கடந்த 31.08.2024 சனிக்கிழமை வை.எம்.எம்.ஏ. மாநாட்டு மண்டபத்தில் நடைபெற்ற சிரேஷ்ட சட்டத்தரணி எம்.எம். அபுல்கலாம் எழுதிய ‘நாட்டு நலனில் முஸ்லிம்களின் பங்களிப்புகள் (வரலாற்றாய்வு) எனும் நூல் வெளியீட்டு விழாவில் தென்கிழக்குப் பல்கலைக்கழக இஸ்லாமிய கற்கை அரபு பொழிப் பீட முன்னாள் பீடாதிபதி போராசிரியர் கலாநிதி
எம்.எஸ்.எம்.ஜலால்தீன் ஆற்றிய உரையின் தொகுப்பு
இலங்கையில் இஸ்லாம்
உலகில் இஸ்லாம் தோன்றியது முதல் அந்த புனித வாழ்வு நெறி இலங்கையுடனும் தொடர்புகொண்டுள்ளதை பல்வேறு வரலாற்று ஆய்வுகள் நிரூபிக்கின்றன. தெற்காசியாவின் முஸ்லிம் சமூகங்களில் மிக நீண்ட வரலாற்றைக் கொண்டவர்கள் இலங்கை முஸ்லிம்களாவர்.
இஸ்லாத்தின் தூது உலக நாடுகளுக்கு கொண்டு செல்லப்பட்ட சமகாலத்தில் அத்தூது இந்தியா, இலங்கை போன்ற நாடுகளுக்கும் எடுத்துச் செல்லப்பட்டதாக வரலாற்று சான்றுகள் உறுதிப்படுத்துகின்றன. இலங்கையில் இஸ்லாம் அறிமுகமான காலப்பிரிவு பற்றி பல்வேறு கருத்துகள் காணப்படுகின்றன.
நபி (ஸல்) அவர்களது காலப்பிரிவில் இலங்கைக்கு இஸ்லாம் அறிமுகமானது.
கலீபா உமர் (ரழி) அவர்களது காலப்பிரிவில் அறிமுகமானது.
உமையாக்கள் காலப்பிரிவில் இடம்பெற்ற ஹாஷிமியர் புலம்பெயர்வுகள் மூலம் அறிமுகமானது
நபி (ஸல்) அவர்களின் தூதுவராக சீனாவுக்குச் சென்ற வஹப் இப்னு அபீ ஹப்ஸா (ரழி) அவர்கள் இலங்கைக்கு வந்ததாகவும், இலங்கை அரசனுக்கு இஸ்லாத்தின் அழைப்பை விடுத்ததாகவும் ஹுஸைன் இப்னு முஹம்மத் என்பவர் கோர்வை செய்த ‘அல்கியா பாக்கரி’ எனும் நூலின் முதலாம் பாகத்திலிருந்து பெற்றுக்கொண்டதாக ஆதாரம் காட்டி முஸ்லிம் நேசன் பத்திரிகையில் அறிஞர் சித்திலெப்பை எழுதியுள்ளார். அதேபோல் கி.பி. 7ஆம் நூற்றாண்டுகளில் அநுராதபுர ஆட்சியாளர்களின் முக்கிய துறைமுகமாக விளங்கிய இலங்கையில் வடக்கே அமையப்பெற்ற மாந்தைத் துறைமுகத்தில் கண்டு பிடிக்கப்பட்ட புதைபொருள் ஆய்வுகளும், அரபு கல்வெட்டுக்களும் அரபு குடியிருப்புகள் காணப்பட்டமைக்கான சான்றுகளாக அமைவதாக கலாநிதி சுக்ரி குறிப்பிடுகின்றார்.
வரலாற்றுச் சான்றுகளினூடாக நிரூபிக்கப்பட்ட இலங்கை முஸ்லிம்களின் தொன்மை வரலாறு முஸ்லிம்கள் இந்நாட்டோடு இரண்டறக் கலந்து இந்நாட்டின் இரண்டாவது சிறுபான்மை இனமாக கடந்த ஆயிரம் வருடங்களாக வாழ்ந்து வருகின்றனர் என்பதை உறுதிப்படுத்துகிறது.
இலங்கையில் கடைசியாக எடுக்கப்பட்ட (2012 இல்) குடிசன மதிப்பீட்டு அறிக்கையின் படி 9.7 வீதமாக சுமார் 21 இலட்சம் மக்கள் தொகை கொண்டவர்களாகக் காணப்படுகின்றனர். எவ்வாறெனினும் இத்தொகை இப்போது இதைவிட அதிகமாக உள்ளதையும் மறுப்பதற்கில்லை.
