- அகில இலங்கை ஜம்இய்யதுல் உலமா முன்னிலையில் ஜனாதிபதி உறுதியளிப்பு
- இலங்கையில் இஸ்ரேலியர்களின் ஊடுருவல் குறித்தும் உலமா சபை சுட்டிக்காட்டு
கொவிட் தொற்றின் போது சடலங்களை தகனம் மட்டுமே செய்ய முடியும் என்ற கொள்கையை அரசாங்கம் அறிவிப்பதற்கு காரணமாக அமைந்தவர்கள் யார் என்பதைக் கண்டறிந்து நடவடிக்கை எடுக்கும் பொருட்டு பாராளுமன்ற தெரிவுக்குழு ஒன்றை அமைக்க தான் நடவடிக்கை எடுப்பேன் என ஜனாதிபதி ரணில் விக்ரமசிங்க உறுதியளித்துள்ளார்.
இலங்கை ஜம்மியத்துல் உலமா நிறைவேற்றுக் குழுவுடன் நேற்று முன்தினம் மாலை நடைபெற்ற சந்திப்பில் உலமா சபை பிரதிநிதிகளால் முன்வைக்கப்பட்ட கோரிக்கைக்கு பதிலளிக்கும் போதே ஜனாதிபதி இதனைக் குறிப்பிட்டார்.
இந்த சந்திப்பின்போது கருத்து வெளியிட்ட உலமா சபையின் செயலாளர் அஷ்ஷெய்க் அர்கம் நூராமித் ‘‘கொவிட் தொற்றினால் மரணித்தவர்களை கட்டாய தகனம் செய்ய வேண்டும் என கடந்த அரசாங்கம் எடுத்த தீர்மானத்தை நாம் பலமாக எதிர்த்தோம். இத்தீர்மானம் நிரூபிக்கப்பட்ட ஆதாரங்களின்படி எடுக்கப்பட்டிருந்தால் அதனைக் காண்பிக்குமாறும் அதில் உண்மை இருந்தால் சடலங்களை எரிக்கலாம் என்ற பத்வாவை உலமா சபையே முன்னின்று வழங்கும் என்றும் நாம் அவர்களிடம் கூறினோம். எனினும் எந்தவித ஆதாரமும் முன்வைக்கப்படாத நிலையில் உலக நாடுகள் அனைத்தும் சடலங்களை அடக்க அனுமதித்த நிலையில் இலங்கையில் மாத்திரம் கட்டாய தகனக் கொள்கை அமுல்படுத்தப்பட்டதானது முஸ்லிம்களுக்கு இழைக்கப்பட்ட பாரிய அநீதியாகும். எனவேதான் மன்னிப்புக் கோருதல் இழப்பீடு வழங்குதல் என்பதற்கு அப்பால் இந்த ஆதாரமற்ற தீர்மானத்தை எடுப்பதற்கு காரணமாக இருந்தவர்களையும் அரசாங்கத்தை தவறாக வழிநடாத்தியவர்களையும் கண்டறிந்து நடவடிக்கை எடுக்க வேண்டும் என்பதே ஒட்டுமொத்த முஸ்லிம் சமூகத்தினதும் கோரிக்கையாகும்’’ என்றார்.
இதன்போது கருத்து வெளியிட்ட முன்னாள் அமைச்சர் பைசர் முஸ்தபா சடலங்களை எரிக்கும் தீர்மானம் முஸ்லிம்களைப் பழிவாங்கும் நோக்கில் அரசியல் ரீதியாக உந்தப்பட்டு எடுக்கப்பட்ட தீர்மானம் என ஜனாதிபதியிடம் சுட்டிக்காட்டினார்.
இதற்குப் பதிலளித்த ஜனாதிபதி ரணில் விக்ரமசிங்க கடந்த கொரோனா வைரஸ் பரவலின் போது மரணித்த முஸ்லிம்கள் மற்றும் ஏனைய மதத்தினரின் உடல்களை தகனம் செய்வதற்கு அரசாங்கத்திற்கு பரிந்துரைத்த தரப்பினரின் பொறுப்புக்கூறல் தொடர்பில் ஆராய்வதற்காக ஏனைய கட்சித் தலைவர்களுடன் கலந்தாலோசித்து பாராளுமன்ற தெரிவுக்குழுவொன்றை நியமிப்பதாக தெரிவித்தார்.
எமது அரசாங்கத்தினால் நஷ்டயீடு வழங்குவதற்கான நடவடிக்கைகளை முன்னெடுக்க முடியும். எனினும் புதிய பாராளுமன்றத்தில் சகல கட்சித் தலைவர்களினதும் இணக்கத்துடன் பாராளுமன்றத் தெரிவுக் குழு ஒன்றை அமைத்து இந்த விடயம் தொடர்பில் பொறுப்புக்கூற வேண்டியவர்களைக் கண்டறிந்து நடவடிக் எடுக்க முடியும் என ஜனாதிபதி மேலும் சுட்டிக்காட்டினார்.
