆம் திகதி தாக்குதல்களை நடாத்திய குண்டுதாரிகளான சஹ்ரான் ஹஷீம், ஹஸ்தூனின் மனைவிமார் உட்பட மேலும் பலர் சாய்ந்தமருது – வெலிவேரியன் பகுதியில் வீடொன்றில் மறைந்திருப்பது தெரியவரவே, அதனை சுற்றிவளைத்த போது, அங்கு இருந்த தற்கொலை குண்டுதாரிகள் குண்டுகளை வெடிக்கச் செய்து தமது உயிர்களை மாய்த்துக்கொண்டதாக கூறப்பட்டது. அதனையடுத்து இராணுவத்தினர் முன்னெடுத்த தேடுதலில், சஹ்ரானின் மனைவி ஹாதியாவும், அவரது மகளும் படுகாயமடைந்த நிலையில் உயிருடன் மீட்கப்பட்டிருந்தனர். இந் நிலையில் சிகிச்சைகளிடையே சஹ்ரானின் மனைவியிடம் முன்னெடுத்த விசாரணைகளில் சி.ஐ.டி. சிறப்புக் குழு பல்வேறு தகவல்களை வெளிப்படுத்திக்கொண்டிருந்தது. (சஹ்ரானின் மனைவிக்கு எதிராக கல்முனை மேல் நீதிமன்றில் வழக்கொன்று தொடரப்பட்டுள்ளது. சாராவின் நடவடிக்கைகள் தொடர்பில் பொலிஸாருக்கு கூறாமை குற்றச்சாட்டாகும்)
அதன்படி, குறித்த சாய்ந்தமருது வீடு சுற்றிவளைக்கப்படும் போது அங்கு இருந்தவர்கள் யார் யார் என்பதை சி.ஐ.டி. வெளிப்படுத்தியது. கொழும்பிலிருந்து அவர்கள் சாய்ந்தமருதுக்கு செல்லும் வழியே, குருணாகல் மாவட்டம் – கிரிஉல்ல பகுதி துணிக்கடையில் அடுத்த கட்ட தாக்குதலுக்கு என சந்தேகிக்கப்படும் வெள்ளை ஆடைகளை கொள்வனவு செய்யும் சி.சி.ரி.வி. காட்சிகளிலும் அந்த தொடர் விசாரணைகளில் மீட்கப்பட்டன. அந்த சி.சி.ரி.வி. காட்சிகளிலும் சாரா உள்ளிட்டவர்கள் தெளிவாக விசாரணைகளால் அடையாளம் காணப்பட்டனர்.
இவ்வாறான பின்னணியில், சட்டத் தேவைக்காக சாய்ந்தமருது வீட்டில் தற்கொலை செய்துகொண்டு உயிரிழந்ததாக கூறப்படும் பயங்கரவத கும்பலைச்சேர்ந்தவர்களின் ஆள் அடையாளத்தை நிரூபிக்க, சஹ்ரானின் மனைவி ஹாதியாவின் வாக்கு மூலத்தினை அடிப்படையாக கொண்டு டி.என்.ஏ. பரிசோதனைகள் ஆரம்பிக்கப்பட்டன. அதாவது, சம்பவ இடத்திலிருந்து ஸ்தல தடயவியல் பிரிவினரால் அடையாளம் காணப்பட்டு மீட்கப்பட்ட உயிரியல் கூறுகள், குண்டு வெடிக்கச் செய்யும் போது வீட்டில் இருந்தவர்கள் என சஹ்ரனின் மனைவி ஹாதியாவின் வாக்கு மூலத்தில் குறிப்பிடப்பட்டவர்களின் இரத்த உறவுகளிடம் பெறப்பட்ட உயிரியல் கூறுகளுடன் ஒப்பீடு செய்யப்பட்டன.