முஸ்லிம்கள் பற்றிய வரலாறு ஆய்வுகள்
இலங்கை முஸ்லிம்களின் தோற்றம், பரவல் பற்றிய பல்வேறு ஆய்வுகள் மேற்கொள்ளப்பட்டுள்ள போதிலும் இவை அனைத்தும் 18, 19 நூற்றாண்டுகளுக்கு பின்னரே மேற்கொள்ளப்பட்டுள்ளதை எம்மால் உணர முடிகிறது. இவ்வரலாற்று ஆய்வில் முஸ்லிம்கள் மட்டுமன்றி, பிற மத, இன, மொழி பேசும் அறிஞர்களும், வெளிநாட்டு ஆய்வாளர்களும் கூட ஈடுபட்டுள்ளதை நாம் அறியலாம். எவ்வாறெனினும் இலங்கை முஸ்லிம்களின் தொன்மை வரலாறு பற்றிய வரலாற்றுச் சான்றுகள் முஸ்லிம் அறிஞர்களால் செய்யப்படவில்லை என்பதை இலங்கையின் பிரபல வரலாற்றாய்வாளர் T.B.H. அபேயசிங்க பின்வருமாறு குறிப்பிடுகின்றார்கள்.
‘While the Sinhalese have their “MAHAVAMSA the CULAVAMSA and the RAJAVALIYA and the TAMILS their YALPANA VAIPAVAMALAI, the MUSLIMS No choronicsl of their own. They are a people without a historical tradition. Following from this is the second problem that much of the information on the Muslim during this period has to be gleaned from the writings by the Portuguese their deadly enemies’ (Muslim of Sri Lanka – P.129).
சிங்கள மக்களுக்கு அவர்களது சொந்த வரலாற்று நூல்களான மகாவம்சம், குலவம்ச, ரஜவலிய போன்ற தொன்மை மிகு வரலாற்று நூல்களும், தமிழ் மக்களுக்கு அவர்களால் எழுதப்பட்ட ‘யாழ்ப்பாண வைபவ மா லை போன்ற நூல்களும் காணப்படும் அதேவேளை, இலங்கை முஸ்லிம்களின் தொன்மை வரலாறு கூறும் அவர்களால் எழுதப்பட்ட வரலாற்று நூல்கள் எதுவும் காணப்பட வில்லை. பொதுவாக இவர்கள் வரலாற்றுப் பாரம்பரியத்தை (பாதுகாக்காத) மக்களாகவே காணப்படுகின்றனர். இங்கு மற்றொரு பிரச்சினையும் காணப்படுகின்றது. இலங்கை முஸ்லிம்கள் பற்றிய அதிகளவிலான தகவல்கள் இலங்கை முஸ்லிம்களின் எதிரிகளாக வரலாற்றில் பதியப்பட்டுள்ள போர்த்துக்கேயரின் வரலாற்றுத் தகவல்களிலிருந்தே பெறப்பட்டுள்ளமை துரதிஷ்டவசமாகும் என்று அபேயசிங்க அவர்கள் இங்கு குறிப்பிடுவது மிக முக்கிய விடயமாகும்.
தமது சமூகம் சார்ந்த வரலாற்றுச் சான்றுகளை ஆய்வு செய்து உறுதிப்படுத்துவதில் இலங்கையின் பெரும்பான்மை சமூகங்களான சிங்கள, தமிழ் மக்கள் தொன்று தொட்டு மிகவும் ஆர்வம் காட்டி வருவதுடன், பல்வேறு படைப்புகளையும் ஆய்வுலகுக்கு தந்துள்ளார்கள். இதன் மற்றொரு வெளிப்பாடாக தமது சமூகம் சார்ந்த ஆய்வுகளிலும் அவற்றை வெளிப்படுத்துவதிலும் இவ்விரு சமூக ஆய்வாளர்கள் மத்தியில் தொடர்ச்சியாக ஒரு பனிப்போர் நடந்து வருவதையும் நாம் இங்கு குறிப்பிட வேண்டும்.
இதற்கு ஆதாரமாக யாழ்ப்பாணத்தில் தொன்று தொட்டு அழைக்கப்பட்டு வந்த பல தமிழ் பெயரிலான ஊர்கள் இன்று சிங்கள ஆய்வாளர்களால் சிங்கள மொழியாக்கம் செய்யப்பட்டு, தமக்கே உரிய ஊர்களாகவும் திரிவு பெற்றுள்ளதை எம்மால் அறிய முடிகின்றது. உதாரணமாக யாழ்ப்பாணத்தில் உள்ள வலிகாமம், வெலிகம என்ற சிங்கள ஊராக இருந்ததாக சொந்தம் கொண்டாடப்படுகின்றது.
