முஸ்லிம்களுக்கு இழைக்கப்பட்ட அநீதிக்கு சட்ட ரீதியாகவே தீர்வளித்துள்ளேன்
ஜனாஸா விவகாரம் தொடர்பில் சாய்ந்தமருதில் ஜனாதிபதி ரணில் விக்கிரமசிங்க தெரிவிப்பு
(எஸ்.என்.எம்.சுஹைல்)
ஜனாஸா எரிக்கப்பட்டு முஸ்லிம் மக்களுக்கு இழைக்கப்பட்ட அநீதிக்கு சட்டரீதியிலான தீர்வொன்றை வழங்கிவிட்டே நான் உங்களிடம் வாக்கு கேட்க வந்துள்ளேன் என ஜனாதிபதி ரணில் விக்ரமசிங்க தெரிவித்தார்.
அத்தோடு, கல்முனை பிராந்தியத்தில் வர்த்தகத்தையும் விவசாயத்தையும் அபிவிருத்தி செய்ய வேண்டியிருக்கிறது அதனை யாரால் செய்ய முடியும் என்பதை முஸ்லிம் காங்கிரஸ் சிந்தித்து பார்க்க வேண்டும் எனவும் ஜனாதிபதி ரணில் விக்கிரமசிங்க இதன்போது தெரிவித்தார்.
சாய்ந்தமருது பௌஸி மைதானத்தில் ஐக்கிய தேசியக் கட்சியின் கல்முனை தொகுதி ஐக்கிய தேசிய அமைப்பாளர் ஜெமீல் தலைமையில் நேற்று இடம்பெற்ற ‘ரணிலால் இயலும்’ வெற்றிப் பேரணியில் கலந்து கொண்டு உரையாற்றும் போதே ஜனாதிபதி ரணில் விக்ரமசிங்க இதனைக் குறிப்பிட்டார்.
எதிர்வரும் ஜனாதிபதித் தேர்தலில் ஜனாதிபதி ரணில் விக்ரமசிங்கவின் வெற்றியை உறுதிப்படுத்தும் வகையில் ஏற்பாடு செய்யப்பட்டிருந்த இந்த பேரணியில் பெருமளவான மக்கள் கலந்துகொண்டனர்.
இந்த மக்கள் பேரணியில் உரையாற்றிய ஜனாதிபதி ரணில் விக்ரமசிங்க, கடந்த இரண்டு வருடங்களில் இந்த நாட்டின் வீழ்ச்சியடைந்த பொருளாதாரத்தை மீட்டெடுத்து அனைவரும் வாழக்கூடிய நாட்டை உருவாக்கியுள்ளதாகவும் தெரிவித்தார்.
அடுத்த 05 வருடங்களில் இந்த வேலைத் திட்டத்தை வலுவாக அமுல்படுத்தி நாட்டின் பொருளாதார பிரச்சினைக்குத் தீர்வுகாண நடவடிக்கை எடுப்பேன் என தெரிவித்த ஜனாதிபதி, மக்கள் தமது பிள்ளைகளின் மற்றும் நாட்டின் எதிர்காலத்திற்கான வேலைத்திட்டத்திற்கு ஆதரவளிக்க வேண்டும் எனவும் தெரிவித்தார்.
இங்கு மேலும் கருத்து தெரிவித்த ஜனாதிபதி ரணில் விக்ரமசிங்க,
” நாட்டின் பொருளாதாரம் சரிவடைந்த வேளையிலேயே நாட்டை ஏற்றேன். 2022 அத்தியாவசிய பொருட்கள் ஒன்றும் எமக்கு கிடைக்கவில்லை. மின்சாரமும் இருக்கவில்லை. கஷ்டங்களுடன் வாழ்ந்தோம். பெண்கள் அதனை மறந்திருக்க வாய்ப்பில்லை. அன்று இப்போதிருக்கும் முன்னேற்றம் கிட்டும் என்று நினைக்கவில்லை.
அனுரவும் சஜித்தும் அன்று இருக்கவில்லை. ஆனால் நான் ஏற்றதால் நாட்டில் தட்டுப்பாடுகள் நீங்கி நல்ல நிலைமை காணப்படுகிறது. அதனால் மக்கள் சுமூகமாக வாழ முடிந்துள்ளது. அன்று பொருட்களின் விலை அதிகரித்தித்து காணப்பட்டது. ரூபாவின் பெறுமதி பெருமளவில் அதிகரித்திருந்தது.