இதன்போது ஹாதியாவின் வாக்கு மூலத்தில் குறிப்பிடப்பட்டிருந்த அனைவரினதும் டி.என்.ஏ.க்கள் கண்டறியப்பட்டு அவர்களது இறப்பு அறிவியல் ரீதியில் உறுதி செய்யப்பட்ட போதும், ஹாதியா பெயர் குறிப்பிட்ட சாரா தொடர்பில் மட்டும் டி.என்.ஏ. பரிசோதனைகள் தோல்வியடைந்தன. ( ஹாதியாவின் வாக்கு மூலத்தை தவிர வேறு சுயாதீனமான சாட்சிகள் ஊடாகவும் அவ்வீட்டில் இருந்தவர்கள் யார் என்பதை விசாரணையாளர்கள் கண்டறிந்திருந்தனர்)
இதனையடுத்து அது குறித்து விஷேட விசாரணைகள் ஆரம்பிக்கப்பட்டன. சாராவின் தாயின் டி.என்.ஏ. மாதிரிகளை பெற்றே, சம்பவ இடத்திலிருந்த உயிரியல் கூறுகளுடன் அது ஒப்பீடு செய்யப்பட்டிருந்தது.
இந் நிலையில் சாய்ந்தமருது வீட்டில் குண்டு வெடிக்கச் செய்யும் போது சாரா அங்கிருந்ததாக சஹ்ரானின் மனைவி ஹாதியாவின் கண்கண்ட சாட்சியும், சாரா சாய்ந்தமருது வீட்டுக்கு சென்றமைக்கான அறிவியல் தடயங்களும் இருக்கும் நிலையில், குண்டு வெடிப்பின் பின்னர் அவருக்கு என்ன ஆனது என்ற கேள்விக்கு பதில் உத்தியோகபூர்வமாக இல்லை.
சாய்ந்தமருது வெடிப்பின் பின்னர், அப்பிரதேசத்துக்குப் பொறுப்பான பொலிஸ் பொறுப்பதிகாரி எனும் ரீதியில் கல்முனை பொலிஸ் பொறுப்பதிகாரி கல்முனை நீதிவான் நீதிமன்றில் தாக்கல் செய்த முதல் தகவல் அறிக்கையில் அங்கு 16 பேர் கொல்லப்பட்டுள்ளதாக குறிப்பிடப்பட்டுள்ளது.
எனினும் இரு நாட்களுக்கு பின்னர், சம்பந்தமே இல்லாத அம்பாறை பொலிஸ் பொறுப்பதிகாரி மேலதிக அறிக்கை ஒன்றினை தாக்கல் செய்து வெலிவோரியன் கிராமத்தில் இறந்தவர்களின் எண்ணிக்கை 17 என குறிப்பிட்டிருந்தார். இதன்போது 2019 ஏப்ரல் 28 ஆம் திகதி, அப்போதைய அம்பாறை சிரேஷ்ட பொலிஸ் அத்தியட்சர் சாமந்த விஜேசேகர எஸ்.பி./ ஏ.பி/ பி.ஏ./ அவூட்/ 545/19 எனும் இலக்கத்தின் கீழ் சி.ஐ.டி. இனருக்கு ஒரு வழக்குப் பொருள் பொதி அனுப்பப்பட்டிருந்தது. அதில் சாரா அல்லது புலஸ்தினி மகேந்ரனுக்கு சொந்தமானது என சந்தேகிக்கப்பட்ட பணப் பை ஒன்று அனுப்பப்பட்டிருந்ததுடன் அதில் ஒரு அடையாள அட்டையும் இருந்தது.
சாராவுக்கு அல்லது புலஸ்தினி மகேந்ரனுக்கு இரு அடையாள அட்டைகள் இருந்துள்ளன. ஒன்று சாரா ஜெஸ்மின் எனும் பெயரிலானது. மற்றையது புலஸ்தினி மேகேந்ரன் எனும் பெயரிலானது.
இதில் முக்கியமான விடயம் என்னவென்றால், சாரா சாய்ந்தமருதில் இறக்கவில்லை என சந்தேகிக்கும் விதமாக மற்றொரு சான்றும் தற்போது வெளிப்பட்டுள்ளது. 2020 ஆம் ஆண்டே வெளிப்பட்டுள்ள இந்த சான்று தொடர்பில் முறையான விசாரணைகள் இடம்பெறவில்லை என கூறப்படுகின்றது.