இதேபோல பல ஊர்களை இவ்விரு சமூகங்களும் தமக்குரியதென சொந்தம் கொண்டாடி வருகின்றனர். இச்செயற்பாடு இவ்விரு சமூகம் சார்ந்த சாதாரண பொது மக்கள் மத்தியில் மட்டுமன்றி, அறிஞர்கள், ஆய்வாளர்கள் மத்தியிலும் வேரூன்றியுள்ளதை பரவலாக அறியலாம்
வரலாற்றுத் துறையில் தமிழ் மொழியிலான ஜாம்பவனாக கருதப்படும் பேராசிரியர் பத்மநாதன் அவர்கள் பெளத்த மக்களின் தொன்மைமிகு வரலாற்று நூலான மகாவம்சத்தையே கேள்விக்குட்படுத்தி அதன் நெளிவு சுழிவுகளை தகுந்த ஆதாரத்துடன் முன்வைத்த பிரபல கட்டுரை ஒன்று அண்மையில் வெளிவந்தது. இவ்வாய்வுக்கட்டுரை மகாவம்சத்தின் தோற்றம், அதன் நம்பகத்தன்மை பற்றிய பல்வேறு கேள்விகளை ஆய்வுலகத்தில் எழுப்பியுள்ளது. அவற்றுக்கான விடைகளை காண்பதிலும் சிங்கள ஆய்வாளர்கள் ஈடுபட்டுள்ளார்கள்.
இவ்வாறான வரலாற்று தேடல்களில் ஏற்பட்ட பிரக்ஞைகளினூடாக, இன்று இலங்கை முஸ்லிம்கள் தமது தாய்நாட்டுக்கு ஆய்றிய பங்களிப்புகளை நிறுவும் பணியில் அண்மைக்காலமாக பல ஆய்வாளர்கள் ஈடுபட்டுள்ளதை நாம் தேடலின் மூலம் அறிய முடிகின்றது. இலங்கை முஸ்லிம்களின் தோற்றம், பரவல், வரலாறு பற்றி மட்டுமல்ல அவர்களின் தேசிய பங்களிப்புகள் பற்றிய குறிப்புகளும், பாட விதானங்களும் இலங்கை பரீட்சைத் திணைக்களத்தின் க.பொ.த.உயர்தர இஸ்லாம் பாடத்திட்டத்திலும் இடம் பெற்றுள்ளது மட்டுமன்றி அதற்கான விளக்கக் குறிப்புகளும் மிக விரிவாக எழுதப்பட்டுள்ளன.
இலங்கை முஸ்லிம்களின் வரலாற்றுத் துறையில் தடம்பதித்த நூல்களில் சிலவற்றை நாம் அடையாளம் காணலாம்.
Muslims of Sri Lanka (1986) Edited by Dr. M.A.M.Shukri
Vamadewan V.(1999) ‘The Story of Sri Lankan Muslims
Devaraja Lorna (1994) ‘The Muslims of Sri Lanka- One thousand years & ethinic harmony (1900-–1915)
முஹம்மது ஸமீம் (1999) ‘ஒரு சிறுபான்மை சமூகத்தின் பிரச்சினைகள்.
Ragavan M.D. (1975) ‘Muslims Under the Portuguese Rule’
அமீன் எம்.ஐ.எம். (2000) ‘இலங்கை முஸ்லிம்களின் வரலாறும் கலாசாரமும்’
Asad Kamil (1993) ‘ The Muslims of Sri Lanka Under the British Rule’
இவை தவிர பல நூற்றுக்கணக்கான ஆய்வுக் கட்டுரைகளும் தமிழ் மொழியிலும், மிக அதிகமாக ஆங்கில மொழியிலும் இலங்கை முஸ்லிம்களின் வரலாற்றைத் தருபவனாக வெளிவந்துள்ளன.
இத்தொடரிலேயே சட்டத்தரணி அபுல் கலாம் எழுதி இன்று வெளியிடுகின்ற ‘நாட்டு நலனில் முஸ்லிம்களின் பங்களிப்புகள்’ என்ற இந்த நூலும் இலங்கை முஸ்லிம்களின் வரலாற்றை சான்றுப்படுத்தும் நூலாக அமையும் என நம்புகிறேன். ஆசிரியருக்கு எனது மனமார்ந்த பாராட்டுகளும் வாழ்த்துக்களும்.- Vidivelli