இதன் போது எதிர்வரும் ஜனாதிபதித் தேர்தலில் ஜனாதிபதி ரணில் விக்ரமசிங்கவின் வெற்றிக்கு மௌலவிமார் தமது ஆசிகளை தெரிவித்தனர். நாட்டின் பொருளாதார மீட்சி மற்றும் எதிர்காலத் திட்டங்கள் குறித்து மௌலவிமார்களுக்கு எடுத்துரைத்த ஜனாதிபதி ரணில் விக்ரமசிங்க, அந்த வேலைத்திட்டத்தை முன்னெடுத்துச் செல்வதற்கான ஆணையை கோருவதற்காகவே இந்த ஜனாதிபதித் தேர்தலில் போட்டியிடுவதாகவும் தெரிவித்தார்.
தேர்தல் நடவடிக்கைகளை ஆரம்பித்ததன் பின்னர் மகாநாயக்க தேரர்கள் மற்றும் ஏனைய மதத் தலைவர்களைச் சந்தித்து ஆலோசனைகளையும் வழிகாட்டல்களையும் பெற்றுக்கொண்டதாகத் தெரிவித்த ஜனாதிபதி, அனைத்து மதங்களையும் சமமாக நடத்துவதற்கு தான் அர்ப்பணிப்புடன் இருப்பதாகவும் தெரிவித்தார்.
மேலும் பலஸ்தீன மோதல்கள் தொடர்பில் கருத்து தெரிவித்த ஜனாதிபதி ரணில் விக்ரமசிங்க, பலஸ்தீன நாடு தொடர்பான இலங்கை அரசாங்கத்தின் நிலைப்பாட்டில் எந்தவித மாற்றமும் இல்லை எனவும், அதற்காக தான் தொடர்ந்தும் குரல்கொடுப்பதாகவும் தெரிவித்தார். இலங்கை அரசாங்கம், ஜெருசலத்தில் புதிய கொன்சூலர் அலுவலகம் ஒன்றை திறந்திருப்பதாக பரவும் தகவல் உண்மைக்கு புறம்பானது என்றும், இஸ்ரேலுக்குள் பணியாற்றும் இலங்கையருக்கு சேவை வழங்குவதற்காக 2000 ஆம் ஆண்டு முதல் இஸ்ரேலுக்குள் தூதரக சேவைகள் முன்னெடுக்கப்பட்டு வருவதாகவும் இதன்போது ஜனாதிபதி ரணில் விக்ரமசிங்க தெரிவித்தார்.
இச் சந்திப்பின்போது இலங்கையின் பல்வேறு பகுதிகளிலும் இஸ்ரேலியர்கள் தங்கியிருப்பதுடன் நீண்ட கால குத்தகை அடிப்படையில் கட்டிடங்களைப் பெற்று தமது கொள்கைகளை பிரசாரம் செய்வது குறித்தும் உலமா சபை பிரதிநிதிகள் ஜனாதிபதியின் கவனத்திற்குக் கொண்டு வந்தனர். இதற்கு பதிலளி்த்த ஜனாதிபதி இஸ்ரேலியர்கள் ரஷ்யர்கள் மற்றும் உக்ரேனியர்கள் இலங்கைக்கு சுற்றுலா விசாவில் வருகை தருகின்றனர். இதனை நாம் தடுக்க முடியாது. எனினும் இதற்கு அப்பால அவர்கள் வேறு ஏதேனும் நடவடிக்கைகளி்ல் அவர்கள் ஈடுபடுகின்றனரா என்பது குறித்து தேடிப் பார்க்க முடியும் என்றார்.
கொழும்பு மாளிகாவத்தையில் அமைந்துள்ள அகில இலங்கை ஜம்மியதுல் உலமா தலைமையகத்திற்குச் சென்ற ஜனாதிபதி, அதன் தலைவர் அஷ்-ஷெய்க் எம். ஐ. எம். றிஸ்வி மற்றும் நிறைவேற்றுக் குழு உறுப்பினர்களைச் சந்தித்து கலந்துரையாடினார். உலமா சபையின் பொதுச் செயலாளர் அஷ்-ஷேக் அர்கம் நூராமித், பொருளாளர் அஷ்-ஷேக் ஏ. ஏ. அஹமட் அஸ்வர், உப தலைவர் அஷ்-ஷெய்க் எச். ஒமர்தீன், அஷ்-ஷெய்க் எம். ஜே. அப்துல் காலிக், உப தலைவர் அஷ்-ஷேக் ஐ. எல். எம். ஹாஷிம், உப தலைவர் அஷ்-ஷேக் ஏ. எல். எம். பழீல் உள்ளிட்ட நிறைவேற்றுக் குழு உறுப்பினர்கள் இந்த சந்திப்பில் கலந்து கொண்டனர்.
முன்னாள் அமைச்சர்களான ஏ.எச்.எம். பௌசி எம்.பி, பைசர் முஸ்தபா, முன்னாள் ஆளுநர் அசாத் சாலி உள்ளிட்ட பலர் இந்த சந்திப்பில் கலந்துகொண்டனர்.- Vidivelli