இன்றும் மக்கள் வாழ்க்கை சுமைகளுக்கு முகம்கொடுக்கிறார்கள். இருப்பினும் எனது முயற்சிகள் ரூபாவின் பெறுமதியை அதிகரிக்கச் செய்தமையால் ஓரளவு சுமூகமான நிலைமை வந்திருக்கிறது. பொருட்களின் விலையும் குறைந்திருக்கிறது.
நாட்டின் பொருளாதாரத்தைக் கட்டியெழுப்பவே மக்கள் மீது சில சுமைகளை சுமத்த வேண்டியிருந்தது. சர்வதேச நாணய நிதியம் எமது கடன் சுமை அதிகரித்தால் நாட்டின் நெருக்கடி மேலும் உக்கிரமடையுமென அறிவுறுத்தியது. நான் மேற்கொண்ட முயற்சிகளின் பலனாக மொத்த தேசிய உற்பத்தியில் 5 சதவீத கடனை மட்டும் பெறுவதற்கு மாத்திரம் அனுமதி கிடைத்தது. இந்த கட்டுப்பாடுகளுக்கு மத்தியிலேயே முன்னேற்றங்களை ஏற்படுத்தினோம். அதற்காகவே மக்களுக்கு நிவாரணங்களை வழங்கினோம்.
அடுத்த ஐந்து வருடங்களில் சுமையை மேலும் குறைக்க எதிர்பார்க்கிறோம். பொருட்களை கொள்வனவு செய்யவும் வாய்ப்பளிப்போம். இந்தப் பகுதியை அபிவிருத்தி செய்ய எதிர்பார்த்திருக்கிறோம். விவசாய நவீனமயப்படுத்தல் செயற்பாடுகளை இங்கும் முன்னெடுக்கலாம்.
முஸ்லிம் மக்களுக்கு பிரதான பிரச்சினைகளுக்கான தீர்வை நான் தந்துள்ளேன. கடந்த ஆட்சியின் போது முஸ்லிம்களின் ஜனாஸாக்கள் எரிக்கப்பட்டன. இனி ஒருபோதும் அவ்வாறு ஜனாஸாக்கள் எரிக்க முடியாத அளவுக்கு சட்டமொன்றை இயற்றி அதனை நிறைவேற்றிவிட்டே இன்று உங்களிடம் வாக்கு கேட்க வந்துள்ளேன். அத்தோடு, இந்த சட்டத்தின் மூலம் நீங்கள் விரும்பிய முறைப்படி நல்லடக்கம் செய்ய உரிமையை சட்ட ரீதியாக பெற்றுத் தந்துள்ளேன். இனி ஒருபோதும் எவராலும் இவ்வாறான அநீதிகளை செய்ய முடியாது. அத்தோடு, பாதிக்கப்பட்ட மக்களுக்கு நிவாரணங்கள் பெற்றுக் கொடுக்கவும் நடவடிக்கை எடுத்துள்ளேன் என்றும் அவர் தெரிவித்தார்.
அத்துடன், இன்னும் 20 வருடங்களில் சிறந்த நாட்டில் வாழ முடியும் என்ற நம்பிக்கையை இந்நாட்டு இளைஞர்களுக்கு வழங்க வேண்டும். நாட்டை உருவாக்க செப்டெம்பர் 21 ஆம் திகதி எரிவாயு சிலிண்டருக்கு வாக்களிக்க வேண்டும் என வலியுறுத்திய ஜனாதிபதி, சஜித்துக்கும் அநுரவுக்கும் நாட்டைக் கட்டியெழுப்ப எந்த திட்டமும் இல்லை எனவும் அவர்களிடம் நாட்டை ஒப்படைத்தால் நாட்டின் பொருளாதாரம் மீண்டும் வீழ்ச்சியடையும் . நாட்டின் பொருளாதாரம் மீண்டும் சீர்குலைந்தால் நாட்டின் எதிர்காலம் தொடர்பில் எவராலும் நம்பிக்கை வைக்க முடியாது என ஜனாதிபதி வலியுறுத்தினார்.- Vidivelli