ஆம், 2020 ஆம் ஆண்டு மார்ச் மாதம் 05 ஆம் திகதி, புலஸ்தினி மகேந்ரன் எனும் பெயரில் உள்ள சாராவின் 1999656702702 எனும் அடையாள அட்டையில் ஒரு சிம் அட்டை கொள்வனவு செய்யப்பட்டுள்ளது. 0717173928 என்பது அந்த இலக்கம். சி.ஐ.டி.யின் உள்ளக தகவல்கள் பிரகாரம் இந்த இலக்கம் தொடர்பில் இதுவரை முறையான விசாரணைகள் இடம்பெற்றதாக தெரியவில்லை. காரணம் இந்த புலஸ்தினி மகேந்ரன் எனும் பெயரில் உள்ள சிம் அட்டை ஊடாக, கொள்வனவு செய்யப்பட்ட தினத்திலிருந்து சந்தேகிக்கத்தக்க அழைப்புக்கள் எடுக்கப்பட்டுள்ளன. அவவழைப்புக்கள் 6 செக்கன்கள் வரை மட்டுமே நீடித்தவை. ஆனால் அதன் விபரத்தை ஆராய்கின்ற போது அழைப்பெடுத்த இலக்கத்தின் விபரப்பட்டியலில் மட்டும் (சாராவின் பட்டியல் ) பதிவுகள் இருப்பதுடன் அழைப்புக்கு பதிலளித்த நபரின் பட்டியலில் அவ்வழைப்பு தொடர்பில் எந்த பதிவுகளும் இல்லை.
இதுவே மிகப் பெரிய சந்தேகங்களுக்கு காரணம். இவ்வாறான ஒரு அழைப்பை அழைப்புப் பட்டியலில் இருந்து நீக்க, அதற்குள் செல்வாக்கு செலுத்தும் தரப்பொன்றினால் அல்லது, அது சார் கருவிகளை பயன்படுத்தும் ஒருவரால் மட்டுமே செய்ய முடியும்.
அவ்வழைப்பின் கோபுரத் தகவல்களை ஆராயும் போது அக்காலப்பகுதியில் மருதமுனை, கல்முனை பகுதிகளில் அவ்விலக்கம் காண்பிக்கப்பட்டுள்ளது.
என்வே சாரா, 2019 ஏப்ரல் மாதம் வெலிவோரியன் கிராமத்திலிருந்து தப்பி, அதனை அண்டிய பகுதியில் தங்கியிருந்தாரா என்ற சந்தேகம் எழுகின்றது.
குறிப்பாக வெலிவோரியன் கிராமத்தில் சாரா உள்ளிட்டவர்கள் தங்கியிருந்த வீடானது இராணுவத்தினரால் சுற்றி வளைக்கப்பட்ட போது அவ்வீட்டின் பின் பகுதியால் அமையப் பெற்றுள்ள வீதி ஊடாக மோட்டார் சைக்கிளில் வந்த ஒருவர் சாராவை அழைத்து சென்றதாக சாட்சிகள் உள்ளன. சஹ்ரானின் மனைவியையும் மகளையும் காப்பாற்றிய, அங்கு நடவடிக்கைகளுக்கு பொறுப்பாக இருந்த இராணுவ பிரிகேடியர் சுதுசிங்கவும் கல்முனை மேல் நீதிமன்றில் சாட்சியம் அளிக்கும் போது, அவ்வீட்டிலிருந்த எவருக்கேனும் தப்பிச் செல்ல வேண்டுமாக இருந்திருப்பின் அதற்கான அவகாசம் இருந்தது என்பதை ஏற்றுக்கொண்டார்.
இவ்வாறான நிலையில், சாரா தப்பிச் சென்றமைக்கு மேலதிகமாக தற்போது அவரின் பெயரில் சம்பவம் நடந்து ஒரு வருடத்துக்கு பின்னர் ஒரு சிம் அட்டை கொள்வனவு செய்யப்பட்டுள்ளது என்ற தகவலும் அதிர்ச்சியை ஏற்படுத்தியுள்ளது.- Vidivelli